CAPITULO 37

Debe Ba Yo Bautiza?

Marca si justo o mali:

Necesita el bautismo para na maga Cristiano.

□ Justo

□ Mali

El de con todo importante proposito del bautismo amo para gendeh tu comete culpa.

□ Justo

□ Mali

Posible tu salva si bautiza tu.

□ Justo

□ Mali

Si gendeh tu bautizao, gendeh tu responsable con Dios na cosa tu ta hace.

□ Justo

□ Mali

Si ya bautiza ya el de tuyu maga amigo, quierre decir se que preparao ya tambien tu para na bautismo.

□ Justo

□ Mali

SI TA vivi tu harmonia na maga principio del Dios, tiene buen amistad con Dios y tan cuento con otro acerca na cosa tu ta creé, normal lang que ta pensa tu acerca na bautismo. Pero paquemodo tu sabe si preparao ya tu para con ese? Para ayuda contesta con ese pregunta, considera kita con el maga cosa ya lista arriba.

● Necesita el bautismo para na maga Cristiano.

Justo. Ya manda si Jesus con el de suyu maga dicipulo que bautiza. (Mateo 28:19, 20) Gane, si Jesus mismo ya bautiza. Para sigui con el Cristo, necesita tu bautiza si tiene tu juicio para hace con ese decision y si quierre gayot tu hace con ese.

● El de con todo importante proposito del bautismo amo para gendeh tu comete culpa.

Mali. El bautismo amo un manera para dale mira na publico que ya dedica tu de tuyu vida con Jehova. El de tuyu dedicacion gendeh igual na un contrata que ta sangga contigo para hace el maga cosas que quierre tu hace. Sino, ya dedica tu con el de tuyu vida con Jehova cay quierre tu vivi asegun na de suyu maga principio.

● Posible tu salva si bautiza tu.

Justo. El Biblia ta habla que importante el bautismo para tene salvacion. (1 Pedro 3:21) Pero, gendeh este quierre decir que el bautismo igual na insurance que ta cumpra tu para protege contigo si llega el maga calamidad. Ta bautiza tu cay ta ama tu con Jehova y quierre tu sirvi con ele con todo corazon hasta para cuando.—Marcos 12:29, 30.

● Si gendeh tu bautizao, gendeh tu responsable con Dios na cosa tu ta hace.

Mali. El Santiago 4:17 ta habla: “El gente quien ta puede hace el bueno, pero gendeh le ta hace, ta comete pecado”—bautizao man o gendeh. Poreso, si sabe tu si cosa el justo y tiene tu juicio para decidi si cosa tu quierre hace na de tuyu vida, posible amo ya se el tiempo para man cuento con el de tuyu mayores o con otro mature Cristiano. Na ese manera, puede tu sabe si paquemodo progresa para na bautismo.

● Si ya bautiza ya el de tuyu maga amigo, quierre decir se que preparao ya tambien tu para na bautismo.

Mali. El decision que bautiza debe estaba mismo na de tuyu corazon. (Salmo 110:3) Bautiza lang tu si ya entende ya gayot tu si cosa quierre decir que queda uno del maga Testigo de Jehova y si asigurao tu que preparao ya tu para acepta con este responsibilidad.—Eclesiastes 5:4, 5.

Un Decision que Hay Cambia con el De Tuyu Vida

El bautismo hay resulta na manada bendicion. Pero, envuelto tambien aqui el un serioso responsibilidad—vivi harmonia na dedicacion que ya hace tu con Jehova.

Cerca ya ba tu hace con ese decision? Si ansina, tiene tu buen razon para queda alegre. Hay tene tu el de con todo grande privilegio—sirvi con Jehova con todo corazon y vivi na manera que ta dale mira que deverasan tu dedicao con ele.—Mateo 22:36, 37.

TEXTO

“Presenta con el de ustedes cuerpo como vivo sacrificio, sagrao y aceptable con Dios, un sagrao servicio que tiene abilidad para examina.”—Roma 12:1, NWT.

TIP

Na ayuda del de tuyu mayores, busca un persona na congregacion quien puede ayuda contigo para hace maga espiritual progreso.—Maga Actividad 16:1-3.

SABE BA TU . . . ?

El bautismo amo un bien importante parte del “marca” que necesita tu para salva.—Ezequiel 9:4-6.

SI COSA YO HACE!

Para progresa para na bautismo, hay omenta yo el de mio saber na siguiente enseñanza del Biblia: ․․․․․

El cosa yo quierre pregunta con el de mio mayores acerca con este topico amo ․․․․․

PARA CONTIGO,

● Porque un serioso decision el bautismo?

● Cosa posible causa con el un joven persona para dayun-dayun decidi bautiza?

● Cosa posible el razon si porque el un joven persona man alang-alang dedica con el de suyu vida y bautiza?

[Blurb]

“Cay sabe yo que bautizao yo, ya ayuda este conmigo para hace maga justo decision y gendeh hace maga cosas que puede tene mal resulta.”—Holly

[Cajon/​Letrato]

Maga Comon Pregunta Acerca na Bautismo

Na cosa ta representa el bautismo? Si hace contigo tusmuk na agua y despues hace levanta, quierre decir de este que ya descanza ya tu hace el maga cosas que quierre tu y preparao hace el querrer de Jehova.

Cosa quierre decir que dedica el de tuyu vida con Jehova? Quierre decir de este que ya promete tu con Jehova que hay dale tu el de tuyu vida para con ele y sirvi con ele. (Mateo 16:24) Justo lang que hace tu un formal dedicacion con Jehova por medio na rezo antes el de tuyu bautismo.

Cosa tu debe hace antes el bautismo? Debe tu vivi harmonia na Palabra del Dios y man cuento con otro acerca na cosa tu ta creé. Debe tu cultiva un buen amistad con Dios por medio na rezo y estudiada del de suyu Palabra. Debe tu sirvi con Jehova cay quierre tu hace con ese y gendeh cay tan pressure contigo el otro.

Tiene ba especifico edad que debe tu bautiza? Si acerca na bautismo, el edad gendeh amo el de con todo importante. Maskin pa ansina, debe tiene ya tu juicio para entende si cosa quierre decir del dedicacion.

Paquemodo si quierre ya tu bautiza pero ya habla el de tuyu mayores que debe pa tu espera? Posible quierre sila que tene pa tu mas experiencia na servicio con Jehova. Sigui con el diila consejo y usa con este tiempo para queda pa mas cerca con Jehova.—1 Samuel 2:26.

[Cajon]

Worksheet

Quierre Ya Ba Tu Bautiza?

Para chequia con el de tuyu progreso, considera con el maga pregunta y sentence abajo. Mira con el maga texto antes tu escribi con el de tuyu contestacion.

Na cosa maga manera tu ta dale mira que ta confia tu con Jehova?—Salmo 71:5. ․․․․․

Paquemodo tu ta demonstra que ta entende tu el diferencia del cosa justo y mali?—Maga Hebreo 5:14. ․․․․․

Paquemodo de regular tu ta reza? ․․․․․

Paquemodo de especifico el de tuyu maga rezo y cosa este ta revela acerca na de tuyu amor para con Jehova?—Salmo 17:6. ․․․․․

Lista abajo con el maga goal que quierre tu hace acerca na de tuyu rezo. ․․․․․

Paquemodo de regular el de tuyu personal estudiada del Biblia?—Josue 1:8. ․․․․․

Cosa tu ta inclui na de tuyu personal estudiada? ․․․․․

Lista abajo el maga goal que quierre tu hace acerca na de tuyu personal estudiada. ․․․․․

Efectivo ba tu na de tuyu ministerio? (Por ejemplo: Ta puede ba tu explica con otro acerca na maga importante enseñanza del Biblia? Ta visita ba tu otravez con el maga interesao? Ta hace ba tu esfuerzo para conduci un Bible study?)

□ Oo □ Gendeh

Ta participa ba tu na ministerio maskin nuay el de tuyu mayores?—Maga Actividad 5:42.

□ Oo □ Gendeh

Lista abajo el maga goal que quierre tu hace acerca na de tuyu ministerio.—2 Timoteo 2:15.․․․․․

Regular ba tu ta atende na maga miting?—Maga Hebreo 10:25. ․․․․․

Na cosa maga manera tu ta participa na maga miting? ․․․․․

Ta atende ba tu maskin gendeh puede el de tuyu mayores (si ya permiti sila contigo para hace con ese)?

□ Oo □ Gendeh

Puede ba tu habla que quierre gayot tu hace con el voluntad del Dios?—Salmo 40:8.

□ Oo □ Gendeh

Puede ba tu lista especifico situacion donde ya puede tu resisti con el pressure del otro?—Roma 12:2. ․․․․․

Cosa tu ta plaña hace para esta fuerte el de tuyu amor con Jehova?—San Judas 20, 21. ․․․․․

Hay sirvi ba tu con Jehova maskin pa descanza con ese hace el de tuyu mayores y maga amigo?—Mateo 10:36, 37.

□ Oo □ Gendeh

[Letrato]

Igual na matrimonio, el bautismo hay cambia con el de tuyu vida—debe pensa enbuenamente antes hace con este