Duele para kanaton si tiene con quien yan disfellow na congregacion especialmente si familia o amigo diaton cay nuay le arripinti na de suyu culpa. El diaton reaccion na principio del Biblia acerca con este puede revela si paquemodo de hondo el diaton amor con Dios y el diaton lealtad na de suyu arreglamiento. * Considera con este cuanto maga pregunta.

Paquemodo kita debe trata con el un disfellow? El Biblia ta habla: “Gendeh ustedes man junto con maskin quien ta lleva el nombre de un hermano o hermana quien immoral, o hambre le, o ta adora le con el maga dios-dios, o chismoso, o borachon, o ladron. Con ese clase de gente no ustedes man junto maskin para come.” (1 Corinto 5:11) Acerca con aquellos quien “gendeh ta esta fiel na maga insiñanza de Cristo,” puede kita le: “No con ele recivi na de ustedes casa, ni saluda con ele. Cay si quien ta saluda con ele ta participa na disuyo maga mal trabajo.” (2 San Juan 9-11) Gendeh kita tan junto o tan cuento acerca na maga espiritual cosas na un disfellow. El The Watchtower de Septiembre 15, 1981, na pagina 25, ya habla: “Maskin man ‘Hello’ lang kita con el un persona puede se queda manera que ta cae na situacion que man cuento kita con ele y gane puede se queda camino para queda ustedes amigo o amiga. Quierre ba kita se hace na un disfellow?”

Necesita ba gayot kita evita con el disfellow? Si, por causa na cuanto maga razon. Una, envuelto aqui el diaton lealtad con Dios y na de suyu Palabra. Ta obedece kita con Jehova gendeh lang si conveniente para kanaton sino ta hace tambien kita se maskin pa dificil. El amor diaton para con Dios ta manda move kanaton para obedece con el de suyu maga mandamiento, cay sabe kita que ele justo y amable y el de suyu maga ley para na diaton bien. (Isaias 48:17; 1 San Juan 5:3) Ika-dos, ta protege se kanaton y con el otro na congregacion para gendeh contamina  el espiritual y moral y mentena el buen reputacion del congregacion. (1 Corinto 5:6, 7) Ika-tres, posible pa gane beneficia el un disfellow si sigui gayot kita con el maga principio del Biblia. Por medio na diaton suporta con el decicion del judicial committee, puede kita hace blando el corazon del quien ya culpa que nuay acepta el ayuda del maga anciano para asisti con ele. Si gendeh mas man junto con ele aquellos con quien le ta ama, baka puede se ayuda con ele para “pensa le na su corazon” si paquemodo de serioso el de suyu culpa y hace le manera para bira otravez con Jehova.—Lucas 15:17.

Paquemodo si familia diaton el disfellow? Na ese situacion, puede pruba si paquemodo kita de leal na maga ley de Jehova. Paquemodo kita debe trata con el diaton familia que yan disfellow? Gendeh kita puede menciona el cada situacion que posible sucede, pero discuti kita con este dos.

Tiene maga situacion que el un disfellow ta queda siempre na casa, posible uno del mayores o el menor de edad anak. Ciendo gendeh ta termina el de suyu relacion como familia cuando yan disfellow le, posible siempre continua el normal maga actividad y tratamiento del familia. Pero por causa na cosa le ya hace, ya iscuji le termina el de suyu espiritual relacion na de suyu familia. El miembro del familia que fiel con Jehova gendeh ya con ele man junto na maga espiritual actividad. Por ejemplo, si presente el disfellow, gendeh le puede participa na de familia adoranza. Pero, si menor de edad anak el disfellow, responsibilidad siempre del mayores que enseña y disciplina con ele. Poreso, el amable mayores puede conduci Bible study con el de suyu anak. *—Proverbio 6:20-22; 29:17.

Na otro situacion, el mayores o menor de edad anak que disfellow gendeh ya ta queda na casa. Maskin tiene maga situacion que necesita man cuento con el disfellow acerca na maga importante cosas de familia, debe limitao lang se. El maga fiel miembro del Cristiano familia gendeh ta busca razon para asocia con el disfellow familia que gendeh ta queda na casa.  Sino, el lealtad con Jehova y na de suyu organizacion manda move kanila para sigui con el arreglamiento estaba na Escritura acerca na maga disfellow. Para se na bien del quien ya culpa y posible puede ayuda con ele para beneficia na disciplina que ya ricibi le. *—Maga Hebreo 12:11.