Sin duda, ya queda hondo el de tuyu amor con Jehova por causa na cosa tu ya aprende na este brosyur. Pero necesita tu continua para queda mas hondo ese amor. (1 Pedro 2:2) Si continua tu estudia con el Palabra del Dios, hay queda tu su amigo y obtene tu vida hasta para cuando.​—Le con el Juan 17:3; San Judas 21.

Mientras ta omenta el de tuyu saber acerca con Dios, el de tuyu fe hay queda mas fuerte. El fe hay ayuda contigo para hace alegre con Dios. (Maga Hebreo 11:1, 6) Este hay causá contigo para arripinti y hace maga cambio na de tuyu vida.​—Le con el Maga Actividad 3:19.

Siempre, quierre tambien tu que el otro puede sabe si cosa tu ya aprende​—todo kita con ansias habla si cosa el buen noticia. Mientras ta continua tu estudia el Biblia, puede tu aprende si paquemodo usa con este para explica el de tuyu fe acerca con Jehova y el buen noticia.​—Le con el Roma 10:13-15.

El mayoria, na diila maga amigo y pariente sila una ta habla el buen noticia. Pero debe con cuidao. En vez habla que falso el diila religión, mas bueno si tu hay habla kanila si cosa el maga promesa del Dios. Acorda tambien que mas tiene efecto el de tuyu buen custumbre na otro contra con el cosa tu ta habla.​—Le con el 2 Timoteo 2:24, 25.

El estudio del Biblia hay ayuda contigo para mas conocé con Dios. Gendeh dura, hay tiene tu un especial relacion  con Jehova. Tu hay queda miembro del su familia.​—Le con el 2 Corinto 6:18.

Progresa tu na espiritual si tu hay continua estudia con el Palabra del Dios. (Maga Hebreo 5:13, 14) Puede tu pidi ayuda na maga Testigo de Jehova para estudia el Biblia usando el libro Cosa Kanaton Puede Enseña el Biblia? Mientras ta omenta el de tuyu saber na Palabra del Dios, mas hay tiene alegria el de tuyu vida.​—Le con el Roma 12:2; 1 Timoteo 4:15, 16.

Na Biblia puede incuntra “el glorioso buen noticia del alegre Dios.” (1 Timoteo 1:11 New World Translation) Queda mas fuerte el de tuyu relacion con Dios si hay asocia tu na su maga siervo. (Maga Hebreo 10:24, 25) Si continua tu hace alegre el corazon de Jehova, hay obtene tu el deverasan vida​—el vida eterna. Nuay mas donde puede compara si tu hay queda amigo del Dios.​—Le con el 1 Timoteo 6:19.