VERDAD acerca na cosa? Acerca na cuanto maga importante pregunta del maga gente. Posiblé, ta busca tambien tu contestacion con este maga pregunta:

• Querrer ba del Dios que sufri kita?

• Tiene ba fin el guerra y sufrimiento?

• Cosa el condicion del maga muerto?

• Tiene pa ba esperanza el maga muerto?

• Paquemodo yo reza para oi conmigo el Dios?

• Paquemodo yo obtene el deverasan alegria?

Onde tu puede incuntra el contestacion de este maga pregunta? Si anda tu na maga libreria y tienda de libro, puede tu mira mucho maga libro que dol ta dale contestacion. Pero, todo este gendeh tan tupahan el contestacion. El otro libro dol tupao pero si ta pasa ya el tiempo, este gendeh mas aplicablé y necesita ya cambia.

Pero tiene un libro que ta contene justo maga contestacion. Este amo el libro de verdad. Si Jesucristo ya habla na su rezo con Dios: “El de Uste Palabra amo el verdad.” (Juan 17:17) Este Palabra amo el Biblia. Na siguiente maga pagina, hay sabé tu el claro y justo contestacion del Biblia na maga pregunta arriba.

SI PORQUE ESTE TA PREGUNTÁ: El Dios amo el quien ya crea con el todo las cosas. Kita ta vivi ahora na un mundo que lleno de violencia y injusticia. Poreso si tiene quien ta sufri, manada ta habla que querrer se del Dios.

SI COSA EL BIBLIA TA ENSEÑA: El Dios gendeh gayot el causa del maga mal cosas que ta sucede. El Santiago 1:13 ta habla: “Ningunos gendeh ta puede tenta con el Dios para hace malo, ni gendeh tamen el Dios ta tenta con ningunos.” El Dios tiene buen proposito para con el maga gente. Poreso ya enseña si Jesus kanaton reza: “Tata diamon na cielo, . . . Manda vene el de Uste Reino. Hace el de Uste voluntad aqui na mundo igual como alli na cielo.” (Mateo 6:9, 10) El Dios ta ama gayot kanaton, poreso ya hace le manera para cumpli gayot su proposito.​—Juan 3:16.

Le tambien el Genesis 1:26-28 y 1 Pedro 5:6, 7.

SI PORQUE ESTE TA PREGUNTÁ: Bien manada ta muri por causa na guerra. Todo kita ta experienciá sufrimiento.

SI COSA EL BIBLIA TA ENSEÑA: El Dios ya habla que hay tiene paz aqui na tierra na futuro. Na rulanza del su Reino, un gobierno na cielo, el maga gente gendeh mas ‘hay aprende guerra.’ En vez, “el diila espada hay hace sila arao.” (Isaias 2:4) Hay termina el Dios con el todo injusticia y sufrimiento. El Biblia ya promete: “Ay limpia [el Dios] el lagrimas na diila maga ojos y nunca mas ay tene muerte, ni dolor, ni tristeza, cay el mundo de antes [hasta el maga injusticia y sufrimiento ahora] ya acaba ya.”​—Revelacion 21:4.

Le tambien el Salmo 37:10, 11; 46:9; y Miqueas 4:1-4.

SI PORQUE ESTE TA PREGUNTÁ: Tiene maga religión ta enseña que si ta muri el gente, el diila alma ta continua vivi. El los demas ta creé que el muerto puede hace mal cosas na maga vivo o el Dios ta castiga con el maga malo na infierno hasta para cuando.

SI COSA EL BIBLIA TA ENSEÑA: El maga muerto nuay mas ya vida, gendeh mas ta oi, mira, converza, ni pensa maskin cosa. “El maga muerto no sabe ni nada,” asegun na Eclesiastes 9:5. Entonces, gendeh mas sila puede hace mal cosas​—o ayudá—​con el maga vivo.​—Salmo 6:5.

Le tambien el Genesis 3:19 y Eclesiastes 9:6, 10.

SI PORQUE ESTE TA PREGUNTÁ: Quierre kita vivi y queda alegre junto con aquellos con quien kita ta ama. Poreso, normál lang que quierre kita mira otravez con aquellos quien ya muri ya.

SI COSA EL BIBLIA TA ENSEÑA: El maga muerto hay resucita. Si Jesus ya promete que “el maga muerto ay oi el disuyo voz, y todo sila ay sale na diila maga sepultura.” (Juan 5:28, 29) Asegun na originál proposito del Dios, aquellos con quien resucita hay obtene el oportunidad para vivi na paraiso tierra. Na futuro, el maga obediente gente hay tiene perfecto salud y vida eterna. El Biblia ta habla: “El maga bueno hay hereda con el tierra, y hay esta sila alli hasta para cuando.”​—Salmo 37:29.

Le tambien el Job 14:14, 15; Lucas 7:11-17; y Maga Actividad 24:15.

SI PORQUE ESTE TA PREGUNTÁ: El maga gente maskin cosa el religión ta reza gayot. Pero, manada kanila ta sinti que gendeh ta oi con el diila maga rezo.

SI COSA EL BIBLIA TA ENSEÑA: Cuando ya enseña kanaton si Jesus reza, ya habla le que no kita debe usa “mucho maga palabra bulao” como cuanto maga gente quien ta habla “maga largo rezo.” (Mateo 6:7) Poreso, evita kita repiti maga encabezao rezo. Si quierre kita oi kanaton el Dios, debe kita reza na manera que aceptablé con ele. Debe kita sabé si cosa el voluntad del Dios y reza harmonia con ese. El 1 San Juan 5:14 ta explica: “Asegurao kita que maskin cosa ta pidi kita con [el Dios] comforme na su querer, Ele ay oi canaton.”

Le tambien el Salmo 65:2; Juan 14:6, 14; y 1 San Juan 3:22.

SI PORQUE ESTE TA PREGUNTÁ: Manada gente ta creé que si sila rico y prominente hay queda sila alegre. Poreso ta pricura sila obtene ese clase de vida, pero na uliji gendeh lang siempre sila ta experienciá deverasan alegria.

SI COSA EL BIBLIA TA ENSEÑA: Ya identifica si Jesus el secreto del deverasan alegria cuando ya habla le: “Mas alegre pa aquellos quien ta oi y ta obedece con el Palabra de Dios.” (Lucas 11:28) Queda lang kita deverasan alegre si kita hay aprende el verdad acerca con Dios y sabé el su proposito para kanaton cay amo este el de con todo importante necesidad na diaton vida. Ese verdad escribido na Biblia. Si sabe kita con ese verdad, hay ayudá se kanaton sabé si cosa gayot el importante y si cosa el gendeh. Si hay actua kita y hace decicion harmonia na verdad del Biblia, hay tiene kita mas alegre vida.​—Mateo 5:3.

Le tambien el Maga Proverbio 3:5, 6, 13-18 y 1 Timoteo 6:9, 10.

 Corto contestacion lang este del Biblia na seis pregunta. Quierre ba tu sabé mas? Si quierre tu guia na de tuyu vida estaba con Dios, asigurao quierre tu sabé pa mas. Siguro ta busca tambien tu contestacion na maga pregunta igual: ‘Si ta ama kanaton el Dios, porque man le ta permiti con el maldad y sufrimiento? Paquemodo hay progresa el vida del de mio familia?’ El Biblia ta dale justo y detallado contestacion con ese y na otro pa maga pregunta.

Pero, manada ahora gendeh mas ta le con el Biblia. Para kanila, un grueso libro lang este y dificil entende. Quierre ba tu obtene ayuda para incuntra el contestacion na Biblia? El maga Testigo de Jehova ta ofrece dos cosa para ayudá contigo.

Una, ya hace con el libro Cosa Kanaton Puede Enseña el Biblia? para ayudá con aquellos quien quierre examina con el contestacion del Biblia na maga bien importante pregunta. El segundo amo el libre Bible study. Un Testigo de Jehova el visitá contigo na de tuyu casa o na otro conveniente lugar para enseña contigo acerca na Biblia. Millones de gente na entero mundo el ya beneficia con este programa. Manada kanila el ya puede gayot habla: “Ya incuntra ya yo el verdad!”

Nuay maskin cosa riqueza el puede compara con este. El verdad na Biblia hay libra kanaton desde na sobra miedo y na maga falso enseñanza. Este hay dale kanaton esperanza, proposito y alegria na vida. Si Jesus ya habla: “Ay sabe ustedes el verdad acerca de Dios, y por causa de ese verdad ay queda ustedes libre y hende na ustedes maga esclavo.”​—Juan 8:32, El Nuevo Testamento.