Maga Quien Ta Ama con Jehova:

“Sabe ustedes si cosa el verdad, y el verdad ay hace con ustedes libre.” (Juan 8:32) Asigurao que ese maga palabra ya puede anima kanaton! Si, puede kita sabe el verdad maskin na este “ultimo maga dia” que donde el mundo lleno de falso enseñanza. (2 Timoteo 3:1) Ta acorda pa ba tu del cuando tu ya sabe el verdad na Palabra del Dios? Sin duda, bien alegre gayot tu!

Deverasan importante tiene exacto saber acerca na verdad y pirmi converza con otro acerca con ese, pero debe tambien kita vivi harmonia con el verdad. Para puede se hace, necesita kita esta na amor del Dios. Pero paquemodo tu esta na amor del Dios? Puede kita sabe el contestacion na cosa ya habla si Jesus durante el noche antes del de suyu muerte. Ya habla le con el de suyu maga fiel apostoles: ‘Si ta obedece ustedes el dimio maga mandamiento ay esta ustedes firmi na mi amor, igual como ya obedece yo el maga mandamiento del dimio Tata y ya esta yo firmi na su amor.’​—Juan 15:10.

Nota que si Jesus ya esta na amor del Dios cay ya obedece le con el mandamiento del de suyu Tata. Ese tambien el cosa kita debe hace ahora. Para esta na amor del Dios, necesita kita vivi cada dia harmonia na verdad. Na aquel mismo noche, si Jesus ya habla: “Sabe ya ustedes, bien alegre ustedes si ay cumpli ustedes con ese.”​—Juan 13:17.

Kame ta esperanza gayot que este publicacion puede ayuda contigo continua aplica con el verdad na de tuyu vida y na ese manera puede tu esta “na amor de Dios . . . para na Vida Eterno.”​—San Judas 21.