CAPITULO 25

Paquemodo Yo Ganá con el Masturbacion?

“Ya principia yo practica con el masturbacion cuando ocho año yo. Despues, ya puede yo aprende si cosa el mirada del Dios acerca con este. Cada vez yo hace con este, tan conciencia gayot yo. ‘Hay ama pa gaha conmigo el Dios?’ ya pregunta yo con el de mio mismo cuerpo.”—Luiz.

MIENTRAS ta engranda tu, mas ta queda fuerte el de tuyu sexual deseo. Como resulta, posible tu cae na mal practica del masturbacion. * Manada el quien ta habla que gendeh se un grande cosa. “Nuay quien hay sinti duele,” ta habla sila. Pero, tiene buen razon para evita con ese practica. Si apostol Pablo ya escribi: “Poreso, mata na de ustedes cuerpo . . . el maga deseo” o sexual deseo que gendeh ta puede controla. (Colosa 3:5, El Nuevo Testamento na Chavacano) El masturbacion gendeh ta mata con el sexual deseo sino mas ta omenta con este. Omento pa, considera con el siguiente:

● El un persona quien ta hace masturbacion ta ama lang con el de suyu mismo cuerpo. Por ejemplo, si el un persona ta hace con ese, tan focus lang le na cosa le ta sinti.

● El masturbacion puede causa con el individual que mira con el un persona con quien tiene le relacion como un cosa lang que puede le obtene para na suyu sexual deseo.

● El masturbacion posible hace dificil con el un persona para tene buen sexual relacion na matrimonio.

En vez que hace con el masturbacion, pricura controla con ese deseo. (1 Tesalonica 4:4, 5) Para ayuda contigo hace se, el Biblia ta recomenda que evita maga situacion que puede causa contigo que hace con ese. (Proverbio 5:8, 9) Pero, paquemodo si ya queda ya tu esclavo na ese practica? Posible, ya pricura tu descanza pero nuay tu tene buen exito. Posible tu pensa que nuay mas ya tu esperanza para cambia y gendeh tu puede vivi harmonia na principio del Dios. Ansina el cosa ya sinti el un hombre que si Pedro. “Si ta puede yo con ese hace otravez, tan conciencia gayot yo,” ele ya habla. “Ta pensa yo gendeh mas conmigo perdona el Dios na cosa yo ya hace. Tan dificil yo reza.”

Si ansina tu ta sinti, tene coraje. Tiene pa tu esperanza para cambia. Mucho maga jovenes—y maga adulto—el quien ya puede quita con ese. Puede tambien tu se hace!

Si Cosa Hace si Tan Conciencia Tu

Como cosa ya menciona, aquellos quien ya man anad hace con el masturbacion mas mucho tan conciencia. Asigurao, si el de tuyu “tristeza comforme con el Dios,” puede se ayuda contigo para quita con ese practica. (2 Corinto 7:11) Pero, nuay contigo cosa puede ayuda si sobra tu ta man conciencia. Puede se hace luya contigo para gendeh mas tu hace esfuerzo quita con ese practica.—Proverbio 24:10.

Poreso, pricura queda balance si paquemodo tu mira con el de tuyu situacion. El masturbacion un acto de cuchinadas. Puede se hace contigo esclavo na “maga mal deseo y maga gusto” y causa ese contigo para cultiva maga mal conducta. (Tito 3:3) Na igual manera, el masturbacion gendeh un clase de grabe sexual imoralidad, igual como el fornicacion. (San Judas 7) Si tiene tu problema acerca con ese, gendeh tu debe pensa que gendeh mas contigo perdona si Jehova. El cosa tu necesita hace amo resisti con el deseo y no descanza hace esfuerzo!

Pronto tu man luya si ya puede tu con ese hace otravez. Si ya sucede se contigo, gendeh quierre decir que un mal persona ya tu. Poreso no descanza. Sino, pensa si cosa ya causa contigo para hace con ese otravez y evita con ese situacion.

Dale tiempo para medita con el amor y lastima del Dios. El salmista que si David, quien ya puede hace cuanto mal cosas, ya habla: “Igual con el un tata que ta dale mira lastima con el de suyu anak, si Jehova ta dale mira lastima con aquellos quien tiene miedo con ele. Cay sabe le si paquemodo kanaton ya forma y ta acorda que polvos kita.” (Salmo 103:13, 14) Si, sabe si Jehova que imperfecto kita y “preparao para perdona” kanaton. (Salmo 86:5) Pero, quierre le que hace kita esfuerzo para hace maga cambio. Cosa maga practical manera que puede tu hace para quita con ese practica?

Examina con el de tuyu entretenimiento. Ta mira ba tu maga salida o programa na TV o maga website que ta hace dispierta con el de tuyu sexual deseo? El salmista ya reza con Dios: “No conmigo permiti mira el maga cosas que nuay valor.” *—Salmo 119:37.

Forza con el de tuyu mismo cuerpo que pensa otro cosas. Si William que un Cristiano, ya dale consejo: “Antes tu durmi, le cosa que base na Biblia. Bien importante que el ultimo cosa que talli na de tuyu pensamiento amo acerca na maga espiritual cosas.”—Filipo 4:8.

Habla con otro el de tuyu problema. Posible, ta tiene tu huya habla con otro acerca na de tuyu problema. Pero si hace tu este, puede se ayuda contigo quita con ese practica! Este el cosa ya habla el un Cristiano que si David: “Ya habla yo con el de mio tata el de mio problema. Gendeh yo ulvida el cosa le ya habla. Yan smile le mientras ta habla, ‘Anak, proud gayot yo contigo.’ Sabe le que necesita coraje para habla yo con ele acerca con este. El cosa le ya habla amo gayot el cosa yo necesita. Mas ya queda yo determinao que quita con este practica.

“Ya le conmigo el de mio tata maga texto que ta dale mira que gendeh yo mal gente y otro pa maga texto que ya ayuda conmigo para entende si paquemodo de serioso este. Ya habla le conmigo que hace yo esfuerzo que evita con este adentro na un especifico tiempo y despues, man cuento kame otravez na otro tiempo. Ya habla le conmigo que si falla yo otravez, no man triste sino hace yo esfuerzo que gendeh hace este otravez adentro na largo tiempo.” Cosa ya aprende si David? Ele ya habla: “Grande gayot ayuda si tiene quien sabe acerca na de mio problema y tiene quien ta ayuda.” *

[Maga footnote]

TEXTO

“Desaleja tu na maga mal deseo del maga jovenes. Precura gayot queda santo y tene fe, amor y paz junto con todo aquellos quien ta reza na Nombre del Señor con un corazon limpio.”—2 Timoteo 2:22.

TIP

Reza antes pa queda fuerte el sexual deseo. Pidi con Dios Jehova que dale le contigo el “grande poder” para resisti con el tentacion.​—2 Corinto 4:7.

SABE BA TU . . . ?

El un mahina persona ta sigui lang na de suyu sexual deseo pero el un fuerte persona, ta puede controla con este maskin pa solo le.

EL COSA YO TA PLAÑA HACE!

Para esta limpio el de mio pensamiento, debe yo ․․․․․

En vez que sigui lang con el de mio sexual deseo, debe yo ․․․․․

El cosa yo quierre pregunta na de mio mayores acerca con este topico amo ․․․․․

PARA CONTIGO?

● Porque importante para acorda que si Jehova “preparao para perdona”?—Salmo 86:5.

● El Dios ya crea con el sexual deseo pero ya habla tambien le que debe kita tene control na cuerpo. Poreso, cosa le ta expecta que puede tu hace?

[Blurb]

“Desde ya quita yo con este vicio, limpio ya el de mio conciencia adelante con Jehova y gendeh gayot yo con este cambia na maskin cosa!”​—Sarah

[Letrato]

Si tumba tu mientras ta corre, gendeh se quierre decir que necesita tu bira otravez na principio​—si falla tu otravez, el de tuyu esfuerzo gendeh queda envano