Si Dios Jehova * el ya dale casá con el primer maridable. El Biblia ta habla kanaton que ya crea le con el primer mujer y “ya lleva le este con el hombre.” Bien alegre si Adan poreso ya habla le: “Este ya el bukuk del de mio bukuk y laman del de mio laman.” (Genesis 2:22, 23) Quierre siempre si Jehova que queda alegre el maga man maridable ahora.

Ta pensa tu siguro que puro alegria ya lang si casáo ya. * Pero el deverasan, maskin ta ama gayot na uno’y otro el man maridable ta tiene siempre sila maga problema. (1 Corinto 7:28) Na este brosyur, puede tu incuntra maga principio na Biblia que puede ayudá hace alegre el de tuyu matrimonio y familia, si aplica tu.—Salmo 19:8-11.

SI COSA EL BIBLIA TA HABLA: El marido amo el cabeza del familia.—Efeso 5:23.

Si etu un marido, ta esperanzá si Jehova que hay cuida tu enbuenamente con el de tuyu mujer. (1 Pedro 3:7) Ya hace con ele para puede ayudá contigo y quierre si Jehova que trata tu con el de tuyu mujer con amor y dignidad. (Genesis 2:18) Debe gayot tu ama con el de tuyu mujer y hace una el de suyu bien.—Efeso 5:25-29.

Si etu un mujer, ta esperanzá si Jehova que hay respeta gayot tu con el de tuyu marido y ayudá con ele cumpli el de suyu responsabilidad. (1 Corinto 11:3; Efeso 5:33) Suportá con el de suyu maga decicion y coopera con ele. (Colosa 3:18) Si hace tu se, hay queda tu precioso na vista del de tuyu marido y de Jehova.—1 Pedro 3:1-6.

SI COSA TU PUEDE HACE:

• Preguntá na de tuyu marido o mujer si paquemodo tu puede cumpli enbuenamente el de tuyu responsabilidad. Oi enbuenamente y pricura aplica

• Queda paciencioso. Ta necesitá tiempo para puede aprende si paquemodo hace alegre con uno’y otro

SI COSA EL BIBLIA TA HABLA: Necesita tu pensa el bien del de tuyu mujer. (Filipo 2:3, 4) Manda sinti que precioso le. Acorda que quierre si Jehova que el su maga siervo queda “amable con todo.” (2 Timoteo 2:24) “El converzada que nuay pensa igual como maga lanciada de espada, pero el lenggua del un sabio ta curá.” Poreso, pensa gayot enbuenamente antes de converza. (Maga Proverbio 12:18) El sagrao espiritu de Jehova puede ayudá contigo man cuento na buen manera y con amor.—Galacia 5:22, 23; Colosa 4:6.

SI COSA TU PUEDE HACE:

• Antes ustedes de man cuento acerca maga serioso cosas, reza una para puede tu esta calmao y preparao oi

• Pensa enbuenamente si cosa y si paquemodo tu con este habla

SI COSA EL BIBLIA TA HABLA: Cuando ya casá tu, ustedes man maridable ya queda “un solo cuerpo.” (Mateo 19:5) Pero dos persona siempre ustedes y tiene diferente opinión. Poreso, debe ustedes aprende queda unido na pensamiento y sentido. (Filipo 2:2) Importante el unidad si ta hace decicion. El Biblia ya habla: “Si ta consulta, el maga plano hay tiene buen exito.” (Maga Proverbio 20:18) Sigui con el maga principio na Biblia si ta hace ustedes maga importante decicion.—Maga Proverbio 8:32, 33.

SI COSA TU PUEDE HACE:

• Habla si cosa gayot tu ta sinti, gendeh lang informacion o opinión

• Consulta una con el de tuyu mujer antes de hace decicion