1-3. (a) Cosa el un regalo que ya dale kanaton si Jehova y paquemodo kita con ese puede descuida? (b) Para esta na amor del Dios, paquemodo kita debe usa con el diaton converzada?

COSA tu sinti si ya dale tu regalo con el un persona pero nuay le cuida con este? Pone kita que ya dale tu con ele coche. Ya sabe tu na uliji que gendeh le con cuidao si ta maneja y ya puede hace bangga con otro. Gendeh ba tu queda triste?

² El diaton abilidad para converza amo un regalo estaba con Jehova, el quien ta dale “todo el regalo bueno y perfecto.” (Santiago 1:17) Gendeh igual con el maga animal, ta puede kita habla con otro si cosa kita ta pensa y ta sinti. Pero igual con el coche, puede kita descuida con ese regalo. Asigurao que triste si Jehova si ta usa kita con el diaton converzada para hace sinti duele con otro.

³ Para esta na amor del Dios, necesita kita converza na manera que quierre el Dios. Claro si Jehova ya habla si cosa clase de converzada el ta hace alegre con ele. El de suyu Palabra ta habla: “No ustedes habla malo. Habla lang el maga palabra que conviene habla na cada situacion, para ayuda crici el fe de los demas y para aprovecha aquellos quien ta oi con ustedes.” (Efeso 4:29) Discuti kita si porque necesita kita controla con el diaton converzada, si cosa clase de converzada debe kita evita y si paquemodo  kita converza para puede “ayuda crici el fe del los demas.”

4, 5. Paquemodo el maga proverbio na Biblia ya dale mira si cosa el efecto del diaton maga palabra con otro?

⁴ El un importante razon si porque kita necesita controla con el diaton converzada amo que el palabra tiene poder. El Proverbio 15:4 ta habla: “El maga calma palabra amo un pono de vida, pero el gendeh justo palabra ta hace sinti duele con otro.” * Igual si paquemodo el agua ta hace vivi con el un pono, el maga calma palabra ta puede anima con aquellos quien ta oi. Pero el gendeh justo palabra ta hace luya con otro. Poreso, el diaton palabra tiene poder para hace sinti duele o anima con otro.​—Proverbio 18:21.

⁵ Claro ya dale mira na otro proverbio si cosa pa el efecto del diaton palabra con otro: “El converzada que nuay pensa igual como maga lanciada de espada.” (Proverbio 12:18) El maga palabra que dayun lang ta habla sin pensar puede hace sinti duele con el emocion y destroza con el diaton relacion con otro. Ya sinti ya ba tu duele por causa na palabra  del otro? El mismo proverbio ta habla tambien: “El lenggua del un sabio ta cura.” El maga buen palabra que estaba na un persona quien tiene sabeduria estaba con Dios, ta puede cura con el corazon que ya sinti duele y ta puede hace bira con el buen relacion. Ya puede ba tu acorda un ocacion que donde ya experiencia tu alivio por causa na maga buen palabra? (Le con el Proverbio 16:24.) Ciendo sabe kita que tiene efecto con otro el cosa kita ta habla, asigurao que quierre kita usa con el diaton converzada para anima y gendeh para hace sinti duele con otro.

6. Porque dificil controla con el diaton converzada?

⁶ Maskin cosa esfuerzo kita hace, gendeh kita puede completamente controla con el diaton converzada. Entonces, este el ika-dos razon si porque kita necesita controla con el diaton converzada: Tiene kita el inclinacion usa na gendeh justo manera con el diaton converzada por causa na pecado y imperfeccion. El maga palabra ta sale na corazon y el “corazon del gente tiene mal inclinacion.” (Genesis 8:21; Lucas 6:45) Poreso, dificil gayot controla con el diaton converzada. (Le con el Santiago 3:2-4.) Maskin gendeh kita puede controla completamente con el diaton converzada, puede siempre kita hace esfuerzo para pricura mejora con el manera si paquemodo kita ta converza. Igual si paquemodo el un persona necesita nada contra con el corentazo para gendeh sigui man anud, kita tambien necesita resisti con el diaton mal inclinacion que converza na gendeh justo manera.

7, 8. Paquemodo el diaton converzada puede afecta na diaton adoranza y servicio con Jehova?

⁷ El ika-tres razon si porque kita debe controla con el diaton converzada amo que responsable kita con Jehova na diaton maga palabra. El manera si paquemodo kita ta converza ta afecta gendeh lang na diaton relacion na maga gente sino na diaton relacion tambien con Jehova. El Biblia  ya habla: “Si un gente ta pensa que ele bien devoto con Dios, pero no puede controla el di suyo boca, ta engaña gayot le con ele mismo y su manera de adorar con Dios no sirve nada.” (Santiago 1:26, El Nuevo Testamento) Como cosa kita ya aprende na capitulo que una con este, el diaton converzada amo un importante parte na diaton adoranza. Si gendeh kita ta controla con el diaton converzada​—ta usa kita maga duele palabra—el todo cosas que ta hace kita na servicio con Dios hay queda nuay valor adelante con Jehova. Gendeh ba un serioso cosa ese que debe kita considera?​—Santiago 3:8-10.

⁸ Claro que tiene maga valido razon si porque kita debe evita usa na gendeh justo manera con el diaton converzada. Antes kita discuti el buen clase de maga palabra que puede anima con otro, discuti kita una el clase de maga palabra que gendeh debe na maga verdadero Cristiano.

9, 10. (a) Cosa clase de maga palabra el comon na maga gente ahora? (b) Porque kita debe evita maga bastos palabra? (Mira tambien con el footnote.)

⁹ Maga bastos palabra. Comon na maga gente ahora habla malo. Manada ta usa maga mal palabra para hace claro el cosa sila ya habla o si no sabe sila el justo palabra para usa. El maga comediante tan broma acerca na sexo para manda re con el maga gente. Pero, un serioso cosa el usada de maga bastos palabra. Maga 2,000 año el ya pasa, si apostol Pablo ya dale consejo na congregacion de Colosa que evita “maga cuento de malicia.” (Colosa 3:8, El Nuevo Testamento) Ya habla si Pablo con el congregacion de Efeso que incluido el maga “broma pesao” na maga cosas que ‘no permiti maskin nombra lang’ entre na maga verdadero Cristiano.​—Efeso 5:3, 4.

¹⁰ Ta odia si Jehova el usada de maga bastos palabra. Ta odia tambien con ese aquellos quien ta ama con ele.  El diaton amor para con Jehova amo el ta manda kanaton move para evita habla maga bastos palabra. Cuando ya menciona si Pablo “el maga trabajo del mal naturaleza del cuerpo,” ya inclui le con el “cuchinadas” que posible ta contene maga bastos palabra. (Galacia 5:19-21) Un serioso cosa este. Puede man disfellow con el un persona na congregacion si ta continua le usa maga palabra malo, imoral y ta hace malo con otro maskin pa cuanto beses ya con ele conseja. *

11, 12. (a) Cosa el chismis y porque este peligroso? (b) Porque el maga siervo de Jehova necesita evita acusa falso con otro?

¹¹ Chismis, falso acusacion. Gendeh malo pregunta acerca na otro persona. Siguro ya sabe kita que tiene quien ya bautiza o maluya el un hermano y necesita ayuda. Quierre lang kita sabe si quetal el diaton maga hermano y hermana. El maga Cristiano del primer siglo ta pregunta tambien acerca na diila maga hermano y hermana. (Efeso 6:21, 22; Colosa 4:8, 9) Pero si ta manda kita sabe con otro el problema del un persona, tan chismis o ta hace por demas el istoria, hay hace kita sinti duele con el diaton hermano o hermana. Si continua kita man chismis, gendeh dura posible kita comete mas serioso culpa. Baka intencional kita acusa o man imbusterias acerca con el un persona para hace con ele malo. El maga Fariseo de antes yan imbusterias tambien acerca con Jesus para hace malo con el de suyu reputacion. (Mateo 9:32-34; 12:22-24) El falso acusacion ta causa peleajan.​—Proverbio 26:20.

¹² Gendeh alegre si Jehova con aquellos quien ta usa con el diila converzada para hace malo con otro o causa  division. Ta odia le con aquellos “quien ta causa peleajan entre na maga hermano.” (Proverbio 6:16-19) Di·aʹbo·los el Griego palabra que yan translate “falso acusador” y ta usa tambien con ese como un titulo de Satanas. Ele el “Diablo,” el falso acusador del Dios. (Revelacion 12:9, 10, NW) Asigurao, quierre kita evita usa con el diaton converzada na manera que hay queda kita igual con el diablo. El falso acusacion que ta causa maga trabajo de laman igual na “peleajan” y “division,” gendeh conviene na congregacion. (Galacia 5:19-21) Poreso, antes de hace pasa un noticia acerca na un persona, pregunta este na de tuyu mismo cuerpo: ‘Deverasan ba este? Bueno ba que manda este sabe con otro? Necesita ba hace calayat con este informacion?’​—Le con el 1 Tesalonica 4:11.

13, 14. (a) Cosa el resulta si insulta kita con otro? (b) Na cosa manera el un persona quien anad insulta con otro ta pone na peligro con el de suyu mismo cuerpo?

¹³ Insulta de palabra. Como cosa ya discuti, el diaton maga palabra puede hace sinti duele con otro. Deverasan, tiene vez por causa na diaton imperfeccion ta puede kita habla maga cosas que ta arripinti kita na uliji. Pero ya menciona el Biblia acerca el clase de converzada que gendeh conviene adentro na familia o na congregacion de Cristiano. Si Pablo ya anima con el maga Cristiano: “No tene agravio con uno y otro, ni perde el paciencia, ni alza el voz, ni insulta de palabra.” (Efeso 4:31) Na otro translation, yan translate con el expresion “insulta de palabra” como “ultraja.” Si ta insulta kita​—incluido ya que nombra umalin o pirmi vicia con otro​—puede perde el diila dignidad y manda kanila sinti que nuay sila valor. El maga bata amo el pronto sinti duele con ese clase de maga palabra.​—Colosa 3:21.

¹⁴ Ta condena gayot el Biblia si el un persona pirmi ta insulta o ta hace de menos con otro. El un persona quien anad usa ansina clase de converzada ta pone na peligro  con el de suyu mismo cuerpo cay posible con ele quita na congregacion si gendeh le sigui con el consejo que cambia. Hay perde tambien el de suyu esperanza vivi na nuevo mundo. (1 Corinto 5:11-13; 6:9, 10) Claro gayot que gendeh kita puede esta na amor del Dios si man anad kita habla maga cosas gendeh bueno o falso. Ese clase de converzada ta hace sinti duele con otro.

15. Cosa clase de palabra el ta puede “ayuda crici el fe” del otro?

¹⁵ Paquemodo kita usa con el diaton palabra na manera que quierre el Dios? Acorda que el Biblia ta anima kanaton que “habla lang el maga palabra que conviene habla . . . para ayuda crici el fe de los demas.” (Efeso 4:29) Alegre si Jehova si ta usa kita maga palabra que ta puede anima y hace fuerte con otro. Necesita kita pensa enbuenamente para puede habla ansina maga palabra. El Biblia nuay dale especifico ley acerca con ese; nuay tambien este dale lista de “maga palabra bueno.” (Tito 2:8) Para puede kita habla maga palabra que puede “ayuda crici el fe” del otro, necesita kita pone na pensamiento el tres importante cosas: El diaton palabra bonito para oi, deverasan y bueno. Considera kita el cuanto maga especifico ejemplo de ese clase de converzada.​—Mira con el cajon “ El De Mio Converzada ba Ta Puede Anima con Otro?”

16, 17. (a) Porque kita debe dale comendacion con otro? (b) Cosa maga oportunidad que donde puede kita dale comendacion con otro na congregacion y na familia?

¹⁶ Sincero comendacion. Sabe si Jehova y si Jesus que necesita dale comendacion con otro. (Mateo 3:17; 25:19-23; Juan 1:47) Como maga Cristiano, necesita tambien kita dale sincero comendacion con otro. Porque? “El palabra que ya habla na justo tiempo, que bien bonito!” asegun na Proverbio 15:23. Pregunta na de tuyu mismo cuerpo:  ‘Cosa yo ta sinti si tiene quien ta dale comendacion conmigo? Ta dale ba se alegria y ta puede anima conmigo?’ Deverasan, el sincero comendacion ta manda contigo sinti que tiene quien ta nota y ta ama contigo y nuay man sayang el de tuyu esfuerzo. Ta ayuda este hace fuerte con el de tuyu confianza y ta manda move contigo para hace pa mas na futuro. Ciendo ta sinti tu alegre si ta ricibi tu comendacion, gendeh ba debe lang tambien tu pricura dale comendacion con otro?​—Le con el Mateo 7:12.

¹⁷ Enseña con el de tuyu mismo cuerpo que mira si cosa el positivo con otro y despues dale kanila comendacion. Na congregacion, baka puede tu oi un bonito talk, nota un joven quien ta pricura alcanza maga espiritual goal o de edad quien regular ta atende miting. El sincero comendacion puede kanila hace alegre y hace fuerte con el diila espiritualidad. Adentro na familia, importante que puede oi el man maridable maga palabra de comendacion y apreciacion na uno’y otro. (Proverbio 31:10, 28) Necesita tambien el maga anak sinti que ta nota y ta aprecia kanila. Igual si paquemodo el sol y agua ta hace gordo con el siembra, el comendacion y atencion ta hace alegre con el maga anak. Maga mayores, busca oportunidad para dale comendacion con el de ustedes maga anak por el diila maga buen calidad y esfuerzo. Puede se anima y hace fuerte con el diila confianza y manda kanila move para mas hace pa si cosa el justo.

18, 19. Porque kita debe hace esfuerzo para anima y dale comforta con el diaton maga hermano y hermana na fe y paquemodo kita se hace?

¹⁸ Anima y dale comforta. Ta ama gayot si Jehova con el maga “humilde” y con “aquellos maluya.” (Isaias 57:15) El de suyu Palabra ta anima kanaton que continua “dale animo con uno y otro” y “con el maga maluya na fe.” (1 Tesalonica 5:11, 14) Puede kita asigura que el Dios ta nota y ta aprecia con el diaton esfuerzo para anima y dale comforta  con el diaton maga hermano y hermana na fe quien ta sinti triste.

¹⁹ Entonces, cosa tu puede habla para anima con el un hermano o hermana quien maluya o triste? No pensa que necesita tu arregla con el de suyu problema. Na manada situacion, el maga simple palabra mas grande cosa puede hace. Manda sinti que ta ama tu con ele. Ofrece que reza junto con ele; puede tu pidi con Jehova que ayuda con ele manda sabe que ta ama con ele el otro y el Dios. (Santiago 5:14, 15) Asigura con ele que valoroso le y necesita con ele na congregacion. (1 Corinto 12:12-26) Le un texto na Biblia para asigura con ele que ta ama gayot con ele si Jehova. (Salmo 34:18; Lucas 12:6, 7) Asigurao que si dale tu bastante tiempo para habla maga “buen palabra” con el un persona maluya y converza con ele con todo corazon, puede se ayuda con ele para sinti que ta ama y ta aprecia con ele el otro.​—Le con el Proverbio 12:25.

20, 21. Cosa-cosa puede ayuda para queda efectivo el consejo?

²⁰ Efectivo consejo. Como maga imperfecto gente, todo kita necesita ricibi consejo. El Biblia ta anima kanaton: “Oi con el consejo y acepta disciplina para queda tu sabio na de tuyu futuro.” (Proverbio 19:20) Puera con el maga anciano, el otro puede tambien dale consejo. El maga mayores ta dale consejo na diila maga anak. (Efeso 6:4) El maga mature hermana puede dale consejo con el maga joven mujer.  (Tito 2:3-5) El amor para con otro amo el ta manda kanaton move para dale kanila consejo na manera que gendeh sila sinti duele. Cosa kanaton puede ayuda para puede se hace? Considera el tres cosas que ta hace mas efectivo con el consejo: el custumbre y motivo del quien ta conseja, onde yan base el consejo y el manera si paquemodo con ese ya dale.

²¹ El efectivo consejo ta principia con el quien ta conseja. Pregunta na de tuyu mismo cuerpo, ‘Na cosa circumstancia facil para conmigo acepta consejo?’ Mas facil acepta consejo si sabe tu que ta ama contigo el quien ta conseja contigo, ta dale le consejo gendeh cay ta consumi le contigo y nuay le maga mal motivo. Poreso si ta conseja tu con otro, gendeh ba ansina tambien debe el de tuyu custumbre y motivo? El efectivo consejo, tan base tambien na Palabra del Dios. (2 Timoteo 3:16) Debe base na Escritura el consejo que hay dale kita, directa man kita ta menciona el laman del un texto na Biblia o gendeh. Poreso, el maga anciano debe queda con cuidao que gendeh sila dale el diila personal opinion con otro; ni hace baliscat con el cosa ta habla na Escritura para hace sale que el Biblia dol ta suporta con el cuanto personal idea. Ta queda tambien efectivo el consejo si ta dale este na justo manera. Facil acepta el consejo si ya dale este na buen manera y gendeh ta perde el dignidad del persona con quien ya conseja.​—Colosa 4:6.

22. Cosa el de tuyu determinacion acerca si paquemodo usa con el de tuyu abilidad para converza?

²² Asigurao que el diaton abilidad para converza amo un precioso regalo estaba con Dios. El diaton amor con Jehova debe manda move kanaton para usa na justo manera con este regalo. Debe kita acorda que el diaton maga palabra tiene poder​—puede se anima o hace sinti duele con otro. Poreso, necesita kita pricura usa con ese regalo na manera que quierre el Dios​—para “ayuda crici el fe” del otro. Na ese manera, el diaton maga palabra puede anima con otro y puede kanaton ayuda esta na amor del Dios.