1, 2. Cosa pregunta kita considera y porque?

CASAO ba tu? Alegre ba tu na de ustedes matrimonio o ta experiencia ustedes maga serioso problema? Hinay-hinay ba ustedes ta queda lejos na uno’y otro? Ta aguanta ya lang ba tu pero gendeh mas alegre? Si ansina, siguro triste tu cay el amor que tiene ustedes de antes, hinay-hinay ya ta perde. Como un Cristiano, asigurao quierre tu que el de ustedes matrimonio dale gloria con Jehova, el Dios con quien tu ta ama. Poreso, tan lingasa tu y ta sinti duele na de ustedes presente situacion ahora. Maskin pa ansina, no pensa que nuay mas ustedes esperanza. *

² Manada maga buen Cristiano man maridable quien ya experiencia dificultad na diila matrimonio de antes. Pero, ya puede sila busca manera para hace fuerte con el diila relacion como man maridable. Puede tambien tu queda mas alegre na de tuyu matrimonio. Paquemodo?

3, 4. Porque queda mas cerca el man maridable si pricura sila queda mas cerca con Dios? Ilustra.

³ Ustedes man maridable hay queda mas cerca na uno’y otro si pricura ustedes queda cerca con Dios. Porque?  Considera este ilustracion: Imagina que subi monte el un hombre y mujer. Ta para el hombre na un lao del monte mientras el mujer ta para na otro lao. Lejos el diila distancia na uno’y otro si talla pa sila abajo del monte. Pero, mientras ta subi sila para na punta del monte, mas ta queda sila cerca na uno’y otro. Ta mira ba tu si cosa leccion kita puede saca na este ilustracion?

⁴ El esfuerzo que ta hace tu para sirvi con Jehova puede compara con el esfuerzo que necesita para puede subi monte. Ciendo ta ama tu con Jehova, ta hace ya tu esfuerzo subi. Si ya queda lejos el de ustedes relacion como man maridable, igual lang se como ta subi ustedes ambus lao del monte. Pero cosa pasa si continua ustedes subi? Deverasan,  si ta principia pa lang ustedes, lejos pa el de ustedes distancia na uno’y otro. Pero, si hace tu mas esfuerzo para queda cerca con Dios​—igual como ta subi para na punta del monte​—mas queda tu cerca con el de tuyu mujer. Entonces, para queda tu mas cerca con el de tuyu mujer, necesita tu queda mas cerca con Dios. Pero, paquemodo man tu con ese hace?

5. (a) Cosa el un manera para queda mas cerca con Jehova y con el de tuyu mujer? (b) Cosa el mirada de Jehova na matrimonio?

⁵ Un importante manera amo que sigui con el consejo na Palabra del Dios acerca na matrimonio. (Salmo 25:4; Isaias 48:17, 18) Considera con el consejo que ya dale si apostol Pablo: “Tene ustedes todo grande respeto con el matrimonio.” (Maga Hebreo 13:4) Cosa se quierre decir? El expresion “grande respeto” ta dale mira que valoroso y precioso el un cosa. Y amo gayot se el mirada de Jehova na matrimonio​—precioso este con ele.

6. Cosa ta dale mira el cosa ya habla si Pablo acerca na matrimonio?

⁶ Siempre, como maga siervo del Dios, sabe ya tu y el de tuyu mujer que precioso y sagrao el matrimonio. Si Jehova el quien ya establicia con el arreglamiento de matrimonio. (Le con el Mateo 19:4-6.) Pero si ta experiencia ustedes serioso problema na de ustedes matrimonio, gendeh bastante que sabe lang ustedes que debe tiene grande respeto con el matrimonio para trata ustedes con uno’y otro con respeto y amor. Entonces, cosa contigo manda move para hace se? Nota enbuenamente si cosa ya habla si Pablo. Gendeh un observacion el cosa le ya habla sino ta dale le consejo: “Tene ustedes todo grande respeto con el matrimonio.” *  Importante que pone kita se na pensamiento. Porque man?

7. (a) Cosa maga mandamiento na Escritura el ta hace kita y porque? (b) Cosa el resulta si obedece kita con ese?

⁷ Considera si paquemodo tu ta mira con el otro mandamiento na Escritura, como el mandato que hace dicipulo o man junto con el maga hermano na adoranza. (Mateo 28:19; Maga Hebreo 10:24, 25) Deverasan, tiene vez gendeh facil con ese hace. Posible que negativo el reaccion del maga gente con quien tu predica o bien cansao tu na trabajo poreso bien dificil ya que atende pa tu miting. Pero maskin pa ansina, ta continua siempre tu predica con el mensaje del Reino y ta atende miting. Nuay quien puede sangga contigo​—maskin si Satanas! Porque? Cay el de tuyu con todo corazon amor con Jehova ta manda contigo move para obedece con el de suyu maga mandamiento. (1 San Juan 5:3) Cosa el buen resulta? El predicacion y atendida na miting ta dale contigo paz na pensamiento y deverasan alegria cay sabe tu que ta hace tu con el voluntad del Dios. Y amo se el cosa contigo ta hace fuerte. (Nehemias 8:10) Cosa kita puede aprende aqui?

8, 9. (a) Cosa kanaton puede manda move para sigui con el consejo que tiene grande respeto con el matrimonio y porque? (b) Cosa dos punto kita ahora discuti?

⁸ Igual si paquemodo el de tuyu hondo amor con Jehova amo el ta manda move contigo para predica y atende miting maskin pa na manada sanggadura, amo tambien se el manda move contigo para sigui con el consejo que ‘tiene grande respeto con el matrimonio’ maskin pa dol dificil con ese hace. (Maga Hebreo 13:4; Salmo 18:29; Eclesiastes 5:4) Y igual si paquemodo ya bendici contigo el Dios cay ta hace tu esfuerzo predica y atende miting, ta mira tambien si Jehova el de tuyu esfuerzo que tiene grande respeto con el de tuyu matrimonio y hay bendici le contigo.​—1 Tesalonica 1:3; Maga Hebreo 6:10.

⁹ Paquemodo man tu dale mira que tiene tu grande respeto  na de tuyu matrimonio? Necesita tu evita maga practica que puede destroza con el de tuyu matrimonio. Necesita tambien tu hace accion para hace fuerte con el de ustedes relacion como man maridable.

10, 11. (a) Cosa clase de conducta el gendeh ta dale mira respeto na matrimonio? (b) Cosa pregunta kita debe considera junto con el diaton mujer?

¹⁰ Cuanto año el ya pasa, un Cristiano mujer ya habla: “Ya reza yo con Jehova que dale conmigo fuerza para puede yo aguanta.” Na cosa? Ya explica le: “Duele el maga palabra del de mio marido. Nuay yo dinigrido na cuerpo pero el cosa le conmigo pirmi ta habla, igual como ‘Pesades lang bo!’ y ‘Nuay sirvi!’ ya hace conmigo sinti duele.” Este mujer ya menciona un serioso cosa​—maga duele palabra que ta usa adentro na matrimonio.

¹¹ Bien makatriste si el maga Cristiano man maridable ta larga maga duele palabra na uno’y otro que ta causa dolor na emocion que gendeh facil perde! Claro gayot que nuay respeto na matrimonio si el man maridable ta usa maga duele palabra. Quetal el de tuyu matrimonio? Un manera para sabe amo pregunta con el de tuyu mujer, “Cosa tu ta sinti na maga palabra que ta usa yo?” Si ta sinti le que pirmi tu ta usa maga duele palabra, debe preparao tu cambia con ese.​—Galacia 5:15; le con el Efeso 4:31.

12. Paquemodo queda no vale nada na ojos del Dios el adoranza del un gente?

¹² Pirmi tu acorda que tiene efecto na de tuyu relacion con Jehova si paquemodo tu ta converza con el de tuyu mujer. El Biblia ta habla: “Si tiene quien ta pensa que ele un gente religioso, pero gendeh le ta controla el disuyo boca, ta engaña lang le con el disuyo mismo cuerpo y no sirvi el disuyo religion [adoranza, NW].” (Santiago 1:26) Parte del de tuyu adoranza con Dios el de tuyu palabra. Gendeh ta  suporta el Biblia con el idea que gendeh importante si cosa ta pasa na casa basta el un persona ta clama que ta adora le con Dios. No engaña con el de tuyu mismo cuerpo, serioso cosa este. (Le con el 1 Pedro 3:7.) Maskin pa tiene tu abilidad y activo na servicio con Dios pero si intencional tu ta usa maga palabra para hace sinti duele con el de tuyu mujer, nuay tu respeto na matrimonio y no vale nada el de tuyu adoranza con Dios.

13. Paquemodo puede causa dolor el un persona con el de suyu marido o mujer?

¹³ Necesita tambien queda alerto el man maridable que gendeh hace sinti duele con uno’y otro na gendeh directa manera. Considera este dos ejemplo: Un nana que solo-solo ta cuida con el de suyu anak el pirmi ta llama na telefono con el un casao hermano na congregacion para pidi con ele consejo y ta dura sila man cuento; un soltero hermano el ta dale grande tiempo para man junto con el un casao hermana na ministerio. El maga casao persona na este ejemplo posible tiene buen intencion; pero, cosa el efecto del cosa sila ta hace na diila maga marido o mujer? Un mujer quien ya enfrenta ansina clase de situacion ya habla: “Duele conmigo si ta mira yo que el de mio marido ta dale grande tiempo y atencion na otro hermana na congregacion. Ta manda este conmigo sinti que nuay yo valor.”

14. (a) Cosa el obligacion del maga casao asegun na Genesis 2:24? (b) Cosa kita debe pregunta na diaton mismo cuerpo?

¹⁴ Puede kita entende si porque ta sinti duele este mujer y el otro quien ta enfrenta igual situacion. El diila marido ta ignora con el instruccion del Dios acerca na matrimonio: “El hombre hay deja con el de suyu tata y nana y esta junto con el de suyu mujer.” (Genesis 2:24) Ta respeta siempre el maga casao con el diila maga mayores; pero una na diila obligacion amo el diila mujer como cosa ya habla el Dios. Na igual manera, el maga Cristiano ta ama gayot con el diila hermano y hermana na fe; pero el diila primer  responsibilidad amo con el diila marido o mujer. Poreso, si el un casao Cristiano ta dale grande tiempo o ta tiene ya bien cerca relacion con el maga hermano o hermana na fe, especialmente na gendeh igual diila sexo, ta causa se problema na matrimonio. Gendeh gaha ese el razon si porque ma-problema el de tuyu matrimonio? Pregunta na de tuyu mismo cuerpo, ‘Ta dale ba gayot yo con el de mio  mujer el tiempo, atencion y amor que debe le ricibi?’

15. Asegun na Mateo 5:28, porque gendeh debe dale sobra atencion el maga casao Cristiano con aquellos gendeh diila marido o mujer?

¹⁵ Aquellos quien ta dale sobra atencion con otro que gendeh diila marido o mujer ta pone con el diila mismo cuerpo na peligroso situacion. Makatriste cay cuanto de maga casao Cristiano ya tiene romantico sentido con aquellos con quien ya tiene sila cerca relacion. (Mateo 5:28) Como resulta, ya hace sila maga cosas que gendeh ta dale mira respeto na matrimonio. Considera si cosa ya habla si apostol Pablo acerca con ese.

16. Cosa mandato ya dale si Pablo acerca na matrimonio?

¹⁶ Despues dale si Pablo el consejo que “tene ustedes todo grande respeto con el matrimonio,” ya omenta le: “No mancha con pecado el cama del maga maridable, cay el Dios ay castiga con aquellos quien ta man cabit y ta comete adulterio.” (Maga Hebreo 13:4) Ya usa si Pablo con el termino “cama del maga maridable” para refiri con el sexual relacion. Este ‘nuay mancha de pecado’ o limpio na moral si ta hace con ese alli lang adentro del matrimonio. Entonces, el maga Cristiano ta sigui con este maga palabra: “Ojala queda tu alegre junto na de tuyu mujer que ya casa tu cuando joven tu.”​—Proverbio 5:18.

17. (a) Porque el mirada del mundo na adulterio gendeh debe influencia con el maga Cristiano? (b) Paquemodo kita puede sigui con el ejemplo de Job?

¹⁷ Aquellos quien tiene sexual relacion con otro quien gendeh diila mujer ta dale mira que gendeh gayot sila ta respeta con el ley del Dios acerca na moral. Deverasan, manada ahora el ta mira con el adulterio como normal lang. Pero, el mirada del otro maga gente na adulterio gendeh debe influencia con el maga Cristiano. Sabe sila que na uliji,  “el Dios ay castiga con aquellos quien ta man cabit y ta comete adulterio.” (Maga Hebreo 10:31; 12:29) Poreso, el maga verdadero Cristiano ta sigui si paquemodo ta mira el Dios con este. (Le con el Roma 12:9.) Acorda que ya habla si Job: “Ya hace yo contrata con el de mio ojos.” (Job 31:1) Para evita maskin cosa que puede resulta na adulterio, el maga verdadero Cristiano ta controla con el diila ojos. Nunca sila mira con mal deseo con otro quien gendeh diila marido o mujer.​—Mira con el articulo “Si Cosa el Biblia Ta Habla Acerca na Divurcio y Separacion” na Appendix.

18. (a) Na ojos de Jehova, paquemodo de serioso el adulterio? (b) Porque semejante el adulterio y idolatria?

¹⁸ Na ojos de Jehova, paquemodo de serioso el adulterio? Na ley que ya dale le con Moises, puede kita entende si cosa el sentido de Jehova na este cosa. Na Israel, incluido el adulterio y idolatria na maga culpa que muerte el castigo. (Levitico 20:2, 10) Ta puede ba tu mira si porque semejante este dos? El un Israelita quien ta adora na idolo, ya viola con el de suyu contrata con Jehova. Na igual manera, el un Israelita quien ya comete adulterio ya viola con el de suyu contrata na de suyu mujer. Igual sila ya traiciona. (Exodo 19:5, 6; Deuteronomio 5:9; le con el Malaquias 2:14.) Entonces, igual sila dos culpable con Jehova, el fiel Dios con quien puede confia.​—Salmo 33:4.

19. Cosa kanaton puede ayuda para queda mas determinao evita con el adulterio y porque?

¹⁹ Siempre, el maga Cristiano gendeh mas bajo na ley que ya dale con Moises. Pero si acorda sila que serioso culpa el adulterio na Israel de antes, puede este hace fuerte con el diila determinacion que gendeh hace con ese. Porque? Considera este: Entra ba tu na iglesia, hinca y reza na un imagen? Hay habla tu, ‘Nunca!’ Pero conforma ba tu hace con ese si ofrece contigo grande cantidad de sen? Hay contesta tu, ‘Gendeh gayot!’ Deverasan, para na un Cristiano gendeh gayot aceptable el idea que adora na imagen y traiciona con Jehova. Na igual manera, gendeh tambien debe  queda aceptable na maga Cristiano el idea que traiciona con Jehova y con el diila marido o mujer por medio de comete adulterio​—maskin cosa pa man sila puede saca con ese. (Salmo 51:1, 4; Colosa 3:5) No quierre gayot kita hace maga cosas que puede hace alegre con Satanas y gendeh ta honra con Jehova y con el matrimonio.

20. Cosa ya pasa na cuanto matrimonio? Ilustra.

²⁰ Puera que evita tu hace maga cosas que gendeh ta honra con el matrimonio, cosa pa tu puede hace para hace bira el de tuyu respeto con el de tuyu mujer? Imagina con el matrimonio como un casa. Despues, pensa con el maga buen palabra y trabajo del man maridable para na uno’y otro como maga decoracion que ta hace mas bonito con el casa. Si ta sinti tu que mas cerca tu con el de tuyu mujer, el de ustedes matrimonio ta semeja na un casa que manada decoracion. Si ta perde ya el de ustedes amor, perde tambien el alegria na de ustedes matrimonio igual si paquemodo el casa gendeh mas bonito cay hinay-hinay ta perde el maga decoracion. Ciendo quierre tu sigui con el mandamiento del Dios que ‘tiene grande respeto con el matrimonio,’ hay manda se move contigo que hace manera para mejora el de ustedes situacion. Siempre, hay pricura tu arregla el un cosa que precioso y valuable. Paquemodo tu se hace? El Palabra del Dios ta habla: “Por medio na sabeduria, ya planta con el casa y por medio na entendimiento tiene este seguridad. Por medio na saber, el maga cuarto de este ya llena de todo clase de precioso y bonito tesoro.” (Proverbio 24:3, 4) Considera si paquemodo aplicable este na matrimonio.

21. Paquemodo kita hinay-hinay puede hace fuerte con el diaton matrimonio? (Mira tambien con el cajon “ Paquemodo Queda Mas Alegre El Diamon Matrimonio?”)

²¹ Incluido na maga precioso tesoro que tiene el un alegre familia el maga calidad igual na deverasan amor, miedo  con Dios y fuerte fe. (Proverbio 15:16, 17; 1 Pedro 1:7) Ta hace este fuerte con el matrimonio. Pero ya puede ba tu nota si paquemodo llena de precioso tesoro el maga cuarto asegun na proverbio? “Por medio na saber.” Si aplica, el saber na Biblia tiene poder para cambia con el pensamiento del maga gente y manda move kanila para hace bira el diila amor para na uno’y otro. (Roma 12:2; Filipo 1:9) Poreso, si tu y el de tuyu mujer ta dale tiempo para le junto con el Biblia o considera con el maga articulo na maga publicacion que base na Biblia acerca na matrimonio, igual lang se como ta mira ustedes decoracion que puede hace bonito con el de ustedes casa. Si el amor con Jehova el move contigo para aplica na de ustedes matrimonio el consejo que nuevo lang tu ya aprende, igual lang se como ta lleva tu con el decoracion na cuarto del de ustedes casa. Como resulta, hay bira el alegria que ya sinti tu del antes na de tuyu matrimonio.

22. Cosa el resulta si pricura kita hace el diaton parte para hace fuerte con el diaton matrimonio?

²² Deverasan, necesita grande tiempo y esfuerzo para uno-uno puede pone otravez con aquel maga decoracion. Pero si pricura tu hace el de tuyu parte, hay tiene tu alegria cay sabe tu que ya sigui tu con este consejo del Biblia: “Respeta gayot con uno y otro.” (Roma 12:10; Salmo 147:11) Y mas pa, por causa na de tuyu esfuerzo que dale mira respeto na de tuyu matrimonio hay esta tu na amor del Dios.