El buen noticia que el maga gente hay vivi hasta para cuando aqui na tierra ya escribi na Biblia. (Mateo 5:5) El Biblia tiene 66 diutay maga libro. El Dios ya usa 40 maga fiel gente para escribi con ese. Maga 3,500 año ya pasa desde si Moises ya escribi con el primer cinco libro. Si apostol Juan tambien el quien ya escribi con el ultimo libro mas de 1,900 año ya pasa. De quien ideá el escribido na Biblia? El Dios ya hace pasa el de suyu mensaje na maga escritor por medio del su sagrao espiritu. (2 Samuel 23:2) Sila ya escribi el pensamiento del Dios, gendeh el diila mismo pensamiento. Poreso, el Autor del Biblia amo si Jehova.​—Le con el 2 Timoteo 3:16; 2 Pedro 1:20, 21.

Mira con el video Quien el Autor del Biblia?

Sabe kita que el Biblia estaba con Dios cay este ta habla exacto y detallado si cosa hay pasa na futuro. Nuay gente el quien puede se hace. (Josue 23:14) Solamente el Dios Todo Poderoso el quien sabe si cosa el futuro del maga gente.​—Le con el Tito 1: 2, 3.

Siempre si el Biblia estaba con Dios, este gendeh basta ordinario libro lang. Billones copia del Biblia el ya puede distribui na mas de cien lengguaje. Maskin el Biblia de antes pa, este harmonia na ciencia. Puera con ese, el cosa ya escribi el 40 escritor gendeh contra con el uno y otro. * Mas pa, el Biblia ta revela con el amor del Dios y este puede cambia con el vida del gente. Por causa con este, millones el convincido que Palabra del Dios el Biblia.​—Le con el 1 Tesalonica 2:13.

Mira con el video Porque Kita Puede Asigura que el Biblia Deverasan?

Uno del primer mensaje del Biblia amo el buen noticia que el Dios tiene amable proposito para kanaton. Este ta hace aclara si paquemodo ya perde el oportunidad del gente para vivi hasta para cuando aqui na tierra y si paquemodo queda paraiso otravez el tierra.​—Le con el Revelacion 21:4, 5.

El Palabra del Dios ta contene tambien maga ley, principio y consejo. Puera con ese, escribido na Biblia si paquemodo el Dios ya trata con el maga gente de antes y este ta revela si cosa su maga calidad. Poreso, el Biblia puede ayuda contigo conocé con Dios. Ta discuti este si pakilaya tu queda su amigo.​—Le con el Roma 15:14; Santiago 2:23; 4:8.

Este brosyur puede contigo ayuda entende con el Biblia cay ya sigui este con el manera de Jesus. Cada vez le cita maga texto, ele ta hace claro si cosa este quierre decir “para puede sila entende el maga Escritura.”​—Le con el Lucas 24:27, 45.

Bonito gayot el buen noticia estaba con Dios. Pero el los demas gendeh interesao con este, el otro ta rabia pa gane. No man luya, cay el de tuyu esperanza obtene vida eterna ta depende si tu hay conocé pa mas con Dios.​—Le con el Juan 17:3.