1, 2. Porque tu ta ama con Dios Jehova?

TA AMA ba tu con Dios? Si ya dedica ya tu el de tuyu vida con Jehova, asigurao que el de tuyu contestacion, si. Natural lang para kanaton que ama con Jehova. Ta ama kita con Dios cay ta ama le kanaton. El Biblia ta habla: “Necesita kita ama, cay el Dios ya ama canaton una.”​—1 San Juan 4:19.

² Si Jehova el una ya demonstra amor kanaton. Ya dale le kanaton un bonito mundo para onde queda. Ta dale le el diaton maga material necesidad. (Mateo 5:45) El mas importante, ta dale le el diaton espiritual necesidad. Ya dale le kanaton el de suyu Palabra, el Biblia. Mas pa, ta invita le kanaton que reza con ele y ta promete le que oi le kanaton y dale el de suyu sagrao espiritu para ayuda kanaton. (Salmo 65:2; Lucas 11:13) Y el mas importante de todo, ya imbia le con el de suyu precioso Anak para rescata kanaton desde na pecado y muerte. Que bien grande el amor de Jehova para kanaton!​—Le con el Juan 3:16; Roma 5:8.

3. (a) Cosa kita necesita hace para esta na amor del Dios? (b) Cosa importante pregunta kita necesita considera y onde kita puede incuntra el contestacion?

³ Quierre si Jehova que beneficia kita na de suyu amor  hasta para cuando. Pero, talli kanaton el decicion si quierre ba kita beneficia o gendeh. El Palabra del Dios ta anima kanaton: “Esta ustedes na amor de Dios . . . [con esperanza de] Vida Eterno.” (San Judas 21) El expresion “esta ustedes” ta dale mira que necesita kita hace accion para esta na amor del Dios. Debe kita demonstra el diaton amor con ele. Entonces, debe kita considera con este importante pregunta, ‘Paquemodo yo demonstra el de mio amor con Dios?’ El contestacion puede incuntra na inspirao palabra de apostol Juan: “Ama con el Dios quiere decir obedece su maga mandamiento. Y el disuyo maga mandamiento gendeh pesao.” (1 San Juan 5:3) Debe kita  examina enbuenamente si cosa se quierre decir cay quierre kita dale mira con el diaton Dios que ta ama gayot kita con ele.

4, 5. Paquemodo tu ya principia ama con Jehova?

⁴ “Ama con el Dios”​—cosa ta pensa si apostol Juan cuando ya escribi le con ese maga palabra? Ta refiri le con el cosa kita ta sinti para con Dios. Ta acorda pa ba tu si del cuando tu ya principia ama con Jehova?

⁵ Acorda con el tiempo cuando primer vez tu ya aprende con el verdad acerca con Jehova y el de suyu proposito y ya principia tu tiene fe. Ya puede tu sabe que maskin tiene tu pecado y nuay personal relacion con Dios, si Jehova por medio con Cristo ya dale contigo el oportunidad para obtene el perfecto vida que ya hace perde si Adan. (Mateo 20:28; Roma 5:12, 18) Ya puede tu entende si paquemodo de grande el sacrificio que ya hace si Jehova cuando ya imbia le con el de suyu precioso Anak para muri na bien de tuyu. Por causa con ese, ya principia tu ama con Dios quien ya dale mira ese clase de grande amor contigo.—Le con el 1 San Juan 4:9, 10.

6. (a) Paquemodo puede dale mira el deverasan amor? (b) Cosa tu ya hace por causa na amor con Dios?

⁶ El cosa tu ya sinti amo el principio pa lang del de tuyu deverasan amor para con Jehova. El amor gendeh basta un sentido lang. Gendeh bastante que habla kita, “Ta ama yo con Jehova.” Igual con el fe, puede mira el deverasan amor para con Dios por medio na accion. (Santiago 2:17) Ta dale kita mira el diaton amor si ta hace kita el maga cosas que ta hace alegre con el persona con quien kita ta ama. Poreso, si con todo corazon tu ta ama con Jehova, hay tiene tu el deseo vivi na manera que ta hace alegre con el de tuyu Tata na cielo. Un Testigo de Jehova  ya ba tu? Entonces, el de tuyu hondo amor y devocion con Jehova amo el ya ayuda contigo para hace el bien importante decicion na de tuyu vida. Ya dedica tu el de tuyu vida con Jehova para hace el de suyu voluntad y ya bautiza. (Le con el Roma 14:7, 8.) Para puede cumpli con el cosa tu ya promete con Jehova, tiene pa tu cosa debe hace.

7. Cosa el cuanto especifico mandato del Dios? Paquemodo tu dale mira que ta obedece tu con ese maga mandamiento?

⁷ Ya explica si Juan si cosa quierre decir del amor con Dios: “Obedece su maga mandamiento.” Cosa el maga mandamiento del Dios? Ya dale si Jehova kanaton maga especifico mandato por medio na de suyu Palabra, el Biblia. Por ejemplo, ya prohibi le el maga practica igual burracherias, sexual imoralidad, idolatria, ladronadas y imbusterias. (1 Corinto 5:11; 6:18; 10:14; Efeso 4:28; Colosa 3:9) Ta obedece kita con el mandamiento del Dios si ta vivi kita harmonia na de suyu maga principio acerca na moral.

8, 9. Paquemodo kita puede sabe si cosa el ta hace alegre con Jehova maskin na maga situacion que donde nuay especifico ley na Biblia? Dale un ejemplo.

⁸ Pero para hace alegre con Jehova, tiene pa otro cosa que necesita kita hace puera que obedece con el de suyu maga especifico ley. Nuay kanaton dale maga ley si Jehova para na todo aspeto del diaton vida. Poreso, na cada dia puede siempre kita enfrenta manada situacion que donde nuay especifico mandamiento na Biblia. Na ese maga situacion, paquemodo kita sabe si cosa ta hace alegre con Jehova? El Biblia claro ta dale mira si cosa el na pensamiento del Dios. Mientras ta estudia kita el Biblia, ta aprende kita si cosa el aceptable con Jehova y si cosa le ta odia. (Le con el Roma 12:9; Proverbio 6:16-19) Ta  puede kita sabe si cosa maga custumbre y accion el aceptable con ele. Si aprende kita mas acerca con el personalidad y maga principio de Jehova, mas puede kita hace maga decicion y accion que aceptable con ele. Poreso, maskin na maga situacion que donde nuay especifico ley na Biblia, puede siempre kita sabe “si cosa ba el querer del Dios.”—Efeso 5:17.

⁹ Por ejemplo, nuay especifico mandato na Biblia que ta prohibi kanaton mira maga salida o programa na TV que ta dale mira grabe violencia y sexual imoralidad. Pero necesita pa ba kita especifico ley para no mira ansina clase de salida? Sabe kita si paquemodo si Jehova ta mira con ese. El de suyu Palabra claro ta habla kanaton: “Ta odia [si Jehova] con aquellos quien ta ama violencia.” (Salmo 11:5) Ta habla tambien este: “El Dios hay juzga con el maga gente ta comete sexual imoralidad.” (Maga Hebre 13:4, NW) Si medita kita con ese maga texto, puede kita sabe si cosa el querrer de Jehova. Poreso, decidi kita que gendeh mira maga salida que ta odia el Dios por medio na TV, internet y otro pa. Sabe kita que alegre si Jehova si ta evita kita con el mal influencia del mundo que ta hace pasa por medio del entretenimiento. *

10, 11. Porque kita ta iscuji obedece con Jehova y cosa clase de obediencia kita ta dale con ele?

¹⁰ Cosa gayot el razon si porque kita ta obedece con el mandamiento del Dios? Porque kita quierre vivi cada dia na manera que aceptable con ele? Gendeh kita se ta hace para lang gendeh castiga kanaton o para evita maga mal resulta que ta experiencia aquellos quien ta ignora con el voluntad del Dios. (Galacia 6:7) Sino, ta obedece kita con Jehova cay quierre kita dale mira el diaton  amor con ele. Igual si paquemodo el bata quierre ganá el favor del de suyu tata, quierre tambien kita ganá el favor de Jehova. (Salmo 5:12) Ele el diaton Tata y ta ama kita con ele. Hay queda gayot kita alegre si vivi kita na manera que puede “obtene el favor de Jehova.”​—Proverbio 12:2.

¹¹ Entonces ta obedece kita gendeh cay contra gusto o depende na diaton situacion. * Gendeh kita ta iscuji si cosa mandamiento lang kita obedece. Ta obedece kita maskin na maga dificil situacion. Ta ‘somete kita con todo corazon.’ (Roma 6:17) Ta sinti kita igual con apostol Pablo quien ya habla: “Ta ama gayot yo con el Ley del Dios.” (Roma 7:22) Si, alegre kita obedece con Jehova. Sabe kita que ta pidi le kanaton que obedece gayot con ele y debe lang kita se hace. (Deuteronomio 12:32) Quierre kita que habla kanaton si Jehova el cosa ya habla el de suyu Palabra acerca con Noe. Cay ta ama le con Dios y obediente con ele por cuanto decada, el Biblia ya habla: “Si Noe ya hace asegun na todo cosas que ya manda con ele el Dios. Ese mismo el cosa le ya hace.”—Genesis 6:22.

12. Cosa clase de obediencia el puede dale alegria con Jehova?

¹² Cosa ta sinti si Jehova si con todo corazon kita ta obedece con ele? El de suyu Palabra ta habla que ta hace kita ‘alegre con el de suyu corazon.’ (Proverbio 27:11) Deverasan ba que ta puede kita hace alegre con el Soberano Dios na entero universo si ta obedece kita con ele? Si! Ya crea kanaton si Jehova con libertad para decidi. Este quierre decir que puede kita iscuji obedece con Dios o iscuji desobedece con ele. (Deuteronomio 30:15, 16, 19, 20) Si iscuji kita obedece con Jehova cay ta ama kita con ele, ta  dale kita grande alegria con el diaton Tata na cielo. (Proverbio 11:20) Ta iscuji tambien kita el de con todo buen manera de vida.

13, 14. Porque kita puede habla que el mandamiento del Dios “gendeh pesao” y paquemodo kita este puede ilustra?

¹³ Acerca na maga mandamiento de Jehova, si apostol Juan ya habla: “El disuyo maga mandamiento gendeh pesao.” Na otro Chavacano translation del Biblia, este texto ta habla: “El di suyo maga mandamiento hende dificil para obedece.” (El Nuevo Testamento) Gendeh kanaton ta manda si Jehova maga cosas que gendeh kita puede hace. * El de suyu maga ley puede cumpli el maga imperfecto gente.

¹⁴ Como ilustracion, ya pidi contigo ayuda el de tuyu amigo para transfiri de suyu carga na casa onde le hay cambia. Tiene maga carton que necesita carga. Cuanto de este libiano que puede lang carga el un gente pero el otro pesao y ta necesita dos gente para carga. Ya iscuji el de tuyu amigo maga carton que hay carga tu. Manda ba le carga contigo maga carton que sabe le que pesao para contigo? Gendeh. No quierre le que balda tu cay ya pricura tu carga con ese solo-solo. Na igual manera, el diaton amable Dios gendeh kanaton ta pidi que obedece maga mandamiento que bien dificil para cumpli. (Deuteronomio 30:11-14) Nunca le se hace. Sabe si Jehova el diaton limitacion, cay “sabe le si paquemodo kanaton ya forma y ta acorda que polvos kita.”​—Salmo 103:14.

15. Porque kita puede confia que para na bien diaton el maga mandamiento de Jehova?

 ¹⁵ El maga mandamiento de Jehova gendeh gayot pesao; sino para se na diaton bien. (Le con el Isaias 48:17.) Poreso ya puede habla si Moises con el Israel de antes: “Ya manda kanaton si Jehova cumpli con este todo ley y tiene miedo con Jehova el diaton Dios que para na diaton bien, para puede kita continua vivi igual como ahora.” (Deuteronomio 6:24) Puede tambien kita confia que cuando ya dale le maga ley kanaton, bien diaton el cosa na pensamiento de Jehova​—bien diaton hasta para cuando. Hay manda ba le kanaton hace cosas que gendeh bueno para kanaton? El sabeduria de Jehova nuay limitacion. (Roma 11:33) Entonces, sabe le si cosa el bueno para kanaton. Si Jehova un Dios de amor tambien. (1 San Juan 4:8) Amor el de suyu primer calidad; todo cosa le ta habla y ta hace por causa na de suyu amor. El todo maga mandamiento que ya dale el Dios na de suyu maga siervo yan base na de suyu amor.

16. Maskin talli el mal influencia del mundo y el diaton imperfeccion, porque kita puede siempre esta obediente?

¹⁶ Gendeh se quierre decir que facil lang obedece con Dios. Debe kita pricura resisti con el mal influencia del mundo que “talli na poder del demonio.” (1 San Juan 5:19) Debe tambien kita hace esfuerzo para resisti con el diaton imperfeccion que ta influencia kanaton para desobedece con el maga ley del Dios. (Roma 7:21-25) Puede kita se hace por medio na diaton amor con Dios. Ta bendici si Jehova con aquellos quien ta dale mira que ta ama sila con ele por medio na diila obediencia. Ta dale le el de suyu sagrao espiritu “con aquellos quien ta obedece con ele.” (Maga Actividad 5:32) Ese espiritu ta ayuda kanaton para cultiva maga buen calidad que puede ayuda kanaton queda obediente con Dios.​—Galacia 5:22, 23.

17, 18. (a) Cosa kita examina na este publicacion y cosa kita debe pone na diaton pensamiento? (b) Cosa kita discuti na siguiente capitulo?

 ¹⁷ Examina kita na este publicacion si cosa si Jehova ta enseña kanaton acerca si paquemodo kita debe actua y si cosa le ta sinti acerca con el maga decicion que ta hace kita cada dia. Mientras ta examina kita con el maga principio de Jehova, tiene cuanto maga importante cosas que debe kita pone na pensamiento. Acorda kita que gendeh ta forza si Jehova kanaton obedece con el de suyu maga ley y principio; quierre le que con todo corazon kita obedece con ele. Gendeh kita debe ulvida que ta pidi kanaton si Jehova vivi na manera que hay obtene kita manada bendicion ahora y vida hasta para cuando na futuro. Y acorda kita que puede kita dale mira el diaton grande amor con Jehova si ta obedece kita con ele con todo corazon.

¹⁸ Ya dale si Jehova kanaton conciencia para ayuda kanaton sabe si cosa el justo y gendeh. Pero, necesita kita enseña con el diaton conciencia para puede con este confia como cosa hay discuti na siguiente capitulo.