Necesita kita cen para puede dale el necesidad del diaton familia. (Maga Proverbio 30:8) Actualmente, “el cen un proteccion.” (Eclesiastes 7:12) Baká dificil con ustedes man maridable man cuento acerca el cen pero no permiti que causá este problema na de ustedes matrimonio. (Efeso 4:32) Debe ustedes confia con uno’y otro y decidi junto si paquemodo man budget con el cen.

SI COSA EL BIBLIA TA HABLA: “Cay si tiene de ustedes ta plania planta un torre, gendeh ba le ay sinta una y carcula el maga gastos, para sabe si tiene le bastante cen para completa el torre?” (Lucas 14:28) Bien importante que plaña ustedes junto si paquemodo usa con el cen. (Amos 3:3) Decidi si cosa ustedes necesita cumpra y si cuanto lang el de ustedes budget. (Maga Proverbio 31:16) Maskin tiene ustedes cen gendeh quierre decir que debe ya ustedes cumpra. Pricura no man debe. Gasta lang el cen que tiene ustedes.—Maga Proverbio 21:5; 22:7.

SI COSA TU PUEDE HACE:

• Si tiene ustedes sobra cen na fin del mes, decidi junto si cosa hace con este

• Si ta sinti ustedes que palta ya el cen, plaña si paquemodo hace menos el gasto. Por ejemplo, en vez de comé afuera mas bueno si cusi ya lang

SI COSA EL BIBLIA TA HABLA: “Habla ustedes el verdad con uno y otro.” (Efeso 4:25) Habla si cuanto gayot el de tuyu incuntrada y gastos na de tuyu mujer.

Consulta pirmi con el de tuyu mujer antes de hace maga grande decicion acerca na cen. (Maga Proverbio 13:10) Si hace tu se, puede evita con el peleahan. Pensa que cen del familia el de tuyu incuntrada gendeh cay de tuyu lang.—1 Timoteo 5:8.

SI COSA TU PUEDE HACE:

• Decidi el valor que puede ustedes gasta maskin gendeh ya pidi permiso con uno’y otro

• No espera que tiene ya problema amo pa discuti acerca el cen