Saluda na bandera. Ta creé el Maga Testigo de Jehova que si el un persona ta saluda na bandera que mas mucho ta hace con ese mientras ta canta con el cancion del nacion, amo un acto de adoranza que donde ta dale mira que el nacion o el maga lider de este amo el quien puede dale salvacion y gendeh el Dios. (Isaias 43:11; 1 Corinto 10:14; 1 San Juan 5:21) El Rey Nabucodonosor del de antes Babilonia amo uno de ese maga lider. Para dale mira el de suyu gloria y pagka-religioso, ya hace le un grande imagen y ya forza con el de suyu maga gente que adora con este mientras tiene musica, igual como un cancion del nacion. Pero, el tres Hebreo​—Sadrac, Mesac y Abednego​—nuay hinca con aquel imagen maskin pa muerte el castigo.​—Daniel, capitulo 3.

Na diaton tiempo ahora, “el bandera amo el simbolo del fe y centro del adoranza del nacionalismo,” ya escribi el un historiador, si Carlton Hayes. “El maga hombre ta quita con el diila sombrero si ta pasa el bandera; y para alaba con el bandera tiene ta escribi poem y el maga bata ta canta.” Ya habla pa ele que el nacionalismo tiene tambien “maga sagrao dia,” “maga santo y hero” y “maga templo” o santuario. Na un de publico ceremonia na Brazil, el un alto oficial de maga soldao ya habla: “Ta respeta y ta adora con el bandera . . . igual como ta adora  kita con el diaton nacion.” Si, “el bandera sagrao igual con el cruz,” ya habla el The Encyclopedia Americana.

El mismo Encyclopedia ya menciona que el cancion del nacion “amo un expresion de nacionalismo y mas mucho tiene incluido pidimiento de guia con Dios y proteccion para na maga gente o con el quien ta rula con el nacion.” Poreso, razonable gayot que el maga siervo de Jehova ta mira como religioso con el maga ceremonia del nacion incluido ya si ta saluda con el bandera y ta canta con el cancion del nacion. Gane, acerca na maga anak del maga testigo de Jehova que gendeh ta saluda bandera y gendeh ta jura na escuela del U.S., el libro The American Character ya habla: “Na manada caso, el Corte Suprema ya decidi que religioso este maga ritual que ta hace cada dia.”

Maskin gendeh ta participa el maga siervo de Jehova con ese maga ceremonia que ta mira sila como gendeh base na Escritura, ta respeta sila con el derecho del otro quien quierre participa con ese. Ta respeta tambien sila con el bandera del nacion como un simbolo y ta conoce con el maga oficial del gobierno como el quien tiene “autoridad” que ta sirvi como ‘maga servidor del Dios.’ (Roma 13:1-4) Poreso, el maga Testigo de Jehova ta sigui con el consejo que reza “especialmente para con el maga rey y maga autoridad.” Pero el diaton motivo amo “para ay puede kita vivi un vida religioso y honrao, con paz y tranquilidad.”​—1 Timoteo 2:2.

Vota na tiempo del eleccion. El verdadero Cristiano ta respeta con el derecho del otro para vota. Gendeh sila tan protesta contra na eleccion y ta coopera sila con el maga oficial con quien ya iscuji. Maskin pa ansina, ta esta sila neutral na maga actividad de politica del maga nacion. (Mateo 22:21; 1 Pedro 3:16) Cosa debe hace el maga Cristiano que ta queda na maga nacion que ta obliga vota o ta man contra con aquellos quien gendeh ta anda na precinto para vota? Acorda que si Sadrac, Mesac y Abednego ya anda na patag lugar del Dura. Igual na ese situacion, el un Cristiano puede decidi anda na precinto onde ta vota si ta permiti el de suyu conciencia. Pero, asigura le que esta le neutral. Debe le considera con este seis principio:

1.   El maga siguidores de Jesus “gendeh del mundo.”​—Juan 15:19.

2. El maga Cristiano ta representa con Cristo y con el de suyu Reino.​—Juan 18:36; 2 Corinto 5:20.

3. El congregacion del Cristiano unido na cosa sila ta creé y el maga miembro de este unido por causa na amor igual de Cristo.​—1 Corinto 1:10; Colosa 3:14.

4. Aquellos quien ya iscuji oficial hay queda tambien responsable na cosa le hace.​—Nota con el maga principio que ya menciona na 1 Samuel 8:5, 10-18 y 1 Timoteo 5:22.

5. Ya mira si Jehova con el deseo del Israel que tiene sila visible rey como un señal que no quierre sila con el de suyu rulanza.​—1 Samuel 8:7.

6. Si ta predica acerca na Reino del Dios, el maga Cristiano debe tiene animo converza na maga gente quien tiene diferente opinion acerca na politica para puede sila mira que con el gobierno del Dios lang kita ta suporta.​—Mateo 24:14; 28:19, 20; Maga Hebreo 10:35.

Servicio na comunidad. Na cuanto maga nacion, el gobierno ta pidi con aquellos quien no quierre queda soldao que participa na un clase de servicio na comunidad adentro na cuanto tiempo. Si ta enfrenta kita ansina clase de decicion, debe kita reza acerca con ese. Posible, puede kita discuti con ese na maga mature Cristiano y despues usa con el diaton conciencia si hace kita decicion base na cosa kita ya sabe acerca con ese.​—Proverbio 2:1-5; Filipo 4:5.

El Palabra del Dios ta habla kanaton que “somete con el maga gobernador y maga autoridad del gobierno, obedece canila, esta firmi preparao para hace el bien na todo ocasion, . . . queda respetoso.” (Tito 3:1, 2) Mientras ta pone kita se na pensamiento, puede kita pregunta el siguiente na diaton mismo cuerpo: ‘Si acepta yo con el trabajo, gendeh gaha yo man compromiso na de mio neutralidad como un Cristiano o queda envuelto na falso religion?’ (Miqueas 4:3, 5; 2 Corinto 6:16, 17) ‘Si hace yo este trabajo hay man dificil o sangga ba se comigo para cumpli con el de mio responsibilidad como Cristiano?’  (Mateo 28:19, 20; Efeso 6:4; Maga Hebreo 10:24, 25) Si participa yo con ese, tiene pa ba yo tiempo para hace mas na de mio servicio como Cristiano, igual como man pioneer?​—Maga Hebreo 6:11, 12.

Si decidi el un Cristiano base na de suyu conciencia que hace le servicio na comunidad en vez de man preso, el maga hermano y hermana debe respeta con el de suyu decicion. (Roma 14:10) Y si ta sinti le que gendeh le se puede hace, debe tambien se respeta el otro.​—1 Corinto 10:29; 2 Corinto 1:24.