1, 2. Porque importante el compass y paquemodo este ta semeja con el conciencia?

EL UN marinero tan timon con el barco na mar; un gente ta camina na desierto; el un piloto ta maneja con el aeroplano. Sabe ba tu si cosa el comon kanila? El cada uno kanila posible perde na justo direccion si nuay sila compass​—especialmente si nuay sila maga moderno tecnologia.

² Un simple instrumento el compass que tiene aguha que ta insiña pa-norte. Si na buen condicion este y si tiene tu exacto mapa, puede este ayuda contigo na maga peligroso situacion. Semejante se con el precioso regalo que ya dale kanaton si Jehova​—el conciencia. (Santiago 1:17) Nuay kita guia si nuay kita conciencia. Si usa kita con este enbuenamente, puede se ayuda kanaton incuntra y esta na justo camino del vida. Poreso, considera kita si cosa el conciencia  y si paquemodo este puede ayuda kanaton. Despues, discuti kita este: (1) Si paquemodo kita puede enseña con el diaton conciencia, (2) si porque kita debe considera el conciencia del otro y (3) si cosa el maga bendicion si mentena kita limpio conciencia.

3. (a) Cosa el literal quierre decir del Griego palabra para na “conciencia”? (b) Cosa abilidad tiene el gente por causa na conciencia?

³ Na Biblia, el Griego palabra para na “conciencia” literal quierre decir “saber acerca na mismo cuerpo.” Gendeh igual na otro maga creacion aqui na tierra, el Dios ya dale kanaton abilidad para conoce con el diaton mismo cuerpo. Puede kita examina con el diaton mismo cuerpo y mira si tiene ba kita buen moralidad. El diaton conciencia igual como testigo o juez que puede ayuda kanaton examina con el diaton accion, custumbre y maga decicion. Puede este ayuda kanaton hace justo decicion o evita hace mal decicion. Despues, puede se dale comforta kanaton si justo el diaton decicion o manda kanaton sinti culpable si malo el decicion que ya hace kita.

4, 5. (a) Porque kita puede habla que tiene conciencia kanda Adan y Eva y cosa el resulta cuando ya desobedece sila con el ley del Dios? (b) Dale ejemplo del maga fiel siervo de antes quien ya usa con el diila conciencia.

⁴ Ya crea con el gente que tiene conciencia. Ya dale mira kanda Adan y Eva que tiene sila conciencia. Puede kita mira el evidencia cay despues sila comete pecado, ya tiene sila huya. (Genesis 3:7, 8) Maskin pa ya sinti sila culpable nuay mas sila cosa puede hace. Intencional sila ya desobedece con el ley del Dios. Na ese manera, ya iscuji sila man rebelde contra con Dios Jehova. Como maga perfecto gente, sabe sila si cosa sila ta hace y gendeh mas sila puede bira con Dios.

⁵ Gendeh igual con kanda Adan y Eva, manada maga  imperfecto gente ya sigui con el diila conciencia. Por ejemplo, si Job ya puede habla: “Hay mentena yo el de mio pagka-recto y nunca con ese larga; gendeh conmigo condena el de mio corazon mientras vivo yo.” * (Job 27:6) Ya deja si Job que el de suyu conciencia amo hay guia con el de suyu maga accion y decicion. Poreso, ya puede gayot le habla que nuay con ele condena el de suyu conciencia​—nuay con ele manda sinti que ele culpable o que debe le tiene huya. Nota el diferencia na reaccion de Job y David. Cuando nuay le dale mira respeto con Saul, el iscujido rey de Jehova, “yan conciencia si David.” (1 Samuel 24:5) Cay yan conciencia le, ya ayuda se con ele para gendeh mas quel hace otravez.

6. Porque kita puede habla que todo maga gente tiene conciencia?

⁶ El maga siervo lang ba de Jehova el tiene conciencia? Considera con el inspirao palabra de apostol Pablo: “El maga pagano [gente de maga nacion, NW] no conoce con el Ley. Pero, cuando el diila conciencia ta guia canila para hace el cosa el Ley ta manda, entonces, maskin noay sila Ley, sila mismo amo el Ley para canila. Ta dale sila mira que el cosa ta manda el Ley talli escribido na diila maga corazon. El testigo de ese amo el diila mismo conciencia con el diila maga pensamiento que ta man peleajan adentro canila para acusa o alaba canila.” (Roma 2:14, 15) Por causa na conciencia, maskin aquellos no sabe acerca el maga ley de Jehova tiene vez ta actua harmonia na maga principio del Dios.

7. Porque tiene vez gendeh justo el diaton conciencia?

⁷ Pero tiene vez, gendeh justo el diaton conciencia. Porque? Si pone kita con el compass cerca na magnet, posible gendeh mas insiña el aguha pa-norte. Y si nuay exacto  mapa, nuay valor el compass. Na igual manera si el diaton corazon lleno de mal deseo, el diaton conciencia posible guia kanaton na gendeh justo direccion. Y si usa kita con este sin guia del Palabra del Dios, posible gendeh kita puede sabe si cosa el justo y gendeh. Poreso, para puede confia con el diaton conciencia necesita kita el guia del sagrao espiritu de Jehova. Si apostol Pablo ya escribi: “El dimio conciencia, unido con el Espiritu Santo [sagrao espiritu, NW], amo el dimio testigo.” (Roma 9:1) Pero, paquemodo kita puede asigura que el diaton conciencia harmonia na sagrao espiritu de Jehova? Puede kita se hace si enseña kita con el diaton conciencia.

8. (a) Paquemodo el corazon puede afecta con el conciencia y cosa debe el mas importante si ta hace decicion? (b) Porque gendeh bastante el limpio conciencia na un Cristiano? (Mira con el footnote.)

⁸ Paquemodo tu ta hace decicion que base na de tuyu conciencia? El cuanto ta examina con el cosa sila ta sinti y despues decidi si cosa hace. Despues, habla sila, “OK lang, limpio man el de mio conciencia.” Puede queda fuerte el deseo del corazon y influencia con el conciencia. El Biblia ta habla: “El corazon mas traidor que na maskin cosa y desperao. Quien este puede sabe?” (Jeremias 17:9) Entonces, gendeh kita debe hace decicion base lang na cosa ta desea el diaton corazon. Sino el mas importante, considera kita si cosa ta hace alegre con Jehova. *

9. Cosa el miedo con Dios y paquemodo se afecta na diaton maga decicion?

 ⁹ Si ya enseña kita con el diaton conciencia y ya hace decicion base con ese, puede mira alli el diaton miedo con Dios y gendeh el diaton personal deseo. Considera este un ejemplo. Tiene derecho si Nehemias como un gobernador que pidi tax con el maga gente na Jerusalem. Pero, nuay le se hace. Porque? No quierre le maltrata con el maga siervo del Dios cay gendeh se bueno na vista de Jehova. Ele ya habla: “Nuay yo con ese hace por causa na miedo con Dios.” (Nehemias 5:15) Importante que tiene kita sincero miedo con Dios​—miedo que hace maga cosas malo na ojos del diaton Tata na cielo. Manda se move kanaton que sigui na guia del Palabra del Dios si ta hace maga decicion.

10, 11. (a) Cosa maga principio na Biblia puede aplica acerca na maga alcoholico tomada? (b) Paquemodo kita obtene el guia del Dios para puede aplica con ese maga principio?

¹⁰ Por ejemplo, considera el decicion acerca na alcoholico tomada. Si tiene maga celebracion manada kanaton el ta pensa, Toma ba yo o gendeh? Una, necesita kita enseña con el diaton mismo cuerpo. Cosa maga principio na Biblia que debe kita considera? Nuay prohibi na Biblia el justo usada de alcoholico tomada. Ta alaba se con Jehova por el regalo de vino. (Salmo 104:14, 15) Pero, ta condena na Biblia el sobra tomada y nuay control de alegria. (Lucas 21:34; Roma 13:13) Mas pa, bien serioso culpa el burracherias igual na sexual imoralidad.​—1 Corinto 6:9, 10.

¹¹ El un Cristiano ta enseña con el de suyu conciencia si ta aplica le maga principio igual con ese na de suyu vida. Na ese manera, el de suyu conciencia puede ayuda con ele para sabe si cosa el justo y gendeh. Poreso si hace decicion acerca na alcoholico tomada, pregunta kita este na diaton mismo cuerpo: ‘Cosa clase de celebracion  yo ta atende? Posible ba queda nuay control el alegria na este celebracion? Cosa el de mio maga inclinacion? Quierre-quierre ba yo toma alcoholico tomada para ulvida con el de mio maga problema? Ta puede ba yo controla con el de mio tomada?’ * Mientras ta medita kita maga principio na Biblia y maga pregunta que necesita kita considera, debe kita pidi el guia de Jehova por medio na rezo. (Le con el Salmo 139:23, 24.) Na ese manera, ta permiti kita que guia kanaton si Jehova por medio na de suyu sagrao espiritu. Ta enseña tambien kita con el diaton conciencia harmonia na maga principio del Dios. Pero, tiene pa otro cosa que debe kita considera na diaton maga decicion.

12, 13. Cosa el cuanto razon si porque gendeh igual el conciencia del maga Cristiano y cosa debe el diaton reaccion?

¹² Siguro ta estraña tu si porque gendeh igual el conciencia del maga Cristiano. Tiene maga cosas que aceptable na un persona pero gendeh aceptable con otro. Por ejemplo, alegre el un persona toma alcoholico tomada junto na de suyu maga amigo para man relax; pero para con otro, gendeh se aceptable na diila conciencia. Porque gendeh igual el diila conciencia y paquemodo se afecta na diaton maga decicion?

¹³ Manada razon si porque diferente el maga gente. Otro-otro el manera que ya hace engranda kanila. Sabe el cuanto que tiene sila maga mal inclinacion de antes que tiene vez gendeh sila ta puede controla. (1 Rey 8:38, 39) Poreso, ta pensa anay sila enbuenamente si toma ba sila o gendeh. Si tiene contigo quien visita igual ansina posible decidi le  que gendeh toma si ofrece tu con ele por causa na de suyu conciencia. Man sentimiento ba tu? Forza ba tu? Gendeh. Sabe man tu el de suyu razon o gendeh​—razon que posible no quierre le habla na ese ocacion​—el de tuyu amor amo manda move contigo para dale mira consideracion.

14, 15. Acerca na cosa que el conciencia del maga Cristiano del primer siglo ya queda gendeh igual y cosa el consejo de Pablo?

¹⁴ Ya puede mira si apostol Pablo que gendeh igual el conciencia del maga Cristiano del primer siglo. Na aquel tiempo, gendeh aceptable na conciencia del cuanto maga Cristiano el maga comida que ya ofrece na maga idolo. (1 Corinto 10:25, NW) Pero na conciencia de Pablo nuay cosa malo con ese maga comida que ta vende na maga tianggue. Para con ele, nuay valor el maga idolo; con Jehova estaba el todo maga comida y gendeh na maga idolo. Pero ta entende si Pablo que gendeh igual con ele el otro. Posible que el cuanto kanila ya adora na maga idolo antes de queda Cristiano. Para kanila, gendeh aceptable el maskin cosa que tiene que hace na idolatria. Paquemodo ya solva si Pablo con este?

¹⁵ Si Pablo ya habla: “Kita, maga ma-fuerza na fe, necesita ayuda con el maga maluya na fe na diila maga duda, y no pensa para del diaton mismo cuerpo lang. Si Cristo noay pensa del disuyo mismo cuerpo lang.” (Roma 15:1, 3) Ya dale mira si Pablo que debe kita hace una el bien del diaton maga hermano y gendeh el diaton bien, igual con Cristo. Ya habla tambien si Pablo que gendeh mas le come carne contra man luya el un persona con quien ya rescata si Cristo.​—Le con el 1 Corinto 8:13; 10:23, 24, 31-33.

16. Porque debe evita aquellos quien tiene mas sensitivo conciencia que juzga con otro?

¹⁶ Pero aquellos quien tiene mas sensitivo conciencia, gendeh debe vicia y forza con otro que sigui si cosa ta dicta  el diila conciencia. (Le con el Roma 14:10.) Debe kita usa con el diaton conciencia para examina con el diaton mismo cuerpo y gendeh para juzga con otro. Acorda el palabra de Jesus: “No ustedes juzga con otros y . . . gendeh ay juzga con ustedes.” (Mateo 7:1) Gendeh debe man purpiajan el maga miembro del congregacion acerca na maga cosas que ta depende na conciencia. Sino, busca kita manera si paquemodo mentena el amor y unidad, anima con uno’y otro y gendeh hace luya con otro.—Roma 14:19.

17. Cosa ya pasa con el conciencia del manada gente ahora?

¹⁷ Si apostol Pedro ya escribi: “Guarda firmi limpio el de ustedes conciencia.” (1 Pedro 3:16) Un grande  bendicion si limpio el diaton conciencia na ojos de Dios Jehova. Gendeh ansina el conciencia del manada gente ahora. Asegun con Pablo, “no sabe mas sila si cosa el bueno o el malo, ya entrega sila el diila cuerpo na immoralidad.” (Efeso 4:19) Igual con el cubal que gendeh sensitivo, manada gente ahora ta hace maga cosas malo y gendeh mas tan conciencia, ni ta tiene huya o ta sinti culpable.

18, 19. (a) Cosa el beneficio si tan conciencia kita? (b) Cosa kita puede hace si tan conciencia siempre kita maskin pa ya arripinti ya kita?

¹⁸ Si tan conciencia kita, quierre decir tiene kita cosa malo ya hace. Si manda este move con el un persona para arripinti hay perdona con ele maskin cosa pa de grabe  el de suyu culpa. Por ejemplo, ya comete serioso culpa si David pero ya perdona con ele cay sincero le ya arripinti. Cay ya odia le con el cosa le ya hace y determinao obedece con el ley de Jehova, ya puede le mira que si Jehova “bueno y preparao para perdona.” (Salmo 51:1-19; 86:5) Paquemodo si tan conciencia siempre kita maskin ya arripinti y ya perdona ya kanaton?

¹⁹ Tiene vez maskin pa ya arripinti ya el un persona, el de suyu conciencia ta manda siempre con ele sinti que culpable le. Na ese maga situacion, necesita kita convence con el diaton corazon que si Jehova mas pa que con el cosa kita ta sinti. Necesita kita creé y acepta el de suyu amor y perdon igual como cosa kita ta anima con otro. (Le con el 1 San Juan 3:19, 20.) Pero si limpio el diaton conciencia hay tiene kita paz na pensamiento, hay queda kita calmao y alegre que ralo lang ta puede sinti el maga gente ahora. Manada quien ya comete serioso culpa de antes ya experiencia ese alivio y ya puede ahora mentena un limpio conciencia mientras ta sirvi con Dios Jehova.​—1 Corinto 6:11.

20, 21. (a) Cosa el proposito de este publicacion? (b) Como maga Cristiano, cosa libertad kita tiene y paquemodo kita con este debe usa?

²⁰ Ya hace con este libro para ayuda contigo tiene alegria y mentena un limpio conciencia mientras ta vivi na este ultimo maga dia del sistema de las cosas de Satanas. Pero siempre, gendeh este ta discuti todo ley y principio na Biblia que necesita tu pensa y aplica na maga situacion cada dia. Mas pa, gendeh este ta discuti maga especifico ley acerca na maga cosas que envuelto el conciencia. Proposito de este libro que ayuda contigo estudia y aplica el Palabra del Dios cada dia. Hay enseña y prepara se con el de tuyu conciencia para sabe tu si cosa el justo y si  cosa el gendeh. Gendeh igual na Ley de Moises, “el Ley de Cristo” ta anima kanaton que vivi asegun na conciencia y principio en vez na maga escribido ley. (Galacia 6:2) Entonces, ya dale libertad si Jehova con el maga Cristiano. Pero, el de suyu Palabra ta hace kanaton acorda que “no usa ese libertad para hace malo.” (1 San Pedro 2:16, El Nuevo Testamento) Sino, ta dale se kanaton el oportunidad para dale mira el diaton amor con Jehova.

²¹ Si considera tu si paquemodo vivi asegun na maga principio del Biblia y aplica con ese na de tuyu maga decicion, hay continua tu el bien importante cosa que ya principia tu hace cuando ya conoce tu con Jehova. Hay enseña tu con el de tuyu abilidad de entendimiento para puede “distingui el bueno y el malo.” (Maga Hebreo 5:14) El de tuyu conciencia que ya enseña tu base na Biblia hay dale contigo beneficio. Igual como compass que ta guia con el un persona quien ta viaja, el de tuyu conciencia puede ayuda contigo hace maga decicion que ta hace alegre con el de tuyu Tata na cielo. Por medio con ese, asigurao que hay esta tu na amor del Dios.