El buen noticia estaba con Jehova, el “alegre Dios,” quien quierre que el maga familia queda alegre. (1 Timoteo 1:11 New World Translation) Ele ya origina con el matrimonio. Importante que legál el matrimonio cay ta manda este sinti el amor y alegria na mayores y na maga anak. El maga Cristiano debe sigui con el ley na diila lugar acerca na registracion del matrimonio.​—Le con el Lucas 2:1, 4, 5.

Cosa el matrimonio na vista del Dios? Ele quierre que este un permanente relacion entre un hombre y mujer. Si Jehova quierre que el man maridable leal na uno y otro. (Maga Hebreo 13:4) Ele ta odia con el divurcio. (Malaquias 2:16) Pero ta permiti le con el maga Cristiano que man divurcio o man separtajan y casá otravez si el diila marido o mujer ya comete adulterio.​—Le con el Mateo 19:3-6, 9.

Ya crea si Jehova con el hombre y mujer para man ayudahan na diila matrimonio. (Mateo 19:4, 5) Como el cabeza del familia, el marido debe queda responsable para mantene el materiál necesidad del su familia y enseña kanila acerca con Dios. Necesita le hace una el bien del de suyu mujer. El marido y mujer debe ama y respeta con uno y otro. Ciendo imperfecto el man maridable, debe igual sila sabe perdona para queda alegre el diila matrimonio.​—Le con el Efeso 4:31, 32; 5:22-25, 33; 1 Pedro 3:7.

Si tiene problema el man maridable, debe pricura sila trata con amor na uno y otro. (1 Corinto 13:4, 5) El Palabra  del Dios gendeh ta recomenda que man separtajan el man maridable como el solucion na diila maga problema.​—Le con el 1 Corinto 7:10-13.

Quierre si Jehova que ustedes queda alegre. Ele ta dale buen consejo si paquemodo ustedes tiene alegria mientras joven. Quierre le que hay beneficia ustedes con el saber y experiencia del de ustedes mayores. (Colosa 3:20) Si Jehova quierre tambien que hay experienciá ustedes el alegria mientras ta hace el de suyu voluntad y del su Anak.​—Le con el Mateo 19:13-15; 21:15, 16; Efeso 6:1, 2.

Debe ustedes trabaja para puede dale comida, casa y ropa na de ustedes maga anak. (1 Timoteo 5:8) Pero para queda sila alegre, debe tambien ustedes enseña kanila ama con Dios y aprende acerca con ele. (Efeso 6:4) Debe sila mira que ustedes ta ama con Dios, cay el de ustedes ejemplo grande influencia kanila. Si basé na Biblia el de ustedes instruccion, ese puede gayot ayuda con el de ustedes maga anak.​—Le con el Deuteronomio 6:4-7; Maga Proverbio 22:6.

Bueno el efecto na maga anak si ustedes hay anima y dale comendacion kanila. Necesita tambien kanila corecta y dicipliná. Ese puede protege kanila desde na maga mal conducta que posiblé hay tiene sila. (Maga Proverbio 22:15) Pero, el diciplina gendeh debe por demas y sin lastima.​—Le con el Colosa 3:21.

El maga Testigo de Jehova ya produci maga libro para ayuda na maga mayores y anak. Este maga libro yan basé na Biblia.​—Le con el Salmo 19:7, 11.