Si Jehova ya crea con el tierra para na maga gente. Este el lugar donde kita ta quedá. Entonces, nuay crea con Adan y Eva, el primer maridable, para quedá na cielo y alla tiene maga anak cay el Dios ya crea maga angél para quedá na cielo. (Job 38:4, 7) El Dios ya pone con el primer hombre na un bien bonito paraiso que ya llama jardin de Eden. (Genesis 2:15-17) Si Jehova ya dale con Adan y con su maga decendiente el oportunidad para vivi hasta para cuando aqui na tierra.​—Le con el Salmo 37:29; 115:16.

Del primero, el jardin de Eden lang el paraiso. Necesita tiene maga anak el primer maridable hasta hinay-hinay hay llena el mundo de gente. Sila hay cultiva con el tierra y hace con este un paraiso. (Genesis 1:28) Nunca hay destroza con el tierra. Este el permanente lugar donde quedá el maga gente.​—Le con el Salmo 104:5.

Mira con el video Porque el Dios Ya Crea con el Tierra?

Si Adan y Eva ya desobedece con Dios, poreso ya manda kanila salé na jardin. El paraiso ya perde y nuay gente el quien ya puede hace vira otravez con este. Asegun na Biblia: “El maga gente malo y maga engañador ay queda mas malo.”​—2 Timoteo 3:13.​—Le con el Genesis 3:23, 24.

Ya abandona ya ba si Jehova con su originál proposito para na maga gente? Nuay! Ele el todo poderoso. Puede gayot le cumpli si cosa le quierre. (Isaias 45:18) El Dios hay cumpli su originál proposito para na maga gente.​—Le con el Salmo 37:11, 34.

El tierra hay queda Paraiso otravez durante el rulanza de Jesus como el iscujido Rey del Dios. Na un guerra que ya llama Armaguedon, si Jesus hay guia con el maga angél del Dios para  destroza con aquellos quien ta anda contra con Dios. Despues, si Jesus hay hace preso con Satanas por 1,000 año. El maga gente del Dios hay salva na destrozo cay si Jesus hay guia y protege kanila. Sila hay tiene vida eterna na Paraiso tierra.​—Le con el Revelacion 20:2; 21:3, 4.

Cuando el Dios hay termina con el maldad aqui na tierra? Si Jesus ya dale “señal” para indica que cerca ya llega el fin. El maga mal cosas que ta sucede ahora na mundo peligroso para na vida del maga gente y este ta dale mira que ta vivi ya kita na “ultimo maga dia.”​—Le con el Lucas 21:7-14; 2 Timoteo 3:1.

Durante el 1,000 año del rulanza de Jesus na cielo para aqui na tierra, ele hay quita el todo sufrimiento. (Isaias 9:6, 7; 11:9) Puera que hay sirvi le como el Rey, si Jesus hay sirvi tambien como un Alto Sacerdote y hay elimina le con el maga pecado de aquellos quien ta ama con Dios. Poreso, por medio de Jesus, el Dios hay quita con el enfermedad, vejez y muerte.​—Le con el Isaias 33:24; Juan 5:28.

El maga gente quien obediente con Dios amo hay quedá na Paraiso. (1 San Juan 2:17) Si Jesus ya manda busca con su maga siguidores con aquellos quien tiene buen corazon y enseña kanila si paquemodo queda aceptablé con Dios. Ahora, si Jehova ta prepara con el millones de gente para tiene vida eterna na Paraiso tierra. (Sofonias 2:3) Na Kingdom Hall del maga Testigo de Jehova, el maga gente ta aprende si paquemodo queda buen marido y tata, y queda buen esposa y nana. El maga anak tan junto con el diila maga mayores na adoranza con Dios, y na ayuda del Biblia sila ta aprende si paquemodo vivi como un familia na mas buen manera.​—Le con el Revelacion 15:4.