1-3. (a) Cosa ta sinti el manada gente acerca na diila trabajo? (b) Cosa el mirada del Biblia na trabajo y cosa maga pregunta kita considera na este capitulo?

PARA na manada gente na mundo ahora, gendeh kanila ta dale alegria el diila trabajo. No quierre sila anda na trabajo cada dia cay gendeh sila ta gusta con el diila trabajo. Cosa sila hace para tiene sila positivo mirada y queda alegre na diila trabajo?

² El Biblia ta anima que necesita kita tiene positivo mirada na trabajo. Ta habla este que un bendicion el trabajo y el resulta de ese. Ya escribi si Solomon: “El cada uno debe come y toma y queda alegre na todo de suyu trabajo. Regalo se del Dios.” (Eclesiastes 3:13) Si Jehova, quien ta ama kanaton y quierre dale si cosa el bueno para kanaton, quierre que queda kita alegre na diaton trabajo y na resulta de ese. Para esta na de suyu amor, necesita kita vivi harmonia na de suyu mirada y principio acerca na trabajo.​—Le con el Eclesiastes 2:24; 5:18.

³ Na este capitulo, considera kita con este cuatro pregunta: Paquemodo kita tiene alegria na diaton trabajo? Cosa clase de trabajo el gendeh para na maga verdadero Cristiano? Paquemodo kita queda balance na diaton trabajo y na maga espiritual actividad? Y cosa el de con todo importante trabajo que puede kita hace? Pero discuti kita una el ejemplo del dos de con todo buen trabajador na universo​—si Jehova y si Jesucristo.

4, 5. Paquemodo ya dale mira el Biblia que buen trabajador si Jehova?

⁴ Si Jehova amo el Supremo Trabajador. El Genesis 1:1 ta habla: “Na principio, ya crea el Dios con el cielo y con el tierra.” Cuando ya acaba crea el Dios incluido ya el tierra, ya habla le que “bien bonito” este. (Genesis 1:31) Quierre decir, bien alegre le na cosa le ya hace na tierra. Asigurao que si Jehova, el “alegre Dios,” ya tiene gayot alegria na de suyu maga trabajo.​—1 Timoteo 1:11, NW.

⁵ El diaton Dios nuay descansa trabaja. Despues crea con el tierra y con el todo cosas aqui, si Jesus ya habla: “El dimio Tata ta trabaja firmi.” (Juan 5:17) Cosa ta hace el de suyu Tata? Activo le ta guia y ta cuida con el maga gente. Ya hace le “un nuevo creacion” que ta refiri con el maga iscujido Cristiano quien rula junto con Jesus na cielo. (2 Corinto 5:17, NW) Ta continua le trabaja para cumpli el de suyu proposito para na maga gente​—que todo quien ta ama con ele hay tiene vida eterna na nuevo mundo. (Roma 6:23) Asigurao que bien alegre si Jehova na resulta del de suyu trabajo. Millones el ya acepta con el mensaje del Reino, ya queda cerca con Dios y ya hace maga cambio para esta na de suyu amor.​—Juan 6:44.

6, 7. Paquemodo ya dale mira si Jesus que trabajor le?

⁶ Si Jesus ya trabaja enbuenamente por bien largo tiempo. Antes bene na tierra como un gente, ya sirvi le como el “buen trabajador” del Dios na creacion del todo cosas “na cielo y na mundo.” (Proverbio 8:22-31; Colosa 1:15-17) Cuando na tierra si Jesus, ya continua le queda buen trabajador. Joven pa, ya aprende le el trabajo de construida y conocido con ele como “el carpintero.” * (Marcos 6:3)  Pesao este clase de trabajo y necesita ma-abilidad​—especialmente na tiempo que nuay pa yarda, nuay onde puede cumpra materiales y nuay pa maga herramienta de corriente. Ta puede ba tu imagina con Jesus que ta saca palo​—posible ta curta le maga pono y ta jala con este hasta na lugar donde le ta trabaja? Ta puede ba tu imagina con ele que ta planta casa​—ta prepara con el techo, ta hace puerta y maga mueble? Asigurao que ya experiencia mismo si Jesus el alegria na de suyu trabajo.

⁷ Bien trabajador tambien si Jesus llega na de suyu ministerio. Por tres y media año, ocupao gayot le na este bien importante trabajo. Ciendo quierre le hace alcanza el mensaje na mas manada gente, nuay le hace usik el de suyu tiempo. Ta despierta le temprano y ta predica hasta denoche. (Lucas 21:37, 38; Juan 3:2) Ya viaja le “na maga pueblo y maga barrio ta predica y ta anuncia el Buen Noticia del Reino de Dios.” (Lucas 8:1) Ya cubri si Jesus mas de cien kilometro y ta camina na mapolvos camino para lleva el buen noticia na maga gente.

8, 9. Paquemodo ya tiene alegria si Jesus na de suyu trabajo?

⁸ Ya tiene ba alegria si Jesus na de suyu trabajo na ministerio? Si! Ya siembra le similla de verdad del Reino y ya deja le con ese que puede ya cosecha. El hacida del trabajo del Dios ya dale fuerza y ya sustene con Jesus poreso conforme le gendeh come para puede hace acaba con el trabajo. (Juan 4:31-38) Pensa el alegria que ya sinti le na fin del de suyu ministerio na tierra cuando ya habla le con el de suyu Tata: “Ya dale yo con Uste el gloria aqui na mundo, cay ya acaba ya yo hace el maga trabajo que Uste ya manda conmigo.”​—Juan 17:4.

⁹ Claro que si Jehova y si Jesus el de con todo buen ejemplo quien ya tiene alegria na diila trabajo. El diaton amor con Jehova el ta manda move kanaton para “imita con el Dios.” (Efeso 5:1) El diaton amor con Jesus el ta manda  move kanaton para “sigui na disuyo maga paso.” (1 Pedro 2:21) Ahora, examina kita si paquemodo tambien kita puede queda alegre na diaton trabajo.

10, 11. Cosa kanaton puede ayuda para queda kita positivo na diaton trabajo?

¹⁰ Parte na vida del maga verdadero Cristiano el trabajo. Quierre kita queda alegre y contento na diaton trabajo pero dificil este si gendeh kita ta gusta con el diaton trabajo. Paquemodo kita queda alegre na ese situacion?

¹¹ Queda positivo. Gendeh kita pirmi puede cambia con el diaton circumstancia pero puede kita cambia el diaton mirada con ese. Si medita kita si paquemodo el Dios ta pensa, puede se ayuda para queda kita positivo na diaton trabajo. Por ejemplo, si etu el cabeza del familia, acorda que maskin cosa de diutay el de tuyu trabajo, ta ayuda se para puede tu dale el material necesidad del de tuyu familia. Poreso, importante con Dios si paquemodo tu ta cuida con el de tuyu familia. El de suyu Palabra ta habla que el quien gendeh ta dale el necesidad del familia, ‘mas malo pa con el gente nuay fe.’ (1 Timoteo 5:8) Si pensa tu que por medio del tuyu trabajo ta puede tu cumpli el responsibilidad que ya dale contigo el Dios, ayuda se para tiene tu alegria​—un cosa que posible gendeh ta experiencia el de tuyu maga uban na trabajo.

12. Cosa el maga beneficio si honesto kita y ta trabaja enbuenamente?

¹² Trabaja enbuenamente y queda honesto. Beneficia kita si ta trabaja kita enbuenamente. Ta aprecia gayot el maga amo con el maga buen trabajador y ma-abilidad. (Proverbio 12:24; 22:29) Como maga verdadero Cristiano, debe tambien kita queda honesto​—gendeh ta  ruba sen, materiales o hora na diaton trabajo. (Efeso 4:28) Como cosa kita ya aprende na capitulo que una con este, tiene buen resulta si honesto kita. Ta confia con el un trabajador que honesto. Ta puede man nota el diaton amo con el diaton buen ejemplo o gendeh, tiene kita alegria cay sabe kita que ‘limpio el diaton conciencia’ y alegre kanaton el Dios con quien kita ta ama.​—Maga Hebreo 13:18; Colosa 3:22-24.

13. Cosa posible el resulta si bueno el diaton conducta na lugar onde kita ta trabaja?

¹³ Acorda que el diaton conducta ta dale gloria con Dios.  Si ta actua kita asegun na alto principio de Cristiano na lugar onde kita ta trabaja, asigurao que el otro hay nota kanaton. Cosa el resulta? ‘Ta dale kita honor con el doctrina del diaton Dios y Salvador.’ (Tito 2:9, 10) Por medio na diaton buen conducta, el otro puede mira con el buen resulta del diaton adoranza. Cosa tu sinti si ya sabe tu que el de tuyu uban na trabajo ya queda interesao na verdad por causa na de tuyu buen ejemplo? Y mas pa, considera este: Tiene pa ba mas grande premio contra sabe que el de tuyu buen conducta ta dale gloria con Jehova y ta hace alegre con ele?​—Le con el Proverbio 27:11; 1 Pedro 2:12.

14-16. Si decidi kita acerca na un clase de trabajo, cosa maga pregunta kita necesita considera?

¹⁴ El Biblia gendeh ta contene maga especifico detalle acerca na maga clase de trabajo que aceptable y gendeh. Pero gendeh este quierre decir que puede lang kita acepta maskin cosa clase de trabajo. El Escritura puede ayuda kanaton iscuji buen trabajo que ta hace alegre con Dios y evita clase de trabajo que gendeh aceptable con ele. (Proverbio 2:6) Si decidi kita acerca na un clase de trabajo, tiene dos importante pregunta que necesita kita considera.

¹⁵ Este ba clase de trabajo ta manda kanaton hace maga cosas que ta condena el Biblia? El Palabra del Dios claro ta condena con el rubada, imbusterias y hacida de maga imagen. (Exodo 20:4; Maga Actividad 15:29; Efeso 4:28; Revelacion 21:8) Gendeh gayot kita acepta maskin cosa trabajo que ta manda kanaton hace ese maga cosas. Por causa na diaton amor con Jehova, gendeh kita acepta trabajo que ta viola con el maga mandamiento del Dios.​—Le con el 1 San Juan 5:3.

 ¹⁶ Por medio ba na ese trabajo ta suporta kita maga mal practica? Considera un ejemplo. Gendeh malo que trabaja na construction. Pero, paquemodo si manda construi iglesia con el un Cristiano? Deverasan, el de suyu trabajo gendeh con ele ta manda hace cosas que directa envuelto na falso adoranza. Pero, si trabaja le na construida del iglesia, gendeh gaha le ta suporta con el trabajo de falso enseñanza? (Revelacion 18:4)  Como maga quien ta ama con Jehova, no quierre gayot kita queda envuelto na maga practica que contra na Biblia.

17. (a) Cosa-cosa kita puede considera si ta hace decicion acerca na trabajo? (Mira con el cajon “ Debe Ba Yo Acepta Con El Trabajo?”) (b) Paquemodo kanaton puede ayuda el diaton conciencia para hace maga decicion que ta hace alegre con Dios?

¹⁷ Manada maga pregunta acerca na trabajo el puede contesta si pensa enbuenamente con el contestacion na parapo 15 y 16. Tiene pa otro maga cosas que debe kita considera si ta hace maga decicion acerca na trabajo. * Gendeh kita expecta que hay dale ley el fiel y sabio esclavo na todo situacion que posible sucede. Poreso, necesita kita pensa con este enbuenamente. Como cosa kita ya  aprende na Capitulo 2, necesita kita enseña con el diaton conciencia por medio na estudiada si paquemodo aplica con el Palabra del Dios na diaton vida. Si ta “pensa enbuenamente para puede distingui el cosas bueno y malo,” el diaton conciencia puede ayuda kanaton para hace decicion que ta hace alegre con Dios y ayuda kanaton esta na de suyu amor.​—Hebreo 5:14, El Nuevo Testamento.

18. Porque gendeh facil esta balance na espiritual?

¹⁸ Na este “ultimo maga dia” que “tene maga dificultad,” gendeh facil esta balance na espiritual. (2 Timoteo 3:1) Dificil incuntra y tiene permanente trabajo. Como maga verdadero Cristiano, sabe kita que importante trabaja para puede dale el necesidad del diaton familia. Pero si gendeh kita tiene cuidao, posible afecta na diaton servicio y adoranza con Dios el influencia del mundo acerca na materialismo. (1 Timoteo 6:9, 10) Discuti kita si paquemodo queda balance para puede asigura “el maga cosas que mas importante.”​—Filipo 1:10, NW.

19. (a) Porque debe kita confia con Jehova? (b) Cosa kita puede evita si confia gayot kita con Dios?

¹⁹ Confia gayot con Jehova. (Le con el Proverbio 3:5, 6.) Debe lang kita confia con ele cay ta ama le kanaton. (1 Pedro 5:7) Mas sabe le el diaton necesidad contra kanaton y gendeh corto el de suyu mano. (Salmo 37:25) Poreso, debe lang kita creé con el cosa ta habla el de suyu Palabra: “No ustedes man ambriento. Comforma ustedes con el maga cosa-cosa tiene ustedes, cay el Dios ya habla: Gendeh yo contigo ay deja ni gendeh yo ay abandona contigo.” (Maga Hebreo 13:5) Manada maga siervo de Jehova quien ta dedica largo tiempo na servicio con ele el puede dale prueba que ta dale si Jehova el diila  maga necesidad. Si confia gayot kita que cuida kanaton si Jehova, puede kita evita el sobra lingasa si paquemodo kita dale el necesidad del diaton familia. (Mateo 6:25-32) Gendeh kita permiti que el diaton trabajo sangga con el diaton maga espiritual actividad igual el predicacion del buen noticia y atendida na maga miting.​—Mateo 24:14; Maga Hebreo 10:24, 25.

20. (a) Cosa quierre decir que hace centro na un cosa el de tuyu ojos? (b) Paquemodo esta centro el de tuyu ojos na hacida del voluntad del Dios?

 ²⁰ Hace centro na un cosa el de tuyu ojos. (Le con el Mateo 6:22, 23, NW.) Ese quierre decir que gendeh kita hace complicao con el diaton vida. El ojos del un Cristiano centro lang na un cosa​—el hacida del voluntad del Dios. Si centro con ese el diaton ojos, gendeh kita pricura tiene trabajo que grande el sueldo y desea mas alto estado de vida. Gendeh tambien kita pricura tiene maga de con todo nuevo y bale material cosas que ta manda kanaton creé el otro que necesita para queda alegre. Paquemodo esta centro el de tuyu ojos na hacida del voluntad del Dios? Evita man debe si gendeh necesita. No hace complicao de tuyu vida por causa na maga cosas que ta necesita grande tiempo y atencion. Sigui con el consejo del Biblia que queda contento na “comida y camisa.” (1 Timoteo 6:8) Pricura hace simple el de tuyu vida.

21. Porque necesita kita pensa si cosa el diaton prioridad y cosa debe el una na diaton vida?

²¹ Hace prioridad con el maga espiritual cosas. Ciendo limitao el diaton tiempo, necesita kita pensa si cosa el diaton maga prioridad. Si gendeh se kita hace, acaba el diaton tiempo na maga cosas que gendeh importante y nuay mas kita tiempo para na maga cosas que mas importante. Cosa debe el una na diaton vida? Manada na mundo ahora el ta pricura tiene mas alto educacion para tiene sila trabajo que grande el sueldo. Pero si Jesus ya anima con el de suyu maga siguidores que ‘busca una con el Reino.’ (Mateo 6:33) Como maga verdadero Cristiano, debe una na diaton vida el Reino del Dios. Debe puede mira na diaton maga decicion, plano y actividad que mas importante kanaton el bien del Reino y el voluntad del Dios contra con el maga material cosas.

22, 23. (a) Cosa el primer trabajo del maga verdadero Cristiano y paquemodo kita dale mira que importante este kanaton? (Mira con el cajon “ Alegre Yo Y Contento Por Causa Na De Mio Decicion.”) (b) Cosa el de tuyu determinacion acerca na de tuyu trabajo?

²² Ciendo sabe kita que cerca ya gayot el fin, ta hace kita centro el diaton atencion na primer trabajo del maga verdadero Cristiano​—predica y hace dicipulo. (Mateo 24:14; 28:19, 20) Igual con Jesus, quierre kita queda ocupao na este trabajo que ta salva vida del maga gente. Paquemodo kita dale mira que importante kanaton este trabajo? Mayoria del maga siervo del Dios el con todo corazon ta dedica el diila tiempo na predicacion como maga publicador na congregacion. El cuanto ya hace maga adjustment para puede sila sirvi como maga pioneer o misionario. Cay sabe sila que importante tiene maga goal na servicio con Jehova, manada mayores ya anima con el diila maga anak que sirvi como pioneer o otro pa. Alegre ba sila na trabajo que ta hace sila na ministerio? Si! El con todo corazon servicio con Jehova amo el manera de vida que ta resulta na grande alegria y manada bendicion.​—Le con el Proverbio 10:22.

²³ Manada kanaton el ta dedica grande tiempo na trabajo para puede dale el necesidad del diaton familia. Acorda que quierre si Jehova que alegre kita na diaton trabajo. Puede se kita experiencia si el diaton custumbre y accion harmonia na de suyu maga principio. Pero debe kita queda determinao que gendeh permiti con el diaton trabajo que sangga con el mas importante trabajo​—el predicacion del buen noticia acerca na Reino del Dios. Si hace kita con este una na diaton vida, ta dale kita mira que ta ama kita con Jehova y hay esta kita na de suyu amor.