1, 2. (a) Acerca na nuevo casao, cosa kita tiene vez ta pensa y porque? (b) Cosa maga pregunta kita discuti na este capitulo?

QUIERRE-QUIERRE ba tu anda na maga casamiento? Manada el quierre anda cay un alegre ocasion se. Puede tu mira con el maridable que bien mudao. Y gendeh lang se, puede tu mira na diila cara el alegria! Na ese dia, bien alegre gayot sila y dol lleno de esperanza el diila futuro.

² Pero, gendeh kita puede nega que manada matrimonio ahora el trambulicao. Maskin pa ta esperanza kita que tiene buen exito el matrimonio del nuevo casao, tiene vez ta pensa kita: ‘Hay queda ba alegre este matrimonio? Hay tarda gaha sila?’ El contestacion de ese maga pregunta ta depende si el man maridable hay confia y aplica con el consejo del Dios acerca na matrimonio. (Le con el Proverbio 3:5, 6.) Necesita sila hace con ese para esta na amor del Dios. Hace kita centro el diaton atencion na contestacion del Biblia na este cuatro pregunta: Porque ta casa el un persona? Si casa tu, con quien tu debe iscuji para queda de tuyu marido o mujer? Paquemodo tu prepara para na matrimonio? Y cosa puede ayuda con el man maridable para esta sila alegre?

3. Porque gendeh justo casa si nuay valido razon?

³ El cuanto ta creé que el matrimonio importante para  queda alegre​—gendeh queda alegre el de tuyu vida si nuay tu marido o mujer. Gendeh gayot se deverasan! Si Jesus quien nuay casa, ya menciona que un regalo si el un persona puede esta soltero o dalaga y ya anima le con aquellos quien puede que hace con ese. (Mateo 19:11, 12) Si apostol Pablo ya discuti tambien el ventaja de ese. (1 Corinto 7:32-35) Nuay dale ley si Jesus y si Pablo que debe esta soltero o dalaga el un persona; gane, un “doctrina que ta sale con el Demonio” que prohibi casa con el un persona. (1 Timoteo 4:1-3) Pero, mas manada cosa puede hace na servicio con Jehova aquellos maga soltero y dalaga. Entonces gendeh justo casa si nuay valido razon, igual si tan pressure lang contigo.

4. Cosa puede dale el alegre matrimonio na vida del familia?

⁴ Pero, tiene ba maga valido razon para casa? Si. El matrimonio un regalo tambien estaba con el diaton amable Dios. (Le con el Genesis 2:18.) Poreso, tiene este ventaja y puede este dale alegria. Por ejemplo, el alegre matrimonio amo el de con todo buen fundacion para na un alegre familia. Necesita el maga anak un buen familia que donde el mayores hay hace kanila engranda, dale mira amor, disciplina y guia. (Salmo 127:3; Efeso 6:1-4) Pero, gendeh lang por causa na diila maga anak ta casa el dos persona.

5, 6. (a) Asegun na Eclesiastes 4:9-12, cosa el cuanto del maga practical beneficio si kita tiene amigo o amiga? (b) Paquemodo el matrimonio queda igual na tres amarro turcido?

⁵ Considera con el texto que amo el tema de este capitulo y el contexto de este: “El dos mas bueno que con el uno cay tiene sila buen premio na diila trabajo. Cay si el uno diila tumba, el de suyu uban puede con ele ayuda hace levanta. Pero cosa pasa con el uno si ya tumba le y nuay con ele quien hace levanta? Mas pa, si el dos hay acusta junto, hay esta sila caliente. Pero paquemodo esta caliente si solo lang? Y el un persona puede ganá con el uno, pero el dos  que junto puede ganá contra con ele. Y el tres amarro turcido gendeh pronto reventa.”​—Eclesiastes 4:9-12.

⁶ Este texto ta dale mira si cosa el valor del amigo o amiga. Siempre, el man maridable amo el de con todo cerca amigo y amiga. Como cosa ta dale mira este escritura, el man maridable puede dale ayuda, comforta y proteccion na uno y otro. Hay queda mas fuerte el diila relacion si tiene pa otro envuelto na diila matrimonio. Asegun na este versiculo, el dos amarro turcido posible reventa. Pero si tres ese amarro, dificil se reventa. Si el deseo del man maridable hace alegre con Jehova, el diila matrimonio igual na tres amarro turcido. Si ta hace sila parte del diila matrimonio si Jehova, hay queda mas fuerte el diila matrimonio.

7, 8. (a) Cosa consejo ya escribi si Pablo para na maga soltero y dalaga Cristiano? (b) Cosa ya habla el Biblia acerca na vida casao?

⁷ Entre na man maridable lang puede satisfecha enbuenamente con el sexual deseo. Na ese lang situacion puede mira con el sexual relacion como un cosa que ta puede dale alegria. (Proverbio 5:18) El un soltero o dalaga tiene siempre sexual deseo maskin pa ya pasa ya le na tiempo del de suyu pagka-joven cuando fuerte el sexual deseo. Si gendeh puede controla con ese deseo puede se guia na gendeh limpio o gendeh justo conducta. Ya escribi si Pablo este consejo para na maga soltero y dalaga: “Si no puede ustedes aguanta, mas bueno pa casa ya lang contra quema na maga deseo del cuerpo.”​—1 Corinto 7:9, 36; Santiago 1:15.

⁸ Maskin cosa pa man el razon si porque el un persona quierre casa, debe le queda realistico. Asegun con Pablo, aquellos quien casa hay ‘tiene maga problema na diila vida casao.’ (1 Corinto 7:28) El maga casao hay enfrenta maga dificultad que gendeh experiencia el maga soltero y dalaga. Si decidi tu casa, paquemodo tu menora con el maga problema y queda mas alegre? Un manera amo que iscuji enbuenamente si con quien tu casa.

9, 10. (a) Paquemodo ya dale mira si Pablo con el peligro si casa na gendeh siervo de Jehova? (b) Cosa pirmi el resulta si gendeh sigui con el consejo del Dios que no casa na gendeh ta sirvi con Jehova?

⁹ Ya escribi si Pablo con el importante principio que debe aplica si ta iscuji con quien casa: “No ustedes man junto con aquellos quien gendeh ta cree.” (2 Corinto 6:14) Si hace junto con el dos animal que diferente el grandor o fuerza, hay sufri sila dos. Ansina tambien el matrimonio. Si el un siervo de Jehova y el gendeh siervo hay casa, asigurao que enfrenta gayot sila manada problema. Si el uno quierre esta na amor de Jehova y el otro gendeh interesao acerca con ese, diila prioridad na vida gendeh man tupajan y posible hay resulta na dificultad. Poreso, ya dale consejo si Pablo con el maga Cristiano que casa lang “na un cristiano.”​—1 Corinto 7:39.

¹⁰ Na cuanto situacion, el maga soltero y dalaga Cristiano ta pensa que mas bueno pa si casa ya lang sila na gendeh siervo de Jehova contra sufri sila na tristeza. El cuanto ya decidi que gendeh sigui con el consejo del Biblia y casa con el persona que gendeh ta sirvi con Jehova. Pirmi se tiene maka-triste resulta. Ya puede sila realiza que gendeh sila ta puede habla na diila marido o mujer el maga importante cosas na diila vida. Posible, mas pa el tristeza que ta experiencia sila contra aquel tiempo que gendeh pa sila casao. Pero manada siempre maga soltero y dalaga Cristiano el ta confia y ta sigui con el consejo estaba con Dios. (Le con el Salmo 32:8.) Maskin pa quierre sila casa algun dia, ta esta sila soltero o dalaga hasta puede sila incuntra marido o mujer aquel ta sirvi con Dios Jehova.

11. Cosa puede ayuda contigo para puede iscuji justo marido o mujer? (Mira tambien con el cajon “ Cosa Yo Ta Busca Na Un Marido O mujer?”)

¹¹ Pero siempre, gendeh automatico que todo siervo de Jehova puede ya queda justo marido o mujer de tuyu. Si  quierre tu casa, busca aquel igual de tuyu espiritual goal, tiene buen custumbre y ta ama gayot con Dios. El fiel y sabio esclavo ya dale manada articulo acerca con ese y mas bueno si considera y reza acerca con ese consejo estaba na Biblia y deja que guia se contigo para hace este importante decicion. *​—Le con el Salmo 119:105.

12. Cosa tradicion ta practica na manada lugar acerca na matrimonio y cosa ejemplo na Biblia el ta sirvi guia acerca con ese?

¹² Na manada lugar, tradicion ya que el maga mayores amo el quien ta iscuji marido o mujer para na diila anak. Na este cultura, manada el ta creé que el maga mayores amo el quien tiene mas saber y experiencia para hace este importante decicion. Igual na tiempo del Biblia, manada na ese clase de matrimonio el ya tiene buen exito. El ejemplo de Abraham quien ya imbia con el de suyu ayudante para busca mujer para con Isaac, ya puede tambien ayuda con el maga mayores que semejante el situacion ahora. Gendeh sen y buen estado de vida el importante con Abraham. Sino, ya hace le el todo esfuerzo para busca mujer con Isaac aquel quien ta sirvi con Jehova. *​—Genesis 24:3, 67.

13, 14. Paquemodo puede ayuda el principio na Proverbio 24:27 con el un hombre quien quierre casa?

¹³ Si quierre ya gayot tu casa, debe tu este pregunta na de tuyu mismo cuerpo, ‘Preparao ya ba gayot yo?’ El contestacion gendeh lang ta depende na de tuyu  sentido acerca na amor, sexo, tiene uban o tiene anak. Sino, debe tu pensa acerca el maga especifico responsibilidad del un casao.

¹⁴ El un joven hombre debe pensa enbuenamente acerca con este principio: “Prepara con el de tuyu trabajo apuera y completa con el de tuyu trabajo na jardin; despues planta con el de tuyu casa.” (Proverbio 24:27) Cosa este quierre decir? Del antes, si el un hombre quierre casa, debe le este pregunta na de suyu mismo cuerpo, ‘Preparao ya ba yo cuida y suporta con el de mio mujer y anak que hay tiene kame?’ Necesita le una trabaja, cuida con el de suyu jardin o maga siembra. Aplicable tambien se principio ahora. El un hombre quien quierre casa necesita preparao na responsibilidad. Mientras puede pa le trabaja, necesita le trabaja. El Palabra del Dios ta dale mira que el un hombre quien gendeh ta dale el fisical, emocional y espiritual necesidad del de suyu familia mas malo pa que con el gente nuay fe!​—Le con el 1 Timoteo 5:8.

15. Cosa puede hace el un joven mujer para queda preparao na matrimonio?

¹⁵ El un mujer tambien quien quierre casa necesita preparao acepta con el manada pesao responsibilidad. El libro de Proverbio ta habla acerca na un buen mujer. Tiene le buen abilidad y calidad que necesita el un mujer para ayuda con el de suyu marido y cuida con el de suyu familia. (Proverbio 31:10-31) El hombre y mujer quien ta apura casa y gendeh preparao acepta con el maga responsibilidad, ta pensa lang con el diila mismo cuerpo y gendeh con el cosa sila puede dale con el diila marido o mujer. El mas importante, aquellos quien tiene plano casa necesita preparao para aplica con el maga consejo na Biblia acerca na matrimonio.

16, 17. Aquellos quien ta prepara para casa, cosa maga principio na Escritura el debe sila medita?

¹⁶ Para queda preparao na matrimonio, necesita medita  con el responsibilidad que ya dale el Dios con el marido y mujer. Necesita, sabe el hombre si cosa quierre decir que queda cabeza del un Cristiano familia. Este responsibilidad gendeh licencia para actua como un dictador. Sino, debe le imita con el manera de Jesus como cabeza. (Efeso 5:23) Na igual manera, el un Cristiano mujer necesita entende si cosa el responsibilidad del un mujer. Preparao ba le somete con el de suyu marido como de suyu cabeza? (1 Corinto 11:3) Bajo ya le na ley de Jehova y de Jesus. (Galacia 6:2) El autoridad del de suyu marido na familia hay queda otro ley. Puede gaha le suporta y somete con el autoridad del un imperfecto gente? Si gendeh le preparao para hace con ese, mas bueno pa si esta le dalaga.

¹⁷ Mas pa, cada uno diila necesita preparao dale el especial necesidad del uno y otro. (Le con el Filipo 2:4.) Si Pablo ya escribi: “Cada uno de ustedes necesita ama con el disuyo mujer como ta ama le con el disuyo mismo cuerpo. Y el mujer necesita respeta con el disuyo marido.” Por medio na guia del Dios, ya mira si Pablo que el hombre necesita sinti que tiene hondo respeto el de suyu mujer con ele. Y quierre el mujer que sinti le que ta ama gayot con ele de suyu marido.​—Efeso 5:21-33.

18. Porque debe demonstra control na cuerpo el man novio y novia?

¹⁸ El dos persona quien interesao casa, ta dale tiempo para man junto con uno y otro para determina si justo ba sila para na uno y otro. Gendeh este tiempo para entretene lang. Este el tiempo que donde el hombre y mujer hay aprende si paquemodo trata enbuenamente con uno y otro y mira si justo ba que casa sila. Tiempo tambien este para demonstra control na cuerpo! Mas ta queda fuerte el tentacion para hace maga cosas que para lang na man maridable​—deverasan, natural lang se. Pero, aquellos quien deverasan ta ama con uno y otro hay evita hace cosas que puede pone na peligro el espiritualidad del un persona con quien  sila ta ama. (1 Tesalonica 4:6) Poreso, si tiene tu novio o novia, controla con el cuerpo y ese puede ayuda contigo na de tuyu entero vida, casa man tu o gendeh.

19, 20. Cosa el diferencia na mirada del maga Cristiano acerca na matrimonio contra na manada gente na mundo ahora? Ilustra.

¹⁹ Si quierre el man maridable que tarda el diila matrimonio, necesita sila tiene justo mirada con el diila relacion como man maridable. Na realidad, gendeh fin el matrimonio sino el principio del un relacion que ya diseña si Jehova para tarda. (Genesis 2:24) Makatriste cay gendeh ansina el mirada del maga gente na mundo ahora. Na cuanto cultura, ta mira el maga gente con el matrimonio como dos amarro que ya amarra. Justo gayot se ilustracion na comon mirada acerca na matrimonio. Porque? Cay puede apreta con el amarrada si necesita pero facil lang tambien con este bunca si quierre.

²⁰ Manada ahora ta mira con el matrimonio como temporario lang. Ya apura sila entra na matrimonio cay pensaba sila amo se el cosa sila necesita. Pero, ta expecta tambien sila que puede lang sila dayun sale si tan dificil ya sila. Acorda que ya usa el Biblia con el amarro como ilustracion na matrimonio. Ya diseña con el amarro que ta usa na barco para tarda puede usa y gendeh este man tapuc maskin pa fuerte el tifun. Na igual manera, ya diseña con el matrimonio para tarda. Acorda el cosa ya habla si Jesus: “El cosa ya uni el Dios no puede el gente separta.” (Mateo 19:6) Si casa tu, necesita tu tiene igual mirada na matrimonio. Queda ba pesao el matrimonio por causa con ese? Gendeh gayot.

21. Cosa custumbre necesita mentena el man maridable y cosa puede ayuda kanila para hace con ese?

²¹ El man maridable necesita mentena el justo mirada  con uno y otro. Si el cada uno ta pricura mira el buen calidad y esfuerzo del otro, el matrimonio hay queda tuburan de alegria. Gendeh ba realistico que tiene positivo mirada na un imperfecto marido o mujer? Si Jehova realistico gayot y ta confia kita que tiene le positivo mirada kanaton. El salmista ya pregunta: “Si kamali el cosa tu ta mira, O Jah, O Jehova, quien puede para?” (Salmo 130:3) El man maridable necesita tiene positivo mirada y sabe perdona con uno’y otro.​—Le con el Colosa 3:13.

22, 23. Paquemodo ya dale mira buen ejemplo kanda Abraham y Sara para na man maridable ahora?

 ²² Mientras ta tarda el matrimonio posible este lleva mas alegria. El Biblia ya dale mira kanaton el matrimonio de Abraham y Sara cuando de edad ya sila. Asigurao que ya experiencia tambien sila maga dificultad. Imagina si cosa ya sinti si Sara que posible 60 año ya cuando ya deja le con el de suyu comfortable vida na rico ciudad del Ur y queda na tolda. Maskin pa ansina, ya somete le siempre con el de suyu marido. Ya suporta y con respeto le ya ayuda con Abraham para tiene buen exito el de suyu decicion. Y sincero gayot le ya somete. Maskin na de suyu pensamiento, ya llama le con el de suyu marido señor. (Genesis 18:12; 1 Pedro 3:6) Con todo corazon gayot el respeto de suyu con Abraham.

²³ Pero, gendeh se quierre decir que pirmi tan uyun kanda Abraham y Sara na todo cosas. Un dia, ya dale ele sugestion que nuay hace alegre con Abraham. Maskin pa ansina, por medio na direccion de Jehova, humilde ya oi si Abraham con el de suyu mujer y ya lleva este bendicion na familia. (Genesis 21:9-13) El man maridable ahora, maskin aquellos casao por largo tiempo, tiene cosa puede aprende na este maridable.

24. Cosa clase de matrimonio el ta honra con Dios Jehova y porque?

²⁴ Na Cristiano congregacion, manada el alegre na diila matrimonio​—matrimonio que donde el mujer tiene hondo respeto con el de suyu marido, el marido ta ama y ta honra con el de suyu mujer y tan ayudajan sila para hace una el voluntad de Jehova na diila vida. Si decidi tu casa, ojala puede tu iscuji enbuenamente si quien queda de tuyu marido o mujer, prepara enbuenamente y pricura hace con paz y amor con el de ustedes matrimonio que ta honra con Dios Jehova. Na ese manera, el de ustedes matrimonio hay puede con ustedes ayuda esta na amor del Dios.