El Reino del Dios amo un gobierno na cielo. Este hay cambia con todo maga gobierno de gente y cumpli con el voluntad del Dios na cielo y aqui na tierra. Este un buen noticia gayot. El Reino del Dios cerca ya queda el clase de buen gobierno que ta necesitá el maga gente. Hay hace este unido con todo viviente aqui na tierra.​—Le con el Daniel 2:44; Mateo 6:9, 10; 24:14.

Siempre, el un reino tiene rey. Si Jehova ya iscuji con su Anak, si Jesucristo, para queda el Rey na Su Reino.​—Le con el Revelacion 11:15.

El Anak del Dios amo el debe queda Rey cay ele bueno y pirmi ta hace si cosa el justo. (Juan 1:14) Tiene tambien ele poder para ayuda con el maga gente cay ele hay rula na cielo para aqui na tierra. Despues con ele resucita, ya subi le na cielo y ya sinta na lao derecha del Dios para espera. (Maga Hebreo 10:12, 13) Na ultimo, si Jehova ya dale con ele el poder para principia rula.​—Le con el Lucas 1:32, 33.

El Dios ya iscuji un diutay grupo de maga gente para rula junto con Jesus na cielo. (Revelacion 5:10) Cuando taqui pa na tierra, si Jesus ya iscuji cuantos maga gente para queda su maga apostoles. Este maga fiel siervo amo el primer parte del diutay grupo con quien ya iscuji para rula na cielo. Hasta ahora, si Jehova ta continua iscuji maga hombre y mujer para queda parte de este grupo. Igual con Jesus, hay resucita  kanila como espiritu persona.​—Le con el Juan 14:1-3; 1 Corinto 15:42-44.

Cuanto maga gente el anda na cielo? Si Jesus ya llama kanila el “diutay grupo.” (Lucas 12:32 New World Translation) Asegun na Biblia, 144,000 sila todo y hay rula sila junto con Jesus para aqui na tierra.​—Le con el Revelacion 14:1.

El Reino del Dios ya principia rula del 1914. * Cosa el una ya hace si Jesus como un Rey? Ya buta le con Satanas junto con el maga demonio para aqui na tierra. Si Satanas ya queda bien rabiao poreso ya trambulica le con el entero mundo. (Revelacion 12:7-10, 12) Desde aquel, mas ya queda gravé el problema del maga gente. El maga guerra, hambre, epidemia y maga temblor amo parte del “señal” que el Reino del Dios cerca ya rula aqui na tierra.​—Le con el Lucas 21:7, 10, 11, 31.

Por medio del predicacion na entero mundo, el Reino del Dios ta ajunta ya un grande grupo de maga gente que ya salé na todo nacion. Ahora, millones ya el ta somete con Jesus. El Reino del Dios hay protege kanila durante el destrozo de este presente mal sistema de las cosas aqui na tierra. Poreso, todo aquellos quien quierre beneficia na este Reino debe aprende queda obediente con Jesus.​—Le con el Revelacion 7:9, 14, 16, 17.

Durante el 1,000 año, el Reino hay cumpli con el originál proposito del Dios para na maga gente. El entero mundo hay queda paraiso. Na ultimo, si Jesus hay entrega el Reino con su Tata. (1 Corinto 15:24-26) Tiene ba tu con quien quierre habla acerca con el Reino del Dios?​—Le con el Salmo 37:10, 11, 29.