El nacimiento del anak ta dale alegria y lingasa na man maridable. Como un nuevo mayores, baká espanta ustedes cay dol ta acaba ya lang el de ustedes tiempo y fuerza na cuidada del de ustedes anak. El palta durmida y cambio na emocion puede afecta na de ustedes relacion. Necesita ustedes hace cambio para puede cuida con el de ustedes anak y esta fuerte el de ustedes matrimonio. Paquemodo el maga consejo na Biblia puede ayudá con ustedes enfrenta este maga dificultad?

SI COSA EL BIBLIA TA HABLA: “El amor paciencioso. El amor lastimoso.” Este “gendeh mal custumbre ni canalla. El amor gendeh ta rabia.” (1 Corinto 13:4, 5) Como un nuevo nana, normál lang que na de tuyu anak el de tuyu atencion. Por causa con ese, baká sinti el de tuyu marido que dol ta deja ya tu con ele. Poreso, no ulvida que necesita tambien le el de tuyu atencion. Si tiene tu paciencia y consideracion, hay puede le sinti que importante y necesita tu con ele na cuidada del de ustedes anak.

“Maga marido, necesita tene consideracion con el de ustedes maga mujer.” (1 Pedro 3:7) Entende que necesita el de tuyu mujer usa su fuerza para cuida el de ustedes anak. Tiene le nuevo responsabilidad y baká ta sinti le stress, cansao o tan depress pa gane. Tiene vez, baká hay rabia pa le contigo. Pero, pricura esta calmao cay “el quien gendeh pronto rabia mas bueno pa contra con el un gente poderoso.” (Maga Proverbio 16:32) Entende y suportá con ele.—Maga Proverbio 14:29.

SI COSA TU PUEDE HACE:

• Tata: Ayudá con el de tuyu mujer cuida con el de ustedes anak maskin denoche. Menora el tiempo na otro maga actividad para tiene tu grande hora na de tuyu familia

• Nana: Acepta el ayuda del de tuyu marido na cuidada del de ustedes anak. Si nuay le puede hace enbuenamente, no regaña. Con paciencia enseña con ele

SI COSA EL BIBLIA TA HABLA: “Sila dos ay queda un solo cuerpo.” (Mateo 19:5) Maskin tiene ya ustedes nuevo miembro na familia, acorda que “un solo cuerpo” lang siempre ustedes man maridable. Hace el todo esfuerzo para esta fuerte el de ustedes relacion.

Maga mujer, aprecia con el ayuda y suporta del de ustedes maga marido. El de ustedes maga palabra de apreciacion puede “curá.” (Maga Proverbio 12:18) Maga marido, habla con el de ustedes mujer que ta ama gayot ustedes kanila. Dale importancia si paquemodo sila ta cuida con el familia.—Maga Proverbio 31:10, 28.

“No ustedes busca el de ustedes interes lang, sino el interes del los demas.” (1 Corinto 10:24) Hace primi si cosa el bueno para na de tuyu mujer. Como man maridable, dale tiempo para man cuento, comenda y oi con uno’y otro. Na de ustedes sexuál relacion, no pensa el de tuyu mismo cuerpo lang. Considera el necesidad del de tuyu mujer. El Biblia ta habla: “El marido necesita dale con el mujer el derecho disuyo como mujer. Y ansina tamen el mujer con el marido.” (1 Corinto 7:3, 4) Poreso, no tiene huya discuti acerca con este. El de ustedes paciencia y entendimiento puede hace fuerte con el de ustedes relacion.

SI COSA TU PUEDE HACE:

• Dale tiempo para de ustedes lang dos

• Manda sinti que ta ama tu con el de tuyu mujer por medio na maga simplé cosas, igual como dale tu carta o regalo

SI COSA EL BIBLIA TA HABLA: “Desde bata pa tu, ya sabe ya tu el Sagrada Escritura de Dios, que ya dale contigo sabiduria para tene tu salvacion.” (2 Timoteo 3:15, El Nuevo Testamento) Plaña si paquemodo tu enseña con el de ustedes anak. Maskin na vientre pa lang, tiene ya le abilidad aprende. Ta puede ya tambien le conocé el de ustedes maga voz y afectao ya na de ustedes emocion. Le para con ele mientras diutay pa le. Maskin gendeh pa le entende el cosa tu ta le pero ayuda quel para tiene le gana le si grande ya.

No pensa que bien bata pa el de tuyu anak para oi maga cosas acerca con Dios. Manda con ele oi si ta reza tu con Jehova. (Deuteronomio 11:19) Maskin ta juga ustedes, man cuento acerca na maga cosas que ya hace el Dios. (Salmo 78:3, 4) Mientras ta engranda le, hay sinti le que ta ama ustedes con Jehova y hay aprende tambien le ama con Dios.

SI COSA TU PUEDE HACE:

• Reza que dale contigo sabeduria para enseña con el de tuyu anak

• Repiti el maga palabra y ideá que quierre tu aprende le mientras bata pa