CAPITULO 35

Paquemodo Yo Puede Queda Amigo del Dios?

Ya puede aprende si Jeremy si paquemodo de importante que queda amigo del Dios cuando tiene mal cosas ya sucede con ele. “Cuando 12 año yo, el de mio tata ya deja con el diamon familia,” ele ya habla. “Un noche, ya reza yo na cama y ya pidi yo con Jehova que manda bira con el de mio tata.”

Na de suyu tristeza, si Jeremy ya principia le con el de suyu Biblia. Cuando ya puede ele le con el Salmo 10:14, ya afecta gayot este con ele. Este versiculo ta habla acerca con Jehova: “Contigo ta anda el maga maka-lastima victima; etu el quien ta ayuda con el maga bata nuay tata.” Si Jeremy ya habla: “Ya sinti yo que dol tan cuento conmigo si Jehova y ta manda le sabe conmigo que ele el quien ayuda; ele el de mio Tata. Tiene pa ba mas buen tata que con ele?”

SEMEJANTE man el de tuyu situacion con Jeremy o gendeh, el Biblia ta indica que quierre si Jehova que queda tu de suyu amigo. Gane, el Biblia ta habla: “Atraca con Dios y Ele ay atraca con ustedes.” (Santiago 4:8) Pensa si cosa quierre decir de este maga palabra: Maskin gendeh tu con ele ta puede mira y gendeh ustedes igual edad, si Dios Jehova ta invita contigo para queda de suyu amigo!

Pero para queda amigo del Dios, necesita tu hace esfuerzo. Para ilustra: Si tiene tu siembra, sabe tu que gendeh este ta crici solo-solo. Para crici este, necesita tu regular rega con este y pone con el siembra donde pronto este crici. Semejante tambien si quierre kita queda amigo del Dios. Cosa tu hace para queda mas fuerte el de ustedes amistad?

El Importancia del Estudiada

El man amigo necesita comunicacion—ta oi y ta man cuento. Deverasan tambien este na diaton amistad con Dios. El lehida y estudiada del Biblia amo el manera para oi kita si cosa ta habla el Dios kanaton.—Salmo 1:2, 3.

Deverasan, el estudiada posible gendeh amo el cosa tu quierre-quierre hace. Mucho jovenes el mas quierre mira TV, juga o man junto con el diila maga amigo. Pero, si quierre tu queda amigo del Dios, nuay pronto manera. Necesita tu oi con ele por medio na estudiada del de suyu Palabra.

Pero, no man lingasa. El estudiada del Biblia gendeh un pesao trabajo. Puede tu man enjoy con ese—maskin pa gendeh tu anad estudia. El primer cosa que necesita tu hace amo que plaña si cuando tu estudia con el Biblia. “Tiene yo schedule,” ya habla el un mujer que si Lais. “Apenas yo dispierta, ta le yo un capitulo na Biblia cada aga.” Si Maria, 15 año, tiene diferente rutina. “Ta le yo diutay porcion del Biblia cada noche antes yo de durmi,” ele ya habla.

Para principia con el de tuyu mismo programa de estudiada, mira con el cajon “ examina con el de tuyu Biblia.” Despues, abajo, escribi con el hora si cuando tu puede dale maga 30 minuto para estudia con el Palabra del Dios.

․․․․․

Si tiene ya tu schedule, principio pa lang este. Si ya principia ya tu estudia, posible puede tu realiza que gendeh pirmi facil le con el Biblia. Posible, man uyun tu con Jezreel, 11 año, quien ya habla, “El cuanto parte na Biblia bien dificil para le y gendeh yo tanto ta man enjoy con este.” Si ta sinti tu ansina, no descanza. Pirmi acorda que el estudiada del Biblia amo el manera para oi con Dios Jehova, el de tuyu amigo. Na uliji, si hace tu mas esfuerzo para estudia con el Biblia, hay man enjoy tu y mas beneficia!

Importante el Rezo

El rezo amo el manera para converza con Dios. Pensa si paquemodo de bonito el regalo de rezo! Puede tu man cuento con Dios Jehova maskin cosa hora, aga man o denoche. Preparao le pirmi para oi contigo. Mas pa, quierre le oi si cosa tu habla. Poreso, el Biblia ta anima kanaton: “Si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias.”—Filipo 4:6.

Como cosa ta habla el texto, manada tu cosa puede man cuento con Jehova. Puede tu inclui con el de tuyu maga problema y lingasa. Puede tambien tu inclui con el maga cosas que ta rindi tu gracias. Gendeh ba ta rindi tu gracias con el de tuyu maga amigo na maga buen cosas que ya hace sila para contigo? Puede tambien tu se hace con Jehova, quien ya hace manada cosas para contigo compara na maskin quien amigo que tiene tu.—Salmo 106:1.

Abajo, lista maga cuanto cosas que ta rindi tu gracias con Jehova.

․․․․․

Asigurao tiene vez, ta tiene tu miedo y ta sinti lingasa. El Salmo 55:22 ta habla: “Buta el de tuyu pesades con Jehova y ele hay ayuda contigo. Nunca le deja que tumba el recto.”

Na siguiente maga linea, lista con el de tuyu maga lingasa que quierre tu inclui na de tuyu rezo.

․․․․․

Personal Experiencia

Tiene pa otro aspeto del de tuyu amistad con Dios que gendeh tu debe ignora. Si salmista David ya escribi: “Pruba y mira que bueno si Jehova.” (Salmo 34:8) Cuando ya hace si David con el ika-34 Salmo, nuevo lang le ya enfrenta un maka-miedo experiencia. Ta escapa le con Rey Saul quien quierre mata con ele—un maka-miedo experiencia gayot este. Pero,necesita tambien le esconde na lugar del de suyu maga enemigo, el maga Filisteo. Asigurao, hay mata gayot con ele pero ya pretende si David queda loco para puede le escapa.—1 Samuel 21:10-15.

Nuay pensa si David que ya puede le escapa por causa na de suyu mismo abilidad. Sino, ya habla le que ya ayuda con ele si Jehova. Antes el salmo que ya menciona arriba, ele ya escribi: “Ya pregunta yo con Jehova y ya contesta le conmigo. Ya libra le conmigo na maga miedo que tiene yo.” (Salmo 34:4) Entonces por causa na de suyu personal experiencia, puede anima si David con otro que “pruba y mira que bueno si Jehova.” *

Puede ba tu pensa un experiencia na de tuyu vida que ya puede tu mira el cuidada de Jehova? Si tiene, escribi se abajo. Sugestion: El experiencia gendeh necesita queda sobra de dramatico. Pruba pensa maga simple bendicion cada dia que posible el cuanto gendeh tu ta puede nota.

․․․․․

Posible, el de tuyu mayores ya enseña contigo acerca na Biblia. Si ansina, un bendicion se. Pero, necesita tu siempre cultiva un personal relacion con Dios. Si nuay pa tu hace con ese, puede tu usa con el material na este capitulo para puede tu principia. Si Jehova hay bendici con el de tuyu maga esfuerzo. El Biblia ta habla: “Pidi ustedes y ay recivi; busca y ay encontra.”—Mateo 7:7.

[Footnote]

TEXTO

“Alegre aquellos quien ta pensa el diila espiritual necesidad.”—Mateo 5:3, NWT.

TIP

Le maskin cuatro pagina del Biblia cada dia y hay completa tu con este adentro de maga un año.

SABE BA TU . . .

Ciendo ta le tu con este libro y ta acepta con el consejo de este que base na Biblia, ta dale este mira que tiene personal interes si Jehova contigo.—Juan 6:44.

EL COSA YO TA PLAÑA HACE!

Para mas beneficia na personal estudiada del Biblia, iyo hay ․․․․․

Para queda mas regular el de mio maga rezo, iyo hay ․․․․․

El cosa yo pregunta con el de mio mayores acerca na este topico amo ․․․․․

PARA CONTIGO?

● Cosa tu hace para mas man enjoy tu con el de tuyu personal estudiada del Biblia?

● Porque si Jehova quierre oi con el rezo del maga imperfecto gente?

● Cosa tu hace para progresa el calidad del de tuyu rezo?

[Blurb]

“Cuando joven yo, el de mio maga rezo bira-bira lang. Ahora, ta pricura yo reza acerca na maga bueno y mal cosas que ta sucede cada dia. Ciendo gendeh igual el cosa ta sucede cada dia, este ya ayuda conmigo para gendeh queda bira-bira el de mio rezo.’’—Eve

[Cajon/Letrato]

 Examina con el De Tuyu Biblia

1. Iscuji un istoria na Biblia que quierre tu le. Por medio na rezo, pidi el sabeduria para puede tu entende con el material.

2. Le enbuenamente con el istoria. No apura. Mientras ta le tu, usa con el de tuyu imaginacion. Usa con el de tuyu maga sentido: Pruba mira con el accion, oi con el voz del maga caracter, ole con el aire, pruba con el comida y otro pa. Hace con el istoria vivo na de tuyu pensamiento!

3. Pensa acerca na cosa tu ya le. Pregunta con el de tuyu mismo cuerpo, igual na siguiente:

● Porque si Jehova ya inclui con este istoria na de suyu Palabra?

● Quien maga caracter el debe yo imita y quien el maga mal ejemplo?

● Cosa maga practical leccion el puede yo aprende na de mio lehida?

● Cosa este istoria ta enseña conmigo acerca con Jehova y si paquemodo le ta hace con el maga cosas?

4. Hace un corto rezo para con Jehova. Habla con ele si cosa tu ya puede aprende na de tuyu estudiada del Biblia y si paquemodo tu aplica con este na de tuyu vida. Pirmi rindi gracias con Jehova por causa na regalo que ya dale le contigo—el de suyu Palabra, el Sagrao Escritura!

[Letrato]

“El de tuyu palabra amo un lampara na de mio pies, y un claridad na de mio camino.—Salmo 119:105.

[Cajon/​Letrato]

Decidi si Cosa el de Tuyu Prioridad

Nuay tiempo para reza? Nuay tiempo para estudia con el Biblia? Mas mucho, ta depende se si cosa el de tuyu prioridad.

Pruba hace con este: Saca un balde y pone maga grande piedra adentro. Despues, vacia arena na balde—hasta llena. Ahora, tiene ya tu un balde que lleno de maga piedra y arena.

Ahora, quita con el laman na balde pero no buta con el arena y piedra. Pruba hace baliscat con el proceso: Vacia con el arena na balde y despues pone con el maga piedra na balde. Nuay mas lugar? Por causa se cay ya pone tu una con el arena na balde.

Cosa el punto? El Biblia ta habla: “Asigura el maga cosas que mas importante.” (Filipo 1:10, NWT) Si hace tu una con el maga diutay cosas igual na recreacion, posible sinti tu que nuay mas lugar na de tuyu vida para na maga grande cosas—maga espiritual actividad. Pero si sigui tu con el consejo del Biblia, hay puede tu realiza que tiene tu tiempo hace con el trabajo del Reino y cuanto tiempo para na recreacion. Ta depende este todo si cosa tu una pone na balde!

[Letrato]

Igual na un siembra, el amistad con Dios ta necesita esfuerzo para crici