Na todo religión, tiene maga gente serioso na diila adoranza. Un buen noticia gayot que el Dios ta mira y interesao kanila. Pero makatriste que ta usa con el religión para hace mal cosas. (2 Corinto 4:3, 4; 11:13-15) Asegun na maga noticia, tiene maga religión ya participa na terorismo, matanza del un raza, guerra y maltratamiento na maga bata. Ta causa gayot este tristeza para con aquellos sincero ta creé con Dios.—Le con el Mateo 24:3-5, 11, 12.

El verdadero religión ta glorifica con Dios mientras el falso religión gendeh ta hace alegre con ele. Ta enseña este maga ideá que nuay na Biblia, igual como el falso doctrina acerca con Dios y acerca na muerto. Pero si Jehova quierre que el maga gente sabé el verdad acerca con ele.—Le con el Ezequiel 18:4; 1 Timoteo 2:3-5.

Gendeh puede pretende el maga falso religión que ta ama sila con Dios, cay ta puede le mira que el diila amor talli na mundo de Satanas. (Santiago 4:4) El Palabra del Dios ya nombra con el todo falso religión como “El Grande Babilonia.” Un ciudad de antes el Babilonia donde ya principia el falso religión despues el Grande Avenida na tiempo de Noe. El Dios cerca ya destroza con el maga religión que ta engaña y ta abusa na maga gente.​—Le con el Revelacion 17:1, 2, 5, 16, 17; 18:8.

Gendeh lang ese el buen noticia. Si Jehova gendeh ta ulvida con el maga gente sincero que talli entre na maga falso religión na entero mundo. Ta ajunta le kanila por medio na enseñanza del verdad.​—Le con el Juan 6:45.

Precioso para con Jehova aquellos quien ta ama con el verdad y ta hace si cosa el bueno. Ta anima le kanila que deja con el falso religión. El maga gente quien ta ama con Dios preparao cambia para hace alegre con ele.​—Le con el Revelacion 18:4.

Del primer siglo, ya queda alegre el maga gente quien quierre sirvi con Dios cuando ya oi el buen noticia na maga apostoles. Por causa na cosa sila ya aprende con Jehova, ya tiene sila alegre vida con proposito y esperanza. Un buen ejemplo sila para kanaton ahora cay ya ricibi sila el buen noticia y ya hace prioridad na diila vida el relacion con Jehova.​—Le con el 1 Tesalonica 1:8, 9; 2:13.

Si Jehova alegre ricibi con aquellos quien ta deja con el falso religión. Si hace tu se, tu hay queda su amigo y parte del un amable familia que ta sirvi con ele. Puera con ese, tu hay obtene vida eterna.​—Le con el Marcos 10:29, 30; 2 Corinto 6:17, 18.

Cerca ya llega el destrozo del falso religión y este un buen noticia. Nuay mas ya quien hay abusa, engaña y nuay mas división entre na maga gente. Todo hay queda unido na adoranza con el solamente verdadero Dios.​—Le con el Revelacion 18:20, 21; 21:3, 4.