Cuando ya llega si Jesus na Betania, un lugar cerca na Jerusalem, cuatro dia ya de muerto el su amigo​—si Lazaro. Si Jesus ya anda na sepultura junto con el maga hermana de Lazaro, si Marta y Maria. Nuay dura, mucho maga gente ya llega. Ta puede ba tu imagina el alegria de Marta y Maria cuando si Jesus ya hace vivi otravez con Lazaro?​—Le con el Juan 11:21-24, 38-44.

Si Marta sabe ya el buen noticia acerca con el maga muerto. Sabe le que si Jehova hay resucita con el maga muerto para vivi otravez aqui na tierra.​—Le con el Juan 11:24.

El maga gente ya salé na polvos del tierra. (1 Corinto 15:47) Nuay kita imortal alma que ta vivi adentro na diaton cuerpo. Maga fisical creatura kita, poreso si muri kita nuay parte del diaton cuerpo hay esta vivo. El diaton utuk hay muri tambien y el diaton pensamiento hay perde. Poreso, nuay cosa ya habla si Lazaro acerca si cosa le ya experiencia durante su muerte, cay el maga muerto no sabe ni nada y nuay mas cosa ta sinti.​—Le con el Salmo 146:4; Eclesiastes 9:5, 6, 10.

El Dios ba ta castiga con el maga gente despues del diila muerte? Ciendo el Biblia ta enseña que el maga muerto no sabe ni nada y nuay mas cosa ta sinti, claro que un falso enseñanza el infierno y ese ta hace malo con Dios. Maskin el  mismo ideá que castiga con el maga gente por medio de fuego, nunca hay queda aceptablé con Dios.​—Le con el Jeremias 7:31.

Mira con el video Cosa el Condicion del Maga Muerto?

El maga muerto gendeh mas ta puede converza, ni oi. (Salmo 115:17) Pero tiene maga mal angél quien ta puede converza con el maga gente y ta pretende sila como el maga gente quien ya muri. (San Judas 6) Si Jehova no quierre que converza kita con el maga muerto.​—Le con el Deuteronomio 18:10, 11.

Millones de maga gente quien ya muri hay vivi otravez aqui na tierra. Maskin aquellos quien nuay puede conocé con Dios y quien ya hace mal cosas hay resucita.​—Le con el Maga Actividad 24:15.

Aquellos con quien resucita hay tiene el oportunidad aprende el verdad acerca con Dios, demonstra el diila fe y obedece con Jesus. (Revelacion 20:11-13) Si sila hace buen cosas, hay obtene sila vida eterna aqui na tierra.​—Le con el Juan 5:28, 29.

El esperanza del maga muerto ya queda posiblé cay el Dios ya imbia con su Anak para muri na bien diaton. Entonces, el resureccion ta enseña kanaton que bueno y amable si Jehova. Si resucita ya maga muerto, con quien gayot tu quierre mira?​—Le con el Juan 3:16; Roma 6:23.