TIENE ba gente hay esta fiel con Dios si na peligro el de suyu vida y si gendeh le beneficia na de suyu obediencia? Ya contesta con ese pregunta na cosa ya sucede con el un gente que el nombre Job.

Cuando na Egipto pa el maga Israelita, si Job, el pariente de Abraham, ta queda na lugar que ta llama ahora Arabia. Na ese tiempo, el maga angel na cielo ya anda na presencia del Dios y uno diila amo si Satanas. Antes anda el maga angel na presencia del Dios, ya habla si Jehova que valoroso con ele si Job cay fiel este con ele. Gane, ya habla si Jehova que nuay otro gente el tiene integridad igual con Job. Pero, ya habla si Satanas que ta sirvi lang si Job con Dios cay ta bendici con ele el Dios y ta protege. Ya clama si Satanas que si quita el todo cosas con Job, hay maldeci este con Dios.

El Dios ya permiti con Satanas que hace pobre con Job, mata con el de suyu maga anak y dale con ele enfermedad. No sabe si Job que si Satanas el causa del todo de suyu maga problema poreso gendeh le ta entende si porque ya permiti el Dios que experiencia le con este maga probanza. Maskin pa ansina, nuay maldeci si Job con Dios.

Ya visita con Job el de suyu tres falso amigo. Ya habla sila con Job que ta castiga con ele el Dios por causa na maga secreto culpa que ya comete le. Ya clama pa gane sila que el Dios gendeh ta ama ni ta confia con el de suyu maga siervo. Nuay creé si Job con el cosa sila ya habla. Con confianza ya habla si Job que hay mentena le con el de suyu integridad hasta na muerte!

Pero, yan kamali si Job cay ya pricura le dale mira que justo le. El un joven hombre que si Elihu ya principia converza. Si Elihu ya corecta con Job ciendo mas malingasa este acerca na de suyu mismo cuerpo y dale prueba que justo le contra defende con el reputacion de Jehova. Ya corecta tambien si Elihu con el maga falso amigo de Job.

Despues, yan cuento si Jehova con Job para corecta con el cosa le ta pensa. Yan cuento si Jehova con Job acerca na creacion y ya ayuda con ele mira si paquemodo de diutay el maga gente compara con Dios. Con humildad ya acepta si Job con el coreccion estaba con Dios. Si Jehova, como “lastimoso y misericordioso,” ya hace bira el buen salud de Job, ya hace doble con el riqueza que tiene le de antes y ya dale con ele diez anak. (Santiago 5:11, El Nuevo Testamento na Chavacano) Cay ya mentena si Job con el de suyu integridad con Jehova maskin bajo na grabe probanza, ya dale prueba si Job que gendeh justo el cosa ya habla si Satanas que el gente gendeh esta fiel con Dios si bajo na probanza.

—Base na libro de Job.