“Na diamon lugar, ralo lang tu puede conoce un persona, que nuay pa 25 año, que gendeh ta puma o tan vape.”—Julia.

Na este articulo

•  Si cosa tu debe sabe

•  Si cosa tu puede hace

•  Quetal el marijuana?

•  Si cosa ta habla el otro jovenes

 Si cosa tu debe sabe

•   El pumada puede resulta na muerte. El maga cigarillo tiene nicotine—un cosa que peligroso para na salud y bien maka-addict. Asegun na U.S. Centers for Disease Control and Prevention, “el tabaco amo uno na maga grande razon si porque manada gente na entero mundo el ta enferma y ta muri temprano—un cosa que puede era evita.”

   “Na de mio trabajo, tan ultrasound yo y ta puede yo mira na maga letrato del ultrasound si cosa el efecto del pumada na maga paciente. Maka-espanta si paquemodo de manada el buling na maga artery de aquellos quien ta puma de antes. Bien precioso conmigo de mio cuerpo poreso gendeh gayot yo pruba puma.”—Theresa.

   Sabe ba tu? El maga cigarillo ta contene maga 7,000 chemical y manada alli el peligroso para na diaton salud. Cada año, millones el ta muri por causa na maga enfermedad que ya causa el pumada.

•   El vaping ta causa para entra na diaton cuerpo el maga peligroso chemical. El maga experto ta creé que por causa na usada de maga vape pen o electronic cigarette, manada el ya tiene problema na diila pulmon y ya muri. Mas pa, igual na cigarillo, ta contene tambien nicotine el manada na maga producto que ta usa para man vape. Ciendo bien maka-addict este, el nicotine puede “causa con el maga jovenes para queda tambien addict na otro maga droga,” asegun na un referencia acerca na maga e-cigarette.

   “Tiene maga producto que ta usa para man vape que tiene flavor de cotton candy y cherry que quierre-quierre el maga bata y teenager. Por causa na sabor, ta pensa sila que gendeh este peligroso.”—Miranda.

   Sabe ba tu? El humu que ta sale na maga e-cigarette gendeh lang basta agua. Sino, ta contene este maga chemical que bien peligroso para na salud y ta guinda se na diaton pulmon.

 Si cosa tu puede hace

•   Sabe si cosa el deverasan. No dayun creé con el todo cosa tu ta oi—por ejemplo, baka habla sila que gendeh peligroso el vaping o que buen manera se para perde el stress. Man research y hace un buen decision base na maga justo informacion.

   Principio na Biblia: “El inocente ta creé con el todo cosa le ya oi, pero el sabio ta pensa antes hace paso.”—Proverbio 14:15.

   “Si ta pensa tu con el maga negativo efecto de pumada y vaping, ta puede tu realiza que gendeh se bonito igual na cosa ta dale mira el maga artista o otro maga jovenes.”—Evan.

   Pensa este: Mas alegre ba gayot el maga jovenes quien ta puma o tan vape? Mas preparao ba sila enfrenta con el maga problema na vida ahora y na futuro? O ta causa lang sila omento maga problema na futuro?

•    Busca maga buen manera para enfrenta con el stress. Puede menora el stress si hace tu maga actividad que bueno para contigo, igual como man ejercicio, le o man junto con el maga amigo quien ta anima contigo. Ciendo manada tu cosa bueno ta pensa, gendeh mas tu sinti que necesita tu puma.

   Principio na Biblia: “El lingasa na corazon del gente ta hace con ele luya, pero el buen palabra ta hace con ele alegre.”—Proverbio 12:25.

   “El maga gente ta pensa que si ta puma y tan vape sila, ta perde el diila stress. Pero, temporario lang el alivio que ta puede este dale y permanente el maga mal efecto de este. Tiene pa maga otro mas bueno manera para enfrenta con el stress.”—Angela.

   Pensa este: Cosa pa el otro maga manera que puede tu enfrenta con el stress? Si necesita tu ayuda, mira con el articulo “How Can I Deal With Anxiety?” na “Young People Ask.”

•    Queda preparao que resisti con el pressure del otro. Posible tu sinti pressure por causa na de tuyu maga uban na escuela o maskin gane na de tuyu entretenimiento. Na maga salida, TV show y social media, ta dale mira que dol astig aquellos quien ta puma y tan vape.

   Principio na Biblia: “El maga gente de edad [o mature] . . . acostumbrao ya pensa enbuenamente para puede distingui el cosas bueno y malo.”—Maga Hebreo 5:14, El Nuevo Testamento.

   “Cuando ta entra pa yo escuela, manada na de mio maga uban ta respeta conmigo cay gendeh yo ta puma o tan vape. Ya defende pa gane sila conmigo despues yo hace claro que gendeh yo puma o man vape. Poreso, maka-estraña man, un proteccion si manda kita sabe el diaton decision.”—Anna.

   Pensa este: Ta puede ba tu resisti con el pressure del otro? Ta puede ba tu pensa maga situacion donde ya puede tu resisti? Si necesita tu ayuda na este aspeto, mira con el “Peer-Pressure Planner” na capitulo 15 del Questions Young People Ask—Answers That Work, Volume 2.

•   Iscuji enbuenamente maga amigo. Gendeh tu man engaño que puma o man vape si el de tuyu maga amigo no quierre tambien con este maga practica.

   Principio na Biblia: “Man amigo con el maga sabio y hay queda tu sabio. Man amigo con el maga estupido y hay tene tu problema.”—Proverbio 13:20, Easy-to-Read Version.

   “Ta puede ayuda si tiene kita maga amigo quien tiene integridad y control na cuerpo. Si ta puede tu mira el maga buen resulta na diila vida, ta manda se move contigo que queda igual kanila.”—Calvin.

   Pensa este: El de tuyu maga amigo ba ta suporta con el de tuyu decision que tene un limpio manera de vida o ta hace sila lisud contigo?

 Quetal el marijuana?

 Manada gente el ta habla que gendeh peligroso el marijuana. Pero imbusterias se!

•   El maga jovenes quien ta usa marijuana posible queda addict con ese. El maga research ta dale mira que si el un persona ta usa marijuana, posible se tene permanente mal efecto na de suyu utuk y posible, queda bajo el de suyu IQ.

•   El U.S. Substance Abuse and Mental Health Services Administration ya habla que “asegun na un research, aquellos quien ta usa marijuana tiene mas grande posibilidad que tene problema na diila relacion con otro, na diila educacion, trabajo y queda gendeh satisfechao na diila vida.”

   “Ya pensa yo que usa marijuana cay quierre yo perde el de mio stress. Pero cuando ya pensa yo que posible yo queda addict con este, gasta bien grande sen y el efecto de este na de mio salud, ya realiza yo que queda lang mas grabe el de mio stress.”—Judah.