1. Paquemodo de comon el creencia na magica, salamanca y barang?

“NA Africa, envano lang pregunta si ta creé ba el maga gente na buruja o gendeh,” ya habla el libro African Traditional Religion y ya omenta que “maskin cosa pa el estado del vida del maga de Africa, todo sila ta creé na barang.” Educao man o gendeh, todo sila ta creé na magica, salamanca y barang. Ta creé tambien con ese el maga religioso lider de Islam y aquellos quien ta clama Cristiano.

2. Para na maga de Africa, onde estaba el maga poder de magica?

² Na Africa, manada el quien ta creé na poder de magica. El Dios el quien ta controla con este. El espiritu del maga muerto puede usa con este. Y el cuanto gente sabe tambien usa con este para hace bueno (white magic) o malo (black magic).

3. Cosa el black magic y cosa ta creé el maga gente que puede este hace?

³ Ta usa con el black magic, o salamanca, para causa peligro na maga enemigo. Ta creé el manada gente que aquellos quien ta usa con este ta puede controla con el maga kabuk, pajaro, moscas y otro animal para ataca con el maga gente. Manada quien ta creé que ta usa con este para causa peleajan, gendeh puede man anak, enferma y muri pa gane.

4. Cosa ta creé el manada acerca na maga buruja y cosa ya habla el cuanto quien ta practica con este de antes?

⁴ El otro ta creé que el maga buruja puede causa peligro con el maga gente. Ta habla sila que el maga buruja ta deja con el diila cuerpo si de noche y ta bula para man mirajan na otro maga buruja o para destroza con el vida del diila maga victima. Pero, nuay evidencia acerca con este puera ya lang na cosa ya habla el cuanto quien ya descanza hace con este. Por ejemplo, el un magasin de Africa ya menciona con el cosa ya habla el maga buruja de antes (mayoria maga teenager mujer): “Ya causa yo maga accidente na motor que ya causa el muerte del 150 gente.” “Ya chupa yo con el todo sangre del cinco bata hasta ya muri sila.” “Ya mata yo con el de mio tres novio cay ya deja sila conmigo.”

5. Cosa el white magic y paquemodo con este ta practica?

⁵ Ta usa white magic el maga gente para protege kanila contra na maga malo. Ta usa sila maga anillo o pulseras de magica. Tiene sila cosa ta toma o ta hace con este pahid na diila cuerpo. Ta esconde sila maga cosas na diila casa o na tierra como proteccion. Ta usa sila maga anting-anting que ta contene maga palabra estaba na Koran o na Biblia.

6. Cosa ya puede hace si Satanas y el de suyu maga demonio de antes y cosa debe el diaton mirada na diila poder?

⁶ Deverasan que maga peligroso enemigo del maga gente si Satanas y el de suyu maga demonio. Tiene sila el poder para influencia con el pensamiento y vida del maga gente y del antes, ya entra sila na cuerpo del maga gente y del maga animal para controla kanila. (Mateo 12:43-45) Maskin pa poderoso si Satanas y el de suyu maga demonio, gendeh se quierre decir que puede sila hace maskin cosa sila quierre.

7. Cosa el quierre si Satanas que creé kita y paquemodo con este puede ilustra?

⁷ Bien bueno engaña si Satanas. Quierre le manda pensa con el maga gente que tiene le poder mas pa na cosa le deverasan tiene. Para ilustra: Durante el reciente guerra na un nacion na Africa, el maga soldao ya usa maga sound equipment para hace miedo con el diila maga enemigo. Antes ataca, el maga soldao yan play maga suena recording del sonor del maga pusil y rebentada. Quierre sila manda pensa con el diila maga contrario que ta ataca kanila el maga soldao que tiene maga mafuerza armas. Na igual manera, quierre manda pensa si Satanas con el maga gente que nuay limitacion el de suyu poder. Quierre le hace miedo con el maga gente para hace sila el de suyu querrer y gendeh el querrer de Jehova. Considera kita ahora con el tres imbusterias que quierre si Satanas que creé el maga gente.

8. Cosa el un imbusterias que ta hace calayat si Satanas?

⁸ El un imbusterias que ta hace calayat si Satanas amo este: Gendeh ta sucede el un cosa si nuay razon; ta sucede el maskin cosa malo por causa na un persona directa man le se hace o por medio na magica. Por ejemplo, pone kita que ya muri el un bata por causa na malaria. Posible sabe el de suyu nana que ya tene le malaria cay ya morde con ele el namuk. Pero, posible tambien le creé que tiene quien yan barang con el de suyu anak y ese persona ya imbia namuk para morde con el de suyu anak.

9. Paquemodo ya dale mira el Biblia que gendeh si Satanas el causa del todo problema?

⁹ Maskin pa tiene poder si Satanas para causa cuanto problema, gendeh justo para creé que tiene le poder para causa con el todo problema. El Biblia ta habla: “Gendeh pirmi ta ganá el fuerte corre na carrera, ni el poderoso ta ganá na guerra, ni el sabio pirmi tiene comida, ni el maga inteligente pirmi tiene el maga riqueza y gendeh pirmi ta tene buen exito el tiene saber, cay afectao sila todo na tiempo y maga suceso que gendeh ta expecta.” (Eclesiastes 9:11) El un runner na carrera posible mas corre que con otro. Pero, posible siempre le gendeh ganá. El cuanto “suceso que gendeh ta expecta” posible causa con ele para perde. Posible ya tumba le, ya enferma o ya balda. Posible este sucede maskin con quien. Gendeh se estaba con Satanas o por medio na barang; ta sucede lang gayot este.

10. Cosa ta habla el cuanto acerca na maga buruja y porque kita sabe que imbusterias este?

¹⁰ El ika-dos imbusterias que ta hace calayat si Satanas amo este: El maga buruja ta deja con el diila cuerpo y ta bula denoche para man mirajan con el otro maga buruja o para chupa sangre hasta muri el diila maga victima. Ahora pregunta na de tuyu mismo cuerpo: ‘Si ta puede este hace el maga buruja, cosa ta separta na diila cuerpo?’ Como cosa kita ya aprende, el alma amo el persona y gendeh un cosa que ta separta na cuerpo del un gente. Mas pa, el espiritu amo el fuerza que ta dale vida na cuerpo del gente pero nuay este cosa puede hace si nuay el cuerpo.

11. Porque kita sabe que gendeh puede deja el maga buruja con el diila cuerpo y ta creé ba tu con este?

¹¹ El alma y el espiritu gendeh puede separta na cuerpo para hace maskin cosa, bueno man o malo. Entonces, el maga buruja gendeh puede deja con el diila cuerpo. Gendeh sila puede hace con el maga cosas que ta clama sila que ya hace sila o ta pensa sila que ya hace sila.

12. Cosa ta hace si Satanas para manda creé con el maga gente que ya puede sila hace maga cosas que nuay deverasan sucede?

¹² Paquemodo kita puede explica con el cosa ya habla el maga buruja que ya hace sila? Puede manda creé si Satanas con el maga gente que ya experiencia sila el maga cosas que nuay deverasan sucede. Por medio na maga vision, puede causa si Satanas con el maga gente para imagina que ya puede sila mira, oi y hace el maga cosas maskin pa nuay ese sucede. Na este manera, ta puede hace lejos si Satanas con el maga gente con Jehova y manda kanila pensa que gendeh justo el Biblia.

13. (a) Bueno ba el white magic? (b) Cosa ta habla el Biblia acerca na magica?

¹³ El ika-tres imbusterias amo este: Bueno el white magic—puede este protege kanaton na black magic. Gendeh ta habla el Biblia que tiene black magic y white magic. Ta condena este con el todo clase de magica. Considera con el maga ley que ya dale si Jehova con el nacion de Israel acerca na magica y aquellos quien ta practica con este:

• “No ustedes . . . practica magica.”—Levitico 19:26.

• “Debe mata con el maskin quien hombre o mujer que un espiritista o quien ta adivina.”—Levitico 20:27.

• “Nuay debe ni uno con ustedes quien . . . ta busca maga señal, salamanquero, maskin quien ta hace daño con otro, maskin quien ta consulta na espiritista.”—Deuteronomio 18:10-14.

14. Porque si Jehova ya hace maga ley contra na magica?

¹⁴ Este maga ley claro ya dale mira que no quierre el Dios que practica magica el de suyu maga siervo. Ya dale si Jehova este maga ley con el de suyu maga siervo cay ta ama le kanila y no quierre le que tene sila miedo y creé na maga supersticion. No quierre le que controla kanila el maga demonio.

15. Paquemodo ya dale mira el Biblia que mas poderoso si Jehova contra con Satanas?

¹⁵ Maskin pa el Biblia gendeh ta dale todo detalle acerca na cosa puede hace y gendeh puede hace el maga demonio, ta dale este mira que si Dios Jehova mas poderoso contra con Satanas y con el de suyu maga demonio. Ya arria si Jehova con Satanas na cielo. (Revelacion 12:9) Nota tambien que ya pidi permiso si Satanas para pruba con Job y ya obedece con Dios cuando ya habla con ele que no mata con Job.—Job 2:4-6.

16. Con quien kita debe depende para na proteccion?

¹⁶ El Proverbio 18:10 ta habla: “El nombre de Jehova amo un fuerte torre. Alla ta anda el recto y ele hay ricibi proteccion.” Poreso debe kita depende con Jehova para na proteccion. El maga siervo del Dios gendeh ta usa maga anting-anting o maga medicina para protege con el diila mismo cuerpo contra con Satanas y con el maga demonio, y gendeh tambien sila ta tiene miedo con el cosa puede hace el maga espiritista. El maga siervo del Dios ta creé con el cosa ta habla el Biblia: “El ojos de Jehova ta mira enbuenamente con el entero tierra para dale mira el de suyu fuerza para con aquellos quien completo el corazon para con ele.”—2 Cronicas 16:9.

17. Cosa kanaton ta asigura el Santiago 4:7 pero cosa kita debe hace?

¹⁷ Puede tambien tu tene este confianza si sirvi tu con Jehova. El Santiago 4:7 ta habla: “Somete ustedes con el Dios. Resisti ustedes con el Demonio, y ay desaleja le con ustedes.” Si sirvi tu con el verdadero Dios y somete con ele, puede tu asigura que hay protege contigo si Jehova.