Ta expecta si Jehova con el maga casao que hay esta sila fiel na diila matrimonio. Cuando ya dale casa si Jehova con el primer hombre y mujer, ele ya habla: El hombre hay . . . esta junto con el de suyu mujer y sila hay queda un laman.” Ya repiti si Jesucristo con ese maga palabra y ele ya omenta: “Entonces, el cosa ya uni el Dios no puede el gente separta.” (Genesis 2:24; Mateo 19:3-6) Poreso, para con Jehova y con Jesus, el matrimonio amo un permanente relacion que termina lang si muri el marido o mujer. (1 Corinto 7:39) Ciendo sagrao el matrimonio, debe considera como un serioso cosa el divurcio. Gane, ta odia si Jehova con el maga divurcio que nuay valido razon base na Escritura.​—Malaquias 2:15, 16.

Cosa el valido razon para man divurcio asegun na  Escritura? Ta odia si Jehova con el adulterio y sexual imoralidad. (Genesis 39:9; 2 Samuel 11:26, 27; Salmo 51:4) Bien detestable para con ele el sexual imoralidad poreso ya permiti le que valido razon se para man divurcio. (Para na mas detalle si cosa el envuelto na sexual imoralidad, mira con el Capitulo 9, parapo 7.) Ya dale derecho si Jehova con el persona quien ya esta fiel para decidi si esta ba le junto con el de suyu marido o mujer quien ya comete sexual imoralidad o man divurcio. (Mateo 19:9) Poreso si ya decidi le man divurcio, nuay le hace un cosa que ta odia si Jehova. Pero, el Cristiano congregacion gendeh ta anima con maskin quien que man divurcio. Gane, por causa na cuanto situacion el persona hay decidi esta junto con el quien ya comete imoralidad, especialmente si deverasan le ya arripinti. Maskin pa ansina, aquellos quien tiene valido razon base na Biblia para man divurcio debe hace personal decicion y acepta el maskin cosa resulta de ese.​—Galacia 6:5.

Na maga grabe situacion, el cuanto Cristiano ya decidi separta o man divurcio con el diila marido o mujer maskin pa el persona nuay comete sexual imoralidad. Na ansina situacion, el Biblia claro ta habla que “no puede le casa, o, si quiere, puede le vira ole” na de suyu marido o mujer. (1 Corinto 7:11) Ese Cristiano gendeh puede busca otro persona con quien le casa. (Mateo 5:32) Considera con el cuanto maga grabe situacion que el otro ta mira como valido razon para separta.

Intencional gendeh ta suporta con el familia. Posible que bien pobre el un familia y ta falta na diila importante maga necesidad cay el marido gendeh ta suporta maskin pa puede le se hace. El Biblia ta habla: “Si quien gendeh ta cuida con el disuyo . . . familia, ese gente ya nega con el fe; y mas malo pa le con el gente noay fe.” (1 Timoteo 5:8) Si no quierre le cambia, el mujer hay decidi si obtene ba le legal separacion para na de suyu bien y del de suyu maga anak. Siempre, el maga anciano debe considera enbuenamente con el acusacion que el marido Cristiano no quierre suporta con  el de suyu familia. Posible man disfellow con el un persona si no quierre le suporta con el de suyu familia.

Por demas abuso na fisical. El un violente marido posible pone na peligro con el salud y vida del de suyu mujer. * Si Cristiano el marido, el maga anciano debe investiga con el acusacion. Puede man disfellow con el un persona por causa na sobra de rabia y si ta continua le demonstra custumbre de pagka-violente.​—Galacia 5:19-21

Ta pone na peligro el espiritualidad. Posible que el un marido pirmi ta pricura sangga con el de suyu mujer que practica el verdadero adoranza o baka forza pa gane con ele para viola con el maga mandamiento del Dios na cuanto manera. Na ese situacion, el mujer hay decidi obtene legal separacion si ese el solamente manera para “obedece con el Dios, y gendeh con el maga gente.”​—Maga Actividad 5:29.

Na todo circumstancia que envuelto el maga grabe situacion que ya discuti, nuay quien debe man pressure con el mujer para separta o esta junto con el de suyu marido. Maskin pa el maga amigo y amiga quien mature na espiritual y maga anciano hay ofrece suporta y dale consejo que base na Biblia, no sabe sila el todo detalle si cosa ya pasa entre con el man maridable. Solamente si Jehova el quien sabe. Siempre, el un Cristiano mujer gendeh puede honra con Dios o con el matrimonio si hace le por demas el istoria acerca na de suyu problema para lang separta con el de suyu marido o si el marido hay hace tambien ansina. Sabe si Jehova si ta busca lang le razon para separta, maskin cosa pa le hace para esconde con ese. Si, “todo desnudo y ay queda claro gayot na maga ojos de Aquel con quien ay dale kita cuenta.” (Maga Hebreo 4:13) Pero si bien peligroso el situacion, nuay quien debe juzga con el un Cristiano si ya decidi le separta con el de suyu marido o mujer. Na uliji, “todo kita ay man atubang con el Dios cuando ay juzga Le canaton.”​—Roma 14:10-12.