Asegun na un survey, 80 por ciento del maga jovenes na America el ta reza pero media lang de ese el quien ta reza todo el dia. Asigurao, el cuanto kanila ya puede pensa: ‘El rezo ba un manera lang para sinti alivio o mas pa con ese?’

•  Cosa el rezo?

•  Ta oi ba el Dios?

•  Acerca na cosa yo puede reza?

•  Si cosa ta habla el otro jovenes

 El rezo amo un real comunicacion con el Creador del todo cosas. Pensa si cosa se quierre decir! Maskin pa poderoso si Jehova que con el maga gente, “gendeh Ele ta queda lejos canaton.” (Maga Actividad 17:27, El Nuevo Testamento na Chavacano) Gane, el Biblia ta invita: “Atraca con Dios y Ele ay atraca con ustedes.”—Santiago 4:8.

 Paquemodo tu puede atraca con Dios?

•   El un manera amo por medio el rezo—etu el tan cuento con Dios.

•   El otro manera amo por medio na estudiada del Biblia—el Dios el “tan cuento” contigo.

 Ese comunicacion—el rezo y el estudiada del Biblia—hay puede ayuda contigo para cultiva un fuerte relacion con Dios.

 “El comunicacion con Jehova—el Todo Alto Dios—amo el uno na de con todo grande privilegio que puede tene el maga gente.”—Jeremy.

 “Si ta habla yo el de mio maga sentido con Jehova por medio na rezo, ta sinti yo mas cerca con ele.”—Miranda.

 Maskin pa ta creé tu na Dios—y maskin pa ta reza tu con ele—posible dificil acepta el idea que deverasan le ta oi contigo. Maskin pa ansina, el Biblia ya llama con Jehova como “el quien ta oi con el rezo.” (Salmo 65:2) Gane, ta invita este contigo que “deja todo el [de tuyu] maga lingasa con Ele.” Porque? “Cay Ele ta cuida [contigo].”—1 Pedro 5:7.

 Pensa este: Ta dale ba tu tiempo para regular man cuento con el de tuyu maga cerca amigo? Puede tambien tu hace ansina con Dios. Regular con ele reza y usa con el de suyu nombre, Jehova. (Salmo 86:5-7; 88:9) El Biblia ta invita contigo que “reza firmi.”—1 Tesalonica 5:17.

 “El rezo amo el manera si paquemodo yo tan cuento con el de mio Tata na cielo, con quien yo ta habla el laman del de mio corazon.”—Moises.

 “Tan cuento yo con Jehova acerca na maga serioso cosas igual si paquemodo tan cuento yo con el de mio nana o na un bien cerca amiga.”—Karen.

 El Biblia ta habla: “Si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias.”—Filipo 4:6.

 Quierre decir ba de ese que puede tu reza acerca na de tuyu maga problema? Si! Gane, el Biblia ta habla: “Buta el de tuyu pesades con Jehova y ele hay ayuda contigo.”—Salmo 55:22.

 Siempre, puede tu habla na rezo con Dios gendeh lang acerca na de tuyu maga problema. “Gendeh deverasan el diamon amistad si ayuda lang yo pirmi ta pidi con Jehova,” ya habla el un joven mujer, si Chantelle. “Ta sinti yo que debe yo una rindi gracias con Jehova y debe manada yo cosas rindi gracias con ele.”

 Pensa este: Cosa maga cosas el ta rindi tu gracias na de tuyu vida? Puede ba tu pensa tres cosas para rindi gracias con Jehova ahora?

 “Maskin el maga simple cosas, igual con el un bonito flores, puede manda move kanaton para rindi gracias con Jehova na rezo.”—Anita.

 “Medita un cosa na creacion que ta aprecia gayot tu o un versiculo na Biblia que ya alcanza gayot na de tuyu corazon y despues, rindi gracias con Jehova por causa de ese.”—Brian.