El masturbacion amo un vicio que ta hace malo con el espiritualidad y ta hace buling con el pensamiento. * El quien ta hace con ese ta pensa lang con el de suyu mismo cuerpo y ta mira con otro como manera para satisfecha de suyu deseo na sexo. Para con ele el sexo gendeh mas un expresion del amor sino un cosa lang que ta dale con ele unrato alegria y alivio. Pero ese alivio, temporario lang. El deverasan, en vez de mata con el maga parte del cuerpo “como el maga immoralidad, maga cuchinadas, maga deseo,” el masturbacion mas ta dale gana con ese.—Colosa 3:5.

Si apostol Pablo ya escribi: “Limpia kita todo mancha na diaton cuerpo o espiritu, y por causa del miedo con el Dios, queda kita santo [sagrao, NW] gayot.” (2 Corinto 7:1) Si tan dificil tu aplica con ese, no pensa que nuay mas ya tu esperanza. Si Jehova pirmi “preparao perdona” y ayuda contigo. (Salmo 86:5; Lucas 11:9-13) El deverasan, si tan conciencia tu y ta hace esfuerzo para descanza ese vicio—maskin tiene vez ta puede tu siempre hace con ese—ta indica se que tiene tu buen custumbre. Acorda pirmi que “el Dios alto pa con el diaton conciencia y Ele sabe gayot todo.” (1 San Juan 3:20) Gendeh lang el diaton culpa ta mira el Dios sino ta mira le si cosa kita clase de gente. Ciendo sabe le todo acerca kanaton, hay oi le con el diaton sincero maga  rezo. Poreso, no gayot descanza reza con humildad igual con el bata que ta atraca con el tata si tiene problema. Si Jehova hay dale contigo un limpio conciencia. (Salmo 51:1-12, 17; Isaias 1:18) Siempre, necesita tu hace dayun maga accion harmonia na de tuyu maga rezo. Por ejemplo, pricura tu evita con el todo clase de pornografia y maga mal asociacion. *

Si tan dificil siempre tu acerca na masturbacion, pabor man cuento acerca con ese na de tuyu Cristiano mayores o na amigo o amiga que mature na espiritual. *—Proverbio 1:8, 9; 1 Tesalonica 5:14; Tito 2:3-5.