1, 2. Quien el alegre durante el bautismo?

SI TA sirvi tu con Jehova por cuanto decada ya, posible ya puede ya tu oi manada talk de bautismo na diaton maga asemblea. Pero, maskin pirmi tu presente na ese maga ocasion, asigurao alegre gayot tu mira con el maga sintao adelante del auditorium hay para presenta el diila mismo cuerpo na bautismo. Na ese tiempo, puede sinti el alegria del maga presente na ese ocasion y puede oi el palakpacan. Posible pa gane tu man luha mientras ta mira tu con el otro precioso grupo quien ya iscuji suporta con Jehova. Bien alegre gayot na ese ocasion!

² Cuanto beses lang kita ta puede mira bautismo na un año na diaton lugar pero mas manada beses ta puede mira el maga angel con ese ocasion. Puede ba tu imagina el “mas alegria na cielo” mientras ta mira sila miles de individual na entero mundo el ta omenta na visible parte del organizacion de Jehova cada semana? (Lucas 15:7, 10) Asigurao que alegre gayot el maga angel mira con este progreso.​—Haggeo 2:7.

3. Porque si Satanas tan libut-libut “igual como un leon que ta gruñi” y cosa le quierre hace?

³ Pero, tiene espiritu creatura quien rabiao ta observa con aquellos quien ta bautiza. Rabiao gayot si Satanas y el  maga demonio mientras ta mira sila con el miles de maga gente quien nuay acepta con el de suyu mundo. Ese gayot el cosa sila ta sinti cay si Satanas yan hambug que nuay gente quien sirvi con Jehova por causa na amor y nuay quien esta fiel bajo na maga probanza. (Le con el Job 2:4, 5.) Ta dale prueba que gendeh justo el acusacion de Satanas si tiene quien ta dedica el diila vida con Jehova. Igual lang ese como miles de palmada na cara de Satanas cada semana na entero año. Poreso, si Satanas “ta man libut-libut . . . igual como un leon que ta gruñi mientras ta busca con quien puede come”! (1 Pedro 5:8) Bien quierre come kanaton este “leon” na espiritual manera para hace malo con el diaton relacion con Dios.​—Salmo 7:1, 2; 2 Timoteo 3:12.

4, 5. (a) Cosa el dos importante manera que ta pone limitacion si Jehova con el influencia de Satanas? (b) Na cosa puede asigura el maga verdadero Cristiano?

 ⁴ Maskin violente el diaton enemigo, nuay razon para ganá kanaton el miedo. Porque? Cay ya pone limitacion si Jehova con el influencia del “leon que ta gruñi” na dos importante manera. Cosa ese? Una, si Jehova ya predicta que tiene “grande grupo” del maga verdadero Cristiano hay sobrevivi na “grande tribulacion.” (Revelacion 7:9, 14, NW) El maga profecia del Dios nunca falla. Entonces, maskin si Satanas sabe que gendeh gayot le puede engaña con el todo maga siervo del Dios.

⁵ El ika-dos amo el cosa puede mira na un verdad que ya habla el uno del maga fiel siervo del Dios. Ya habla si profeta Azarias con Rey Asa: “Si Jehova man uban contigo si esta tu junto con ele.” (2 Cronicas 15:2; le con el 1 Corinto 10:13.) Manada ejemplo na Biblia donde ta dale mira que nuay tiene buen exito el tactica de Satanas para hace malo con aquellos maga siervo quien ya esta cerca con Dios. (Maga Hebreo 11:4-40) El un Cristiano quien ta esta cerca con Dios ahora puede resisti y queda victorioso contra con el Diablo. Gane, el Palabra del Dios ta dale kanaton asiguranza: “Resisti ustedes con el Demonio, y ay desaleja le con ustedes.”​—Santiago 4:7.

6. Paquemodo ta ataca si Satanas con el cada Cristiano?

⁶ Gendeh gana si Satanas con este espiritual guerra pero, puede le kanaton engaña como individual si gendeh kita esta alerto. Sabe le que puede le gana contra kanaton si puede le hace luya con el diaton relacion con Jehova. Paquemodo este hace si Satanas? Por medio na por demas ataque, personal ataque y ataque que gendeh kita puede nota. Considera kita con este maga tactica de Satanas.

7. Porque por demas el ataque de Satanas con el maga siervo de Jehova?

 ⁷ Por demas ataque. Si apostol Juan ya habla: “El entero mundo talli na poder del demonio.” (1 San Juan 5:19) Ese maga palabra ta dale aviso con el todo maga verdadero Cristiano. Ciendo ya puede ya engaña si Satanas con el entero mundo, puede le ahora man centro y hace por demas el ataque con aquellos quien ya puede escapa con ele​—maga siervo de Jehova. (Miqueas 4:1; Juan 15:19; Revelacion 12:12, 17) Rabiao gayot ele cay sabe le que corto ya lang el de suyu tiempo. Poreso, mas ya hace pa le grabe el ataque. Ahora, ta enfrenta kita con el de suyu violente ataque para hace malo con el diaton relacion con Dios.

8. Cosa quierre decir cuando ya habla si Pablo que “ta man contra” kita na maga mal espiritu?

⁸ Personal ataque. Si apostol Pablo ya dale aviso con el maga Cristiano: “Cay hende kita ta man contra con el maga gente, sino contra con el maga demonio . . . quien tiene poder na di ila reino de maldad aqui na mundo.” (Efeso 6:12, El Nuevo Testamento) El Griego palabra que yan translate “ta man contra” literal quierre decir “luchajan”​—mano-mano y apiquijan el peleajan. Poreso, por medio con ese maga palabra, ya hace claro si Pablo que cada uno diaton tiene pelea contra con el maga mal espiritu. Comon man el creencia acerca na maga mal espiritu o gendeh na lugar onde kita ta queda, pirmi kita acorda que cuando ya dedica kita el diaton vida con Jehova, entrao ya kita na espiritual pelea. Poreso, ya anima si Pablo con el maga Cristiano na Efeso que “para ustedes duro”!​—Efeso 6:11, 13, 14.

9. (a) Porque si Satanas y el maga demonio ta usa manada clase de “maga ataque”? (b) Porque ta pricura influencia si Satanas con el diaton pensamiento y paquemodo kita puede resisti con el de suyu esfuerzo? (Mira con el cajon “ Queda Alerto Na Ataque De Satanas!”) (c) Cosa ataque el considera kita ahora?

⁹ Ataque que gendeh kita puede nota. Ya dale consejo si Pablo con el maga Cristiano que para duro contra na “maga  ataque” de Satanas. (Efeso 6:11) Nota que ya usa si Pablo aqui el palabra “maga”. El maga mal espiritu ta usa gendeh lang un ataque sino manada clase de ataque. Porque? Cay na pasada del tiempo, el cuanto maga hermano y hermana ya puede para duro contra na un probanza pero nuay puede para duro cuando ya experiencia otro probanza. Poreso, el Diablo y el maga demonio ta observa gayot con el diaton maga movimiento para puede mira si onde kita maluya. Despues, usa sila con ese. Bueno ya lang sabe kita el manada ataque del Diablo cay ya revela ya este na Biblia. (2 Corinto 2:11) Na maga capitulo que una pa con este, ya discuti kita con el tactica de materialismo, mal asociacion y sexual imoralidad. Considera kita ahora el otro pa ataque de Satanas​—espiritismo.

10. (a) Cosa el espiritismo? (b) Cosa el espiritismo para con Jehova y paquemodo tu ta mira con ese?

¹⁰ Si el uno ta practica espiritismo o demonismo, ele directa tiene coneccion con el maga mal espiritu. El adivinacion, magica, hace barang y man cuento con el maga muerto amo el cuanto na maga practica de espiritismo. Como cosa kita todo sabe, “detestable” con Jehova el espiritismo. (Deuteronomio 18:10-12; Revelacion 21:8) Ciendo debe kita “odia el maga cosa-cosa malo,” gendeh gayot kita debe tiene coneccion na maga mal espiritu. (Roma 12:9) Si hace kita con ese, tan traidor gayot kita con el diaton Tata na cielo, si Jehova.

11. Porque queda victorioso si Satanas si puede le kanaton influencia para practica espiritismo? Ilustra.

¹¹ Ciendo un acto de traicion el espiritismo contra con Jehova, si Satanas ta pricura gayot hace manera para queda kita envuelto con ese. Ta queda gayot victorioso si Satanas cada vez ta puede le engaña un Cristiano para practica demonismo. Porque? Pensa tu este: Si puede influencia  con el un soldao que deja y man traidor con el de suyu grupo y man junto con el enemigo, hay queda gayot alegre el comandante del enemigo. Posible, hace como trofeo con el traidor para insulta con el comandante del soldao. Na igual manera, si el un Cristiano practica espiritismo, intencional le ta deja con Jehova y ta pone de suyu vida bajo na rulanza de Satanas. Un grande alegria gayot este para con Satanas y trata le con el traidor como trofeo! Quierre ba kita queda victorioso si Satanas? Gendeh gayot! Gendeh kita maga traidor.

12. Cosa tactica ta usa si Satanas para influencia con el diaton mirada na espiritismo?

¹² Si ta odia kita con el espiritismo, gendeh gayot tiene buen exito si Satanas. Poreso, ya puede le realiza que debe le influencia con el diaton pensamiento. Paquemodo? Ta hace le manera para man libug el maga Cristiano hasta llega na punto hay pensa sila que “el bueno amo el malo y el malo amo el bueno.” (Isaias 5:20) Para hace con ese, ta usa si Satanas el un tactica que efectivo desde antes pa​—usa maga pregunta para man duda.

13. Paquemodo ya usa si Satanas con el tactica que usa maga pregunta para man duda?

¹³ Nota si paquemodo ya usa si Satanas con ese tactica de antes. Ya pregunta le con Eva na Eden: “Ya habla ba gayot el Dios que gendeh ustedes debe come con el fruta del todo pono na jardin?” Durante el miting del maga angel na cielo na tiempo de Job, ya pregunta si Satanas: “Si nuay cosa puede saca si Job, tiene ba siempre le miedo con Dios?” Y na principio del ministerio de Jesus aqui na tierra, ya pruba si Satanas con Cristo cuando ya habla con ele: “Si deverasan Uste Anak del Dios, manda con este maga piedra queda pan.” Na situacion de Jesus, ya gangguia mismo si Satanas con el cosa ya habla si Jehova maga seis semana el ya pasa:  “Este amo el dimio anak con quien ta ama gayot yo. Bien alegre yo con Ele.”​—Genesis 3:1; Job 1:9; Mateo 3:17; 4:3.

14. (a) Cosa tactica ta usa si Satanas para man duda kita acerca na espiritismo? (b) Cosa kita discuti ahora?

¹⁴ Ahora, ta usa tambien ansina clase de tactica el Diablo para man duda kita si malo ba gayot el espiritismo. Makatriste cay ya puede le se hace na cuanto maga Cristiano. Ya principia sila cuestiona si malo ba gayot el todo clase de espiritismo. (2 Corinto 11:3) Paquemodo kita puede ayuda para cambia el diila pensamiento? Paquemodo kita puede asigura que gendeh kanaton puede influencia si Satanas? Para sabe kita, considera kita el dos aspeto del vida que ya mezcla espiritismo si Satanas​—el entretenimiento y cuidada de salud.

15. (a) Paquemodo ta mira con el espiritismo el manada na Europe y North America? (b) Paquemodo el mirada del mundo con el espiritismo ya influencia con el cuanto maga Cristiano?

¹⁵ Especialmente na Europe y North America, ordinario ya lang el magica, barang y otro practica de espiritismo. El maga practica de demonismo ya hace como entretenimiento y gendeh peligroso que puede mira na salida, libro, programa na TV y na maga juego na computer. El cuanto del maga salida y libro de espiritismo ya queda popular. Claro que ya tiene buen exito el maga demonio que manda creé con el maga gente que gendeh peligroso ese practica. Ya puede ba este influencia con el maga Cristiano? Ya sale afectao el cuanto. Na cosa manera? Como un ejemplo, despues mira salida de espiritismo el un Cristiano, ele ya habla, “Ya mira yo con el salida pero, gendeh man yo ta practica espiritismo.” Porque peligroso ese clase de razon?

16. Porque peligroso iscuji entretenimiento que tiene coneccion na espiritismo?

¹⁶ Maskin pa tiene diferencia entre el actual ta practica  espiritismo y ta mira con ese, gendeh se quierre decir que nuay mas ya peligro si mira kita ese clase de practica. Porque? Considera este: El Palabra del Dios ta dale mira que si Satanas ni el de suyu maga demonio nuay abilidad para le con el diaton pensamiento. * Como cosa ya menciona enante, para sabe si cosa kita ta pensa y si cosa el ta hace luya na diaton relacion con Dios, el maga mal espiritu ta observa gayot enbuenamente con el diaton maga accion​—incluido ya si cosa entretenimiento kita ta iscuji. Si el un Cristiano quierre-quierre mira salida o le maga libro acerca na maga espiritista, magica, con el maga ta entra mal espiritu o cosas de demonio, ta dale le idea con el maga demonio. Na ese manera, ta dale le mira si onde le maluya. Como resulta, hay usa el maga demonio con el inclinacion de aquel Cristiano para ataca con ele por demas hasta hay gana sila. Gane, el cuanto quien ya tiene interes na espiritismo por medio na entretenimiento na uliji actual ya ta practica espiritismo.​—Le con el Galacia 6:7.

17. Cosa tactica posible usa si Satanas para ataca con aquellos enfermo?

¹⁷ Gendeh lang el diaton deseo para entretene quierre usa si Satanas sino hasta el diaton necesidad para cuida diaton salud. Paquemodo? Posible queda bien triste el un Cristiano cay ta queda mas grabe el de suyu enfermedad maskin pa manada ya le cosa ya hace para queda bueno. (Marcos 5:25, 26) Puede se dale oportunidad con Satanas y con el de suyu maga demonio. Posible tenta el maga demonio con el enfermo que busca cura que envuelto el usada de “poder de magica” o espiritismo. (Isaias 1:13) Si hace se el enfermo, queda maluya el de suyu relacion con Dios. Na cosa manera?

18. Cosa clase de curada el gendeh debe acepta el un Cristiano y porque?

 ¹⁸ Ya dale aviso si Jehova con el maga Israelita quien ya acepta “poder de magica”: “Si abri ustedes el de ustedes mano, hay esconde yo de mio ojos con ustedes. Maskin pa ta reza ustedes manada beses, gendeh yo ta oi.” (Isaias 1:15) Siempre, no quierre kita que tiene cosa hay sangga na diaton maga rezo y menggua el suporta que ta ricibi kita estaba con Jehova​—especialmente si enfermo kita. (Salmo 41:3) Poreso, si el manera para sabe si cosa el enfermedad o para cura con ese ta contene practica de espiritismo, gendeh debe acepta con ese el un verdadero Cristiano. (Mateo 6:13) Como resulta, puede le asigura que continua con ele guia si Jehova.​—Mira con el cajon “ Espiritismo ba Gayot se?”

19. (a) Cay ya engaña el Diablo con el manada gente, cosa sila ta creé acerca na de suyu poder? (b) Cosa cuento el debe evita el maga verdadero Cristiano?

¹⁹ Mientras el manada gente na Europe y North America ta hace de menos con el peligro del poder de Satanas, otro con ese el cosa ta creé na otro maga nacion. Na ese maga lugar, ya puede engaña el Diablo con el manada gente para creé que tiene le poder mas pa na cosa le deverasan tiene. El cuanto maga gente ta vivi cada dia que tiene miedo na maga mal espiritu. Manada maga istoria acerca na  maga trabajo del demonio. Tiene vez, con gana con ese ta hace cuento y el maga gente bien interesao con este. Debe ba tambien kita hace calayat ansina clase de istoria? Gendeh. El maga siervo del verdadero Dios ta evita hace con ese por causa na dos importante razon.

20. Paquemodo puede hace calayat el un persona, posible gendeh intencional, con el propaganda de Satanas?

²⁰ Una, si tan cuento el un persona acerca na maga cosa ta hace el maga demonio, ta ayuda gayot le con Satanas. Paquemodo? El Palabra del Dios ya dale prueba que si Satanas puede hace maga poderoso cosas pero, ya dale tambien este aviso que ta usa le maga “señal falso” y “todo clase de maldad para engaña.” (2 Tesalonica 2:9, 10) Ciendo si Satanas bien bueno engaña, sabe le si paquemodo influencia con el pensamiento del gente quien quierre-quierre na espiritismo para manda kanila creé con el maga cosas que gendeh deverasan. Posible hay creé gayot sila na cosa sila  ya oi y ya mira y habla se sila na otro. Llega el tiempo, ta queda sobra el istoria cay ta relata con este pirmi. Si hace calayat el un Cristiano ansina clase de istoria, dol ta hace ya tambien le el voluntad del Diablo​—el “tata del imbusterias.” Hay hace le calayat el propaganda de Satanas.​—Juan 8:44; 2 Timoteo 2:16.

21. Onde kita quierre hace centro el diaton maga cuento?

²¹ Segundo, maskin el un Cristiano quien ya puede experiencia maga cosas que tiene que hace na maga mal espiritu del antes, gendeh le debe hace cuento na maga hermano y hermana acerca con ese cosas. Porque? Ya anima kanaton: “Fija kita el diaton maga ojos con Jesus, quien amo el ta guia canaton na fe y ta hace con ese perfecto.” (Maga Hebreo 12:2) Si, debe kita hace centro el diaton atencion con Cristo, gendeh con Satanas. Cuando taqui pa le na tierra, nuay si Jesus cunta maga istoria na de suyu maga dicipulo acerca na maga mal espiritu, maskin pa manada le cosa puede habla acerca na maga cosas que puede y gendeh puede hace si Satanas. Sino, yan centro si Jesus na mensaje del Reino. Entonces, igual con Jesus y con el de suyu maga apostoles, hace kita centro el diaton maga cuento na “grande maga cosa-cosa que ya hace el Dios.”​—Maga Actividad 2:11; Lucas 8:1; Roma 1:11, 12.

22. Paquemodo kita puede continua contribui “mas alegria na cielo”?

²² Deverasan, ta usa si Satanas diferente maga tactica incluido ya el espiritismo, para destroza con el diaton relacion con Jehova. Pero, si odia kita si cosa el malo y ama si cosa el bueno, gendeh kita ta dale oportunidad con el Diablo para hace luya con el diaton determinacion que gendeh acepta con el maskin cosa clase de espiritismo. (Le con el Efeso 4:27.) Imagina el “mas alegria na cielo” si continua kita para ‘para puede resisti el maga ataque del Demonio’ hasta hay termina con ele!​—Lucas 15:7; Efeso 6:11.