1, 2. Paquemodo ya plaña si Balaam para lleva peligro con el maga siervo de Jehova?

YA ANDA el pescador na de suyu favorito lugar para pesca. Quierre le cuji un particular clase de pescao. Ya iscuji le paun y ya pone de suyu bingit na agua. Nuay tarda, ya sinti le ya queda pesao el bingit, ya hila le con este y ya saca le con el pescao. Alegre le cay ya usa le el justo paun.

² Del año 1473 B.C.E., un hombre que el nombre Balaam ya pensa enbuenamente si cosa le usa paun. Quierre le hace victima con el maga siervo del Dios quien tan campo na lugar de Moab que cerca lang na tierra que ya promete kanila si Jehova. Ya clama si Balaam que profeta le de Jehova pero el deverasan, un hambriento gente le con quien ya paga para maldici con el Israel. Pero ya causa si Jehova que bendici si Balaam con el Israel. Ciendo bien determinao si Balaam que ricibi el de suyu pago, ya pensa le que baka puede le hace manera para el Dios mismo el maldici con el de suyu maga siervo, si puede le kanila influencia para comete serioso culpa. Por causa con ese plano, ya puede pensa si Balaam si cosa le usa paun​—el maga joven mujer del Moab.​—Numero 22:1-7; 31:15, 16; Revelacion 2:14.

3. Paquemodo de efectivo el plano de Balaam?

³ Efectivo ba el de suyu plano? Si. Miles de maga Israelita  hombre el ya cae na tentacion y ya comete “sexual imoralidad na maga anak mujer del Moab.” Ya principia pa gane sila adora con el maga dios del maga Moabita incluido ya el detestable dios que el nombre Baal de Peor, un dios de sexo. Como resulta, 24,000 Israelita el ya muri cerca na tierra que ya promete kanila si Jehova. Bien grabe el cosa ya sucede kanila!​—Numero 25:1-9.

4. Porque miles de maga Israelita el ya comete imoralidad?

⁴ Cosa el causa de ese tragedia? Manada el ya cultiva mal corazon y ya queda lejos con Jehova, el Dios quien ya salva kanila na Egipto, ya dale kanila come na desierto y quien ya lleva kanila cerca na tierra que ya promete kanila si Jehova. (Maga Hebreo 3:12) Acerca con ese, si apostol Pablo ya escribi: “No kita hace el cosa de immoralidad: Tiene diila ya hace ansina, y poreso, veinte tres mil diila ya muri na un dia lang.” *—1 Corinto 10:8.

5, 6. Porque importante que sabe kita ahora acerca na pecado que ya comete el maga Israelita na Moab?

⁵ Manada leccion el cosa ya menciona na Numero para na  maga siervo del Dios ahora quien para entra ya na mas bonito tierra que ya promete kanila si Jehova. (1 Corinto 10:11) Por ejemplo, el fuerte deseo del maga Moabita de antes na sexo puede mira na maga gente ahora y mas grabe pa gane. Cada año, miles de maga Cristiano el ta comete imoralidad​—igual na paun que ya usa na maga Israelita de antes. (2 Corinto 2:11) Igual con Zimri quien ya lleva un Midianita mujer adentro del campo del maga Israelita para na de suyu tolda, cuanto de aquellos junto na maga siervo del Dios ahora el ya queda mal influencia adentro na Cristiano congregacion.​—Numero 25:6, 14; San Judas 4.

⁶ Ta puede ba tu mira que igual el de tuyu situacion na cosa ya sucede na Moab? Ta mira ba tu el premio​—el nuevo mundo​—que bien cerca ya? Entonces, hace el todo que puede tu para esta na amor del Dios por medio que obedece con este mandamiento: “Desaleja gayot ustedes el cosa inmoralidad.”​—1 Corinto 6:18.

7, 8. Cosa el sexual imoralidad y paquemodo aquellos quien ya comete con ese ta cosecha el cosa sila ya siembra?

⁷ Na Biblia, el sexual imoralidad (Griego, por·neiʹa) ta refiri na gendeh justo sexual relacion apuera del matrimonio. Incluido alli el adulterio, prostitucion, sexual relacion entre na maga gendeh casao, oral y anal sex y el manipulacion del privado parte del un persona con quien gendeh le casao. Ta inclui tambien alli el maga sexual actividad que ta hace el hombre con hombre o mujer con mujer y el bestialidad. *

⁸ Claro el cosa ta habla el Escritura: Aquellos quien ta comete sexual imoralidad gendeh puede esta na Cristiano congregacion y gendeh obtene vida hasta para cuando.  (1 Corinto 6:9; Revelacion 22:15) Gane ahora pa lang, ta sufri ya sila —ta perde el diila confianza y respeto na cuerpo, peleajan na diila matrimonio, tan conciencia sila, tan priñada nuay na plano, ta tiene enfermedad y ta muri pa gane. (Le con el Galacia 6:7, 8.) Gendeh gayot justo que comete sexual imoralidad ciendo ta lleva lang se grabe problema. Pero makatriste cay manada el nuay con ese pensa cuando ya hace sila con el primer gendeh justo cosa —que envuelto el pornografia.

9. Gendeh ba peligroso el pornografia como cosa ta habla el otro? Explica.

⁹ Na manada lugar, puede mira con el pornografia na diario, magasin, musica y televicion. Comon tambien este na Internet. * Deverasan ba que gendeh se peligroso como cosa ta habla el otro? Gendeh gayot! Aquellos quien ta mira pornografia posible acustumbra con el masturbacion y tiene sobra deseo na hombre o mujer que puede resulta na adiccion na sexo, mal deseo, serioso problema na matrimonio y divurcio pa gane. * (Roma 1:24-27; Efeso 4:19) El un researcher ya habla que el adiccion na sexo igual na cancer. “Ta queda este grabe y tan calayat,” ya habla le. “Bien ralo lang que perde este y bien dificil para cura.”

10. Paquemodo kita puede aplica el consejo na Santiago 1:14, 15? (Mira tambien con el cajon “ Ya Tiene Yo Fuerza Para Queda Limpio Na Moral.”)

¹⁰ Considera el cosa ta habla na Santiago 1:14, 15: “El ta tenta con el gente amo el maga mal deseo del disuyo mismo  cuerpo, que ta hala y ta encanta con ele. Despues, el mal deseo ta entoja y ta pari con el pecado; y el pecado, cuando grande ya, tiene tamen un anak que amo el muerte.” Poreso, si tiene mal deseo ya entra na de tuyu pensamiento, quita dayun con ese! Por ejemplo, si ya puede tu mira maga erotico letrato, evita dayun con ese o man off con el computer o cambia el channel na TV. Hace si cosa el necesita para gendeh tu cae con ese imoral deseo!​—Le con el Mateo 5:29, 30, NW.

11. Si ta hace kita esfuerzo para evita maga mal deseo, paquemodo kita ta demonstra que ta confia kita con Jehova?

¹¹ Poreso, ya dale kanaton consejo el quien mas conoce kanaton: “Mata na de ustedes cuerpo el maga cosa-cosa de este mundo, como el maga immoralidad, maga  cuchinadas, maga deseo y maga sentimiento malo y maga ambrentada, cay esos igual como ta adora con el maga dios-dios.” (Colosa 3:5) Deverasan, gendeh se facil hace. Pero acorda que tiene kita amable y paciencioso Tata na cielo con quien kita puede pidi ayuda. (Salmo 68:19) Poreso, si tiene tu cosa malo que ta puede pensa, atraca con ele por medio na rezo. Reza que dale contigo “grande poder” y pricura pensa otro cosas.​—2 Corinto 4:7; 1 Corinto 9:27; mira con el cajon “ Paquemodo Yo Quita con el De Mio Mal Vicio?”

12. Cosa el diaton “corazon” y porque kita debe protege con este?

¹² Si Solomon ya escribi: “Mas pa na todo cosas que guarda tu, protege con el de tuyu corazon, cay alli ta sale el tuburan del vida.” (Proverbio 4:23) El diaton “corazon” amo el diaton deverasan personalidad, si cosa kita clase de gente na vista del Dios. El mirada del Dios con el diaton “corazon”​—gendeh si cosa el otro gente ta mira kanaton​—amo el determina si obtene ba kita vida eterna o gendeh. Ansina se de simple pero ansina tambien de serioso. Para gendeh mira si Job con mal deseo na un mujer, ya hace le un contrata con el de suyu ojos. (Job 31:1) Un buen ejemplo para kanaton! Ansina tambien el cosa ta pensa el salmista cuando ya reza le: “No conmigo permiti mira el maga cosas que nuay valor.”​—Salmo 119:37.

13. Quien si Dina y porque gendeh justo con quien le ya iscuji man amiga?

¹³ Como cosa kita ya aprende na Capitulo 3, puede tiene grande influencia kanaton el diaton maga amigo, bueno man o malo. (Proverbio 13:20; le con el 1 Corinto 15:33.) Considera el ejemplo de Dina, el anak mujer de Jacob. Maskin pa ya hace con ele engranda enbuenamente, yan amiga si Dina con el maga mujer de Canaan. Igual con el maga Moabita, conocido con el maga de Canaan como maga  gente imoral. (Levitico 18:6-25) Na ojos del maga hombre de Canaan, incluido si Siquem​—“el de con todo respetao” na familia del de suyu tata​—si Dina preparao para hace maga cosas imoral igual con el maga joven mujer de Canaan.​—Genesis 34:18, 19.

14. Paquemodo ya resulta na tragedia el decicion de Dina?

¹⁴ Posible, nuay na pensamiento de Dina que tiene sexual relacion con Siquem cuando ya mira le con este. Pero ya hace si Siquem el cosa ta hace el maga de Canaan si ta desea sila man sexo. Nuay cosa ya puede hace si Dina cay si Siquem ya ‘saca y ya forza con ele.’ Na uliji, ya quierre si Siquem con Dina pero gendeh se puede cambia con el cosa le ya hace con Dina. (Le con el Genesis 34:1-4.) Y gendeh lang si Dina el ya sufri. El de suyu decicion que man amiga con el maga de Canaan ya causa maga suceso que ya lleva verguenza na de suyu entero familia.​—Genesis 34:7, 25-31; Galacia 6:7, 8.

15, 16. Paquemodo kita tiene deverasan sabeduria? (Mira tambien con el cajon “ Maga Texto Para Medita.”)

 ¹⁵ Si ya aprende man si Dina, ya aprende le con ese despues pa del de suyu grabe experiencia. Aquellos quien ta ama y ta obedece con Jehova gendeh necesita aprende el leccion na vida despues pa del maga mal experiencia. Cay ta oi sila con Dios, ya iscuji sila “sigui junto con el sabio.” (Proverbio  13:20a) Poreso, sabe sila si cosa el justo y ta puede evita maga problema y dolor.​—Proverbio 2:6-9; Salmo 1:1-3.

¹⁶ El sabeduria que estaba con Dios puede ricibi el todo quien quierre y ta actua harmonia con ese por medio na rezo y regular estudiada del Palabra del Dios y maga publicacion que ta dale el fiel y sabio esclavo. (Mateo 24:45, NW; Santiago 1:5) Importante tambien que queda humilde y puede se mira si preparao sila obedece con el maga consejo na Biblia. (2 Rey 22:18, 19) Por ejemplo, posible ta creé el un Cristiano con el principio que traidor y desperao el de suyu corazon. (Jeremias 17:9) Pero si ya puede le actua na gendeh justo manera, humilde ba le y preparao acepta amable consejo y ayuda?

17. Dale un situacion que posible sucede na familia y dale mira si paquemodo el tata posible ayuda con el de suyu anak.

¹⁷ Imagina este situacion. Gendeh ta permiti el tata con el de suyu anak mujer que sigui con el un Cristiano hermano si nuay sila chaperone. Habla el anak: “Pero Pang, gendeh ba tu ta confia conmigo? Gendeh kame hace cosa malo!” Posible, ta ama le con Jehova y tiene justo intencion, pero ta actua ba le harmonia na sabeduria que estaba con Dios? Ta desaleja ba le na sexual imoralidad? O ta confia le con el de suyu mismo corazon? (Proverbio 28:26) Siguro puede pa tu pensa otro maga principio na Biblia que puede ayuda con el tata y con el anak acerca na este situacion.​—Mira con el Proverbio 22:3; Mateo 6:13; 26:41.

18, 19. Cosa tentacion el ya experiencia si Jose y paquemodo le ya enfrenta con ese?

¹⁸ Un buen joven quien ta ama con Dios y ya desaleja na sexual imoralidad amo si Jose, el hermano de Dina na tata. (Genesis 30:20-24) Ya mira si Jose el gendeh buen resulta del cosa ya hace de suyu hermana. Ese y el querrer de Jose que esta na amor del Dios amo el ya protege con ele cuanto año  despues na Egipto cuando el mujer del de suyu amo ya pricura tenta con ele “cada dia” para comete sexual imoralidad. Siempre, gendeh lang le basta puede sale na de suyu trabajo ciendo un esclavo le! Necesita le enfrenta con el situacion con sabeduria y animo. Pirmi le ta habla no con el mujer de Potifar y na uliji, ya escapa le con este.​—Le con el Genesis 39:7-12.

¹⁹ Pensa tu: Si pirmi pa tan fantasia si Jose con este mujer o con el sexo, puede gaha le mentena el de suyu integridad? Gendeh siguro. En vez de pirmi pensa con ese mal cosas, ya dale importancia si Jose el de suyu relacion con Jehova. Claro se na cosa le ya habla con el mujer de Potifar: “Nuay le [si Potifar] conmigo prohibi na maskin cosa puera contigo cay etu el de suyu mujer. Poreso, paquemodo yo comete con este grande maldad y culpa con Dios?”​—Genesis 39:8, 9.

20. Cosa ya hace si Jehova para ayuda con Jose?

²⁰ Imagina el alegria de Jehova mientras ta mira le con Jose que ta mentena el de suyu integridad cada dia maskin lejos na de suyu familia. (Proverbio 27:11) Ya hace manera si Jehova para puede sale na preso si Jose y queda el primer ministro y el quien ta mira con el comida na Egipto. (Genesis 41:39-49) Deveras gayot el cosa ta habla na Salmo 97:10: O ustedes quien ta ama con Jehova, odia el cosa malo. Ta guarda le el vida del maga  leal con ele; ta salva le kanila na mano del maga malo”!

21. Acerca na maga principio na moral, paquemodo ya dale mira animo el un joven hermano na Africa?

²¹ Manada tambien maga siervo del Dios ahora ta demonstra que ta ‘odia sila si cosa el malo y ta ama si cosa el bueno.’ (Amos 5:15) Un joven hermano na un lugar na Africa el ya acorda que ya ofrece con ele sexo el de suyu classmate mujer si ayuda le con ele na diila test na math. “Dayun-dayun yo nuay acepta con el cosa le ta ofrece,” ya habla le. “Cay ya mentena yo de mio integridad, ya puede tambien yo mentena el de mio dignidad y respeto na cuerpo que mas valoroso pa na oro y plata.” Deverasan, el pecado puede lleva “alegria” pero gendeh se ta dura y ta causa pa grabe dolor. (Maga Hebreo 11:25) Mas pa, nuay se valor compara con el hasta para cuando alegria que hay experiencia kita si obedece kita con Jehova.​—Proverbio 10:22.

22, 23. (a) Porque tiene siempre esperanza el un Cristiano quien ya comete serioso culpa? (b) Cosa ayuda puede ricibi el quien ya culpa?

²² Ciendo maga imperfecto kita, ta hace kita esfuerzo para resisti con el maga deseo de laman y hace si cosa el justo na ojos del Dios. (Roma 7:21-25) Sabe este si Jehova y ele “ta acorda que polvos kita.” (Salmo 103:14) Pero tiene vez, ta puede comete serioso culpa el un Cristiano. Si ansina el situacion, tiene pa ba le esperanza? Si. Deverasan, hay experiencia le el mal resulta del cosa le ya hace igual con Rey David. Pero el Dios pirmi “preparao perdona” con aquellos ta arripinti y ‘ta confesa el diila maga pecado.’​—Salmo 86:5; Santiago 5:16; le con el Proverbio 28:13.

²³ Na Cristiano congregacion, ya dale tambien el Dios maga “regalo con el maga gente”​—maga mature hermano quien cualificao y preparao ayuda. (Efeso 4:8, 12; Santiago 5:14, 15) Quierre sila ayuda con el quien ya culpa para bira el de suyu buen relacion con Dios y tiene “entendimiento”  para gendeh mas le repiti con el culpa que ya hace le.​—Proverbio 15:32.

24, 25. (a) Paquemodo ya dale mira el joven hombre na Proverbio 7:6-23 que ‘no sabe le pensa’? (b) Paquemodo kita “tiene abilidad para pensa”?

²⁴ Ya menciona el Biblia acerca el un persona “quien no sabe pensa” y un persona quien “tiene entendimiento.” (Proverbio 7:7) Ciendo gendeh mature na espiritual y falta experiencia na servicio con Dios, el un persona “quien no sabe pensa” posible falta entendimiento y gendeh ta puede hace justo decicion. Igual con el joven hombre na Proverbio 7:6-23, baka pronto lang le comete serioso culpa. Pero, “el quien tiene abilidad para pensa” ta examina con el de suyu mismo cuerpo por medio na regular estudiada del Palabra del Dios y rezo. Y maskin pa imperfecto le, ta pricura le hace harmonia na querrer del Dios el de suyu pensamiento, deseo, emocion y plano na vida. Poreso, ‘ta ama le con el de suyu mismo cuerpo’ o ta lleva bendicion na de suyu mismo cuerpo y “tiene buen exito.”​—Proverbio 19:8.

²⁵ Pregunta na de tuyu mismo cuerpo: ‘Convincido ba gayot yo que justo el maga principio del Dios? Ta creé ba gayot yo que si sigui yo con ese hay tiene yo deverasan alegria?’ (Salmo19:7-10; Isaias 48:17, 18) Si tan duda tu maskin diutay, pricura solva con ese. Medita con el maga mal resulta si ignora con el maga ley del Dios. Puede tu “pruba y mira que bueno si Jehova” si vivi tu harmonia na verdad y pone na de tuyu pensamiento el maga buen cosas​—si cosa el deverasan, justo, limpio y amable. (Salmo 34:8; Filipo 4:8, 9) Puede tu asigura que si hace tu con ese, mas queda hondo el de tuyu amor con Dios, ama si cosa le ta ama y odia si cosa le ta odia. Gendeh perfecto si Jose. Pero ya puede le desaleja na sexual imoralidad cay ya permiti le que ayuda con ele si Jehova y dale con ele el deseo para hace si cosa ta hace alegre con Dios. Ojala ansina tambien tu.​—Isaias 64:8.

26. Cosa kita discuti na siguiente capitulo?

 ²⁶ Ya diseña el diaton Creador con el diaton privado parte gendeh para de juego lang sino para puede tiene alegria na matrimonio y puede tiene anak. (Proverbio 5:18) El mirada del Dios na matrimonio hay discuti na siguiente dos capitulo.