Maskin pa ta hace tu el todo para queda alegre el de ustedes matrimonio y familia, ta sucede lang siempre el maga cosas que ta causa tristeza con ustedes. (Eclesiastes 9:11) Na ese maga situacion, el Dios hay ayudá kanaton. Si aplica tu el maga siguiente principio na Biblia, puede este ayudá con el de tuyu familia enfrenta maskin pa maga grabe situacion.

SI COSA EL BIBLIA TA HABLA: “Deja todo el de ustedes maga lingasa con Ele, cay Ele ta cuida con ustedes.” (1 Pedro 5:7) Pirmi acorda que el Dios gendeh el causa del de tuyu problema. (Santiago 1:13) Mientras ta pricura tu tiene buen relacion con ele, hay ayudá gayot le contigo. (Isaias 41:10) “Hace salé con ele el cosa ustedes ta sinti.”—Salmo 62:8.

Hay obtene tambien tu comforta si le y estudia tu con el Biblia cada dia. Si hace tu se, hay sinti tu si paquemodo si Jehova ‘ta dale consuelo kanaton na todo diaton maga sufrimiento.’ (2 Corinto 1:3, 4; Roma 15:4) Ya promete le que dale contigo “el paz del Dios . . . que noay quien ta puede entende.”—Filipo 4:6, 7, 13.

SI COSA TU PUEDE HACE:

• Reza con Jehova que ayudá contigo esta calmao y puede pensa enbuenamente

• Pensa el maga cosas que puede tu hace y iscuji si cosa el mas bueno

SI COSA EL BIBLIA TA HABLA: “El corazon del un gente que tiene entendimiento ta saca saber, y el orejas del sabio ta busca saber.” (Maga Proverbio 18:15) Sabé el situacion y necesidad del cada miembro del de tuyu familia. Converza y oi kanila.—Maga Proverbio 20:5.

Paquemodo si tiene quien ya muri na familia? No esconde el cosa tu ta sinti. Acorda que maskin “si Jesus ya llora.” (Juan 11:35; Eclesiastes 3:4) Importante tambien que tiene tu bastante descanso y durmida. (Marcos 6:31) Ayudá se contigo para mas facil enfrenta con el situacion.

SI COSA TU PUEDE HACE:

• Maskin nuay tragedia, pirmi ya man cuento con el de tuyu familia. Si llega man maga problema, gendeh ya sila man alang-alang converza contigo

• Man cuento con aquellos quien ya enfrenta igual situacion

SI COSA EL BIBLIA TA HABLA: “El verdadero amigo ta ama na todo tiempo, y un hermano quien ya nace para na tiempo de dificultad.” (Maga Proverbio 17:17) Quierre contigo ayudá el de tuyu maga amigo y amiga pero baká no sabe sila si paquemodo. No tiene huya habla kanila si cosa gayot tu necesita. (Maga Proverbio 12:25) Pidi tambien ayuda con aquellos quien ta entende con el Biblia si paquemodo tu aplica el maga principio na Biblia. Puede contigo ayudá el guia que hay dale sila.—Santiago 5:14.

Hay obtene tu el suporta que necesita tu si pirmi tu man junto con aquellos quien deverasan ta creé con Dios y ta confia na su maga promesa. Queda tambien tu alegre si anima tu con el maga maluya. Habla kanila si porque tu ta confia con Jehova y na su maga promesa. Ayudá con otro y no man lejos con aquellos quien ta ama contigo.—Maga Proverbio 18:1; 1 Corinto 15:58.

SI COSA TU PUEDE HACE:

• Man cuento con el de tuyu amigo y acepta el de suyu ayuda

• Habla si cosa gayot el de tuyu maga necesidad