PREGUNTA DEL MAGA JOVENES
Paquemodo Yo de Fuerte si Tiene Problema?
Paquemodo tu de fuerte si tiene problema? Ya experiencia ya ba tu que . . .
ya muri el persona que cerca contigo?
ya enferma por largo tiempo?
ya queda victima de natural calamidad?
El maga researcher ta habla que gendeh lang na maga grande problema el necesita queda fuerte. Maskin el diutay problema puede hace contigo stress y afecta con el de tuyu salud. Poreso, importante que queda tu fuerte, diutay man o grande el de tuyu problema.
Cosa quierre decir que queda fuerte?
Este quierre decir que tiene tu el abilidad para enfrenta maga cambio y problema na de tuyu vida. El maga gente quien tiene ansina abilidad ta experiencia tambien problema. Pero, ta puede sila enfrenta con el diila maga problema y maskin na maga negativo resulta de este, y ta queda mas fuerte contra de antes.
Igual si paquemodo el cuanto maga pono ta queda lang otravez derecho despues del un tifun, puede tambien tu levanta otravez estaba na de tuyu maga problema
Porque tu necesita queda fuerte?
Cay gendeh puede evita con el maga problema. El Biblia ta habla: “Gendeh pirmi ta ganá el fuerte corre na carrerajan, . . . y gendeh pirmi ta tene buen exito el tiene saber, cay afectao sila todo na tiempo y maga suceso que gendeh ta expecta.” (Eclesiastes 9:11) Cosa el leccion? Maskin el maga buen gente ta sufri—mas mucho, gendeh por causa cay ya puede sila hace kamali.
Cay puede este protege contigo si queda tu fuerte. Un high-school counselor ya habla: “Mas ya queda manada el maga estudiante quien ta anda na de mio oficina cay bien triste sila na diila bajo grado na exam o na negativo comento del otro na social media.” Baka habla sila que simple lang este maga problema. Pero si el estudiante no sabe enfrenta con este, posible resulta este maga problema na mental y emocional.” a
Cay puede este ayuda contigo ahora y si queda ya tu adulto. Acerca na maga cosas na vida que ya falla tu, si Dr. Richard Lerner ya escribi: “Ta tene buen exito y ta queda responsable el un adulto si sabe le enfrenta con el maga cosas le ya falla, ta hace nuevo goal o ta busca manera para puede otravez alcanza con ese.” b
Paquemodo tu queda fuerte?
Analiza si el de tuyu ba problema grande o diutay. El Biblia ta habla: “El estupido ta dale dayun mira el de suyu rabia, Pero el sabio ta ignora con el insulto.” (Proverbio 12:16) No gayot queda afectao na todo problema.
“Na escuela, sobra gayot el reaccion del de mio maga classmate maskin na diutay cosas. Despues, consinti el maga amigo diila na social media que justo sila, poreso ta queda sila mas rabiao. Por causa con ese, el diutay problema dol bien grande ya para kanila.”—Joanne.
Aprende con otro. El Biblia ya habla: “Igual como el hierro ta hace agudo con el hierro, el un gente ta hace agudo con el de suyu amigo.” (Proverbio 27:17) Puede kita aprende maga importante leccion estaba na maga gente quien ya experiencia grande problema de antes.
“Si man cuento tu con otro, hay sabe tu si paquemodo sila ya experiencia con el grande problema. Pero OK ya sila ahora. Pregunta kanila si cosa sila ya hace o si cosa sila nuay hace para enfrenta con el diila problema.”—Julia.
Queda paciencioso. El Biblia ta habla: “Cay el recto puede tumba siete beses y hay levanta le otravez.” (Proverbio 24:16) Ta necesita tiempo para levanta na maga dificultad na vida. Poreso, no espanta si triste tu tiene vez. El importante que puede tu ‘levanta otravez.’
“Si ta levanta tu otravez estaba na de tuyu problema necesita tiempo para ulvida con el maga cosas dificultad tu ya sinti. Ya sabe yo que mientras ta pasa el tiempo hinay-hinay yo ta puede levanta y mas ya queda enbuenamente el cosa yo ta sinti..”—Andrea.
Rindi gracias. El Biblia ta habla: “Dale ustedes gracias.” (Colosa 3:15, El Nuevo Testamento na Chavacano) Maskin paquemodo de grande el problema tu ta experiencia ahora, tiene siempre maga cosas que puede tu rindi gracias. Pensa tres cosas que ya hace contigo alegre.
“Si ta experiencia maga problema, baka pregunta tu, ‘Porque este ta sucede conmigo?’ Queda tu fuerte enfrenta con el de tuyu maga problema si gendeh tu man focus con ese. Hay queda tu positivo y rindi gracias con el cosas tu tiene o si cosa tu puede hace.”—Samantha.
Queda contento. Si apostol Pablo ya habla: “Ya aprende yo esta contento con masquin cosa yo tiene.” (Filipo 4:11, El Nuevo Testamento) Gendeh puede controla si Pablo con el maga mal cosas que ta sucede con ele. Pero puede le controla con el de suyu reaccion. Determinao si Pablo que queda contento.
“Ya puede yo aprende que el de mio primer reaccion na un problema, gendeh pirmi el de con todo bueno hace. Goal de mio que queda positivo na maskin cosa situacion. Gendeh lang yo beneficia con este, sino aquellos tambien alrededor conmigo.”—Matthew.
Reza. El Biblia ta habla: “Buta el de tuyu pesades con Jehova y ele hay ayuda contigo. Nunca le deja que tumba el recto.” (Salmo 55:22) El rezo gendeh lang basta ta hace liviano con el cosa tu ta sinti. Sino un deverasan comunicacion este na de tuyu Creador quien ta ama contigo.”—1 Pedro 5:7.
“Gendeh yo solo si ta enfrenta con el de mio maga problema. Si ta habla yo con Dios el todo de mio maga problema y ta rindi gracias con el maga bendicion que ta dale le conmigo, ta queda yo positivo cay tan focus yo na maga bendicion que ta dale si Jehova. Bien importante gayot el rezo!”—Carlos.
