1, 2. Porque alegre si Jehova si ta mira le que ta pricura kita queda honesto? Ilustra.

JUNTO ya sale na tienda el nana y el de suyu diutay anak hombre. Nuay dura, ya descanza camina el bata y cara’y espantao. Ta agarra le un diutay jurguesa que ya saca le na tienda. Ya ulvida le debolbe con este o habla con el de suyu nana que cumpra con este. Malingasa le y ta pidi ayuda con el de suyu nana. Ya hace con ele calma el de suyu nana y ya bira sila na tienda para debolbe con el jurguesa y pidi despensa. Alegre el nana mientras ta mira con el de suyu anak que ta hace se. Porque?

² Alegre el maga mayores mira que ta dale valor el maga anak con el pagka-honesto. Ansina tambien el cosa ta sinti diaton Tata na cielo, “el Dios de verdad.” (Salmo 31:5) Mientras ta mira le kanaton ta queda mature na espiritual, alegre le mira que ta pricura kita queda honesto. Ciendo quierre kita hace alegre con ele y esta na de suyu amor, ta imita kita con apostol Pablo quien ya habla, “Ta precura came hace todo maga cosa-cosa embuenamente.” (Maga Hebreo 13:18) Incluido el pagka-honesto na cosa quierre decir del original Griego palabra que yan translate “embuenamente.” Hay examina kita el cuatro importante aspeto na vida que posible tan dificil kita tiene vez queda honesto. Despues, discuti kita si cosa el cuanto maga bendicion.

3, 4. Paquemodo ta dale mira el Palabra del Dios que peligroso si engaña kita con el diaton mismo cuerpo?

³ El primer cosa que tan dificil kita amo que queda honesto  na diaton mismo cuerpo. Ciendo maga imperfecto kita, facil lang kita engaña con el diaton mismo cuerpo. Por ejemplo, ya habla si Jesus con el maga Cristiano na Laodicea que ta engaña lang sila con el diila mismo cuerpo. Ta pensa sila que rico sila pero el deverasan, ‘pobre sila, desnudo pati bulag’ na espiritual​—un maka-lastima condicion. (Revelacion 3:17) Por causa con ese, ta hace lang sila mas peligroso con el diila situacion.

⁴ Ta acorda tambien siguro tu el cosa ya habla si Santiago: “Si tiene quien ta pensa que ele un gente religioso, pero gendeh le ta controla el disuyo boca, ta engaña lang le con el disuyo mismo cuerpo y no sirvi nada el disuyo religion [adoranza, NW].” (Santiago 1:26) Si ta pensa kita que aceptable siempre el diaton adoranza con Jehova maskin gendeh kita ta usa na justo manera con el diaton converzada, ta engaña lang kita con el diaton mismo cuerpo. El diaton adoranza con Jehova hay queda no vale nada. Cosa kita hace para gendeh se sucede kanaton?

5. Cosa kanaton puede ayuda para queda kita honesto na diaton mismo cuerpo?

⁵ Na mismo capitulo, ya compara si Santiago con el Palabra del Dios na un espejo. Ya anima le kanaton que examina enbuenamente con el perfecto ley del Dios y hace maga necesita cambio. (Le con el Santiago 1:23-25.) Puede kanaton ayuda el Biblia para queda honesto na diaton mismo cuerpo y mira si cosa kita necesita cambia. (Lamentacion 3:40; Haggeo 1:5) Puede tambien kita reza con Jehova y pidi con ele que examina kanaton para puede kita mira y corecta el maskin cosa serioso defecto que tiene kita. (Salmo 139:23, 24) El pagka-deshonesto amo un inclinacion que gendeh pronto puede nota y necesita kita mira con este igual si paquemodo el diaton Tata na cielo ta mira con ese. El Proverbio 3:32 ta habla: “Ta odia si Jehova con el un gente que gendeh honesto, pero tiene Le buen amistad con el maga recto.” Puede kanaton ayuda si Jehova para sinti el cosa le ta sinti y mira con el diaton  mismo cuerpo igual si paquemodo le ta mira kanaton. Acorda que si Pablo ya habla: “Ta precura came hace todo maga cosa-cosa embuenamente.” Gendeh kita puede queda perfecto ahora, pero sincero kita ta desea y ta pricura queda honesto.

6. Porque necesita queda honesto na uno’y otro el man maridable y cosa peligro sila puede evita?

⁶ Debe queda identificacion del un Cristiano familia el pagka-honesto. Entonces, el man maridable debe queda honesto na uno’y otro. Debe sila evita maga duele y mabuling practica igual como man flirt con el gendeh diila marido o mujer, tiene secreto relacion na otro por medio na Internet o el usada de maskin cosa clase de pornografia. El cuanto maga Cristiano ya hace con ese maga mal cosas y ta esconde se na diila marido o mujer. Gendeh honesto el quien ta hace con ese. Nota con el cosa ya habla el un fiel Rey, si David: “Gendeh yo tan junto con el maga gente engañador y ta evita yo con aquellos quien ta esconde si quien sila.” (Salmo 26:4) Si casao tu, no gayot practica maga cosas que manda contigo esconde si quien gayot tu na de tuyu marido o mujer!

7, 8. Cosa maga ejemplo na Biblia puede ayuda con el maga anak sabe si porque importante queda honesto?

⁷ Si ta enseña el maga mayores con el maga anak acerca si porque importante queda honesto, mas bueno que usa sila maga ejemplo na Biblia. Si ta discuti acerca na maga gente gendeh honesto, puede considera el ejemplo de Acan quien ya ruba y ya  pricura esconde el cosa le ya hace; Gehazi, quien yan imbusterias por causa lang na sen; y Judas, quien ya ruba y yan imbusterias para hace cosa malo con Jesus.​—Josue 6:17-19; 7:11-25; 2 Rey 5:14-16, 20-27; Mateo 26:14, 15; Juan 12:6.

⁸ Puede tambien sila discuti con el buen ejemplo del maga gente honesto igual como si Jacob quien ya anima con el de suyu maga anak que debolbe el sen que ya incuntra sila na diila saco cay ta pensa le que yan mali lang este pone alla; si Jefte y el de suyu anak mujer quien ya cumpli con el promesa del de suyu tata maskin pa grande el cosa le sacrificia y si Jesus quien con animo ya manda conoce con el de suyu mismo cuerpo na maga violente gente para cumpli con el profecia y protege con el de suyu maga amigo. (Genesis 43:12; Juez 11:30-40; Juan 18:3-11) Este cuanto maga ejemplo ta dale mira con el maga mayores si cosa maga precioso informacion puede sila saca na Palabra del Dios que puede sila usa para enseña con diila maga anak queda honesto.

9. Cosa debe evita el maga mayores si quierre sila queda honesto el diila maga anak y porque importante que tiene sila buen ejemplo?

⁹ Importante obligacion del maga mayores que enseña con el diila maga anak. Si apostol Pablo ya pregunta: “Si ta insiña tu con los demas, por que man gendeh tu ta insiña con el dituyo mismo cuerpo? Tu ta predica: ‘No roba,’ pero tu ta roba.” (Roma 2:21) Tan libug el maga anak si el diila mayores ta enseña kanila queda honesto pero sila mismo gendeh honesto. Baka hace sila de menos el rubada de maga cosas que diutay el valor y maga imbusterias que man razon igual como, “Sabe ya se el dueño que hay saca con ese el maga gente” o “Diutay imbusterias lang se.” El deverasan, maskin cosa pa de diutay el valor del cosa ya ruba, robo siempre se. Y maskin cosa pa de diutay el imbusterias o acerca de cosa, imbusterias siempre se. * (Le con el Lucas 16:10) Ta puede dayun mira el maga  bata si el diila maga mayores ba ta actua contra na cosa sila ta enseña y por causa con ese posible gendeh sila engranda como honesto persona. (Efeso 6:4) Pero si ya aprende sila queda honesto por medio na ejemplo del diila maga mayores, hay dale sila gloria con Jehova mientras ta engranda na este mundo que donde manada el gendeh honesto.​—Proverbio 22:6.

10. Cosa-cosa kita necesita pone na pensamiento si tan cuento con el diaton maga hermano y hermana na fe?

¹⁰ Tiene kita manada oportunidad para aprende queda honesto si tan junto kita con el diaton maga hermano y hermana na fe. Como cosa kita ya aprende na Capitulo 12, necesita kita queda con cuidao na manera si paquemodo ta usa con el diaton abilidad para converza, especialmente entre na diaton maga hermano y hermana. El normal cuento puede cae na chismis y na falso acusacion! Si habla kita con otro el un cosa que gendeh kita asigurao si deverasan, baka ayuda kita hace calayat imbusterias. Poreso, mas bueno si controla kita con el diaton converzada. (Proverbio 10:19) Pero gendeh tambien quierre decir que si deverasan el cosa kita ya sabe hay habla ya kita se con otro. Por ejemplo, un cosa se que gendeh kita debe entra mete o gendeh bueno que habla con otro. (1 Tesalonica 4:11) El cuanto maga gente ta habla maga cosas maskin duele este con otro y ta man razon que honesto lang sila. Pero,  el diaton maga palabra debe bueno y bonito para oi.​—Le con el Colosa 4:6.

11, 12. (a) Cosa el cuanto maga manera que donde aquellos quien ya comete serioso culpa ta hace mas grabe con el problema? (b) Cosa el cuanto imbusterias que ta enseña si Satanas acerca na maga serioso culpa y paquemodo kita resisti con ese? (c) Paquemodo kita dale mira que honesto kita na organizacion de Jehova?

¹¹ Importante queda honesto especialmente con aquellos quien ta guia na congregacion. El cuanto quien ya comete maga serioso culpa ta esconde con el cosa sila ya hace y tan imbusterias na maga anciano si ta pregunta kanila acerca con ese. Por causa con ese, ta hace sila mas grabe el problema. Gane, tiene sila doble manera de vida, ta pretende sila que ta sirvi sila con Jehova mientras ta comete serioso culpa. Como resulta, ta vivi sila na imbusterias. (Salmo 12:2) El otro tambien gendeh ta habla el todo cosas na maga anciano y ta esconde el cuanto importante detalle. (Maga Actividad 5:1-11) Ta hace sila se cay ta creé sila con el maga imbusterias de Satanas.​—Mira con el cajon “ Maga Imbusterias de Satanas Acerca na Maga Serioso Culpa.”

¹² Importante tambien queda honesto na organizacion de Jehova si tan fill up kita maga form. Por ejemplo, si tan report kita si cosa kita ya hace na ministerio, ta pone kita si cosa lang el deverasan. Na igual manera, si tan fill up kita application form para na cuanto privilegio, gendeh kita man imbusterias acerca na diaton salud y na diaton personal informacion.​—Le con el Proverbio 6:16-19.

13. Paquemodo kita dale mira que honesto kita si tiene kita coneccion na negocio con el diaton maga hermano o hermana na fe?

¹³ Necesita tambien kita queda honesto na diaton maga hermano y hermana na maga cosas de negocio. Tiene vez, ta man junto na negocio el maga hermano. Debe sila queda con cuidao que gendeh hace junto con el maga cosas de negocio na adoranza. Debe sila evita discuti acerca con ese si talli sila na Kingdom Hall o mientras ta participa na ministerio. Posible, el uno diila amo y el otro trabajante. Si saca kita con el diaton  maga hermano o hermana como diaton trabajante, debe kita queda honesto kanila. Dale kita el diila sueldo na hora y asegun si cuanto el diaton sabut y incluido el maga beneficio que ta manda el ley. (1 Timoteo 5:18; Santiago 5:1-4) Pero, si kita tambien el quien ta trabaja con el un hermano o hermana, debe kita trabaja exacto na sueldo que ta dale kanaton. (2 Tesalonica 3:10) Gendeh kita ta expecta que trata kanaton especial cay hermano o hermana kita diila na fe que dol ta sinti kita obligao el diaton amo dale kanaton vacacion, maga beneficio y otro ventaja que gendeh ta dale na otro trabajante.​—Efeso 6:5-8.

14. Si el maga Cristiano tiene ka-socio na negocio, cosa sila ta hace y porque?

¹⁴ Paquemodo si tiene kita ka-socio na negocio, pone kita yan invest o yan loan kita? El Biblia ta dale un importante y practical principio: Man record o escribi el todo cosa kita ya man sabut! Por ejemplo, cuando ya cumpra lote si Jeremias, ya hace le dos copia de documento adelante del maga testigo y ya esconde este para puede usa como referencia na futuro. (Jeremias 32:9-12; le tambien con el Genesis 23:16-20.) Si tan negocio con el otro hermano, gendeh quierre decir que nuay kita confianza na uno’y otro si ta hace kita un detallado documento y ta manda firma adelante del maga testigo. Sino, ta puede se ayuda para evita el posibilidad que gendeh man entendijan y man purpiajan que ta causa division. El maskin quien Cristiano que tan negocio con otro hermano debe pone na pensamiento que gendeh debe pone na peligro el unidad y paz na congregacion por causa lang na negocio. *​—1 Corinto 6:1-8.

15. Cosa si Jehova ta sinti acerca na maga deshonesto practica de negocio y cosa el mirada del maga Cristiano con ese practica?

¹⁵ Honesto el un Cristiano gendeh lang na congregacion.  Si Pablo ya habla: “Ta precura came hace todo maga cosa-cosa embuenamente.” (Maga Hebreo 13:18) Quierre el diaton Creador que queda honesto el maga gente na maga cosas de negocio. Na libro del Proverbio pa lang, cuanto beses ya menciona acerca el gendeh exacto pesador. (Proverbio 11:1; 20:10, 23) Del antes, comon el usada de pesador na negocio para pesa con el cosa ya cumpra y con el sen que ya usa paga con ese. El maga deshonesto negociante ta usa gendeh exacto pesador para engaña y man maru con aquellos quien ta cumpra kanila. Ta odia si Jehova con ese practica! Para esta na de suyu amor, ta evita gayot kita todo deshonesto practica de negocio.

16, 17. (a) Cosa-cosa maga deshonesto practica el comon na mundo ahora? (b) Cosa determinao hace el maga verdadero Cristiano?

¹⁶ Ciendo si Satanas amo el quien ta rula con el mundo, gendeh maka-espanta que manada gente na mundo gendeh honesto. Cada dia ta enfrenta kita maga tentacion para queda deshonesto. Si ta hace el maga gente résumé para man apply trabajo, comon ya kanila man imbusterias, hace por demas el informacion acerca kanila y inventa maga experiencia para dale mira que cualificao sila na trabajo. Si tan fill up el maga gente form para trabaja o queda na otro nacion, para paga tax, saca insurance y otro pa, ta dale sila falso informacion para puede obtene el cosa sila quierre. Manada estudiante ta copia si ta saca test o si ta hace sila report para na escuela, el otro ta copia na Internet y ta habla que sila lang el quien ya hace con ese. El otro tambien ta dale suborno con el maga deshonesto oficial para puede sila obtene el cosa sila quierre. Ese el cosa kita expecta na un mundo que donde bien manada el “canalla y hambriento, . . . enemigo de todo maga cosa-cosa bueno.”​—2 Timoteo 3:1-5.

¹⁷ El maga verdadero Cristiano determinao gendeh practica con ese maga cosas. Dificil tiene vez esta honesto cay dol mas enbuenamente el vida del maga deshonesto y ta puede sila obtene el cosa sila quierre. (Salmo 73:1-8) Mientras  tanto, posible man dificil na material el maga Cristiano cay mas quierre sila esta honesto na todo cosas. Debe ba kita hace ese sacrificio? Siempre! Pero, porque? Cosa el maga bendicion si honesto kita?

18. Porque valoroso el buen reputacion como un honesto persona?

¹⁸ Cuanto cosas lang na diaton vida el mas valoroso que con el buen reputacion como un honesto persona con quien puede confia. (Mira con el cajon “ Paquemodo Yo de Honesto?”) Gane, maskin quien puede tiene ansina reputacion! Gendeh este ta depende na de tuyu talento, riqueza, ichura, estado na vida o otro pa cosas que gendeh tu puede controla. Pero manada el nuay puede obtene ansina clase de buen reputacion. Ralo lang se sucede. (Miqueas 7:2) Si honesto tu, baka el cuanto hay gangguia contigo. Pero el otro hay aprecia si honesto tu y hay confia y respeta sila contigo. Manada maga Testigo de Jehova el ya beneficia na material cay honesto sila. Ya esta sila na diila trabajo cuando ya quita con el maga deshonesto trabajante o ta incuntra sila trabajo si tiene quien ta necesita honesto trabajante.

19. Si honesto el un persona, cosa el efecto de ese na de suyu conciencia y na de suyu relacion con Jehova?

¹⁹ Ya sucede man se contigo o nuay, si honesto tu hay experiencia tu mas manada bendicion. Hay tiene tu un limpio conciencia. Si Pablo ya escribi: “Asegurao came cay limpio el diamon conciencia.” (Maga Hebreo 13:18) Mas pa, el diaton Tata na cielo ta nota con el de tuyu buen reputacion y ta ama le con el maga gente honesto. (Le con el Salmo 15:1, 2; Proverbio 22:1.) Si, el de tuyu pagka-honesto puede ayuda contigo esta na amor del Dios y gendeh kita ta desea mas pa que con ese. Hay discuti kita el siguiente tema que tiene coneccion con este: Si cosa el mirada de Jehova con el trabajo.