Asegun na Biblia, cuando y porque el un Cristiano mujer debe tapa con el de suyu cabeza? Considera kita el maga inspirao palabra que ya escribi si apostol Pablo acerca con este. Ya dale le guia que necesita kita para puede hace maga justo decicion que ta honra con Dios. (1 Corinto 11:3-16) Ya revela si Pablo tres cosas que necesita considera: (1) maga actividad que donde ta necesita el un mujer tapa con el de suyu cabeza, (2) maga situacion que necesita le se hace y (3) el de suyu motivo si porque le aplica con este principio.

Maga actividad. Ya menciona si Pablo dos actividad: ta reza y ta predicta. (Versiculo 4, 5) Siempre, el rezo amo un comunicacion de adoranza con Jehova. Ahora, el maskin cosa enseñanza que base na Biblia que ta hace el un Cristiano igual como ta predicta. El palabra ba de Pablo quierre decir que el un mujer debe tapa con el de suyu cabeza si ta reza o si ta enseña le verdad na Biblia? Gendeh. Ta depende se na situacion si necesita ba le tapa con el de suyu cabeza o gendeh.

Maga situacion. El Palabra de Pablo ta dale mira dos situacion​—na familia y na congregacion. Ele ya habla: “El marido amo el cabeza del disuyo mujer; . . . el mujer quien noay velo na cabeza mientras ta reza o ta man profeta, gendeh tamen ta respeta con el disuyo cabeza.” (Versiculo 3, 5) Na familia, ya iscuji si Jehova con el marido para queda el cabeza del mujer. ​Si  gendeh conoce el mujer con el autoridad del de suyu marido, hace le huya con el de suyu marido si hace le el maga responsibilidad que ya dale si Jehova con el de suyu marido. Por ejemplo, si necesita le conduci Bible study mientras talli cerca el de suyu marido, puede le dale mira que ta conoce le el autoridad del de suyu marido si hay tapa le con el de suyu cabeza. Bautizao man o gendeh el marido, necesita le se hace cay el marido amo el cabeza del familia. * Si reza le o enseña mientras talli presente el menor de edad anak hombre que bautizao, necesita tambien le tapa con el de suyu cabeza. Necesita le se hace gendeh cay el anak amo el cabeza del familia, sino para dale mira respeto con ele como un bautizao hombre na Cristiano congregacion.

Ya menciona si Pablo el situacion si na congregacion, ele ya habla: “Si algunos quiere man discucion acerca de este, todo el que puede yo habla amo que came y todo el maga creyente del maga otro grupo nuay otro practica si ta adora con Dios, sino este solamente que ya esplica yo aqui.” (1 Corinto 11:16, El Nuevo Testamento) Na congregacion, con el maga bautizao hombre ya dale el privilegio queda cabeza. (1 Timoteo 2:11-14; Maga Hebreo 13:17) Solamente con el maga hombre ta iscuji para queda anciano y siervo ministerial con responsibilidad estaba con Dios que cuida con el de suyu maga carnero. (1 Pedro 5:1, 2) Pero tiene maga situacion que donde el un Cristiano mujer amo el quien necesita cumpli con el un trabajo de un bautizao hombre. Por ejemplo, necesita le conduci miting para na predicacion cay nuay o gendeh presente el un cualificao bautizao hombre. O ta conduci le Bible study na casa mientras presente el un bautizao hombre. * Si hace le ansina maga actividad, necesita le tapa con el de suyu cabeza para dale mira que ta cumpli le un trabajo que ya dale na maga hombre.

Pero manada maga aspeto de adoranza que donde el  un hermana gendeh necesita tapa con el de suyu cabeza. Por ejemplo, gendeh le se necesita hace si tan comento na maga miting, ta predica na ministerio junto con el de suyu marido o otro bautizao hombre, o ta estudia o ta reza junto con el de suyu gendeh pa bautizao anak. Siempre, posible tiene pa otro maga situacion puera con este y si gendeh asigurao el un hermana acerca con ese, puede le man research. * Si gendeh le siempre asigurao y el de suyu conciencia ta manda con ele move que hace se, gendeh malo tapa con el cabeza como cosa puede mira na letrato.

El motivo. Na versiculo 10, puede kita sabe el dos razon si porque el un Cristiano mujer hay tapa con el de suyu cabeza: “Para respeta con el maga angel, el maga mujer necesita pone na diila maga cabeza un señal de sumision.” Una, nota con el maga palabra, “un señal de sumision.” Cosa se quierre decir? Si el un Cristiano mujer ta tapa con el de suyu cabeza, ta dale le mira que ta conoce le con el autoridad que ya dale si Jehova na maga bautizao hombre na congregacion. Na ese manera, ta dale le mira el de suyu amor y lealtad con Dios Jehova. El segundo razon amo que ‘para con el maga angel.’ Cosa el efecto na maga angel si el un mujer ta tapa con el de suyu cabeza?

Interesao el maga angel mira que el entero organizacion de Jehova—na cielo y na tierra—ta conoce con el autoridad del Dios. Ta beneficia tambien sila na maga buen ejemplo del maga imperfecto gente acerca na este cosa. Cay maskin sila necesita somete na arreglamiento de Jehova—un cosa que nuay puede hace el cuanto maga angel de antes. (San Judas 6) Posible puede mira el maga angel con el un Cristiano mujer ahora que mas experienciao, mas manada cosa sabe y mas inteligente  que con el un bautizao hombre na congregacion; pero, alegre le dale mira que ta somete le na autoridad del hermano. Na cuanto situacion, un iscujido Cristiano el mujer. Gendeh dura hay obtene le mas alto posicion que con el maga angel y rula junto con el Cristo na cielo. Que bien bonito ejemplo que puede nota el maga angel ahora! Asigurao, un grande privilegio para na todo maga hermana que demonstra el diila humildad y obediencia adelante del millones de fiel angel, si sila leal y ta somete na autoridad!