1, 2. Cosa decicion kita necesita hace acerca na entretenimiento?

IMAGINA que come tu un fruta. Pero, ya puede tu nota que tiene este buluk. Cosa tu hace? Come ba tu con el fruta hasta con el buluk, buta con el fruta o quita con el buluk y despues come con el fruta?

² El entretenimiento ta semeja con aquel fruta. Tiene vez, quierre tu entretene pero ya puede tu nota que gendeh bueno na moral el manada entretenimiento ahora. Cosa tu hace? El cuanto ta acepta con el entretenimiento maskin tiene este cosa malo. El otro ta evita con el todo entretenimiento para asigura que puede sila desaleja na maga mal cosas. Mientras el otro ta evita con el gendeh bueno pero ta participa na maga buen entretenimiento. Cosa tu debe iscuji para esta na amor del Dios?

3. Cosa kita considera?

³ Mayoria kanaton hay iscuji con el ika-tres. Sabe kita que necesita kita entretenimiento pero ta iscuji kita aquel bueno na moral. Entonces, necesita kita considera si paquemodo determina si el un entretenimiento ba bueno o malo. Pero discuti kita una si cosa el efecto del diaton entretenimiento na adoranza con Jehova.

4. Paquemodo debe afecta el diaton dedicacion na entretenimiento que ta iscuji kita?

⁴ Un de edad Testigo de Jehova que ya bautiza del 1946  ya habla: “Ta asigura yo que pirmi yo presente y ta oi enbuenamente na cada talk de bautismo, que dol conmigo bautiza.” Porque? Ya explica le, “Ta pone yo pirmi na pensamiento el de mio dedicacion y ya ayuda se para puede yo esta fiel.” Asigurao, uyun tu na cosa le ya habla. Si ta hace tu acorda con el de tuyu mismo cuerpo que ya promete tu con Jehova que usa tu el de tuyu vida para sirvi con ele, ayuda se contigo para aguanta. (Le con el Mateo 5:33.) Si medita tu con el de tuyu dedicacion, hay mira tu con el ministerio y con el todo aspeto del vida​—incluido el entretenimiento​—igual si paquemodo el Dios ta mira con ese. Ya hace se claro si apostol Pablo cuando ya escribi le con el maga Cristiano na de suyu tiempo: “Maskin cosa ustedes ta come, maskin cosa ustedes ta toma, maskin cosa gayot ustedes ta hace, hace ese para el gloria del Dios.”​—1 Corinto 10:31.

5. Paquemodo kanaton puede ayuda el Levitico 22:18-20 para entende el cosa ya habla na Roma 12:1?

⁵ Tiene coneccion na de tuyu adoranza con Jehova el todo cosa tu ta hace. Na de suyu carta para con aquellos na Roma, ya usa si Pablo maga palabra que hondo el cosa quierre decir para hace claro acerca con ese verdad. Ya anima le kanila: “Ofrece el de ustedes maga cuerpo con el Dios igual como un sacrificio vivo, santo [sagrao,  NW] y que Ele ta gusta.” (Roma 12:1) Incluido na de tuyu cuerpo el de tuyu pensamiento, corazon y fuerza. Ta usa tu se todo para sirvi con Dios. (Marcos 12:30) Ya habla si Pablo que ese clase de servicio un sacrificio. Pero, tiene kita cosa debe pone na pensamiento. Na ley de Moises, gendeh ta acepta el Dios con el sacrificio que tiene defecto. (Levitico 22:18-20) Na igual manera, gendeh tambien acepta el Dios con el servicio del un Cristiano si tiene este defecto. Paquemodo se sucede?

6, 7. Paquemodo queda mabuling el cuerpo del un Cristiano y cosa el resulta de ese?

⁶ Ya anima si Pablo con el maga Cristiano na Roma: “No ustedes deja ni con un miembro del de ustedes cuerpo queda un armas malo para pelea na lao del pecado.” Ya habla tambien le kanila: “Mata ustedes con el maga mal trabajo del cuerpo.” (Roma 6:12-14; 8:13) Na de suyu carta, ya dale le maga ejemplo del “maga mal trabajo del cuerpo.” Acerca con el maga imperfecto gente, el texto ta habla: “El diila maga boca lleno de maldicion.” “El diila maga pies lijero para mata.” “El diila maga ojos noay miedo con Dios.” (Roma 3:13-18) Ta queda mabuling el cuerpo del un Cristiano si ta usa le con el “miembro” o parte del de suyu cuerpo para comete pecado. Por ejemplo, si el un Cristiano ahora intencional ta mira pornografia o maga salida de violencia, ta deja le comete pecado el de suyu ojos. Na ese manera, ta queda mabuling el de suyu cuerpo. El maskin cosa adoranza que hace le hay queda un sacrificio que gendeh mas sagrao y gendeh mas aceptable con Dios. (Deuteronomio 15:21; 1 Pedro 1:14-16, NW; 2 Pedro 3:11) Que bien peligroso gayot si iscuji kita mal entretenimiento!

⁷ Claro que tiene serioso resulta el entretenimiento que ta iscuji el un Cristiano. Asigurao, quierre kita iscuji entretenimiento  que puede ayuda para progresa y gendeh para tiene defecto el diaton servicio con Dios. Considera kita ahora si paquemodo kita determina si bueno ba el un entretenimiento o gendeh.

8, 9. (a) Cosa el dos clase de entretenimiento? (b) Cosa clase de entretenimiento kita debe evita y porque?

⁸ El todo entretenimiento ta cae lang na dos clase. El una ta inclui maga entretenimiento que debe evita el maga Cristiano; el ika-dos amo el maga entretenimiento que el un Cristiano decidi si aceptable ba con ele o gendeh. Considera kita el primer clase de entretenimiento que ta evita el maga Cristiano.

⁹ Como cosa ya discuti na Capitulo 1, el cuanto maga entretenimiento ta dale mira maga actividad que claro ta condena el Biblia. Pensa por ejemplo el maga Website, salida, cancion y programa na TV que ta dale mira maga trabajo de sadista o ta contene maga cosas de demonismo, pornografia o maga imoral practica. Ciendo ese clase de entretenimiento ta dale mira que normal lang el maga cosas que claro ta viola con el maga principio o ley na Biblia, debe con ese evita el maga verdadero Cristiano. (Maga Actividad 15:28, 29; 1 Corinto 6:9, 10; Revelacion 21:8) Si ta hace tu se, ta dale tu prueba con Jehova que ta “odia” tu y ta continua “evita con el cosas malo.” Na ese manera, tiene tu “fe sincero.”​—Roma 12:9; Salmo 34:14; 1 Timoteo 1:5.

10. Cosa clase de razon acerca na entretenimiento el peligroso y porque?

¹⁰ Pero para con el los demas, gendeh peligroso mira maga salida que ta dale mira maga cosas imoral. Ta habla sila, ‘Ta mira yo se na salida o na TV, pero nunca yo con ese hace.’ Ese clase de razon peligroso y puede kanaton  engaña. (Le con el Jeremias 17:9.) Si alegre kita mira maga cosas que ta condena si Jehova, deverasan ba kita ta “odia el maga cosa-cosa malo”? Si pirmi kita ta mira, ta le o ta oi maga cosas de imoral, el diaton conciencia hay queda cubalan. (Salmo 119:70; 1 Timoteo 4:1, 2) Ese clase de practica puede afecta na cosa kita ta hace o si paquemodo kita ta mira con el mal conducta del otro.

11. Porque deverasan el cosa ta habla na Galacia 6:7 acerca na entretenimiento?

¹¹ Ansina el cosa ya sucede na cuanto maga Cristiano. Ya comete sila imoralidad cay ya influencia kanila el maga entretenimiento que pirmi sila ta mira. Por medio na diila mal experiencia ya aprende sila que si “cosa el gente ta siembra, ese tamen ele ay cosecha.” (Galacia 6:7) Pero puede evita con ese mal resulta. Si siembra tu na de tuyu pensamiento el maga cosas limpio na moral, hay cosecha tu maga buen resulta.​—Mira con el cajon “ Cosa Entretenimiento Yo Debe Iscuji?”

12. (a) Cosa el coneccion del Roma 2:6 na entretenimiento? (b) Cosa kanaton puede ayuda para hace maga personal decicion?

¹² Discuti kita el ika-dos clase​—entretenimiento que ta dale mira maga cosas que gendeh directa ta condena ni especifico ta aprova el Palabra del Dios. Si ta iscuji ansina clase de maga entretenimiento, el cada uno Cristiano necesita hace personal decicion si cosa el aceptable con ele. (Le con el Roma 2:6.) Pero tiene guia que puede kanaton ayuda. El Biblia ta contene maga principio o importante verdad que ayuda kanaton sabe si cosa el pensamiento de Jehova. Si aplica kita con ese maga principio, puede kita sabe “si cosa ba el querer del Dios” na todo cosas incluido el entretenimiento que ta iscuji kita.​—Efeso 5:17.

13. Cosa kanaton manda move para evita maga entretenimiento que gendeh aceptable con Jehova?

 ¹³ Gendeh igual-igual el entendimiento del maga Cristiano na maga cosas acerca na moral. (Filipo 1:9) Mas pa, sabe sila que el cada individual otro-otro clase de entretenimiento el cosa quierre. Poreso, gendeh kita puede expecta que igual el maga decicion del todo Cristiano. Maskin pa ansina, si deja kita con el maga principio del Dios que influencia con el diaton pensamiento y corazon, mas  hay quierre kita evita el maskin cosa entretenimiento que gendeh aceptable con Jehova.​—Salmo 119:11, 129; 1 Pedro 2:16.

14. (a) Cosa kita debe considera si ta iscuji entretenimiento? (b) Paquemodo kita continua hace una na diaton vida el maga espiritual cosas?

¹⁴ Si ta iscuji entretenimiento, tiene pa otro cosa que debe considera: el de tuyu tiempo. El clase de entretenimiento que ta iscuji tu ta revela si cosa el aceptable contigo; mientras el tiempo que ta usa tu para con ese ta revela si cosa el importante contigo. Siempre, el mas importante para na maga Cristiano amo el maga espiritual cosas. (Le con el Mateo 6:33.) Entonces, cosa tu puede hace para asigura que el maga espiritual cosas amo el una na de tuyu vida? Si apostol Pablo ya habla: “Bicia si cosa clase de vida ta vivi ustedes. Vivi gendeh como maga gente noay juicio, sino como maga gente con buen juicio quien ta usa el tiempo embuenamente.” (Efeso 5:15, 16) Si pone tu limitacion na tiempo que ta usa tu na entretenimiento, ayuda se contigo para tiene tiempo na “maga cosas que mas importante”​—maga actividad que puede ayuda para progresa el de tuyu espiritualidad.​—Filipo 1:10, NW.

15. Porque necesita siempre kita queda con cuidao maskin dol aceptable el un entretenimiento?

¹⁵ Maskin dol aceptable el un entretenimiento, necesita siempre kita queda con cuidao. Cosa se quierre decir? Considera kita otravez con el ilustracion del fruta. Para evita come con el buluk, hay quita tu gendeh lang con el mismo buluk sino pati el alrededor de este. Na igual manera, ansina tambien el cosa tu hace si ta iscuji entretenimiento. El un sabio Cristiano ta evita gendeh lang con el maga entretenimiento que claro ta viola con el maga principio na Biblia; sino, pati maga entretenimiento que cuestionable o ta contene cosas que gendeh bueno  na espiritualidad. (Proverbio 4:25-27) Puede tu se hace si ta sigui tu enbuenamente con el consejo na Biblia.

16. (a) Paquemodo kita dale mira que igual el diaton pensamiento con Jehova acerca na moral? (b) Paquemodo tu asigura que ta aplica tu maga principio na Biblia na de tuyu vida?

¹⁶ Si ta iscuji entretenimiento, el maga deverasan Cristiano ta considera una si cosa el pensamiento de Jehova. El Biblia ta revela si cosa si Jehova ta sinti y si cosa el de suyu maga principio. Por ejemplo, si Rey Solomon ya menciona maga cosas que ta odia si Jehova, igual el “un lenggua imbustero y mano que ta mata maga inocente, un corazon que ta plaña cosa malo y pies que ta corre pronto para hace malo.” (Proverbio 6:16-19) Paquemodo el pensamiento de Jehova debe afecta contigo? “O ustedes quien ta ama con Jehova,” ya anima el salmista, “odia el cosa malo.” (Salmo 97:10) Necesita puede mira na de tuyu entretenimiento que ta odia tu con el cosa ta odia si Jehova. (Galacia 5:19-21) Pone tambien na pensamiento que el cosa tu ta hace na privado amo el ta revela si cosa clase de persona tu. (Salmo 11:4; 16:8) Entonces, si tiene tu con todo corazon deseo que demonstra na todo aspeto del de tuyu vida si cosa si Jehova ta sinti na maga cosas acerca na moral, pirmi tu hace maga decicion que harmonia na maga principio na Biblia. Como resulta, hay queda se de tuyu manera de vida.​—2 Corinto 3:18.

17. Antes de iscuji entretenimiento, cosa kita debe pregunta na diaton mismo cuerpo?

 ¹⁷ Cosa pa tu necesita hace para asigura que actua tu harmonia na pensamiento de Jehova si ta iscuji entretenimiento? Medita con este pregunta, ‘Paquemodo este afecta conmigo y na de mio relacion con Dios?’ Por ejemplo, antes de decidi si mira ba tu con el un salida, pregunta na de tuyu mismo cuerpo, ‘Paquemodo este afecta con el de mio conciencia?’ Considera kita si cosa maga principio puede aplica acerca con este.

18, 19. (a) Paquemodo el principio na Filipo 4:8 puede ayuda kanaton para determina si bueno ba el diaton entretenimiento? (b) Cosa pa otro maga principio puede ayuda contigo para iscuji buen entretenimiento? (Mira con el footnote.)

¹⁸ El un importante principio puede le na Filipo 4:8: “Precura pone na de ustedes pensamiento el verdad, el honor, el maga cosa-cosa bueno y limpio, el maga cosa-cosa que kita ta ama y ta respeta, todo clase de virtud y maskin cosa conviene para alaba.” Deverasan, gendeh entretenimiento el cosa ta discuti si Pablo sino el maga cosas que debe kita medita que ta hace alegre con Dios. (Salmo 19:14) Pero, el palabra de Pablo puede tambien aplica si ta iscuji entretenimiento. Paquemodo?

¹⁹ Pregunta na de tuyu mismo cuerpo, ‘Ta puede ba ayuda conmigo el maga salida, video game, cancion o otro forma de entretenimiento que ta iscuji yo para pensa el maga cosas “limpio”?’ Por ejemplo, despues tu mira un salida, cosa escena ta esta na de tuyu pensamiento? Si ese bueno, limpio y ta dale contigo alivio, puede tu habla que bueno el de tuyu entretenimiento. Pero si ta manda se contigo pensa maga cosas mabuling, entonces gendeh bueno el de tuyu entretenimiento y peligroso pa gane. (Mateo 12:33; Marcos 7:20-23) Porque? Cay si ta pensa tu maga cosas que mabuling na moral, hay perde el de tuyu  paz na pensamiento, queda cubalan el de tuyu conciencia y puede se hace malo con el de tuyu relacion con Dios. (Efeso 5:5; 1 Timoteo 1:5, 19) Ciendo ese clase de entretenimiento tiene mal efecto contigo, queda determinao evita con ese. * (Roma 12:2) Imita con el salmista quien ya reza con Jehova: “No conmigo permiti mira el maga cosas que nuay valor.”​—Salmo 119:37.

20, 21. Cosa el coneccion del 1 Corinto 10:23, 24 na entretenimiento que iscuji kita?

²⁰ Ya menciona si Pablo un principio que necesita considera si ta hace maga personal decicion. Ele ya habla: “Tiene came permiso para hace todo el maga cosas que quiere came hace. Justo tamen. Pero hende todo el maga cosas ta ayuda con los demas maga creyente. No pensa pirmi del bien y del ventaja lang di ustedes mismo, sino pensa tamen para el bien y el ventaja de otros.” (1 Corinto 10:23, 24, El Nuevo Testamento) Cosa el coneccion de este principio na entretenimiento que iscuji kita? Necesita tu pregunta na de tuyu mismo cuerpo, ‘Paquemodo el de mio entretenimiento puede afecta con otro?’

²¹ Posible, permiti contigo el de tuyu conciencia que participa na un forma de entretenimiento que “justo” o aceptable para contigo. Pero si ya nota tu que gendeh se aceptable con el otro hermano quien tiene mas sensitivo conciencia, baka decidi tu que evita ya lang con ese entretenimiento. Porque? Cay no quierre tu ‘peca contra con el dituyo maga hermano’​—o “peca tu contra con Cristo” como cosa ya habla si Pablo​—na manera que ta hace tu dificil para kanila esta fiel con Dios. Ta pone tu na corazon este consejo: “No hace nada que puede ofende.” (1 Corinto  8:12; 10:32, El Nuevo Testamento) El maga deverasan Cristiano ahora ta aplica con el consejo de Pablo por medio que ta evita sila el maga entretenimiento que dol “justo” pero gendeh “ta ayuda con los demas.”​—Roma 14:1; 15:1.

22. Porque el un Cristiano ta respeta con el opinion del otro maga hermano acerca na personal maga cosas?

²² Pero, tiene pa otro cosa que necesita considera si ta pensa el bien del otro. El un Cristiano que tiene mas sensitivo conciencia gendeh debe forza con otro na congregacion que sigui si cosa le ta pensa como justo entretenimiento. Si hace le se, igual lang le como un driver na highway quien ta forza con otro maga driver que sigui con ele si paquemodo de corre le ta maneja. Gendeh se razonable. Por causa na amor, el un Cristiano quien tiene mas sensitivo conciencia necesita respeta con el de suyu maga hermano quien tiene otro opinion acerca na entretenimiento que gendeh contra na maga principio de Cristiano. Na ese manera, ta dale le mira “consideracion” con otro.​—Santiago 3:17; Eclesiastes 7:16.

23. Paquemodo tu asigura que bueno el entretenimiento que ta iscuji tu?

²³ Poreso, paquemodo tu asigura que bueno el entretenimiento que ta iscuji tu? Evita con el maskin cosa clase de entretenimiento que ta dale mira maga imoral actividad que claro ta condena na Palabra del Dios. Sigui con el maga principio na Biblia que aplicable na maga entretenimiento que gendeh especifico ta condena ni ta aprova el Biblia. Evita con el entretenimiento que puede hace malo con el de tuyu conciencia y puede ofende con otro, especialmente con el de tuyu maga hermano y hermana na fe. Ojala el de tuyu decicion que hace con ese dale gloria con Dios y puede contigo y con el de tuyu familia ayuda esta na amor del Dios.