Na 1 Corinto 6:1-8, ya discuti si Pablo acerca na caso na corte entre maga hermano y hermana na fe. Triste le cay cuanto Cristiano na Corinto el ya “atrivi . . . lleva el caso na corte.” (Versiculo 1) Ya dale si Pablo valido razon si porque el maga Cristiano gendeh debe man caso na corte con uno y otro sino pricura arregla el problema adentro na congregacion. Discuti kita el cuanto maga razon si porque ya dale este consejo y despues, considera el cuanto situacion que gendeh aplicable este consejo.

Si tiene kita problema na negocio con el diaton hermano o hermana na fe, necesita kita arregla con ese na manera de Jehova, gendeh na diaton mismo. (Proverbio 14:12) Como cosa ya dale mira si Jesus, mas bueno si arregla kita dayun el problema antes de agraba este. (Mateo 5:23-26) Pero makatriste cay el cuanto maga Cristiano quierre causa peleajan y ya lleva pa gane con ese na corte. Ya habla si Pablo: “Malo ya ese cay tiene maga caso entre con ustedes.” Porque? El un importante razon amo que dale este mal reputacion con el congregacion y con el Dios con quien kita ta adora. Poreso necesita kita pensa enbuenamente el pregunta de Pablo: “Gendeh ba mas bueno era si aguanta ya lang cuando tiene ta hace malo con ustedes?”​—Versiculo 7.

Ya habla tambien si Pablo que tiene instruccion el Dios con el congregacion si paquemodo arregla el manada problema. Maga sabio Cristiano el maga anciano quien tiene saber acerca na maga verdad na Biblia y ya habla si Pablo que puede sila “arregla el maga diferencia entre maga hermano” acerca na “maga problema de este vida.” (Versiculo 3-5) Ya dale mira si Jesus que el maga serioso culpa, igual como falso acusacion o hace loco con otro, debe arregla na este proceso: una, pricura arregla na privado entre el quien envuelto; ika-dos, si nuay resulta el primer accion, lleva  uno o dos testigo; y el ika-tres, si gendeh tiene buen exito el ika-dos accion, lleva este con el maga anciano que ta representa con el congregacion.​—Mateo 18:15-17.

Siempre, gendeh este quierre decir que debe abogao o negociante el maga anciano ni debe sila actua na ese manera. Gendeh sila ta dale maga condicion que debe sigui el maga hermano para arregla con el problema na negocio. Sino, ta pricura sila ayuda con el maga hermano que aplica con el Escritura y man uyun na un solucion. Na cuanto maga complicao situacion, puede sila consulta con el circuit overseer o na branch office del maga Testigo de Jehova. Pero tiene maga situacion que gendeh aplicable el consejo de Pablo. Cosa el cuanto de este?

Na cuanto maga situacion, necesita anda na corte para formal o legal solva con el un problema na enbuenamente manera. Por ejemplo, necesita anda na corte cay este lang el manera para legal man divurcio, obtene derecho para cuida con el anak, sabe si cuanto el cantidad que debe paga despues del divurcio, ricibi pago de insurance, legaliza con el last will y otro pa. Tiene maga situacion que necesita man contra demanda el un hermano para protege con el de suyu mismo cuerpo na un caso. *

Si hace con ese maga caso na manera que nuay intencion para man peleajan, gendeh ese contra na consejo que ya dale si Pablo. * Pero siempre, el prioridad del un Cristiano amo el santificacion del nombre de Jehova y el paz y unidad na congregacion. El maga siguidores de Cristo conocido por causa na diila amor y “el amor gendeh . . . canalla.”​—1 Corinto 13:4, 5; Juan 13:34, 35.