1. Cosa ya hace claro si Jesus durante el de suyu ultimo noche como un gente?

DURANTE el ultimo noche de Jesus como un gente, malingasa le si cosa sucede con el de suyu maga siguidores. Gane, ya reza le con el de suyu Tata acerca con ese: “Gendeh yo ta pidi con Uste para lleva canila afuera del mundo, sino para libra canila del mal. Sila gendeh del mundo, igual como yo gendeh del mundo.” (Juan 17:15, 16) Na cosa ya pidi si Jesus, ya dale le mira el de suyu grande amor para con el de suyu maga siguidores y el importancia del cosa le ya habla con el cuanto kanila: “Ustedes gendeh del mundo.” (Juan 15:19) Claro que bien importante con Jesus que el de suyu maga siguidores esta separtao na mundo!

2. Na cosa ta refiri el “mundo” que ya menciona si Jesus?

² El “mundo” que ya menciona si Jesus ta refiri con el maga gente que nuay buen relacion con Dios. Ta rula kanila si Satanas y ya queda sila esclavo na mal deseo y espiritu de orgullo que ta sale con ele. (Juan 14:30; Efeso 2:2; 1 San Juan 5:19) Poreso, ‘el maga amigo del mundo, contrario del Dios.’ (Santiago 4:4) Entonces, paquemodo aquellos quien quierre esta na amor del Dios queda aqui na mundo pero esta separtao con este? Puede sila se hace si: (1) Esta sila leal con el Reino del Dios y neutral na politica, (2) resisti con el espiritu del mundo, (3) decente na diila camisa y mudada, (4) mentena un simple vida y (5) usa con el completo espiritual armadura. Discuti kita con este cinco manera.

3. (a) Porque nuay participa si Jesus na politica? (b) Porque puede habla que el maga iscujido siguidores de Jesus ta sirvi como maga representante? (Inclui con el footnote.)

³ En vez de participa na politica na de suyu tiempo, ya hace centro si Jesus el de suyu atencion na predicacion acerca na Reino del Dios. Un gobierno este na cielo que donde ele hay queda Rey. (Daniel 7:13, 14; Lucas 4:43; 17:20, 21) Poreso ya habla si Jesus con el un Romano Gobernador, si Poncio Pilato: “El dimio Reino gendeh de este mundo.” (Juan 18:36) El maga fiel siguidores de Cristo ta esta leal con ele y ta imita con el de suyu ejemplo. Ta esta sila leal con el Reino del Dios y ta anuncia con ese na entero mundo. (Mateo 24:14) “Representante came de Cristo,” ya escribi si apostol Pablo. “Por amor de Cristo, ta suplica came con ustedes: Hace ustedes el paz con el Dios.” *​—2 Corinto 5:20.

4. Paquemodo el maga deverasan Cristiano ya dale mira lealtad con el Reino del Dios? (Mira con el cajon “ Neutral El Maga Cristiano De Antes.”)

⁴ El maga ambassador o representante del un nacion gendeh ta entra mete na maga cosas que ta sucede na nacion onde sila ta sirvi; sino ta esta sila neutral. Pero ta suporta sila con el gobierno del nacion que ta representa sila. Ansina tambien el maga iscujido siguidores de Cristo que donde el diila “casa talla na cielo.” (Filipo 3:20) Gane, por causa con el diila activo predicacion ya puede sila ayuda con el “otro maga carnero” de Cristo para tiene “paz con el Dios.” (Juan 10:16; Mateo 25:31-40) Este otro maga carnero ta suporta con el maga iscujido hermano de Jesus. Como un unido grupo quien ta suporta con el Mesianico Reino, igual sila ta esta neutral na politica de este mundo.​—Le con el Isaias 2:2-4.

5. Cosa el otro razon si porque ta esta neutral el maga deverasan Cristiano?

 ⁵ Gendeh lang el lealtad con Cristo el razon si porque el maga deverasan Cristiano ta esta neutral. El maga siervo del Dios de antes ta queda lang na un nacion, pero ahora  tiene ya kita maga hermano y hermana na entero mundo. (Mateo 28:19; 1 Pedro 2:9) Poreso si suporta kita un partido na politica, gendeh kita puede predica con limpio conciencia que el Reino del Dios lang el esperanza del maga gente. Perde tambien el diaton unidad como maga Cristiano. (1 Corinto 1:10) Mas pa, si na tiempo del guerra, el diaton maga hermano na fe​—con quien kita debe ama​—amo queda diaton maga contrario. (Juan 13:34, 35; 1 San Juan 3:10-12) Poreso, tiene buen razon si porque ya habla si Jesus con el de suyu maga dicipulo que no participa na guerra. Ya habla pa gane le que ama con el diila maga enemigo.​—Mateo 5:44; 26:52; mira con el cajon “ Ta Esta ba Yo Neutral?”

6. Paquemodo el de tuyu dedicacion con Dios ta afecta con el de tuyu relacion con Caesar?

⁶ Como maga deverasan Cristiano, ya dedica kita el diaton vida con Dios y gendeh na gente, organizacion del gente o nacion. El 1 Corinto 6:19, 20 ta habla: “Gendeh mas ustedes el dueño del de ustedes maga cuerpo. Cay ya compra y ya paga ya con ustedes.” Poreso, maskin ta dale el maga siguidores de Jesus el cosas que para con “Caesar” igual como el honor, tax y relativo obediencia, ta dale tambien sila “con Dios el cosa de Dios.” (Marcos 12:17; Roma 13:1-7) Incluido con ese el diila adoranza, amor, lealtad y obediencia. Si necesita, conforme sila dale el diila vida para con Dios.​—Lucas 4:8; 10:27; le con el Maga Actividad 5:29; Roma 14:8.

7, 8. Cosa el “espiritu del mundo” y paquemodo este “ta trabaja” adentro na maga desobediente gente?

⁷ Para esta separtao na mundo, necesita tambien el maga Cristiano resisti con el mal espiritu de este. Si apostol Pablo ya escribi: “Came noay recivi el espiritu del mundo, sino el  Espiritu del Dios.” (1 Corinto 2:12) Con aquellos na Efeso, ele ya habla: “Ta vivi ustedes durante aquel tiempo cuando ta sigui pa ustedes na . . . mundo y ta obedece pa ustedes con el rey que ta goberna na aire, el espiritu que ta trabaja adentro na corazon del maga rebelde.”​—Efeso 2:2, 3.

⁸ El “aire” o espiritu de este mundo amo un invisible fuerza que ta manda move con el maga gente para desobedece con Dios y sigui con el ‘maga mal deseo del cuerpo y del ojos.’ (1 San Juan 2:16; 1 Timoteo 6:9, 10) Tiene este autoridad cay ta puede este influencia con el deseo del cuerpo, gendeh con este ta puede nota y maskin onde este igual con el aire. Mas pa, “ta trabaja” este adentro na maga desobediente gente na manera que hinay-hinay ta influencia kanila para queda hambriento, orgulloso, ambicioso, rebelde y hace diila mismo maga principio de moral. * El espiritu del mundo hinay-hinay ta siembra na corazon del maga gente el maga custumbre del Diablo.​—Juan 8:44; Maga Actividad 13:10; 1 San Juan 3:8, 10.

9. Na cosa maga manera el espiritu del mundo puede penetra na diaton pensamiento y corazon?

⁹ Puede ba penetra na de tuyu pensamiento y corazon el espiritu del mundo? Posible se sucede si gendeh tu continua vicia. (Le con el Proverbio 4:23.) Hinay-hinay este ta influencia kanaton, posible por medio na diaton maga uban que dol maga buen gente pero el deverasan nuay amor con Jehova. (Proverbio 13:20; 1 Corinto 15:33) Puede tambien contigo influencia el mal espiritu por medio na maga cuestionable publicacion o entretenimiento, maga website de pornografia o apostata y maga juego que tiene espiritu de competicion​—por medio con maskin quien o maskin cosa que ta dale mira el pensamiento de Satanas o del de suyu sistema.

10. Paquemodo kita puede resisti con el espiritu del mundo?

 ¹⁰ Paquemodo kita puede resisti con el peligroso espiritu del mundo y esta na amor del Dios? Puede lang se kita hace si beneficia kita con el maga espiritual provicion de Jehova y pidi pirmi el de suyu sagrao espiritu por medio na rezo. Mas poderoso si Jehova contra con el Diablo o con este mal sistema que bajo na rulanza de Satanas. (1 San Juan 4:4) Poreso, bien importante  gayot que esta kita cerca con Jehova por medio na rezo!

11. Paquemodo el espiritu del mundo ya influencia con el maga gente na diila usada de camisa?

¹¹ El camisa, mudada y limpieza del un persona ta indica si cosa espiritu le tiene. Na manada lugar, gendeh mas decente el maga camisa que ta usa poreso el un comentarista na TV ya habla que gendeh dura gendeh mas kita conoce si quien el prostitute y si quien el gendeh. Asegun na un report del diario, maskin maga mujer que nuay pa 13 año ta usa bien corto y gendeh decente camisa. Uso tambien el mudada que ta dale mira rebelion, nuay dignidad y respeto na mismo cuerpo.

12, 13. Cosa maga principio debe guia kanaton na diaton estilo de camisa y mudada?

¹² Como maga siervo del Dios, quierre kita que presentable el diaton ichura poreso ta usa kita camisa arreglao, limpio, aceptable con otro y justo na ocacion. Debe kita muda na “decente y . . . modesto” manera y “hace maga buen trabajo” que conviene para con aquellos quien tiene devocion con Dios​—hombre man o mujer. Siempre gendeh proposito diaton que saca el atencion del otro sino para ‘esta kita na amor del Dios.’ (1 Timoteo 2:9, 10; San Judas 21) Si, mas quierre kita que bonito el cosa que talli ‘adentro na diaton corazon cay amo este el precioso adelante del Dios.’​—1 Pedro 3:3, 4.

¹³ Debe tambien kita pone na pensamiento que el estilo del diaton camisa y mudada puede afecta na mirada del otro con el verdadero adoranza. El Griego palabra que yan translate “modesto,” si usa acerca na moral, quierre decir respeto na sentido o opinion del otro. Entonces, debe kita considera que mas importante el conciencia del otro contra con el diaton derecho si paquemodo kita quierre muda. El mas importante na todo, quierre kita honra con Jehova  y con el de suyu maga siervo y dale mira que maga ministro kita del Dios que ta hace el todo “para el gloria del Dios.”​—1 Corinto 4:9; 10:31; 2 Corinto 6:3, 4; 7:1.

14. Cosa maga pregunta kita debe considera acerca na diaton ichura y limpieza na cuerpo?

¹⁴ Mas importante que dale kita atencion con el diaton camisa, mudada y limpieza si ta participa kita na predicacion y ta atende miting. Pregunta na de tuyu mismo cuerpo: ‘El de mio ichura y limpieza na cuerpo ta saca ba atencion del otro? Tan huya ba sila por causa con este? Mas importante ba conmigo el de mio derecho acerca con este contra queda cualificao na maga privilegio na congregacion?’​—Salmo 68:6; Filipo 4:5; 1 Pedro 5:6.

15. Porque el Palabra del Dios nuay dale maga especifico ley acerca na camisa, mudada y limpieza?

¹⁵ El Biblia nuay dale maga especifico ley na maga Cristiano acerca na camisa, mudada y limpieza. No quierre si Jehova que sangga con el diaton libertad para decidi y abilidad para pensa. Sino, quierre le que queda kita mature na espiritual que ta hace decicion base na maga principio na Biblia y ta “pensa enbuenamente para puede distingui el cosas bueno y malo.” (Hebreo 5:14, El Nuevo Testamento) Mas pa, quierre le que tiene kita amor​—amor para con Dios y na diaton vecinos. (Le con el Marcos 12:30, 31.) Manada estilo  de camisa y mudada que puede kita iscuji que gendeh ta viola con el maga principio del Biblia. Puede se kita mira na diferente clase y estilo de camisa que ta usa el maga siervo del Dios maskin onde parte del tierra.

16. Paquemodo el espiritu del mundo ta anda contra con el enseñanza de Jesus y cosa kita debe pregunta con el diaton mismo cuerpo?

¹⁶ El espiritu del mundo ta engaña con el millones de gente para pensa que el alegria ta depende na cen y material cosas. Pero, si Jesus ya habla: “El maga bienes del persona no puede asegura el disuyo vida maskin quemodo le de rico.” (Lucas 12:15) Nuay enseña si Jesus que gendeh kita necesita cen o material cosas. Sino, ya enseña le que aquellos quien “ta pensa el diila espiritual necesidad” y ta mentena un simple vida que centro na maga espiritual cosas  amo el ta experiencia deverasan alegria. (Mateo 5:3, NW; 6:22) Pregunta na de tuyu mismo cuerpo: ‘Ta creé ba gayot yo con el cosa ya enseña si Jesus o ya influencia conmigo el “tata del imbusterias”? (Juan 8:44) Cosa ta dale mira el de mio maga palabra, plano, prioridad y manera de vida?’​—Lucas 6:45; 21:34-36; 2 San Juan 6.

17. Cosa el cuanto maga bendicion que ta experiencia aquellos quien ta mentena un simple vida?

¹⁷ Si Jesus ya habla: “El saber del Dios, por medio del disuyo mismo maga trabajo, ya dale prueba cay amo gayot.” (Mateo 11:19) Considera el cuanto maga beneficio que ya experiencia aquellos quien ta mentena un simple vida. Ta experiencia sila deverasan alivio mientras ta sirvi na Reino. (Mateo 11:29, 30) Ta puede sila evita el sobra lingasa y dolor na emocion. (Le con el 1 Timoteo 6:9, 10.) Ciendo contento ya na cosa lang sila ta necesita na vida, tiene sila mas grande tiempo na diila familia y na maga hermano y hermana na fe. Como resulta, mas enbuenamente el diila durmida. (Eclesiastes 5:12) Mas alegre sila cay ta dale sila con otro y ta hace con ese na maskin cosa manera que puede sila hace. (Maga Actividad 20:35) Sila tambien “lleno de esperanza,” contento y tiene paz na pensamiento. (Roma 15:13; Mateo 6:31, 32) Nuay onde puede compara con ese maga bendicion!

18. Cosa el Biblia ta habla acerca na diaton enemigo, el manera del de suyu ataque y si cosa clase de peleajan kita tiene?

¹⁸ Aquellos quien ta esta na amor del Dios ta ricibi tambien espiritual proteccion contra con Satanas quien no quierre que experiencia alegria y obtene vida hasta para cuando el maga Cristiano. (1 Pedro 5:8) Si Pablo ya habla: “Cay hende kita ta man contra con el maga gente, sino contra con el maga demonio . . . y contra con el di ila maga  gobernador y maga autoridad y aquellos quien tiene poder na di ila reino de maldad aqui na mundo.” (Efeso 6:12, El Nuevo Testamento) El Griego palabra que yan translate “ta man contra” quierre decir mano-mano o apiquijan el peleajan. Mas pa, el maga termino “gobernador,” “autoridad” y “aquellos quien tiene poder” ta indica que bien organizao y intencional el ataque del maga mal espiritu.

19. Cosa-cosa el maga espiritual armadura del maga Cristiano?

¹⁹ Maskin pa con el imperfeccion y limitacion del maga gente, puede siempre kita ganá. Paquemodo? Por medio na usada del “maga armas [completo armadura, NW] de Dios.” (Efeso 6:13) El Efeso 6:14-18 ta dale mira si cosa-cosa este armadura: “Para ustedes duro, usa el verdad como un cinturon alrededor del de ustedes cintura, el justicia como un camisa de guerra, el interes para predica el Evangelio de paz como un zapatos, el Fe como un defensa para hace apaga con el maga pana de fuego del Demonio. Cubri el de ustedes cabeza con el helmet del salvacion y agarra el espada del Espiritu que amo el Palabra del Dios. Reza firmi; pidi el de ustedes maga necesidad; reza el tiempo unido con el Espiritu.”

20. Porque diferente el diaton situacion na un literal soldao?

²⁰ Ciendo estaba con Dios el espiritual armadura, protege se kanaton si usa kita con ese pirmi. Gendeh igual con el maga literal soldao que ta dura antes de man guerra otravez, el maga Cristiano ta continua el diila espiritual guerra. Vida el envuelto na este guerra que hay continua hasta destroza el Dios con el mundo de Satanas y buta con el maga mal espiritu na ondura. (Revelacion 12:17; 20:2) Poreso, no descanza resisti con el de tuyu mal inclinacion o deseo cay todo kita necesita “castiga” con el diaton mismo cuerpo para puede esta fiel con Jehova. (1 Corinto 9:27) Gane, mas man lingasa kita si gendeh mas kita ta resisti con ese!

21. Paquemodo kita puede ganá na diaton espiritual guerra?

 ²¹ Mas pa, gendeh kita puede ganá con este guerra por medio lang na diaton fuerza. Poreso, si Pablo ya hace kanaton acorda que necesita kita reza “firmi” con Jehova. Debe tambien kita oi con Jehova por medio na lehida del de suyu Palabra y man junto pirmi con el diaton maga hermano y hermana cay gendeh kita solo-solo na este guerra! (Filemon 2; Maga Hebreo 10:24, 25) Aquellos fiel na este todo aspeto hay ganá na este guerra y puede defende con el diila fe.

22, 23. (a) Porque kita debe pirmi preparao para defende con el diaton fe y cosa kita pregunta na diaton mismo cuerpo? (b) Cosa hay discuti na siguiente capitulo?

²² “Ustedes gendeh del mundo,” ya habla si Jesus, “poreso, el mundo ta odia con ustedes.” (Juan 15:19) Entonces, necesita pirmi preparao el maga Cristiano para defende con el diila fe y hace con ese con respeto y na buen manera. (Le con el 1 Pedro 3:15, 16.) Pregunta na de tuyu mismo cuerpo: ‘Ta entende ba yo si porque el maga Testigo de Jehova tiene vez gendeh ta sigui con el opinion del mayoria? Si enfrenta yo ansina situacion, convincido ba gayot yo que justo el cosa ta habla el Biblia y el fiel esclavo? (Mateo 24:45, NW; Juan 17:17) Conforme ba yo queda diferente na otro para hace el cosa justo na vista de Jehova y hace con ese con alegria?’​—Salmo 34:2; Mateo 10:32, 33.

²³ Pero, el diaton deseo que esta separtao na mundo pirmi ta pone na probanza na maga manera que gendeh kita ta puede nota. Por ejemplo, como cosa kita ya discuti ta pricura engaña el Diablo con el maga siervo del Dios por medio na entretenimiento del mundo. Paquemodo kita puede iscuji buen entretenimiento que puede kanaton dale alegria y limpio conciencia? Hay discuti se na siguiente capitulo.