Quierre si Jehova que queda kita leal. (Miqueas 6:8) Bien importante este especialmente na matrimonio, cay dificil confia con el un persona si ele gendeh leal. Necesita el confianza para mas queda hondo el amor.

Ahora, mucho man maridable tan separtahan por causa cay tiene diila gendeh leal. Para gendeh se sucede con ustedes, debe tu hace este dos cosas.

SI COSA EL BIBLIA TA HABLA: “Asigura el maga cosas que mas importante.” (Filipo 1:10, NW) El de ustedes matrimonio amo el uno na maga bien importante cosas na de tuyu vida. Debe lang con este dale prioridad.

Quierre si Jehova que dale tu atencion con el de tuyu mujer y vivi junto con alegria. (Eclesiastes 9:9) Claro que no tu hace no vale nada con el de tuyu mujer. Debe ustedes busca manera si paquemodo hace alegre con uno’y otro. (1 Corinto 10:24) Manda sinti con el de tuyu mujer que importante y necesita tu con ele.

SI COSA TU PUEDE HACE:

• Asigura que pirmi ustedes tiene tiempo para na uno’y otro y dale con ele el de tuyu atencion

• Pirmi pensa “kame” en vez de “iyo”

SI COSA EL BIBLIA TA HABLA: “Todo maga hombre quien ta mira con un mujer con mal deseo, ya comete ya sila adulterio con ese mujer na su corazon.” (Mateo 5:28) Si el un marido pirmi ta pensa maga cosas que imoral, igual lang como ta traiciona le con su mujer.

Si Jehova ya habla que debe tu “protege con el de tuyu corazon.” (Maga Proverbio 4:23; Jeremias 17:9) Para puede este hace, debe tu con cuidao na cosa tu ta mira. (Mateo 5:29, 30, NW) Copiá el ejemplo de Job quien ya promete que gendeh gayot le mira con mal deseo na otro mujer. (Job 31:1) Queda determinao que no mira pornografia y no desea con otro puera con el de tuyu mujer.

SI COSA TU PUEDE HACE:

• Dale mira na otro que leal tu na de tuyu mujer

• Pensa si cosa hay sinti el de tuyu mujer. Termina dayun el maskin cosa relacion que tiene tu na otro que puede hace sinti duele con el de tuyu mujer