•  Examina de tuyu mismo cuerpo

•  Porque yo necesita consejo?

•  Paquemodo yo puede acepta con el consejo?

•  Si cosa ta habla el otro jovenes

 Tiene vez, todo kita necesita consejo que puede ayuda para queda mas bueno el diaton trabajo o custumbre. Considera con el siguiente situacion.

1.  ● Ya habla de tuyu maestro que de apurao lang tu ya hace con el de tuyu project. Ya habla le contigo, “Necesita tu dale mas grande tiempo para man research.”

    Cosa tu hace con el de suyu consejo?

   1.   Gendeh acepta con ese. (‘No quierre lang conmigo el de mio maestro.’)

   2.   Acepta con ese. (‘Aplica yo con el de suyu consejo na de mio sunod project.’)

2.  ● Ya habla de tuyu nana que calayat el de tuyu cuarto maskin nuevo lang tu se ya limpia.

    Cosa tu hace con el de suyu consejo?

   1.   Gendeh acepta con ese. (‘Gendeh lang gayot le ta queda contento si iyo ta limpia.’)

   2.   Acepta con ese. (‘Deverasan, puede pa yo hace mas limpio con el de mio cuarto.’)

3.  ● Ya habla de tuyu menor hermana que no quierre le contigo cay manda que manda lang tu con ele.

    Cosa tu hace con el de suyu consejo?

   1.   Gendeh acepta con ese. (‘Ele gane pirmi ta manda conmigo.’)

   2.   Acepta con ese. (‘Siguro, puede pa yo trata mas bueno con ele.’)

 El cuanto maga jovenes pronto lang man sentimiento si ta dale kanila consejo. Ansina ba tambien tu? Si ansina tu, manada tu oportunidad que puede hace sayang. Porque? Cay si aprende tu acepta maga consejo, puede gayot se ayuda contigo ahora y na futuro.

•   Cay gendeh tu perfecto. El Biblia ta habla: “Todo kita tan kamali manada beses.” (Santiago 3:2, ftn., NWT) Por causa con ese, todo kita necesita consejo.

   “Ta pricura yo acorda que todo kita imperfecto y normal lang man kamali. Poreso si ta corecta conmigo, ta pricura yo aprende y evita hace otravez con el kamali.”—David.

•   Cay puede pa tu progresa. El Biblia ta habla: “Enseña tu con el un sabio persona y hay queda le mas sabio.” (Proverbio 9:9) Puede tu beneficia na consejo—si acepta tu con ese.

   “De antes, gendeh justo el de mio mirada na consejo. Ta sinti yo dol ta hace se conmigo bajo. Pero ahora ta acepta ya yo con ese y ta pidi pa gane yo con otro que dale conmigo consejo para sabe yo si paquemodo yo puede progresa.”—Selena.

 Siempre, OK lang si ya pidi tu con el consejo. Pero si nuay tu se pidi, baka otro el de tuyu reaccion. “Ya espanta yo y yan luya,” ya habla si Natalie, cuando ya acorda le que ya ricibi le un carta de antes que tiene consejo. “Ya hace gayot yo esfuerzo pero consejo lang yo ya ricibi.”

 Ya sucede ya ba se contigo? Si ansina, cosa tu puede hace?

•   Oi.

   El Biblia ta habla: “El gente tiene saber ta controla con el de suyu maga palabra y el gente tiene entendimiento hay esta calmao.” (Proverbio 17:27) No man sabat mientras ta dale contigo consejo. Y no basta contesta dayun y habla cosas que hay arripinti tu.

   “Si ta dale conmigo consejo, tiene yo tendencia que man razon. Pero debe yo acepta con el consejo y hace mas bueno na sunod.”—Sara.

•   Man focus na cosa ta habla y gendeh na quien ta habla.

   Posible, busca tu kamali con el quien ta dale contigo consejo. Pero mas bueno que sigui tu con el consejo na Biblia: “Man alisto ustedes para oi, pero no conversa dayun, no rabia dayun.” (Santiago 1:19, El Nuevo Testamento na Chavacano) Mas mucho, deverasan el cuanto maga consejo que ta ricibi kita. No evita con el cosa tu necesita oi por causa lang cay no quierre tu oi con ese.

   “De antes, si ta corecta conmigo el de mio mayores, ta rabia yo y ta habla, ‘Sabe ya yo se.’ Pero si ta oi yo enbuenamente kanila y ta aplica con el diila consejo, mas bueno el resulta.”—Edward.

•   Tiene balance mirada na de tuyu mismo cuerpo.

   Si ya dale contigo consejo, gendeh se quierre decir que gendeh mas tu puede hace bueno. Quierre decir lang de aquel que tan kamali tambien tu igual con otro. Maskin el persona quien ya corecta contigo, necesita tambien tiene vez ricibi consejo. Gane, el Biblia ta habla: “Nuay maskin un recto gente na tierra el pirmi ta hace bueno.”—Eclesiastes 7:20.

   “Ya dale conmigo consejo el de mio amiga que para conmigo gendeh yo necesita. Ya rindi yo gracias con ele cay honesto le pero ya sinti yo duele. Na uliji, ya realiza yo que tiene punto el de suyu consejo. Bueno ya lang, ya dale le conmigo consejo cay ya puede yo mira si cosa yo necesita corecta—que gendeh era yo puede nota si nuay le conmigo habla.”—Sophia.

•   Hace goal que progresa.

   El Biblia ta habla que “el sabio persona ta acepta coreccion.” (Proverbio 15:5) Si acepta tu con el consejo, hay puede tu ulvida que ya sinti tu duele y puede tu man focus que aplica con el consejo que ya dale contigo. Hace un plano y observa el de tuyu progreso adentro na cuanto maga mes.

   “Para puede acepta con el consejo, importante que queda kita honesto. Cay si honesto kita, puede kita admiti el diaton kamali, pidi perdon y hace manera para progresa.”—Emma.

 Acorda: El Biblia ta habla: “El maga gente ta aprende na uno y otro, igual si paquemodo el hierro ta hace agudo con el hierro.” (Proverbio 27:17, Good News Translation) El consejo puede hace agudo o ayuda contigo ahora y si queda ya tu adulto.