Na este articulo

•  Cosa el dating?

•  Preparao ya ba tu para man date?

 El cuanto gente ta mira con el dating como un cosa que ta hace para man alegria lang. Pero na este articulo, el palabra “dating” ta refiri con el tiempo donde tan junto el man novio y novia para mira si justo ba sila para con uno y otro como man maridable. Entonces, tiene proposito el dating. Gendeh este para lang queda alegre el un persona cay tiene con ele quien ta dale atencion.

 Llega el tiempo, el dos persona quien tan date hay hace decision—casa ba sila o termina con el diila relacion. Si principia tu man date, debe preparao tu na maskin cosa resulta de ese.

 Acorda: Si ta creé tu que preparao ya tu para man date, debe preparao ya tambien tu para casa.

 Ciendo el dating puede guia na matrimonio, debe tu pensa si cosa maga calidad tu tiene que puede ayuda con el de ustedes relacion. Por ejemplo, considera con el siguiente:

•   Relacion na familia. Mas mucho, el de tuyu tratamiento na de tuyu mayores, hermano y hermana—especialmente si tan stress tu—ta dale mira si paquemodo tu trata con el de tuyu marido o mujer.

   Principio na Biblia: “No tene agravio con uno y otro, ni perde el paciencia, ni alza el voz, ni insulta de palabra. Desaleja con todo clase de intencion malo entre con ustedes.”—Efeso 4:31, El Nuevo Testamento na Chavacano.

   Pregunta na de tuyu mismo cuerpo: ‘Puede ba habla el de mio mayores, hermano y hermana que tiene yo respeto kanila? Si gendeh yo uyun na cosa sila ya habla, ta puede ba yo se discuti na calmao manera o ta rabia dayun yo y quierre man purpiajan?’

•   Preparao hace maga sacrificio. Si casao tu, mas mucho necesita tu considera y sigui con el cosa quierre el de tuyu marido o mujer.

   Principio na Biblia: “No ustedes busca el de ustedes interes lang, sino el interes del los demas.”—1 Corinto 10:24.

   Pregunta na de tuyu mismo cuerpo: ‘Quierre ba yo que pirmi sigui con el de mio gusto? Ta mira ba conmigo el otro como un razonable persona? Na cosa manera yo ya puede dale mira que ta hace yo una el necesidad del otro contra de mio?’

•   Humildad. El un buen marido o mujer ta admiti con el de suyu maga kamali y sincero ta pidi despensa.

   Principio na Biblia: “Todo kita ta comete culpa muchas veces.”—Santiago 3:2.

   Pregunta na de tuyu mismo cuerpo: ‘Ta admiti ba yo dayun con el de mio maga kamali o ta dale pa yo razon? Sobra ba yo de sensitivo si tiene quien ta dale conmigo consejo?’

•   Gastada. El un persona quien sabe agarra sen hay puede evita con el uno na maga de con todo comon causa de purpiajan na matrimonio.

   Principio na Biblia: “Cay si tiene de ustedes ta plania planta un torre, gendeh ba le ay sinta una y carcula el maga gastos, para sabe si tiene le bastante cen para completa el torre?”—Lucas 14:28.

   Pregunta na de tuyu mismo cuerpo: ‘Ta puede ba yo controla con el de mio gastada o pirmi yo tiene debe? Paquemodo yo ya puede dale mira que sabe yo agarra sen?’

•   Espiritualidad. Si uno tu del maga Testigo de Jehova, debe tiene tu un regular rutina de estudiada del Biblia y atendida na maga miting.

   Principio na Biblia: “Alegre aquellos quien ta pensa el diila espiritual necesidad.”—Mateo 5:3, NWT.

   Pregunta na de tuyu mismo cuerpo: ‘Ta hace ba yo esfuerzo para mentena con el de mio espiritualidad? Prioridad ba de mio el de mio espiritual rutina o ta deja lang yo con el otro cosas que sangga con ese?’

 Acorda: El persona con quien tu casa conviene lang tene un buen marido o mujer. Si ta hace tu esfuerzo para queda ese clase de persona, posible que hay gusta tambien contigo el un persona quien ta hace igual ansina.