Cuando ya casá ustedes, ya tiene tu un nuevo familia. Maskin gendeh perde el de tuyu amor y respeto na de tuyu mayores, el de tuyu mujer ya ahora el de con todo importante gente para contigo. Posiblé, dificil este acepta el cuanto del de tuyu maga pariente. Pero el maga principio na Biblia puede ayudá contigo queda balancé y tiene buen relacion na de tuyu maga pariente mientras ta principia tu el de tuyu nuevo familia.

SI COSA EL BIBLIA TA HABLA: “Honra con el dituyo tata y nana.” (Efeso 6:2) Maskin pa cuanto año ya tu, necesita siempre tu honra y respeta con el de tuyu mayores. Debe tu acorda que el de tuyu mujer, como un anak, necesita tambien dale atencion con el de suyu mayores. “El amor gendeh envidioso,” poreso no sinti que dol ta rebata sila con el atencion del de tuyu mujer.—1 Corinto 13:4; Galacia 5:26.

SI COSA TU PUEDE HACE:

• Evita habla maga palabra igual “Pirmi ya lang conmigo ta hace de menos el de tuyu familia” o “Nunca ya gusta de tuyu nana el cosa yo ta hace”

• Pone el de tuyu mismo cuerpo na situacion del de tuyu mujer

SI COSA EL BIBLIA TA HABLA: “Ay deja el hombre con su tata y nana y ay man junto con su mujer. Y sila dos ay queda un solo cuerpo.” (Marcos 10:7, 8) Maskin casao ya tu, baká ta sinti el de tuyu mayores que responsabilidad lang siempre tu diila. Poreso, baká ta entramete sila na de ustedes matrimonio maskin gendeh ya debe.

Decidi ustedes man maridable si cosa el diila limitacion na de ustedes matrimonio y manda se sabe kanila. Puede se ustedes habla derecta pero con respeto. (Maga Proverbio 15:1) Si tu humilde, calmao y pacencioso, puede tu tiene buen relacion na de tuyu maga pariente y “por causa del amor, aguanta con uno y otro.”—Efeso 4:2.

SI COSA TU PUEDE HACE:

• Si ta sinti tu que dol ta entramete ya el maga pariente na de ustedes vida, discuti este na de tuyu mujer na tiempo que calmao ustedes

• Decidi junto si paquemodo solva con ese