Cuando ya formá si Jehova con el familia, na mayores le ya manda cuida con el diila maga anak. (Colosa 3:20) Como mayores, responsabilidad de tuyu enseña con el de tuyu anak ama con Jehova y queda un responsable persona. (2 Timoteo 1:5; 3:15) Necesita tambien tu sabé si cosa el na corazon del de tuyu anak. Siempre, bien importante el de tuyu mismo ejemplo. Puede tu enseña el Palabra de Jehova na de tuyu anak si pone tu una con ese na de tuyu corazon.—Salmo 40:8.

SI COSA EL BIBLIA TA HABLA: “Man alisto ustedes para oi, pero no conversa dayun.” (Santiago 1:19) No quierre tu que tiene miedo el de tuyu anak man cuento contigo. Necesitá le sabé que preparao tu oi con ele. Pricura esta calmao para puede le habla si cosa le quierre habla. (Santiago 3:18) Si rabion tu y pronto juzga, baká man alang-alang le habla contigo. Queda paciencioso na de tuyu anak y manda pirmi sinti que ta ama tu con ele.—Mateo 3:17; 1 Corinto 8:1.

SI COSA TU PUEDE HACE:

• Asigura que talli tu si quierre man cuento el de tuyu anak

• Pirmi man cuento con el de tuyu anak, gendeh lang si ta tiene problema

SI COSA EL BIBLIA TA HABLA: “El quien ta dale mira hondo entendimiento na un cosa hay tiene buen exito.” (Maga Proverbio 16:20) Tiene vez, necesita tu pone atencion gendeh lang na cosa ta habla el de tuyu anak para entende si cosa gayot le ta sinti. Comon na maga jovenes que hace por demas el diila cuento o larga maga palabra que gendeh intencional. “Si el uno ta contesta dayun na un cosa antes de oi el verdad, de locuras se.” (Maga Proverbio 18:13) No dayun rabia.—Maga Proverbio 19:11.

SI COSA TU PUEDE HACE:

• Oi anay y no sobrá el reaccion, maskin cosa pa habla el de tuyu anak

• Pricura acorda si cosa tu ya sinti y si cosa el importante contigo cuando ansina pa el de tuyu edad

SI COSA EL BIBLIA TA HABLA: “Anak, oi el disciplina del de tuyu tata, y no hace desaire el instruccion del de tuyu nana.” (Maga Proverbio 1:8) Ya dale si Jehova con el tata’y nana autoridad na maga anak. Debe tu enseña con el de tuyu anak respeta y obedece con ustedes. (Efeso 6:1-3) Ta sinti el maga anak si el diila mayores gendeh “unido . . . na pensamiento.” (1 Corinto 1:10) No man peleahan enfrente na de ustedes maga anak para gendeh perde el diila respeto con ustedes como mayores.

SI COSA TU PUEDE HACE:

• Discuti si paquemodo ustedes disciplina con el de ustedes anak

• Si diferente el de ustedes opinión si paquemodo enseña con el de ustedes anak, considera el opinión del de tuyu mujer

SI COSA EL BIBLIA TA HABLA: “Manda canila engranda con disciplina y instruccion que ta sale con el Señor.” (Efeso 6:4, El Nuevo Testamento) Tiene tu cosa debe hace para puede enseña enbuenamente con el de tuyu anak. Necesita tu plaña si paquemodo enseña kanila y incluido alli el disciplina. (Salmo 127:4; Maga Proverbio 29:17) El disciplina gendeh lang basta castigo. Necesita tu hace entende na de tuyu maga anak si porque tu ya dale ley que debe sila sigui. (Maga Proverbio 28:7) Enseña tambien kanila ama con el Palabra de Jehova y entende el maga principio de este. (Salmo 1:2) Hay ayudá se kanila para tiene buen conciencia.—Maga Hebreo 5:14.

SI COSA TU PUEDE HACE:

• Asigura que un reál persona si Jehova na de tuyu maga anak con quien sila puede confia

• Ayudá kanila conocé y evita maga cosas que peligroso na moral, igual como talli na internet y na social network. Enseña kanila si paquemodo desaleja na maga gente quien ta abusa y ta molestia maga bata