Mientras ta principia ustedes el vida como man maridable, hay enfrenta ustedes maga problema. Por causa este cay diferente el manera si paquemodo ustedes ta pensa, ta sinti y si paquemodo con ustedes ya hace engranda. O baká estaba na otro el problema o na maga cosas que de repente lang ya sucede.

Dol facil lang hace no vale nada con el maga problema pero ta conseja kanaton el Biblia que debe ta con este enfrenta. (Mateo 5:23, 24) Si hay sigui tu con el maga principio na Biblia, puede gayot tu solva con el de tuyu maga problema.

SI COSA EL BIBLIA TA HABLA: “Tiene . . . tiempo para converza.” (Eclesiastes 3:1, 7) Dale tiempo para converza acerca el problema. Habla con el de tuyu mujer si cosa tu deverasan ta sinti y ta pensa. Pirmi ‘habla el verdad’ na de tuyu mujer. (Efeso 4:25) Maskin dificil para controla el de tuyu emocion, no pelea con el de tuyu mujer. Si calmao tu contesta, gendeh guinda na peleahan el de ustedes cuento.—Maga Proverbio 15:4; 26:20.

Maskin gendeh tu conforme na cosa ya habla el de tuyu mujer, trata siempre enbuenamente y dale mira amor y respeto con ele. (Colosa 4:6) Pricura solva dayun con el problema y no man bungul-bungul.—Efeso 4:26.

SI COSA TU PUEDE HACE:

• Decidi si cuando el justo tiempo para discuti con el problema

• Oi si ta converza el de tuyu mujer y espera el de tuyu turno para man cuento

SI COSA EL BIBLIA TA HABLA: “Ama con uno y otro igual como el maga hermano ta ama. Respeta gayot con uno y otro.” (Roma 12:10) Bien importante si paquemodo tu ta oi. Pricura entende el opinión del de tuyu mujer y queda “humilde.” (1 Pedro 3:8; Santiago 1:19) No man tampa que ta oi tu. Si posiblé, deja el cosa tu ta hace y pone atencion con el de tuyu mujer o preguntá si puede ba luego ya lang se discuti. Si trata tu con el de tuyu mujer como amigo en vez de contrallo, gendeh tu dayun-dayun rabia.—Eclesiastes 7:9.

SI COSA TU PUEDE HACE:

• Oi y considera el de suyu opinión maskin pa gendeh tu ta gusta el cosa tu ta oi

• Pricura entende con el cosa le ta habla. Observa el accion y tono de converzada del de tuyu mujer

SI COSA EL BIBLIA TA HABLA: “Tiene beneficio na todo clase de esfuerzo, pero el puro cuento lang ta resulta na escasez.” (Maga Proverbio 14:23) Gendeh bastante que ya puede ustedes incuntra solucion na problema. Necesita hace si cosa ustedes dos ya decidi. Posiblé gendeh se facil hace pero gendeh sayang el de tuyu esfuerzo. (Maga Proverbio 10:4) Hay tiene ustedes “buen premio” si man ayudahan ustedes.—Eclesiastes 4:9.

SI COSA TU PUEDE HACE:

• Decidi si cosa puede hace el cada uno para solva con el problema

• Examina si cosa ya ustedes ya puede hace