1, 2. Cosa verdad ta habla el Biblia?

KITA maga gente igual como esponja, ta puede kita man absorb maskin cosa alrededor kanaton. Bien facil lang copia​—maskin gendeh intencional​—el maga custumbre, principio y personalidad de aquellos con quien kita pirmi tan junto.

² Verdad el cosa ta habla el Biblia: “El quien ta sigui junto con el sabio hay queda sabio, pero el quien tan junto con el estupido hay resulta na mal.” (Proverbio 13:20) Este proverbio gendeh ta refiri con aquellos tiene vez lang kita tan junto. El expresion “ta sigui junto” ta dale mira que el un persona ta continua asocia na otro. Acerca con este texto, el un referencia del Biblia ta habla: “Sigui junto con el un persona ta indica amor y cerca relacion.” Gendeh ba ta imita kita con aquellos con quien kita ta ama? Gane, por causa que tiene kita cerca relacion con aquellos con quien kita ta ama, puede sila tiene grande influencia kanaton​—bueno man o malo.

3. Paquemodo kita puede iscuji maga amigo quien tiene buen influencia kanaton?

³ Para esta na amor del Dios, bien importante que man amigo kita con aquellos quien tiene buen influencia kanaton. Paquemodo kita se hace? Necesita kita ama con aquellos ta ama el Dios y man amigo con el de suyu  maga amigo. Pensa tu este. Tiene pa ba mas buen amigo contra con aquellos tiene maga calidad que ta busca si Jehova na un amigo? Entonces, examina kita si cosa clase de gente el Dios ta ama. Si claro kanaton si cosa el pensamiento de Jehova, puede kita iscuji maga amigo quien tiene buen influencia kanaton.

4. (a) Porque tiene derecho si Jehova iscuji si quien queda de suyu amigo? (b) Porque ya llama si Jehova con Abraham como el de suyu “amigo”?

⁴ Ta iscuji enbuenamente si Jehova si quien queda de suyu amigo. Nuay ba le derecho para hace se? Ele el Soberano Dios de entero universo y un grande privilegio queda de suyu amigo. Entonces, con quien man si Jehova ta iscuji queda de suyu maga amigo? Cerca le con aquellos quien ta confia y tiene fe con ele. Considera el ejemplo de Abraham, un gente quien tiene fuerte fe. Nuay mas otro probanza de fe que mas dificil para na un tata contra pidi con ele ofrece el de suyu anak como sacrificio. * Pero “ya ofrece si Abraham con Isaac como un sacrificio” cay fuerte el de suyu fe que “poderoso el Dios maskin para hace levanta con el maga muerto.” (Maga Hebreo 11:17-19) Por causa na de suyu fe y obediencia, ya llama con ele si Jehova como el de suyu “amigo.”​—Santiago 2:21-23.

5. Paquemodo si Jehova ta mira con aquellos quien ta obedece con ele?

⁵ Bien importante para con Jehova el lealtad y obediencia. Ta ama le con aquellos quien ta hace mas importante  na diila vida el lealtad con ele. (Le con el 2 Samuel 22:26.) Como cosa kita ya aprende na Capitulo 1, alegre si Jehova con aquellos quien ta obedece con ele por causa na amor. El Proverbio 3:32 ta habla: “Tiene Le buen amistad con el maga recto.” Tiene un bonito invitacion si Jehova para con aquellos quien ta obedece con el maga cosa le ta manda: Puede sila queda visita na de suyu “tolda”​—puede sila adora y reza con ele.​—Salmo 15:1-5.

6. (a) Paquemodo kita dale mira que ta ama kita con Jesus? (b) Cosa ta sinti si Jehova para con aquellos quien ta ama con el de suyu Anak?

⁶ Ta ama si Jehova con aquellos quien ta ama con Jesus, el de suyu unico Anak. Si Jesus ya habla: “Si quien ta ama conmigo ay obedece mi Palabra, y mi Tata ay ama con ele.” (Juan 14:23) Paquemodo kita dale mira el diaton amor con Jesus? Por medio na diaton obediencia na de suyu maga mandamiento, incluido el predicacion y hacida de dicipulo. (Mateo 28:19, 20; Juan 14:15, 21) Ta dale tambien kita mira amor con Jesus si ta ‘sigui kita na de suyu maga paso’​—hace kita el todo para imita con ele na diaton converzada y maga accion. (1 Pedro 2:21) Alegre si Jehova con aquellos quien ta ama con Jesus y ta hace esfuerzo para imita con el de suyu Anak.

7. Porque justo man amigo con el maga amigo de Jehova?

⁷ Fe, lealtad, obediencia y amor para con Jesus y na de suyu manera de vida​—ese el cuanto na maga calidad que ta busca si Jehova na de suyu maga amigo. Pregunta kita este na diaton mismo cuerpo: ‘El maga amigo ba de mio tiene ansina maga calidad? Tan amigo ba yo con el maga amigo de Jehova?’ Justo gayot que hace tu se. Aquellos quien ta cultiva maga buen calidad y activo ta predica el buen noticia acerca el Reino puede tiene buen influencia kanaton. Ayuda sila kanaton vivi harmonia na diaton determinacion que hace alegre con  Jehova.​—Mira con el cajon “ Cosa el un Buen Amigo?”

8. Cosa tu ya gusta acerca na relacion de kanda (a) Noemi y Rut? (b) el tres joven Hebreo? (c) Pablo y Timoteo?

⁸ El Biblia ta contene manada ejemplo de aquellos quien ya beneficia cay ya iscuji sila maga buen amigo. Puede kita le el istoria acerca con kanda Noemi y Rut, el tres joven Hebreo na Babilonia y kanda Pablo y Timoteo. (Rut 1:16; Daniel 3:17, 18; 1 Corinto 4:17; Filipo 2:20-22) Pero, considera kita el buen ejemplo de kanda David y Jonatan como man amigo.

9, 10. Cosa el razon si porque ya queda man amigo kanda David y Jonatan?

⁹ El Biblia ta habla que despues si David mata con Goliat, “kanda Jonatan y David ya queda man amigo, y si Jonatan ya ama con ele como de suyu mismo cuerpo.” (1 Samuel 18:1) Maskin pa grande el diferencia na diila edad ya queda sila man amigo hasta na muerte de Jonatan na guerra. * (2 Samuel 1:26) Cosa el razon si porque ansina de fuerte el diila relacion como man amigo?

¹⁰ Ya queda man amigo kanda Jonatan y David cay igual sila ta ama con Jehova y tiene fuerte deseo que esta fiel con ele. Igual sila quierre hace alegre con Jehova. Por causa na diila maga buen calidad, ya queda sila cerca na uno’y otro. Asigurao que ya gusta si Jonatan el animo de David quien nuay tiene miedo defende con el nombre de Jehova. Sin duda, ya respeta tambien si David con Jonatan quien leal ya suporta con el voluntad de  Jehova y ya hace una el bien de David en vez el de suyu bien. Considera por ejemplo cuando bien triste si David y ta esconde na desierto cay bien rabiao con ele si Rey Saul. Ya dale mira si Jonatan el de suyu lealtad con David cuando ele mismo el “ya anda con David . . . y ya ayuda con ele hace fuerte el de suyu confianza con Jehova.” (1 Samuel 23:16) Imagina si cosa ya sinti si David  cuando ya anda con ele el de suyu amigo para suporta y anima con ele! *

11. Cosa tu ya aprende acerca na ejemplo de Jonatan y David como man amigo?

¹¹ Cosa kita puede aprende con kanda Jonatan y David? El bien importante na man amigo amo el diila relacion con Dios. Si cerca kita con aquellos quien igual kanaton el creencia, principio na moral y tiene tambien deseo esta fiel con Dios, hay puede kita anima y hace fuerte con uno’y otro. (Le con el Roma 1:11, 12.) Incuntra kita ansina clase  de amigo na organizacion de Jehova. Pero, quierre decir ba se que todo quien ta atende na Kingdom Hall maga buen amigo? Gendeh.

12, 13. (a) Porque kita debe iscuji si con quien kita man amigo maskin adentro na congregacion? (b) Cosa problema ya enfrenta el maga congregacion del primer siglo y cosa consejo ya dale si Pablo?

¹² Maskin adentro na congregacion, debe kita iscuji maga amigo quien puede ayuda kanaton queda fuerte na espiritual. Porque? Cay el cuanto Cristiano na congregacion gendeh pronto queda mature na espiritual, igual como el cuanto maga fruta na un pono que tarda madura. Poreso, na todo congregacion gendeh igual-igual el espiritualidad del maga Cristiano. (Maga Hebreo 5:12–6:3) Pero siempre necesita kita man paciencia y dale mira amor con el maga nuevo o mahina na congregacion para puede kanila ayuda progresa na diila espiritualidad.​—Roma 14:1; 15:1.

¹³ Tiene vez, necesita kita queda con cuidao si con quien kita pirmi tan junto na congregacion. Posible, tiene cuanto maga individual quien ta hace maga cosas cuestionable. El otro, baka rabiao con el congregacion y reclamoso. El maga congregacion del primer siglo ya enfrenta tambien ansina problema. Fiel el mayoria del maga miembro del congregacion pero tiene cuanto que gendeh bueno el conducta. Por causa cay el cuanto na congregacion na Corinto nuay esta na enseñanza de Cristiano, si Pablo ya dale kanila consejo: “El maga barcada malo ta hace cambia el custumbre bueno de un gente.” (1 Corinto 15:12, 33) Ya habla tambien si Pablo con Timoteo que tiene cuidao con el maga Cristiano quien gendeh bueno el conducta y no man amigo kanila.​—Le con el 2 Timoteo 2:20-22.

14. Paquemodo kita puede aplica el consejo de Pablo acerca na maga amigo?

¹⁴ Paquemodo kita puede aplica el consejo de Pablo?  Puede kita se aplica si evita kita man amigo con aquellos quien posible tiene mal influencia kanaton​—adentro o apuera del congregacion. (2 Tesalonica 3:6, 7, 14) Debe kita protege el diaton relacion con Jehova. Acorda que igual como esponja, tan absorb o ta copia kita el custumbre y manera de vida del diaton maga amigo. Si hace kita tusmuk con el esponja na vinagre gendeh kita puede expecta que man absorb este agua. Na igual manera, si man amigo kita con aquellos quien tiene mal influencia kanaton gendeh kita puede expecta que man absorb kita cosas bueno.​—1 Corinto 5:6.

15. Paquemodo tu puede incuntra buen amigo na congregacion?

¹⁵ Mas grande siempre el posibilidad que puede kita incuntra maga buen amigo adentro na organizacion de Jehova. (Salmo 133:1) Paquemodo tu incuntra buen amigo na congregacion? Si cultiva tu maga calidad y vivi na manera que aceptable con Dios, asigurao que aquellos quien ta hace tambien con ese hay man amigo contigo. Necesita tambien tu hace cuanto maga cosas para tiene maga nuevo amigo. (Mira con el cajon “ Si Paquemodo Kita Tiene Buen Amigo.”) Busca amigo aquel quien tiene maga calidad que quierre tambien tu demonstra. Aplica el consejo del Biblia que ‘abri el de tuyu corazon,’ man amigo con el maga hermano y hermana maskin cosa pa el diila raza, nacionalidad o cultura. (2 Corinto 6:13; le con el 1 Pedro 2:17.) Man amigo gendeh lang na maga igual contigo el edad. Acorda que mas mayor si Jonatan con David. Si man amigo tu con el maga mas mayor contigo, puede tu beneficia na diila experiencia y sabeduria.

16, 17. Si el un hermano o hermana ya puede kanaton hace sinti duele, porque kita gendeh debe deja con el congregacion?

¹⁶ Ciendo otro-otro el personalidad y manera si paquemodo ya engranda el maga miembro na congregacion, posible  tiene problema. Baka puede kanaton habla o hace cosas el un hermano o hermana que duele para kanaton. (Proverbio 12:18) Tiene vez ta tiene problema cay gendeh igual el personalidad, nuay man entendijan o otro-otro el opinion. Man luya ba kita por causa con ese y deja con el congregacion? Gendeh kita se hace si deverasan kita ta ama con Jehova y con aquellos con quien le ta ama.

¹⁷ Como el diaton Creador y quien ta sustene con el diaton vida, debe lang kita ama y dale el diaton completo devocion con Jehova. (Revelacion 4:11) Mas pa, debe lang kita dale el diaton leal suporta con el congregacion que ta usa le. (Maga Hebreo 13:17, NW) Poreso, si ya puede kanaton hace sinti duele el un hermano o hermana, gendeh kita deja con el congregacion para dale mira que ya sinti kita duele. Gendeh si Jehova el quien ya hace kanaton sinti duele. Nunca kita deja con Jehova y con el de suyu maga siervo por causa na diaton amor para con ele.​—Le con el Salmo 119:165.

18. (a) Cosa kita puede hace para mentena el paz na congregacion? (b) Cosa el maga bendicion si iscuji kita perdona si tiene valido razon?

 ¹⁸ El amor para na maga hermano y hermana amo hay manda move kanaton para mentena el paz na congregacion. Gendeh ta expecta si Jehova perfeccion con aquellos con quien le ta ama y debe ansina tambien kita. El amor amo el ayuda kanaton para gendeh man centro na maga diutay kamali del otro y acorda que imperfecto kita todo y tan kamali. (Proverbio 17:9; 1 Pedro 4:8) El amor ayuda kanaton para continua “perdona con uno y otro.” (Colosa 3:13) Gendeh pirmi facil aplica con este consejo. Si permiti kita que continua el diaton negativo emocion, baka esta kita rabiao con el quien ya hace sinti duele kanaton y pensa que manera se para castiga con ele. Pero el deverasan, gendeh bueno para kanaton que siembra agrabio. Si iscuji kita perdona si tiene valido razon, hay obtene kita manada bendicion. (Lucas 17:3, 4) Dale se kanaton paz na pensamiento y corazon, puede mentena el paz na congregacion y mas pa puede kita mentena el diaton relacion con Jehova.​—Mateo 6:14, 15; Roma 14:19.

19. Cuando kita gendeh mas debe asocia con el un individual?

¹⁹ Tiene vez, pidi kanaton que no mas asocia con el un miembro del congregacion de antes. Ta sucede se si yan disfellow con el un individual quien ya viola con el ley del Dios y nuay arripinti o si ta enseña le falso doctrina o ele mismo el no quierre mas asocia na congregacion. El Palabra del Dios claro ta habla kanaton que ‘gendeh kita man junto’ con ese clase de maga gente. * (Le con el  1 Corinto 5:11-13; 2 San Juan 9-11) Posible dificil para kanaton que evita con el un persona que amigo diaton de antes o miembro del diaton familia. Hay obedece ba kita con Jehova y dale mira que mas importante kanaton el lealtad con ele y el de suyu maga ley? Acorda que bien importante para con Jehova el lealtad y obediencia.

20, 21. (a) Porque un amable provicion estaba con Jehova si tan disfellow con el un individual? (b) Porque importante que iscuji kita enbuenamente con el diaton maga amigo?

²⁰ Un amable provicion estaba con Jehova si tan disfellow con el un individual. Un manera se que ta demonstra le de suyu amor y ta dale se oportunidad kanaton para demonstra amor. Porque kita se puede habla? Cay si tan disfellow con el un individual quien nuay arripinti, ta dale se mira amor con el sagrao nombre de Jehova y con el de suyu maga principio. (1 Pedro 1:15, 16) Ta ayuda tambien se protege con el congregacion. Protegido el maga fiel miembro de congregacion na mal influencia de aquellos quien ya culpa y nuay arripinti. Puede sila continua diila adoranza cay asigurao sila que limpio el congregacion desde na mal influencia de este mundo. (1 Corinto 5:7; Maga Hebreo 12:15, 16) Mas pa, este disciplina ta dale mira amor con el quien ya comete culpa. Baka ese mismo el manera para puede le realiza que necesita le hace maga cambio para bira otravez con Jehova.​—Maga Hebreo 12:11.

²¹ Deverasan gayot que el diaton maga amigo o amiga puede tiene grande influencia kanaton. Poreso, bien importante que iscuji enbuenamente con el diaton maga amigo. Hay tiene kita maga buen amigo si man amigo kita con el maga amigo de Jehova y ama con aquellos con quien le ta ama. El cosa kita puede copia kanila hay ayuda kanaton vivi harmonia na diaton determinacion hace alegre con Jehova.