CAPITULO 8

Paquemodo Yo Tene Maga Buen Amigo?

“Si rabiao yo, necesita tiene yo con quien habla si cosa yo ta sinti. Si triste yo, quierre yo que tiene conmigo quien habla que queda lang enbuenamente el todo. Si alegre yo, quierre yo que tiene tambien otro quien queda alegre junto conmigo. Para conmigo, importante tene maga amiga.”​—Brittany.

CUANDO bata tu, necesita tu juga junto na otro maga bata. Ta man junto sila contigo para gendeh tu queda solo. Pero ahora, necesita tu maga deverasan amigo quien gendeh lang basta man junto contigo sino hay ayuda y suporta contigo.

Mas pa, el Biblia ta habla que “el verdadero amigo ta ama na todo tiempo, y un hermano quien ya nace para na tiempo de dificultad.” (Proverbio 17:17) Ese clase de amigo mas pa contra na un amigo que puede tene el un bata con quien le puede juga junto!

El deverasan: Mientras ta engranda tu, necesita tu maga amigo quien tiene

1. Maga bonito calidad

2. Maga buen principio

3. Buen influencia contigo

Pregunta: Paquemodo tu incuntra ansina clase de maga amigo? Discuti kita con ese uno-uno.

Clase de Amigo #1​—Tiene Maga Bonito Calidad

Si cosa tu debe sabe. Gendeh todo puede queda deverasan amigo de tuyu. Gane, el Biblia ta habla que “tiene maga man uban quien ta hace malo con uno y otro.” (Proverbio 18:24) Deverasan ba se? Considera este: Tiene ba tu un “amigo” quien ya toma ventaja contigo? O quien ya hace malo contigo con otro o tan chismis acerca contigo? Si ansina, asigurao ya perde el de tuyu confianza con ele. * Pirmi acorda, dejalo lang umpoco el de tuyu amigo basta deverasan!

Si cosa tu puede hace. Iscuji maga amigo quien tiene maga calidad que puede tu imita.

“Positivo el mirada del todo con el de mio amiga, si Fiona. Ansina tambien yo quierre que mira conmigo el otro. Ta gusta yo con ele y quierre yo que tene tambien yo buen reputacion.”—Yvette, 17.

Pruba hace este.

1. Le con el Galacia 5:22, 23.

2. Pregunta na de tuyu mismo cuerpo, ‘El de mio maga amigo ba tiene maga calidad que incluido na “fruta del espiritu”?’

3. Pone abajo el nombre del de tuyu maga de con todo cerca amigo. Na costao del cada nombre, pone el calidad que tiene ese persona.

Nombre

․․․․․

Calidad

․․․․․

Indicacion: Si puro maga negativo custumbre el ta pensa tu acerca con ese persona, posible tiempo ya para busca maga buen clase de amigo!

Clase de Amigo #2​—Tiene Maga Buen Principio

Si cosa tu debe sabe. Si bien quierre gayot tu tene maga amigo, baka maskin con quien ya lang tu iscuji man amigo. El Biblia ta habla: “El quien tan junto con el estupido hay resulta na mal.” (Proverbio 13:20) El termino “estupido” gendeh ta refiri na maga gente quien tiene bajo grado o aquellos quien nuay tanto saber. Sino, ta refiri este con aquellos quien no quierre acepta maga buen consejo y ta iscuji hace maga mal cosas. Ese el clase de maga amigo que gendeh tu necesita!

Si cosa tu puede hace. En vez de man amigo maskin con quien ya lang, iscuji enbuenamente. (Salmo 26:4) Pero, gendeh se quierre decir que discrimina tu con otro. Sino, ese quierre decir que necesita tu mira “el diferencia entre del un persona recto y malo, entre del quien ta sirvi con Dios y del quien gendeh ta sirvi con ele.”—Malaquias 3:18.

“Ta rindi gayot yo gracias con el de mio mayores cay ya ayuda sila conmigo busca maga amigo—maga persona que igual de mio el edad quien tiene buen espiritualidad.”—Christopher, 13.

Contesta con el siguiente pregunta:

Si junto yo na de mio maga amigo, ta nervia ba yo que baka man pressure sila conmigo que hace un cosa que sabe yo que gendeh bueno?

□ Oo

□ Gendeh

Tan alang-alang ba yo manda conoce con el de mio maga amigo na de mio mayores cay baka gendeh kanila aproba el de mio mayores?

□ Oo

□ Gendeh

Indicacion: Si oo el de tuyu contestacion na maga pregunta arriba, busca maga amigo quien tiene alto principio—aquellos quien ta pricura hace alegre con Dios.

Clase de Amigo #3​—Tiene Buen Influencia

Si cosa tu debe sabe. El Biblia ta habla: “El maga barcada malo ta hace cambia el custumbre bueno de un gente.” (1 Corinto 15:33) El un joven que si Lauren ya habla: “El de mio maga schoolmate tan amiga lang conmigo si ta hace yo si cosa sila ta manda conmigo. Ya decidi yo que actua igual kanila para acepta sila conmigo.” Ya aprende si Lauren que si hace tu si cosa contigo ta manda el de tuyu maga amigo, dol aquel tu pawn na chessboard que ta puede lang sila controla. Gendeh tu necesita maga amigo igual ansina!

Si cosa tu puede hace. No mas ya man amigo con aquellos quien ta forza contigo que hace si cosa sila ta hace. Si hace tu con este, posible mas poco ya lang el de tuyu amigo; pero hay tene tu maga amigo quien hay ayuda contigo para queda un mas buen persona.—Roma 12:2.

“El de mio amigo que si Clint tiene empatia y ta puede hace maga justo decision y como resulta, ya puede gayot le ayuda conmigo.”—Jason, 21.

Pregunta con el de tuyu mismo cuerpo:

Ta cambia ba yo si paquemodo yo ta muda, ta converza o ta actua maskin malo quel para lang hace alegre con el de mio maga amigo?

□ Oo

□ Gendeh

Ta anda ba yo na maga lugar que gendeh yo debe anda cay quierre yo hace alegre con el de mio maga amigo?

□ Oo

□ Gendeh

Indicacion: Si oo el de tuyu contestacion na maga pregunta arriba, pidi ayuda con el de tuyu mayores o con el otro mature persona. Si uno tu del maga Testigo de Jehova, puede tambien tu atraca con el un anciano y manda sabe con ele que quierre tu pidi ayuda si paquemodo iscuji maga amigo que puede tene buen influencia contigo.

[Footnote]

TEXTO

“Tiene un amigo que leal pa na un hermano.”​—Proverbio 18:24.

TIP

Si vivi tu asegun na maga justo principio, el otro quien ta pricura tambien hace ansina hay puede nota contigo. Puede sila queda de tuyu maga de con todo buen amigo!

SABE BA TU . . . ?

Imparcial el Dios pero ta iscuji le enbuenamente si quien puede ‘visita na de suyu tolda.’​—Salmo 15:1-5.

EL COSA YO TA PLAÑA HACE!

Para incuntra maga buen amigo, hay ․․․․․

El cuanto maga individual quien mas mayor conmigo con quien yo quierre mas conoce amo kanda ․․․․․

El cosa yo quierre pregunta na de mio mayores acerca con este topico amo ․․․․․

PARA CONTIGO?

● Cosa maga calidad el ta busca gayot tu na un amigo y porque?

● Cosa maga cambio tu necesita hace para queda mas buen amigo?

[Blurb]

“Cuando ya habla conmigo el de mio mayores que desaleja con el un particular grupo de maga amigo, ya habla yo con el de mio mismo cuerpo que con este grupo lang yo quierre man junto. Pero, bueno el consejo del de mio mayores y cuando ya puede yo pensa acerca con aquel, ya realiza yo que puede pa yo incuntra maga mas buen amigo.”​—Cole

[Cajon]

Pruba con Este Maga Sugestion

Man cuento na de tuyu mayores acerca si con quien tu puede man amigo. Pregunta kanila si cosa clase de maga amigo sila ya tiene cuando igual el diila edad contigo. Ta arripinti ba sila si con quien sila ya iscuji man junto? Si ansina, porque? Pregunta kanila si paquemodo tu puede evita con el cuanto na maga problema que ya puede sila experiencia.

Manda conoce con el de tuyu maga amigo na de tuyu mayores. Si tan alang-alang tu hace se, pregunta na de tuyu mismo cuerpo, ‘Porque yo ta sinti ansina?’ Tiene ba cosa na de tuyu maga amigo que sabe tu gendeh gusta el de tuyu mayores? Si ansina, posible necesita tu iscuji enbuenamente si con quien tu man amigo o man amiga.

Oi enbuenamente. Dale mira interes na bien diila y na cosa sila ta man lingasa.​—Filipo 2:4.

Perdona. No expecta perfeccion. “Todo kita ta comete culpa muchas veces.”​—Santiago 3:2.

Gendeh necesita que pirmi ya lang tu man junto kanila. El maga deverasan amigo pirmi talli si necesita tu kanila.​—Eclesiastes 4:9, 10.

[Letrato]

Si hace tu si cosa contigo ta manda el de tuyu maga amigo para lang acepta sila contigo, dol aquel tu pawn na chessboard que ta puede lang sila controla