1, 2. (a) Cosa precioso regalo kita ya ricibi estaba con Dios? (b) Porque importante ahora que puede kita entende con el maga principio na Biblia?

YA DALE kanaton el diaton Tata na cielo un bien precioso regalo​—el diaton vida como maga inteligente gente quien ta puede imita con el de suyu maga calidad. (Genesis 1:27) Por causa con ese regalo, puede kita entende si paquemodo beneficia na maga principio na Biblia. Si aplica kita con ese, queda kita mature na espiritual quien ta ama con Jehova y sabe “si paquemodo distingui el bueno y el malo.”​—Maga Hebreo 5:14.

² Importante gayot que puede kita entende con el maga principio na Biblia cay el mundo ahora bien complicao y imposible tiene ley que puede aplica na todo situacion. Deverasan este na aspeto del curada especialmente na maga producto y proceso que envuelto el sangre. Importante este para con todo quien quierre obedece con Jehova. Pero si ta entende kita con el maga principio na Biblia que aplicable na este situacion, puede kita hace maga justo decicion que uyun na diaton conciencia y ayuda kanaton esta na amor del Dios. (Proverbio 2:6-11) Considera el cuanto de este maga principio.

3, 4. Cuando el primer vez que ya menciona na Escritura que sagrao el sangre y base se na cosa maga principio?

³ Despues mata si Cain con Abel, ya revela si Jehova por primer vez el coneccion del vida na sangre y si paquemodo  este de sagrao. “Oi!” ya habla el Dios con Cain. “Ta grita conmigo el sangre del de tuyu hermano estaba na tierra.” (Genesis 4:10) Na ojos de Jehova, el sangre de Abel ta representa con el de suyu vida que ya termina si Cain. Poreso, puede kita habla que ta grita el sangre de Abel con Dios que vengga para con ele.​—Maga Hebreo 12:24.

⁴ Despues del Avenida na tiempo de Noe, ya permiti el Dios con el maga gente come carne de animal puera con el sangre. Ya habla el Dios: “No ustedes come con el carne que tiene sangre, cay el sangre amo el vida. Puera con ese, responsable conmigo el quien hace derrama el sangre del de ustedes vida.” (Genesis 9:4, 5) Aplicable este mandamiento na todo descendiente de Noe hasta na diaton tiempo ahora. Ta hace este claro con el maga principio que puede mira na cosa ya habla el Dios con Cain​—que el sangre ta representa con el vida del todo creatura. Ta dale tambien este prueba que hay castiga si Jehova, el Tuburan del vida, con todo maga gente quien gendeh ta trata como sagrao el vida y sangre.​—1 Timoteo 6:13.

5. Base na ley que ya dale con Moises, paquemodo ya dale mira que sagrao y precioso el sangre?

⁵ Puede mira con este dos principio na ley que ya dale con Moises. El Levitico 17:10, 11 ta habla: “Si maskin quien gente . . . come maskin cosa clase de sangre, gendeh gayot yo con ele acepta y termina con ele entre na de suyu maga gente. El vida del carne talli na sangre y iyo mismo ya dale con este na altar para hace ustedes el tapada del de ustedes culpa, cay el sangre amo ta tapa con el culpa.” *—Mira con el cajon “ El Sangre Puede Tapa con el Culpa.”

6. Antes de come con el animal que ya mata, porque importante hace derrama enbuenamente con el sangre de este na tierra? (Mira tambien con el cajon “ Dale Valor Con El Vida Del Animal.”)

 ⁶ Si gendeh usa na altar con el sangre del animal que ya mata, necesita con este hace derrama na tierra. Na simbolico manera, ya devolve con el vida na original Dueño de este. (Deuteronomio 12:16; Ezequiel 18:4) Pero, gendeh se quierre  decir que el maga Israelita necesita hace el todo manera para quita con el todo rastro del sangre na carne del animal. Basta ya mata sila enbuenamente con el animal y ya hace derrama el sangre de este, puede sila come con este con limpio conciencia. Por medio con ese, ta dale sila mira respeto con el quien ta dale vida.

7. Paquemodo ya dale mira si David que sagrao para con ele el sangre?

⁷ Si David, un gente con quien el Dios “ya gusta gayot,” ya entende con el maga principio na ley del Dios acerca na sangre. (Maga Actividad 13:22) Un dia cuando bien con sequia le, tres na de suyu maga soldao el ya forza entra na campo del contrario, ya saca agua na pozo y ya lleva este con ele. Cosa el reaccion de David? “Debe ba yo toma el sangre del maga gente quien ya anda pone na peligro el diila vida?” ya pregunta le. Para con David, si toma le con el agua igual lang ya toma le el sangre del de suyu maga soldao. Poreso maskin bien con sequia, si David “ya vacia con este para con Jehova.”​—2 Samuel 23:15-17.

8, 9. Ya cambia ba el mirada del Dios na vida y sangre cuando ya establicia el congregacion del maga Cristiano? Explica.

⁸ Maga 2,400 año despues del ley que ya dale con Noe acerca na sangre y maga 1,500 año despues del ley que ya dale con Moises, ya guia si Jehova con el cuerpo gobernante del Cristiano congregacion del primer siglo para escribi: “Ya decidi came y el Espiritu Santo no mas omenta otro carga con ustedes, fuera lang este maga bien importante: No ustedes come maga cosa-cosa que ya ofrece como sacrificio con el maga dios-dios, no come [evita, NW] sangre o maga animal que ya hace cuga y no comete immoralidad.”​—Maga Actividad 15:28, 29.

⁹ Claro que el cuerpo gobernante del primer siglo ya entende que sagrao el sangre y el gendeh justo usada de este igual lang como ta comete idolatria o sexual imoralidad. El maga verdadero Cristiano ta sigui con ese. Y ciendo ta aplica sila maga principio na Biblia, ta puede sila hace alegre con Jehova na diila decicion acerca na usada de sangre.

10, 11. (a) Cosa el mirada del maga Testigo de Jehova con el abonada del puro sangre y del cuatro importante parte de este? (b) Cosa maga situacion que diferente el opinion del maga Cristiano acerca na sangre?

¹⁰ Ta entende el maga Testigo de Jehova que el mandato ‘evita con el sangre’ quierre decir que no abona sangre y no dona o hace pondo con el diila mismo sangre. Cay ta respeta sila con el ley del Dios, gendeh tambien sila ta acepta con el cuatro importante parte del sangre: colorao celula, blanco celula, plasma y platelet.

¹¹ Ahora por medio na mas manada proceso, el cuatro importante parte del sangre ta puede pa dividi na mas diutay parte que ta usa na diferente manera. Acepta ba el un Cristiano con ese mas diutay parte del sangre o blood fraction? Ta mira ba le se como “sangre”? Cada uno kanaton debe decidi acerca  con ese. Aplicable tambien se na maga proceso de curada igual na hemodialysis, hemodilution y cell salvage donde envuelto el diaton mismo sangre basta nuay con este hace pondo.​—Mira con el articulo “Maga Blood Fraction y Maga Manera de Operacion” na Appendix.

12. Paquemodo kita debe mira con el maga decicion que ta depende na conciencia y cosa kita hace si enfrenta ansina situacion?

¹² Acerca na maga personal decicion, importante ba con Jehova si cosa kita iscuji? Si, cay bien interesao le na diaton maga pensamiento y motivo. (Le con el Proverbio 17:3; 24:12.) Poreso despues kita pidi guia con Jehova na rezo y man research acerca maga producto o proceso de curada, debe kita sigui con el diaton conciencia. (Roma 14:2, 22, 23) Siempre, gendeh debe forza el otro que sigui kita con el diila decicion. Gendeh tambien kita debe pregunta, “Cosa tu hace si tu na de mio situacion?” Cada Cristiano “necesita carga con el disuyo problema personal” o responsibilidad. *​—Galacia 6:5; Roma 14:12; mira con el cajon “ Sagrao ba Para Conmigo el Sangre?”

13. Cosa ta revela el maga ley y principio de Jehova acerca con ele? Dale ejemplo.

¹³ El maga ley y principio na Biblia ta revela que si Jehova un sabio Dios quien ta dale ley y un amable Tata quien interesao gayot na bien del de suyu maga anak. (Salmo 19:7-11) Ya manda le que evita kita con el sangre cay sagrao este. Pero tiene pa otro beneficio si evita kita con ese. Por ejemplo, puede kita evita maga enfermedad que puede saca si ta abona sangre. (Maga Actividad 15:20) Gane para con el manada doctor, el operacion que gendeh ta usa sangre amo el de con todo buen manera de curada. Para na maga verdadero Cristiano, ta dale lang se prueba que el sabeduria y amor de Jehova nuay onde puede compara.​—Le con el Isaias 55:9; Juan 14:21, 23.

14, 15. (a) Na cosa maga ley puede mira el amor del Dios para na de suyu maga siervo? (b) Paquemodo tu aplica con el maga principio acerca na seguridad?

 ¹⁴ El amor de Jehova para na de suyu maga siervo na Israel de antes puede mira na maga ley que ya dale le. Por ejemplo, ya manda le con el maga Israelita que pone barandilla na techo del diila casa para evita accidente ciendo manada actividad ta hace alla. (Deuteronomio 22:8; 1 Samuel 9:25, 26; Nehemias 8:16; Maga Actividad 10:9) Ya manda tambien el Dios que guarda enbuenamente con el diila maga toro. (Exodo 21:28, 29) Si ignora sila con ese maga mandato, ta dale sila mira que nuay sila queber na bien del otro y culpable sila si tiene quien ya muri.

¹⁵ Paquemodo tu aplica con el maga principio na ese maga ley? Pensa el condicion del de tuyu vehiculo, manera de manejada, maga animal, casa, lugar de trabajo y de tuyu entretenimiento. Na otro maga lugar, accidente el causa del manada muerte del maga jovenes cay ta pone sila na peligro el diila vida. Pero el maga jovenes quien quierre esta na amor del Dios ta mira que valoroso el vida y ta evita maga peligroso actividad. Ta pensa sila que maskin joven pa sila, posible siempre sila desgracia. Poreso, ta protege sila diila cuerpo y gendeh ta pone na peligro el diila vida.​—Eclesiastes 11:9, 10.

16. Cosa maga principio na Biblia el aplicable na aborcion? (Mira tambien con el footnote.)

¹⁶ Precioso con Dios maskin el vida del bata que nuay pa nace. Na Israel del antes, si tiene quien ya hace sinti duele con el priñada y ya muri el nana o el bata, para con Dios aquel persona un criminal y debe le paga “vida para na vida.” * (Le con el Exodo 21:22, 23.) Imagina si cosa ta sinti si Jehova si ta mira le que bien manada bata el ta muri cada año por  medio na aborcion para lang na personal interes y imoralidad!

17. Paquemodo tu dale comforta con el un persona quien ya comete aborcion antes de sabe con el maga principio del Dios?

¹⁷ Paquemodo si el un mujer ya comete aborcion antes de  sabe con el verdad na Biblia? Quierre decir ba que gendeh con ele perdona el Dios? El un persona quien deverasan ya arripinti puede confia que perdona con ele si Jehova base na sangre de Jesus. (Salmo 103:8-14; Efeso 1:7) Si Cristo mismo ya habla: “Noay Yo vene para llama con el maga gente noay culpa para arripinti, sino con el maga pecador.”​—Lucas 5:32.

18. Paquemodo ya identifica el Biblia con el razon del bien manada matanza?

¹⁸ Puera que gendeh kita hace sinti duele con otro, quierre tambien si Jehova que elimina kita na diaton corazon el rabia​—el causa del bien manada matanza. “Si tiene ta odia con su hermano o hermana, ele un criminal,” ya escribi si apostol Juan. (1 San Juan 3:15) Ese persona gendeh lang basta no quierre con el de suyu hermano sino ta roga le que muri este. Dale le mira de suyu rabia por medio na maga imbusterias o mal acusacion contra con el de suyu hermano y si deverasan el de suyu acusacion hay resulta se na juzgamiento de Jehova. (Levitico 19:16; Deuteronomio 19:18-21; Mateo 5:22) Entonces, bien importante que hace kita manera para quita el rabia que ta existi na diaton corazon!​—Santiago 1:14, 15; 4:1-3.

19. Paquemodo mira el un persona quien ta sigui na maga principio del Biblia con el Salmo 11:5 y Filipo 4:8, 9?

¹⁹ Aquellos quien ta mira que valoroso el vida igual con Jehova y quierre esta na de suyu amor ta evita con el todo forma de violencia. El Salmo 11:5 ta habla: “Ta odia le con maskin quien ta ama con el violencia.” Este texto gendeh lang ta habla si cosa el personalidad del Dios; ta contene este principio que puede kanaton guia. Manda este move con aquellos quien ta ama con Dios que evita el maskin cosa forma de entretenimiento que ta dale mira violencia. Ciendo si Jehova amo “el Dios de paz,” manda tambien se move con el de suyu maga siervo que pone na diila pensamiento y corazon el maga cosas amable, bueno y ta resulta na paz.​—Le con el Filipo 4:8, 9.

20-22. Cosa el posicion del maga Cristiano na mundo y porque?

²⁰ Na ojos del Dios, el entero mundo de Satanas culpable na muerte del manada gente. El sistema de politica que ya representa como maga violente animal na Escritura ya mata millones de maga gente incluido el manada siervo de Jehova. (Daniel 8:3, 4, 20-22; Revelacion 13:1, 2, 7, 8) El negocio y ciencia ta coopera con este para hace maga armas y tiene grande ganancia. Deverasan gayot que “el entero mundo talli na poder del demonio”!​—1 San Juan 5:19.

²¹ Ciendo “gendeh del mundo” el maga siguidores de Jesus y ta esta neutral na politica y guerra, ta puede sila evita comete culpa de sangre y queda envuelto na culpa del maskin cosa organizacion quien culpable na muerte del manada gente. * (Juan 15:19; 17:16) Igual con Jesus, gendeh sila tan balus si ta persigui kanila. Sino, ta dale sila mira amor con el diila  enemigo y ta reza pa gane para kanila.​—Mateo 5:44; Roma 12:17-21.

²² Mas pa, ta evita el maga verdadero Cristiano queda envuelto na “Grande Babilonia,” el imperio del falso religion y el de con todo culpable na muerte del otro. El Palabra del Dios ta habla: “Ya encontra alli con ele el sangre del maga profeta y del maga santo [sagrao, NW] y de todo aquellos con quien ya mata aqui na mundo.” Poreso ya manda kanaton: “Sale ustedes afuera del ciudad, maga gente dimio.”​—Revelacion 17:6; 18:2, 4, 24.

23. Cosa quierre decir que sale na Grande Babilonia?

²³ Para deja con el Grande Babilonia, gendeh lang se quierre decir que gendeh mas queda miembro de ese. Ta inclui tambien este que odia con el maga mal practica que ta consinti o ta acepta el falso religion​—igual na imoralidad, queda envuelto na politica y el deseo queda rico. (Le con el Salmo 97:10; Revelacion 18:7, 9, 11-17) Este maga mal practica ta resulta na matanza!

24, 25. (a) Paquemodo puede ricibi lastima del Dios el un persona quien ya arripinti maskin pa culpable le na sangre? (b) Ta manda se kanaton acorda el cosa provision na tiempo del Biblia?

²⁴ Antes del diaton dedicacion y bautismo, cada uno kanaton ya suporta con el sistema de Satanas poreso ya queda kita culpable na sangre. Pero ciendo ya cambia kita el diaton conducta, ya demonstra fe na rescate de Cristo y ya dedica el diaton vida con Dios, ya ricibi kita el lastima y espiritual proteccion del Dios. (Maga Actividad 3:19) Ta hace se kanaton acorda acerca na maga ciudad de refugio na tiempo del Biblia.​—Numero 35:11-15; Deuteronomio 21:1-9.

²⁵ Cosa el proposito de este? Si el un Israelita gendeh intencional ya causa con el muerte del un persona, necesita le anda na uno del maga ciudad de refugio. Despues hace decicion el maga cualificao juez, aquel persona necesita esta na ciudad de refugio hasta na muerte del alto sacerdote. Despues, puede ya le queda maskin onde. Claro este ta dale mira el lastima del Dios y si paquemodo de valoroso con ele el vida del gente!  Igual con aquel maga ciudad de refugio de antes, tiene provision el Dios ahora que base na rescate de Cristo para protege kanaton desde na muerte si gendeh kita intencional ya viola con el maga mandamiento del Dios acerca na sangre y vida. Ta aprecia ba tu con ese provision? Paquemodo tu demonstra que ta aprecia tu? Un manera amo que invita con otro que acepta con el proteccion del Dios, especialmente que bien cerca ya el “grande tribulacion.”​—Mateo 24:21, NW; 2 Corinto 6:1, 2.

26-28. (a) Na cosa manera el diaton situacion ahora semejante na tiempo de profeta Ezequiel? (b) Paquemodo kita esta na amor del Dios?

²⁶ El situacion del maga siervo del Dios na diaton tiempo ahora igual na tiempo de profeta Ezequiel con quien ya manda si Jehova dale aviso con el maga Israelita de antes. “Si oi tu un palabra estaba conmigo debe tu dale aviso kanila,” ya habla el Dios. Si gendeh se hace si Ezequiel, ele el quien queda responsable na sangre del todo quien muri na Jerusalem na juzgamiento de este. (Ezequiel 33:7-9) Pero nuay queda culpable na sangre si Ezequiel cay obediente le.

²⁷ Cerca ya el fin del entero mundo de Satanas. Poreso, el maga Testigo de Jehova ta mira como un obligacion y privilegio que proclama el “dia de vengganza” del Dios y mensaje acerca el Reino. (Isaias 61:2; Mateo 24:14) Activo ba tu ta suporta con ese importante trabajo? Serioso ya cumpli si apostol Pablo con el trabajo predicacion. Poreso ya puede le habla: “Limpio yo na sangre del todo gente, cay ya habla yo con ustedes y nuay esconde el todo consejo del Dios.” (Maga Actividad 20:26, 27, NW) Un buen ejemplo gayot para imita kita!

²⁸ Siempre para esta kita na amor del diaton Tata si Jehova, gendeh bastante que mira lang kita que sagrao el vida y sangre. Debe tambien kita esta limpio o sagrao na de suyu ojos como cosa kita aprende na siguiente capitulo.