SECCION 9
Adora con Jehova Como Un Familia
“Adora con Aquel quien ya hace el cielo y el tierra.”
Como cosa tu ya aprende na este brosyur, el Biblia ta contene mucho maga principio que puede ayudá contigo y con el de tuyu familia. Quierre si Jehova que queda tu alegre. Ya promete le que “ay dale con ustedes ese maga necesidad de todo el dia,” si hace tu una el adoranza con ele. (Mateo 6:33, El Nuevo Testamento) Quierre gayot le que queda tu amigo de suyu. Pricura tiene buen amistad con Dios. Ese el de con todo grande privilegio que el gente puede tiene.
1 HACE FUERTE EL DE TUYU RELACION CON JEHOVA
SI COSA EL BIBLIA TA HABLA: “Yo ay queda un Tata para con ustedes y ustedes ay queda el dimio maga anak hombre y mujer,” ya habla si Jehova. (2 Corinto 6:18) Quierre el Dios que queda tu amigo de suyu. El rezo amo el un manera para puede se hace. Ta invita contigo si Jehova que “reza firmi.” (Tesalonica 5:17) Quierre le oi si cosa el na de tuyu pensamiento y de tuyu maga lingasa. (Filipo 4:6) Si ta reza tu junto con el de tuyu familia, hay sinti sila que reál para contigo si Jehova.
Puera que converza tu con Dios, necesita tambien tu oi con ele. Puede tu se hace si estudia tu con el de suyu Palabra y maga publicacion que basé na Biblia. (Salmo 1:1, 2) Medita con el cosa tu ta aprende. (Salmo 77:11, 12) Para oi con Dios, necesita tambien tu atende pirmi na maga miting del maga verdadero Cristiano.
Puede tambien tu hace fuerte el de tuyu relacion con Jehova si hay converza tu con otro acerca con ele. Si pirmi tu se hace, mas queda fuerte el de tuyu relacion con ele.
SI COSA TU PUEDE HACE:
-
Dale tiempo cada dia para reza y le con el Biblia
-
Como un familia, dale prioridad con el maga espiritual actividad contra con el entretenimiento
2 HACE MAKA-ALEGRE EL DE FAMILIA ADORANZA
SI COSA EL BIBLIA TA HABLA: “Atraca con Dios y ele ay atraca con ustedes.” (Santiago 4:8) Necesita tu hace schedule para na de familia adoranza * y sigui con ese. (Genesis 18:19) Pero, gendeh lang se el debe hace. El Dios debe queda parte del de ustedes vida. Hay queda fuerte el de ustedes relacion con Dios si ta converza tu con el de tuyu familia acerca con ele “si ta sinta tu na de tuyu casa y si ta camina tu na camino y si ta acusta tu y si ta levanta tu.” (Deuteronomio 6:6, 7) Imita con Josue quien ya habla: “Iyo y el todo quien ta queda na mi casa hay sirvi con Jehova.”
SI COSA TU PUEDE HACE:
-
Hace arreglao y regulár el programa del de familia adoranza que tupao na necesidad del cada miembro del de tuyu familia
^ par. 13 El maga Testigo de Jehova ta dale tiempo cada semana para na junto adoranza del familia. Un alegre ocacion este donde ta discuti sila maga espiritual cosas.
