1, 2. Cosa kita necesita hace para queda mafuerza y tiene buen salud y porque se importante?

TODO kita quierre queda mafuerza y tiene buen salud. Posible se si come kita sustancioso comida, man ejercicio y pirmi cuida con el diaton salud. Maskin pa ta necesita esfuerzo, ta hace kita se cay ta afecta se na diaton vida y futuro. Pero tiene pa otro cosa que necesita kita dale atencion. Cosa se?

² El dicipulo Judas ya menciona acerca con ese cuando ya anima le con el maga Cristiano: “Esta ustedes na amor de Dios.” Ya habla tambien le si cosa el necesita para puede se hace: “Crici na de ustedes fe.” (San Judas 20, 21) Cosa tu puede hace para queda mas fuerte el de tuyu fe y esta na amor del Dios? Discuti kita el tres aspeto que necesita kita dale atencion.

3-5. (a) Cosa si Satanas quierre que pensa tu acerca con el maga ley del Dios? (b) Paquemodo kita debe mira con el maga mandamiento del Dios y cosa debe el efecto de ese kanaton? Ilustra.

³ Una de con todo, necesita kita hace fuerte con el diaton fe na maga ley del Dios. Mientras ta estudia tu con este libro, ya puede tu considera el cuanto maga mandamiento de Jehova acerca si paquemodo kita actua. Paquemodo tu ta mira con ese? Quierre si Satanas engaña contigo para pensa tu que el maga ley y principio de Jehova bien istricto y por demas. Ta usa le con ese tactica desde na tiempo pa  na Eden y ese bien efectivo. (Genesis 3:1-6) Puede ba tambien le engaña contigo? Ta depende se si paquemodo tu ta mira con el maga cosas.

⁴ Considera este: Mientras ta camina tu na un parque, ya mira tu un alto corral que ta tranca con el un parte del parque. Dol bale gayot quel lugar. Na primero, baka pensa tu que sanggadura lang quel corral. Pero cuando ya mira tu si cosa tiene adentro, ya puede tu nota con el un leon que ta vicia con quien puede ataca! Por causa con ese, ya puede tu realiza que un proteccion aquel corral. Tiene ba quien quierre ataca contigo ahora? El Palabra del Dios ta dale aviso: “Esta alerto y bicia cay el de ustedes contrario, el demonio, ta man libut-libut alrededor de ustedes igual como un leon que ta gruñi mientras ta busca con quien puede come.”​—1 Pedro 5:8.

⁵ Si Satanas igual con el un violente leon. Ciendo no quierre si Jehova que queda kita victima de Satanas, ya establicia Ele maga ley para protege kanaton desde na de suyu “maga ataque.” (Efeso 6:11) Poreso cada vez medita kita con el maga ley del Dios, debe kita pensa que ya dale se el diaton Tata cay ta ama le kanaton. Si ese el cosa na diaton pensamiento, el maga ley del Dios puede kanaton dale seguridad y alegria. Si Santiago ya escribi: “Alegre gayot el gente quien ta mira fijo con el Ley perfecto del libertad y ta continua queda fiel con ese.”​—Santiago 1:25.

6. Cosa el de con todo buen manera para hace fuerte con el diaton fe na maga ley y principio del Dios? Dale ejemplo.

⁶ El de con todo buen manera para hace fuerte con el diaton fe con Dios y diaton confianza na de suyu maga ley amo que vivi harmonia na de suyu maga mandamiento. Por ejemplo, incluido na “Ley de Cristo” el mandamiento de Jesus que enseña con otro ‘todo el que ya manda le.’ (Galacia 6:2; Mateo 28:19, 20) Ta sigui tambien el maga Cristiano con el mandato que man junto para na  adoranza y anima con uno’y otro. (Maga Hebreo 10:24, 25) Como parte tambien del mandamiento del Dios, ta anima kanaton que reza pirmi con Jehova con todo corazon. (Mateo 6:5-8; 1 Tesalonica 5:17) Mientras ta vivi kita harmonia con ese maga mandamiento, mas claro kita ta puede mira que amable guia este para kanaton. Si ta obedece kita con ese, puede kita queda alegre y contento, cosas que gendeh kita puede experiencia na este mundo que trambulicao. Mientras ta medita tu si paquemodo tu ya beneficia na maga ley del Dios, gendeh ba mas ta queda fuerte el de tuyu fe con ese?

7, 8. Paquemodo el Palabra del Dios ta dale asiguranza con aquellos tan lingasa que baka gendeh sila puede esta obediente con Dios mientras ta pasa el maga año?

⁷ Tiene vez, tan lingasa el cuanto que hay man dificil sila esta obediente na maga ley de Jehova mientras ta pasa el maga año. Tiene sila miedo que baka gendeh sila esta fiel. Si ya puede tu sinti ansina, pone este na de tuyu pensamiento: “Yo, si Jehova, el de tuyu Dios, el Quien ta enseña contigo para na de tuyu mismo beneficio, el Quien ta guia contigo na camino que onde tu debe pasa. Si pone lang tu atencion con el de mio maga mandamiento, el de tuyu paz  hay queda como igual na un rio y el de tuyu justicia hay queda igual na maga marijada del mar.” (Isaias 48:17, 18) Ya puede ba tu pensa si paquemodo ese maga palabra ta anima kanaton?

⁸ Ta hace kanaton acorda si Jehova na ese texto que kita mismo beneficia si hay obedece kita con ele. Ya promete le dos bendicion si hace kita se. Una, el diaton paz hay queda igual como rio​—calma, abundancia y nuay descanso. Segundo, el diaton justicia hay queda igual como marijada del mar. Si para tu na aplaya y mira con el maga marijada, asigurao puede tu sinti que permanente se. Sabe tu que gendeh descanza el maga marijada hasta para cuando. Si Jehova ta habla que el de tuyu justicia​—de tuyu hacida si cosa el justo​—hay queda igual con ese. Mientras ta pricura tu esta fiel con ele, gendeh le contigo deja! (Le con el Salmo 55:22.) Gendeh ba ese promesa ta hace fuerte con el de tuyu fe con Jehova y na de suyu maga mandamiento?

9, 10. (a) Porque un bonito goal para maga Cristiano que queda mature na espiritual? (b) Paquemodo el espiritual mirada ta puede kanaton ayuda queda alegre?

⁹ Ika-dos, necesita kita queda “maga gente grande” o mature na espiritual. (Maga Hebreo 5:14; 6:1) El un bonito goal para na un Cristiano amo queda mature na espiritual. Gendeh puede queda perfecto el maga gente ahora pero puede sila queda mature. Mas pa, el maga Cristiano ta tiene mas grande alegria mientras ta progresa sila na espiritual. Porque?

¹⁰ Un espiritual persona el un mature Cristiano. Ta mira le con el maga cosas asegun na mirada de Jehova. (Juan 4:23) Si Pablo ya escribi: “Aquellos ta vivi asegun con el mal naturaleza del cuerpo ta desea con el maga cosa-cosa lang del cuerpo. Pero aquellos ta vivi asegun con el Espiritu ta desea el maga cosa-cosa del Espiritu.” (Roma 8:5) El mirada que  asegun na laman ta resulta na diutay alegria cay este centro na mismo cuerpo, material cosas y na presente cosas lang. El espiritual mirada ta resulta na grande alegria cay tan centro este con Jehova, “el alegre Dios.” (1 Timoteo 1:11, NW) El un espiritual persona bien quierre gayot hace alegre con Jehova maskin ta experiencia dificultad. Porque? Cay el maga dificultad ta dale con ele oportunidad para dale prueba que imbustero si Satanas y ta hace este fuerte con el de suyu integridad. Como resulta, ta hace se alegre con el diaton Tata na cielo.​—Proverbio 27:11; le con el Santiago 1:2, 3.

11, 12. (a) Cuando ya menciona si Pablo acerca “si paquemodo distingui el bueno y malo,” cosa quierre decir del palabra que yan translate “ya enseña”? (b) Cosa clase de training el necesita el un diutay bata y el gymnast?

¹¹ Necesita training el un persona para queda mature na espiritual. Considera este versiculo: “El comida duro para del maga gente grande, para de aquellos con quien el experiencia ya insiña si paquemodo distingui el bueno y malo.” (Maga Hebreo 5:14) Cuando ya menciona si Pablo que el experiencia ‘ta enseña’ kanaton para puede distingui el bueno y malo, ya usa le un Griego palabra que puede man translate ‘man train igual como un gymnast.’ Pensa si cosa envuelto na ese training.

¹² Cuando ya nace kita, gendeh pa kita ta puede controla con el diaton cuerpo. Por ejemplo, el un diutay bata gendeh pa tanto ta puede controla con de suyu brazo y pierna. Poreso, si ta hace move el bata el de suyu brazo, tiene vez ta tupa este na de suyu cara y ele mismo ta estraña. Gendeh dura cay ta usa le con el maga parte del cuerpo, hinay-hinay ya le puede controla con este. El un diutay bata tan camang, pasa el cuanto tiempo ta puede ya le camina y na uliji ta puede ya le corre. Pero, quetal el un gymnast? Si ta puede tu mira ansina clase de atleta que bien bueno y na exacto posicion ta salta y despues tan bira-bira na aire, asigurao puede tu  pensa que bien experienciao ese atleta. Gendeh dayun lang ta tiene abilidad el un gymnast​—manada hora el necesita para man train. Asegun na Biblia, “bueno” ese clase de actividad. Pero, mas bueno pa gayot si enseña kita con el diaton mismo cuerpo si paquemodo mira si cosa el bueno y malo!​—1 Timoteo 4:8.

13. Cosa kanaton puede ayuda para conoce kita si cosa el justo y el gendeh?

¹³ Na este libro, manada kita cosa ya discuti que puede contigo ayuda si paquemodo mira si cosa el bueno y malo. Como resulta, puede tu esta fiel con Jehova como un espiritual persona. Antes tu de hace maga decicion cada dia, considera con el maga principio y maga ley del Dios. Na cada decicion que hace tu, pregunta este na de tuyu mismo cuerpo: ‘Cosa maga ley o principio na Biblia el aplicable na este situacion? Paquemodo yo con este aplica? Cosa puede hace alegre con Jehova?’ (Le con el Proverbio 3:5, 6; Santiago 1:5.) El cada decicion que hace tu harmonia na Biblia hay ayuda contigo para mas conoce si cosa el justo y el gendeh. Ese clase de training hay ayuda contigo queda y esta un deverasan espiritual persona.

14. Cosa kita necesita hace para progresa na espiritual y cosa kita necesita pirmi acorda?

¹⁴ Maskin pa el un persona mature ya na espiritual puede siempre le continua progresa. Necesita comida para engranda. Si Pablo ya habla: “El comida duro para del maga gente grande.” Para queda fuerte el de tuyu fe, necesita tu continua come espiritual comida. Si ta aplica tu na justo  manera el cosa tu ta aprende, sabeduria se y el Biblia ta habla: “El sabeduria amo el de con todo importante cosa.” Poreso, necesita kita tiene deseo na maga precioso verdad que ta dale el diaton Tata. (Proverbio 4:5-7; 1 Pedro 2:2) Siempre gendeh kita pensa que mas bueno kita con otro cay manada kita cosa sabe. Necesita kita examina pirmi con el diaton mismo cuerpo para gendeh crici na diaton corazon el orgullo o otro maga mal inclinacion. Si Pablo ya escribi: “Examina el de ustedes cuerpo y mira si ta esta ustedes na fe. Pruba el de ustedes cuerpo.”​—2 Corinto 13:5.

15. Porque importante el amor para progresa na espiritual?

¹⁵ Maskin pa mafuerza y tiene buen salud el un persona, necesita siempre le come y cuida con el de suyu mismo cuerpo. Cosa kita necesita para queda mature y puede mentena con el diaton espiritualidad? Una de con todo, necesita el amor. Necesita kita continua hace fuerte con el diaton amor con Jehova y con el diaton maga hermano y hermana na fe. Si nuay kita amor, no vale nada el diaton saber y maga cosas que ta hace kita. (1 Corinto 13:1-3) Por medio na amor, puede kita queda un mature Cristiano y continua progresa na espiritual.

16. (a) Cosa clase de pensamiento quierre si Satanas que tiene kita? (b) Cosa defensa ya dale kanaton si Jehova?

¹⁶ Ika-tres, necesita kita hace centro el diaton pensamiento na esperanza que ta dale si Jehova. Para puede se hace, necesita kita vicia con el manera si paquemodo kita ta pensa. Si Satanas el quien ta rula con este mundo, bien bueno engaña con el maga gente para tiene sila negativo pensamiento, perde confianza y esperanza. (Efeso 2:2) Peligroso ese clase de pensamiento para na un Cristiano igual con el buluk tabla na un casa de palo. Bueno ya lang ya dale kanaton si Jehova un defensa​—esperanza.

17. Paquemodo el Palabra del Dios ta dale mira que importante el esperanza?

 ¹⁷ Ya menciona na Biblia el diferente parte del espiritual armadura que necesita kita para puede resisti con Satanas y con este mundo. El un importante parte del armadura amo el helmet, “el esperanza del salvacion.” (1 Tesalonica 5:8) Na tiempo del Biblia, sabe el un soldao que gendeh le tarda na guerra si nuay le helmet. Mas mucho, hacido este de metal que tiene grueso clase de tela o cuero adentro. Por medio na helmet, protegido el cabeza na golpe. Igual si paquemodo el helmet ta protege con el cabeza, el esperanza tambien puede protege con el de tuyu pensamiento.

18, 19. Porque si Jesus un buen ejemplo quien ya mentena el de suyu esperanza y paquemodo kita puede imita con ele?

¹⁸ Ya dale buen ejemplo si Jesus si paquemodo mentena con el esperanza. Acorda si cosa le ya experiencia na de suyu ultimo noche aqui na tierra. Un amigo de suyu yan traidor con ele por causa na sen. El otro amigo de suyu ya desconoce con ele. El otro ya abandona con ele. El maga gente na de suyu lugar yan contra con ele y ta pidi que muri le na estaca na mano del maga Romano soldao. Asigurao que mas pesao el probanza que ya enfrenta si Jesus compara na cosa kita hay enfrenta. Cosa ya puede ayuda con ele? El Biblia ta habla: “Nuay ele man atras de sacrificar el di suyo vida . . . cay sabe le ay tene le grande alegria despues. Poreso ahora talla ya le sentao na lao derecha del trono de Dios.” (Hebreo 12:2, El Nuevo Testamento) Nuay perde na pensamiento de Jesus el “grande alegria despues.”

¹⁹ Cosa alegria el ta espera con Jesus? Sabe le que si esta le fiel, puede le ayuda santifica con el sagrao nombre de Jehova. Puede le dale el de con todo grande prueba que imbustero si Satanas. Nuay otro esperanza que puede dale mas alegria con Jesus! Sabe tambien le que hay bendici gayot con ele si Jehova cay ya esta le fiel​—man junto le otravez con el de suyu Tata na cielo. Nuay perde na pensamiento  de Jesus ese esperanza na maga tiempo de dificultad. Ansina tambien el cosa kita necesita hace. Tiene tambien kita esperanza na futuro. Ya dale kanaton si Jehova el privilegio que ayuda santifica con el de suyu nombre. Si iscuji kita con Jehova como el diaton Soberano y esta na de suyu amor maskin cosa probanza y tentacion kita enfrenta, puede kita dale prueba que imbustero si Satanas.

20. Cosa puede ayuda contigo para mentena el de tuyu positivo pensamiento y esperanza?

²⁰ Gendeh lang basta conforme si Jehova bendici con el de suyu maga fiel siervo, sino bien quierre gayot le se hace. (Isaias 30:18; le con el Malaquias 3:10.) Alegre le dale el justo cosa que ta desea el de suyu maga siervo. (Salmo 37:4) Poreso continua hace centro el de tuyu pensamiento na de tuyu esperanza. No permiti que influencia contigo el negativo y gendeh justo pensamiento del mundo de Satanas. Si ta puede tu sinti que el espiritu de este mundo hinay-hinay ya ta penetra na de tuyu pensamiento y corazon, reza con Jehova que dale contigo “el paz del Dios.” Ese paz hay guarda con el de tuyu corazon y pensamiento.​—Filipo 4:6, 7.

21, 22. (a) Cosa bonito esperanza tiene aquellos parte del “grande grupo”? (b) Cosa esperanza el de con todo quierre tu y cosa el de tuyu determinacion?

²¹ Que bien bonito esperanza que puede tu medita! Si  parte tu del “grande grupo” quien hay sobrevivi na “grande tribulacion,” pensa si cosa clase de vida tu hay tiene na futuro. (Revelacion 7:9, 14, NW) Si nuay mas si Satanas y el de suyu maga demonio, hay sinti tu el alivio que posible dificil imagina ahora. Quien ba kanaton ahora el ya experiencia ya vida que nuay influencia de Satanas? Si nuay mas ya el mal influencia de Satanas, hay queda gayot kita bien alegre mientras ta ayuda kita hace paraiso con el tierra bajo na guia de Jesus y del 144,000 quien hay rula junto con ele! Bien quierre ya gayot kita mira con el cumplimiento del promesa que hay quita con el todo enfermedad y diferencia na cuerpo, resucita con aquellos con quien kita ta ama y vivi na manera que el Dios quierre! Mientras hinay-hinay kita ta queda perfecto, tiene pa otro bendicion que hay obtene kita​—el promesa que el Roma 8:21 ta revela, “participa na libertad y na gloria del maga anak del Dios.”

²² Quierre si Jehova que tiene tu libertad mas pa na cosa tu puede imagina. Para obtene con ese, necesita tu queda obediente. Gendeh ba justo lang que hace tu esfuerzo obedece con Jehova cada dia? Entonces, continua hace fuerte con el de tuyu fe para puede tu esta na amor del Dios hasta para cuando!