1, 2. (a) Cosa dificultad kita ta enfrenta acerca na obediencia na autoridad? (b) Cosa maga pregunta kita considera?

YA PUEDE ya ba tu nota con el reaccion del un bata si tiene con ele cosa ya manda pero no quierre le hace? Puede tu mira na cara del bata si cosa le ta sinti. Ya oi le el voz del de suyu mayores y sabe le que debe le obedece kanila. Pero na este situacion, no quierre lang gayot le obedece. Este ilustracion ta dale mira si cosa dificultad kita ta enfrenta tiene vez.

² Gendeh pirmi facil para kanaton que obedece con aquellos tiene autoridad. Tan dificil ba tu tiene vez que obedece con aquellos tiene autoridad contigo? Entonces, gendeh lang etu el ta sinti ansina. Ta vivi kita na tiempo que donde gendeh todo el ta obedece con el autoridad. Pero, el Biblia ta habla que debe kita dale mira respeto con aquellos tiene autoridad kanaton. (Proverbio 24:21) Gane, necesita kita se hace para esta na amor del Dios. Entonces, considera kita con este maga pregunta: Porque dificil para kanaton obedece con aquellos tiene autoridad? Porque ta pidi si Jehova que hace kita se y cosa kanaton puede ayuda para queda obediente? Na cosa maga manera kita puede dale mira que ta obedece kita con aquellos tiene autoridad?

3, 4. Paquemodo ya principia el pecado y imperfeccion? (b) Porque dificil para na imperfecto gente que obedece con aquellos quien tiene autoridad?

³ Considera kita dos razon si porque dificil obedece con  aquellos tiene autoridad. Primero, maga imperfecto kita; segundo, imperfecto tambien aquellos tiene autoridad kanaton. El pecado y imperfeccion ya principia na jardin de Eden cuando kanda Adan y Eva yan rebelde contra na autoridad del Dios. Poreso, el pecado ya principia por causa na rebelion. Desde aquel tiempo el gente tiene tendencia man rebelde.​—Genesis 2:15-17; 3:1-7; Salmo 51:5; Roma 5:12.

⁴ Por causa na diaton imperfeccion, pronto kita queda orgulloso y arogante. Mientras el humildad necesita kita cultiva y mentena. Maskin cuanto año ya kita fiel ta sirvi con Dios, posible siempre kita queda duro cabeza y orgulloso. Por ejemplo, si Core ya esta fiel junto con el maga siervo de Jehova maskin na manada dificultad. Pero ya desea le mas autoridad y ya guia con otro man rebelde contra con Moises, un humilde gente quien ya vivi aquel tiempo. (Numero 12:3; 16:1-3) Acorda tambien kita con Rey Ozias. Por causa na de suyu orgullo, ya entra le na templo de Jehova y ya hace un sagrao trabajo que debe el maga sacerdote lang ta hace. (2 Cronicas 26:16-21) Ya sufri gayot sila por causa na diila rebelion. Pero, el diila mal ejemplo un leccion para kanaton todo. Necesita kita resisti con el orgullo que ta hace kanaton dificil para obedece con aquellos tiene autoridad.

5. Paquemodo ya abusa el maga imperfecto gente con el diila autoridad?

⁵ El maga gente quien tiene autoridad manada cosa malo ya hace poreso nuay mas respeto el maga gente con aquellos tiene autoridad. Manada kanila nuay lastima, abusao y ta maltrata con otro. Gane, el historia ta dale mira que manada el ya abusa con el diila poder. (Le con el Eclesiastes 8:9.) Por ejemplo, bueno y humilde si Saul cuando ya iscuji con ele si Jehova para queda rey. Pero ya queda le orgulloso y celoso poreso ya persigui le con el fiel gente, si David. (1 Samuel 9:20, 21; 10:20-22; 18:7-11) Si David ya queda uno del maga buen rey na Israel pero ya abusa le con el de suyu poder cuando ya saca le con el mujer de Urias. Y na guerra, ya manda le  que pone con Urias adelante para muri. (2 Samuel 11:1-17) Por causa na imperfeccion, dificil para na gente que usa na justo manera con el diila poder. Y mas pa aquellos quien gendeh ta respeta con Jehova. Un gente de Britain quien ya queda envuelto na gobierno ya habla que el maga papa del Catolico Iglesia ya abusa con el diila poder para maltrata y persigui con el manada gente. Ciendo ta dale mira el historia que ya abusa el maga gente con el diila autoridad, considera kita con este pregunta: Porque kita debe obedece con aquellos tiene autoridad?

6, 7. (a) Cosa kita hace por causa na diaton amor con Jehova y porque? (b) Paquemodo kita dale mira que ta somete kita?

⁶ El de con todo buen razon para obedece con aquellos tiene autoridad amo el amor​—amor para con Jehova, para na diaton projimo y maskin para na diaton cuerpo. Cay ta ama kita con Jehova, quierre kita hace alegre con el de suyu corazon. (Le con el Proverbio 27:11; Marcos 12:29, 30.) Sabe kita que desde el rebelion na Eden ya cuestiona con el de suyu soberania o derecho para rula con el universo. Mayoria tambien del maga gente ya sigui con Satanas y nuay acepta con el rulanza de Jehova. Pero alegre kita suporta con el soberania de Jehova. El maga palabra na Revelacion 4:11 ta dale kanaton razon para hace con ese. Convencido kita que si Jehova lang el tiene derecho rula con el universo! Ta suporta kita con el soberania de Jehova y ta acepta con el de suyu rulanza na diaton vida cada dia.

⁷ Pero mas pa el cosa envuelto na diaton obediencia. Ta obedece kita con Jehova cay ta ama kita con ele. Pero, tiene maga tiempo que dificil para kanaton que obedece. Na ese maga situacion, igual con el bata na ilustracion debe kita aprende somete. Acorda kita que si Jesus ya somete con el voluntad del de suyu Tata maskin pa bien dificil se para hace. Ya  habla le con el de suyu Tata: “No hace el cosa yo quiere, sino el que cosa Uste quiere.”​—Lucas 22:42.

8. (a) Paquemodo kita dale mira que ta somete kita na autoridad de Jehova ahora y cosa ta sinti si Jehova acerca con ese? (b) Cosa kanaton puede ayuda para oi con el consejo y acepta con el disciplina? (Mira con el cajon “ Oi Con El Consejo Y Acepta Con El Disciplina.”)

⁸ Siempre, gendeh kanaton ta converza si Jehova na personal ahora; ta usa le de suyu Palabra y maga gente como representante na tierra. Poreso, ta dale kita mira que ta somete kita con el autoridad de Jehova si ta respeta kita con aquellos ya dale le autoridad. Si man rebelde kita con ese maga gente​—por ejemplo, si gendeh kita acepta diila consejo estaba na Escritura​—gendeh kita ta hace alegre con Jehova. Cuando el maga Israelita ya murmura y yan rebelde contra con Moises, ya mira si Jehova con el diila accion como rebelion contra con ele.​—Numero 14:26, 27.

9. Porque el diaton amor na projimo manda kanaton move para obedece con aquellos tiene autoridad? Dale ejemplo.

⁹ Obediente tambien kita con aquellos tiene autoridad cay ta ama kita con el diaton projimo. Porque kita se puede habla? Imagina que un soldao tu. Para ganá o salva, el cada soldao necesita coopera, obedece y respeta con aquellos quien ta guia kanila. Si gendeh tu obedece con aquellos tiene autoridad, posible pone tu na peligro el vida del de tuyu maga uban. Deverasan, ta causa grande destrozo na mundo el maga soldao ahora. Pero, tiene maga soldao si Jehova que pirmi ta hace si cosa el bueno para na maga gente. Mas de cien beses ya llama con Dios na Biblia como “Jehova el Dios de maga soldao.” (1 Samuel 1:3) Ele el Comandante del bien manada poderoso espiritu creatura. Tiene vez, ta compara si Jehova con el de suyu maga siervo aqui na tierra como maga soldao. (Ezequiel 37:1-10; 2 Timoteo 2:3) Si man rebelde kita contra con el maga gente con quien ya dale si Jehova autoridad, gendeh ba dol ta pone kita na peligro con el diaton maga hermano? Si el un Cristiano man rebelde contra na maga anciano, el otro na congregacion hay sufri tambien. (1 Corinto 12: 14, 25, 26) Entonces, puede kita dale mira el diaton amor na projimo si ta respeta y ta obedece kita con aquellos tiene autoridad.

10, 11. Cosa el otro razon si porque ta obedece kita con aquellos tiene autoridad?

¹⁰ Ta obedece tambien kita con aquellos tiene autoridad cay para na bien se diaton. Cuando ya pidi si Jehova kanaton que obedece kita con aquellos tiene autoridad, ya menciona le si cosa el beneficio si hace kita se. Por ejemplo, ya manda le con el maga anak que obedece con el diila maga mayores para tiene sila largo y alegre vida. (Deuteronomio 5:16; Efeso 6:2, 3) Ya manda le kanaton obedece con el maga anciano na congregacion cay si gendeh kita con ese hace hay queda malo el diaton relacion con Dios Jehova. (Maga Hebreo 13:7, 17) Y ya manda le kanaton obedece con aquellos quien tiene autoridad na gobierno para na diaton proteccion.​—Roma 13:4.

¹¹ Gendeh ba mas facil obedece con aquellos tiene autoridad si sabe kita si porque ya manda kanaton si Jehova queda  obediente kanila? Entonces, considera kita si paquemodo kita dale mira obediencia con aquellos tiene autoridad na tres aspeto de vida.

12. Cosa responsibilidad ya dale si Jehova con el marido na familia y paquemodo le se cumpli?

¹² Si Jehova mismo el ya hace con el arreglamiento adentro na familia. Ciendo ele un Dios de orden, ya organiza le con el familia para tiene este buen exito. (1 Corinto 14:33) Ya dale le autoridad con el marido para actua como el cabeza del familia. El marido ta dale mira respeto con el de suyu Cabeza, si Cristo Jesus, si ta imita le con Jesus como el cabeza del congregacion. (Efeso 5:23) Entonces, debe cumpli enbuenamente el marido con el de suyu responsibilidad. Gendeh le debe dominante sino amable, razonable y bueno na de suyu mujer y maga anak. Pirmi le ta pone na pensamiento que tiene limitacion el de suyu autoridad​—nunca este queda mas alto pa na autoridad de Jehova.

13. Paquemodo cumpli el mujer con el de suyu autoridad na familia na manera que ta hace alegre con Jehova?

¹³ El mujer amo el ta ayuda con el marido. Tiene tambien le autoridad na familia, cay asegun na Biblia el maga anak gendeh debe ignora con el ‘instruccion del diila nana.’ (Proverbio 1:8) Pero, mas alto siempre el autoridad del de suyu  marido. El un Cristiano mujer ta dale mira respeto con el autoridad del de suyu marido si ta ayuda le cumpli con el de suyu responsibilidad como cabeza del familia. Gendeh le debe hace de menos, manipula o rebata con el posicion del de suyu marido. Sino, ta suporta y ta coopera le. Si gendeh le ta gusta con el decicion del de suyu marido, puede le habla con respeto si cosa el de suyu opinion pero necesita le siempre somete. Si gendeh Testigo de Jehova el de suyu marido, baka enfrenta le maga dificil situacion. Pero si ta somete le, posible se manda move con el de suyu marido para sirvi con Jehova.​—Le con el 1 Pedro 3:1.

14. Paquemodo puede dale alegria el maga anak con el diila maga mayores y con Jehova?

¹⁴ Ta hace alegre el maga anak con Jehova si ta obedece sila con el diila tata y nana. Ta dale tambien sila honor y alegria con el diila mayores. (Proverbio 10:1) Na un familia que donde nana o tata lang tiene, el maga anak ta aplica tambien con ese principio ciendo sabe sila que mas ta necesita suporta  y cooperacion el diila tata o nana. Na familia que donde todo el miembro ta cumpli el diila responsibilidad que ya dale el Dios kanila, tiene grande alegria y paz. Ta dale se honor con el quien ya origina con el todo familia, si Dios Jehova.​—Efeso 3:14, 15.

15. (a) Paquemodo kita dale mira el obediencia na autoridad de Jehova adentro na congregacion? (b) Cosa maga principio puede ayuda kanaton queda obediente con aquellos quien ta guia kanaton? (Mira con el cajon “ Queda Obediente Con Aquellos Quien Ta Guia.”)

¹⁵ Ya iscuji si Jehova con el de suyu Anak como el Cabeza del Cristiano congregacion. (Colosa 1:13) Ya dale tambien si Jesus responsibilidad con el de suyu “fiel y sabio esclavo” para dale el espiritual necesidad del maga siervo del Dios aqui na tierra. (Mateo 24:45-47, NW) El Cuerpo Gobernante del maga Testigo de Jehova ta sirvi como el “fiel y sabio esclavo.” Igual con el maga Cristiano congregacion del primer siglo, el maga anciano ahora ta ricibi maga instruccion y consejo estaba na Cuerpo Gobernante por medio de carta o na maga representante, igual na maga traveling overseer. Si ta obedece kita con el maga anciano, ta obedece tambien kita con Jehova.​—Le con el 1 Tesalonica 5:12; Maga Hebreo 13:17.

16. Porque kita puede habla que ya iscuji con el maga anciano por medio de sagrao espiritu?

¹⁶ Gendeh perfecto el maga anciano. Tan kamali tambien sila igual kanaton. Maskin pa ansina, el maga anciano un “regalo con el maga gente” quien ta ayuda con el congregacion para esta fuerte na espiritual. (Efeso 4:8) Ya iscuji con el maga anciano por medio na sagrao espiritu. (Maga Actividad 20:28) Porque kita se puede habla? Cay antes de queda anciano, necesita sila alcanza con el maga cualificacion que ya menciona na Palabra del Dios. (1 Timoteo 3:1-7, 12; Tito 1:5-9) Mas pa, el maga anciano quien ta examina si cualificao ba el un hermano para queda anciano ta reza pirmi para na guia del sagrao espiritu de Jehova.

17. Na maga actividad na congregacion, porque el maga mujer tiene vez ta tapa con el diila cabeza?

 ¹⁷ Tiene congregacion que donde nuay anciano o maskin siervo ministerial para cumpli maga trabajo que sila el quien debe hace, igual como conduci miting de predicacion. Na ansina situacion, el otro bautizao hermano puede hace con ese. Si nuay tambien hermano, puede se hace el maga cualificao hermana. Pero si el un hermana hay hace un responsibilidad que debe para na un bautizao hermano, necesita le tapa con el de suyu cabeza. * (1 Corinto 11:3-10) Gendeh se ta hace de menos con el maga mujer. Sino, ta dale este oportunidad kanila para dale mira obediencia con el arreglamiento de Jehova acerca na autoridad na familia y na congregacion.

18. Paquemodo tu explica con el principio na Roma 13:1-7?

¹⁸ El maga deverasan Cristiano ta sigui enbuenamente con el principio na Roma 13:1-7. (Le.) Mientras ta permiti pa si Jehova que existi el gobierno del gente, tiene sila importante trabajo ta hace, igual como mentena el paz y dale el maga necesita servicio. Ta dale kita mira que ta respeta kita con este autoridad si ta obedece kita con el maga ley. Ta paga kita tax, tan fill up enbuenamente con el maskin cosa documento que ta pidi el gobierno y ta sigui con el maga ley que aplicable kanaton, na diaton familia, negocio o propiedad. Pero, gendeh kita somete con el gobierno si pidi sila que desobedece con Dios. Sino, contesta kita igual con el maga apostoles: “Necesita came obedece con el Dios, y gendeh con el maga gente.”​—Maga Actividad 5:28, 29; mira con el cajon “ De Quien Autoridad Yo Debe Obedece?”

19. Cosa otro manera que puede kita dale mira respeto con el gobierno?

¹⁹ Ta dale tambien kita mira respeto con el gobierno por  medio na manera si paquemodo kita ta trata con otro. Tiene vez, posible que directa kita man cuento con el maga oficial del gobierno. Si apostol Pablo ya trata con respeto con Rey Herodes Agripa y con Gobernador Festo maskin pa ya hace sila maga serioso culpa. (Maga Actividad 26:2, 25) Ta imita kita con el ejemplo de Pablo, presidente man o un polis el oficial con quien kita ta man cuento. Na escuela, el maga Cristiano jovenes ta pricura dale mira respeto con el diila maga maestro y na maga oficial y empleado na escuela. Siempre, ta dale kita mira respeto gendeh lang con aquellos quien ta respeta con el diaton creencia; sino, ta respeta tambien kita maskin con aquellos tan contra con el maga Testigo de Jehova. Debe puede mira el maga gendeh Testigo de Jehova que maga respetoso kita.​—Le con el Roma 12:17, 18; 1 Pedro 3:15, 16.

20, 21. Cosa el cuanto maga bendicion si dale kita mira respeto y obediencia con aquellos tiene autoridad?

²⁰ Si apostol Pedro ya escribi: “Respeta con todo.” (1 Pedro 2:17) Si, dale kita pirmi mira respeto con otro. Si puede nota el maga gente que ta respeta kita kanila, posible sila tiene buen impresion kanaton. Acorda que ese clase de calidad ralo ya lang ahora. Entonces, si ta dale kita se mira ta sigui kita con el mandato de Jesus: “El de ustedes luz necesita alumbra na presencia del maga gente para puede sila mira el de ustedes maga buen trabajo, y ay dale sila alabanza con el de ustedes Tata na cielo.”​—Mateo 5:16.

²¹ Na diaton tiempo ahora, el maga humilde ta queda interesao na verdad acerca con Dios. Poreso si dale kita mira el diaton respeto y obediencia adentro na familia, na congregacion y na gobierno posible hay queda interesao el maga gente man junto kanaton adora con Dios. Que bien bonito si sucede se! Pero maskin gendeh se sucede, un cosa el asigurao. El diaton respeto y obediencia con otro ta hace alegre con Dios Jehova y ayuda se kanaton para esta na de suyu amor. Tiene pa ba otro premio que mas pa con ese?